Fanontanian’ny mpamaky
▪ Ao amin’ny Apokalypsy 20:5 dia izao no vakintsika: “Fa ny sisa amin’ny maty dia tsy mbola velona mandra-pahatapitry ny arivo taona.” Hitranga aloha sa aorian’ny fitsapana farany izany?
Araka ny tokony ho marina, io fanambarana io dia mifandray amin’ny fotoana izay hahatraran’ny olombelona ny fahatanterahana, izany hoe any amin’ny faran’ny arivo taona, nefa alohan’ny hamahana an’i Satana avy ao amin’ny lavaka tsy hita noanoa sy hampiharany ny fitsapana farany amin’ny olombelona.
Ny teny manodidina ny Apokalypsy 20:5 dia mahakasika ireo kristiana voahosotry ny fanahy izay hatsangan’Andriamanitra mba hataony mpiara-mandova amin’i Kristy (Romana 8:17). Izy ireo dia ‘ ho velona ka hiara-manjaka amin’i Kristy mandritra ny arivo taona’. (Apokalypsy 20:4.) Rehefa avy nanambara io hevitra io, nefa talohan’ny niresahana bebe kokoa ny amin’ireo mpanjaka ireo ilay mpanoratra dia nanatsofoka ao amin’ny Apokalypsy 20:5 ity fanamarihana mahakasika ny mponina amin’ny tany ity: “Ny sisa amin’ny maty dia tsy mbola velona mandra-pahatapitry ny arivo taona.”
Ireo olona izay maty tokoa ary hatsangana ety an-tany mandritra ny fanjakana arivo taonan’i Kristy dia mbola tsy ho tanteraka foana. Etsy ankilan’izany, ireo izay ho tafita velona amin’ny adin’Andriamanitra dia tsy hanjary tanteraka eo no ho eo sy tsy hanana ota. Raha araka ny tokony ho izy, raha mitoetra ho mahatoky eo anatrehan’Andriamanitra izy ireo mandritra ny arivo taona, ireny ho tafita velona eto an-tany ireny dia handroso tsikelikely ho amin’ny fahatanterahana. Amin’izany, raha mbola tsy afaka amin’ny ota nolovana ny olona amin’ireo sokajy roa ireo, dia hijanona amin’ny heviny sasany ho “maty” (ary tsy ho velona tanteraka àry izany) eo imason’Andriamanitra. — Lioka 9:60; Efesiana 2:1.
Na natsangana tamin’ny maty izy ireny na tafita velona tamin’ny “fahoriana lehibe” na teraka nandritra ny fanjakana arivo taona, ny fahatsinjovan’ny olombelona ny ho avy dia hamirapiratra tokoa. (Apokalypsy 7:14). Marina tokoa fa raha mijanona ho tsy mivadika amin’Andriamanitra izy ireo ary maniry tokoa handray soa amin’ny avotra naloan’i Kristy, dia tsy hahita intsony ny fahoriana vokatry ny ota sy ny tsy fahatanterahana rehefa ho avy ny faran’ny arivo taona. Amin’izay, ny fahafatesana nolovana tamin’i Adama dia tsy ‘hanjaka’ intsony amin’izy ireo (Romana 5:14). Mifanohitra amin’izany, dia hahatratra ny toetry ny fahatanterahan’olombelona izay nisy an’i Adama sy Eva talohan’ny nanotany izy ireo.
Araka izany àry, rehefa hifarana ireo arivo taona, ireo olona izay hanompo an’Andriamanitra eto an-tany na, amin’ny teny hafa, “ny sisa amin’ny maty”, dia ho ‘tonga amin’ny fiainana tanteraka’. Ho afaka hamerina amim-pandresena amin’ny Rainy taranak’olombelona lavorary i Jesosy (I Korintiana 15:28; Apokalypsy 20:14). Ny Apokalypsy 20:7-10 dia manohy amin’ny filazana fa Satana dia hovahana amin’izay mba hampihatra amin’ny olombelona fisedrana farany. Ireo olona izay hamakivaky io fisedrana io amin’ny fijanonana ho mahatoky eo anatrehan’i Jehovah dia hahafeno ireo fepetra takina mba hahazoana ny fiainana mandrakizay ao amin’ny paradisa.