Hiaina eo amin’izao tontolo izao sambatra ve ianao indray andro any?
IREO izay maneho fitiavana an’Andriamanitra sy mahaforona ny “olony” dia manana antony tsara tokony hanantenana ny hiaina eo amin’izao tontolo izao sambatra (Romana 15:10). Marina fa ny ho avy akaiky dia toa manjombona aoka izany ho an’ny taranak’olombelona, nefa ilay Andriamanitry ny lanitra dia manao izay hanambarana ny ‘vaovao tsarany be voninahitra’ amin’ny tany manontolo, dia hafatra mampahery raha izany no izy (I Timoty 1:11, MN). Tsy hoe ela izao, ny Fanjakan’i Jesosy Kristy Mesia any an-danitra, Fanjakana nambara hatramin’ny ela be, dia handrodana ireo fironana mandrahona izay miharihary loatra ankehitriny eto an-tany ka hanafoana an’ireo zava-manahirana mamely ny olombelona. Madiva hanorina izao tontolo izao sambatra io Fanjakana io.
Ny fandaharan’ilay Fanjakana
Tokony hampanahy ve ny fihoaran’ny isam-bahoaka eto an-tany? Tsy hoe tsy hahay handamina io zava-manahirana io akory Jehovah Andriamanitra na Jesosy Kristy Mpanjaka. Tamin’ny voalohany, ny fikasan’Andriamanitra dia ny ‘hamenoan’ny olombelona ny tany’ fa tsy ny hanasiany olona mihoapampana eo. Na inona na inona fomba hampiasainy, dia mahazo matoky isika fa, amin’io lafiny io, dia hatao eto an-tany ny sitrapon’Andriamanitra. — Genesisy 1:27, 28; Isaia 45:18.
Eo ambanin’ny Fanjakan’Andriamanitra, hampisaraka foana ny mpanan-karena sy ny mahantra ve ny hantsana mampalahelo? Azo antoka fa tsy izany. Mifanohitra amin’izany, ny Soratra Masina dia manambara fa ilay Mpanjaka be fahamoram-panahy voatendrin’Andriamanitra dia “hamonjy ny mahantra mitaraina”, ary tsy maintsy hanao izany izy. — Salamo 72:1, 12, 13.
Misy antony tokony hampamoifo eo anoloan’ny fihenan’ny fananana sy ny fanjavonan’ireo “foto-javatra ilaina eo amin’ny fiainana ve”? Tokony hitaraina ve isika satria misondrotra be loatra ny vidin-javatra ka tsy takatry ny volan’ny ankamaroan’olona? Na dia tsy misy na inona na inona tena manambara fihatsarana akaiky aza amin’ireo lafiny ireo, ny Baiboly, Tenin’Andriamanitra kosa dia mampanantena toy izao: “Hahavoka-bary betsaka ny tany, na dia any an-tampon’ny tendrombohitra aza.” (Salamo 72:16). Moa ve izany filazalazana tany iray tsy hanam-pananana ka tsy hahitana “foto-javatra ilaina eo amin’ny fiainana ny toerana manodidina eo aminy? Moa ve io fampanantenana ao amin’ny Baiboly io mampahatsiahy tsy fahampian-javatra aoka izany, hany ka hanjary tsy ho azo atao ny hanana fiainana mahafinaritra eto an-tany? Azo antoka fa tsy izany velively.
Eo ambanin’ilay Fanjakana, moa ve izao tontolo izao ‘ho mora voa kokoa, eo anoloan’ny loza aman’antambo araka ny natiora sy eo anoloan’ny fikorontanana avy amin’ny olombelona? Tsia, satria tsy ho ela Andriamanitra dia “hampitsahatra ny ady” ho mandrakizay. Ambonin’izany, eo ambany fitarihan’ilay Fanjakana, dia ho feno voninkazo ny efitra, ary tsy hisy intsony mihitsy ny zava-dratsy hanimba ny fahasalamana sy ny fiainana. Fahasambarana tsy hisy fetra no hampisava ireo fahasahiranana sy ny alahelo. — Jereo Salamo 46:1, 9; Isaia 35:1-10; 65:25.
Zava-baovao eny am-paravodilanitra
Anisan’ireo faminaniana mampahery maro manambara soa mahagaga ho an’ny olombelona ilay nosoratan’ny apostoly Jaona tamin’izao teny izao:
“Ary nahita lanitra vaovao sy tany vaovao aho; fa efa las any lanitra voalohany sy ny tany voalohany, ary ny ranomasina dia tsy misy intsony. Ary nahita aho fa, indro, ny tanàna masina, dia Jerosalema vaovao, nidina avy any an-danitra tamin’Andriamanitra, voaomana tahaka ny ampakarina efa mihaingo hihaona amin’ny vadiny. Ary nahare feo mahery avy teo amin’ny seza fiandrianana aho nanao hoe: Indro, ny tabernakelin’Andriamanitra dia eo amin’ny olona, ary Izy hitoetra eo aminy, ary ireo ho olony, ary Izy hitoetra eo aminy, ary ireo ho olony, ary Andriamanitra no hitoetra eo aminy, dia ho Andriamaniny. Ary hofafany ny ranomaso rehetra amin’ny masony, ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha” — Apokalypsy 21:1-4.
Na dia ara-panoharana indrindra aza ny fitenenana sasany ao amin’ireo andinin-teny ireo, dia tsy afaka ny ho diso hevitra ny tena amin’izao hevitra izao: misy firesahana ny amin’ny soa lehibe. Ny “lanitra vaovao” dia tsy inona fa ny Fanjakan’i Jesosy Kristy sy ireo mpanjaka sady mpisorona lefiny 144 000 any an-danitra (Romana 8:16, 17; Apokalypsy 14:1-4; 20:4). Fa raha ny amin’ny “tany vaovao”, izany dia tsy gilaoby tany vaovao akory fa fitambaran’olona vaovao izay, eto amin’ity planeta ity mihitsy, dia hanaiky tanteraka ny Fanjakan’i Kristy ka tsy hamela mihitsy, fefy ara-pirazanana, ara-pirenena na ara-pitenenana, hampisaraka azy ireo (jereo Salamo 96:1). Izany toe-javatra izany dia hanaraka ny fandravana ny “lanitra” sy ny “tany” ara-panoharana ankehitriny. Ny fitambaran’olona vaovao ho eto an-tany dia ho marina satria, na dia haharitra aza ny ranomasina ara-bakiteny, ny “ranomasina” ara-panoharana kosa, izany hoe ny olona misamboaravoara, mikomy sy ratsy fanahy, dia ho nanjavona. Ireo mpanjaka any an-danitra izay ampiarahina amin’i Kristy dia mahaforona ny “Jerosalema Vaovao”, dia ny fandaminana izay ho renivohitra ho an’ny fitambaran’olona marina. Andriamanitra kosa anefa tsy hanangana ny tranolainy eo amin’ny olona eto an-tany raha tsy amin’ny alalan’ny solontena manelanelana, mandra-pihavin’izy ireo tanteraka aminy amin’ny alalan’i Jesosy Kristy, “Zanak’ondrin’Andriamanitra”, eo amin’ny fahataperan’ny andro fitsarana maharitra arivo taona. — Jaona 1:29, 36; Apokalypsy 20:6.
Eo ambanin’ilay Fanjakana, dia ho maro ny anton-javatra hampiravoravo. Ho nanjavona ny alahelo sy ny fitarainana ary ny fanaintainana mifamatotra amin’ny antony samihafa. Tsy hisy intsony ny fahafatesana izay niely nanomboka tamin’i Adama, lehilahy voalohany, mpanota (Romana 5:12). Miaraka amin’izany, dia ho nanjavona ny antony mahatsiravina miteraka ranomaso maneran-tany. Tsy ho hita intsony ny maty noho ny fahotan’i Adama fa ho toy inona moa ny fifaliana hanatrika fananganana maty, hahita ny taranaky ny lehilahy voalohany hafahana amin’ny vokatry ny fahotany ka hahatsiaro fahasalamana tonga lafatra ho solon’ny loza maro mitambesatra amin’ny olombelona amin’izao andro izao! Amin’izay dia tena ‘ho efa lasa tokoa ny zavatra taloha’.
‘Ny finoana an’izany, hoy angamba ny fihiakan’ny sasany, dia fiheverana ny fanirian’ny tena ho zavatra tena misy!’ Tsy izany anefa no izy. Marina tokoa fa rehefa avy nandinika ny “lanitra vaovao” sy ny “tany vaovao” izay hizara soa lehibe tondraka ho an’ny olombelona ny apostoly Jaona dia izao no teny nanampiny: “Ary hoy Ilay mipetraka eo ambonin’ny seza fiandrianana: Indro, havaoziko ny zavatra rehetra. Ary hoy koa Izy: Soraty; fa mahatoky sy marina ireo teny ireo.” (Apokalypsy 21:5). Eny, rariny tokoa raha hino izany isika.
Marina tokoa àry fa izany dia izao tontolo izao voaova izay manangasanga eny am-paravodilanitra. Ny fahatongavany dia tsy hiankina amin’izay mety ho fanovana ny ‘politikan’olombelona’ hatao hitsimbinana ny olombelona amin’ny fahoriana mihatra aminy ‘noho ny tsy nahaizana nanararaotra ny fotoana mety’. Mifanohitra amin’izany kosa aza fa ireny fampanantenana tsara ao amin’ny Soratra Masina rehetra ireny dia mifamatotra amin’ny fahatanterahan’ny sitrapon’Andriamanitra tsy hay tohaina.
Mety ho ny anao izany fahasambarana izany
Iza no hanararaotra izany soa avy amin’Andriamanitra izany? Iza no hifaly amin’izany loharanom-pahasambarana tsy mety ritra izany? Izay rehetra haniry handray soa amin’ny fomba atolotr’Andriamanitra azy mba hahazoana ny fiainana mandrakizay. Jehovah, ‘Andriamanitra fitiavana’, dia nanao izay hetezan’izany fahatsinjovan-javatra mahatalanjona izany tamin’ny alalan’ny Zanany, Jesosy Kristy. — I Jaona 4:8, 9; Jaona 3:16.
Ny Vavolombelon’i Jehovah dia maniry hampita amin’ny olona tso-po rehetra izany “vaovao tsara” ny amin’ny toe-piainana mahatalanjona izany. Noho izany antony izany no itorian’izy ireo isan-trano toy ny nataon’ireo apostoly sy ny mpianatr’i Jesosy (Asa. 5:42; 20:20). Tsy isalasalana fa ho takatrao fa izy ireny dia mahatsiaro ho voatosika hanambara io hafatra mahafaly momba ilay Fanjakana io amin-jotom-po, ary mahita fahafinaretana amin’izany izy. Tena vaovao tsara marina tokoa izany!
Nefa rehefa avy nandre vaovao mampahery toy izany ianao, inona no hataonao? Afaka manana fiainana sambatra mandrakizay ianao, eo amin’ny tany voaova ho paradisa noho ny Fanjakan’Andriamanitra. Amin’izany anefa dia ilainao ny hahafantatra marina ny Baiboly. Noho izany, raha tsy efa vita izany, nahoana raha manararaotra ny fahafahana atolotra anao mba hiresahana ny Soratra Masina amin’ny Vavolombelon’i Jehovah? Ambaran’i Jesosy fa ny fikatsahana fahalalana marina ny Rainy any an-danitra sy ny tenany dia “fiainana mandrakizay. — Jaona 17:3.
Eny, akaiky dia akaiky ny izao tontolo izao sambatra iray. Dieny izao anefa ianao dia efa manana antony tsara tokony hifaliana. Tsy an’ny ho avy ihany tokoa ny fitahian’Andriamanitra sy ireo antony mitera-pifaliana. Azo atao amin’izao andro ny ‘manompo an’i Jehovah amin’ny fo falifaly’. Ambonin’izany, raha mahazo sitraka amin’Andriamanitra isika, dia tsy isalasalana mihitsy fa ‘afaka mifaly isika amin’ny andro rehetra hiainantsika’. Ho fantatrao ny antony amin’ny famakiana ireo lahatsoratra ao amin’ny pejy fahavalo ka hatramin’ny fahasivy ambin’ny folo.