Ny arivo taona mahatalanjona — efa antomotra

“Ary nahita seza fiandrianana maro aho, ary nisy nipetraka teo amboniny, ary nomena fahefana hitsara izy; ary hitako koa ny fanahin’izay notapahin-doha noho ny filazana an’i Jesosy sy ny tenin’Andriamanitra sy izay rehetra tsy niankohoka teo anoloan’ny bibi-dia na teo anoloan’ny sariny ary tsy nandray ny marika ho eo amin’ny handriny na ho eo amin’ny tànany; ary velona izy ka niara-nanjaka tamin’i Kristy arivo taona.” “Ary hofafan’[Andriamanitra] ny ranomaso rehetra amin’ny mason’[ny olombelona]; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.” — Apokalypsy 20:4; 21:4.

TOY IZANY no nilazan’ny Baiboly mialoha ny amin’ny arivo taona mahatalanjona efa antomotra — ny Fanjakana Arivo taonan’i Jesosy Kristy sy ny fitambaran’olona hiara-manjaka aminy any an-danitra. Angamba ianao hirona hanilika io faminaniana io ho toy ny hevi-dravina sy nofinofy fotsiny. Misy antony maro tokony hiheveranao io Arivo taona io ho toy ny zavatra hisy anefa.

Voalohany aloha, ny fianaranao ny Baiboly dia hampiharihary aminao fa izy io dia miresaka ny amin’ireo enina arivo taona lasa teo amin’ny tantaran’ny olombelona amin’ny fomba mendrika itokiana sy miavaka. Manaraka izany, ny Baiboly dia bokim-paminaniana, ary ny maro be amin’ireo faminaniany dia efa tanteraka tamin’ny antsipirianya. Raha izany àry no izy, nahoana ny Baiboly no tsy ho azo itokiana rehefa manambara ny amin’ny Arivo taonan’ny fanapahan’i Kristy efa antomotra. Mety hanontany tena anefa ianao ny amin’izay lazain’ny Baiboly momba io vanim-potoana io. Inona no hotanterahiny? Ary, zavatra izay tokony hahaliana anao manokana, amin’ny fomba ahoana izany no hahakasika ny fiainanao?

Lova iray very

Ny Baiboly dia mampiseho fa ny Fanjakana Arivo taonan’i Kristy no fomba ampiasainy mba hanomezana lova sarobidy indrindra ho an’ireo ‘zanany’. Lova inona anefa izany? Ary “zanaka” iza? Azo lazaina fa ny lova dia zavatra izay avelan’ny olona iray ho an’ny zanany rehefa maty izy. Rehefa niseho ho tsy nankatò an’Andriamanitra i Adama razambentsika, dia veriny, ho an’ny tenany sy ny taranany rehetra — ny taranak’olombelona manontolo — ny zo hiaina mandrakizay ao amin’ny tany paradisa. Tamin’izany no nampandovan’i Adama ny taranany ny ota sy ny fahafatesana ary ny fahoriana. — Genesisy 3:1-19; Romana 5:12.

Tonga nofo teto an-tany i Jesosy mba hamerenana ho an’ny taranak’olombelona ilay lova verin’i Adama. Nanao izany izy tamin’ny fisehoana ho nahatoky teo anatrehan’i Jehovah Andriamanitra, tamin’ny fanolorana an-tsitrapo ny ainy ho an’ny olombelona. (Jaona 3:16) Tamin’ny fananana fiainana tanteraka sy tsy nisy ota, i Jesosy dia nahazo ny zo ho amin’ny fiainana tanteraka sy mandrakizay ao amin’ny tany paradisa, dia ilay zavatra narian’i Adama mihitsy. I Jesosy anefa dia tsy nampiasa io zo io mihitsy; ary tsy namoy izany koa izy rehefa maty sy nitsangana ho amin’ny fiainana any an-danitra. Azony natao àry ny nampiasa azy io ho toy ny lova sarobidy homena ireo ‘zanany’. — Romana 5:18, 19.

Ny mpandova: ireo ‘zanak’i’ Kristy

Ao amin’ny Isaia 9:6, MN, i Jesosy dia antsoina ara-paminaniana hoe “Ray Mandrakizay”. Tonga Ray Mandrakizain’ny taranak’olombelona voavotra izy, ary afaka ny hanome lova ho an’ireo voavotra, na zanaka natsangany. (Matio 20:28; jereo ny Salamo 37:18, 29). Izany no asehon’izao fampanantenana mazava nomeny izao: “Avia hianareo izay notahin’ny Raiko, mandovà ny fanjakana izay voavoatra ho anareo hatrizay nanorenana izao tontolo izao.” Hoy koa izy: “Sambatra ny malemy fanahy; fa izy no handova ny tany.” — Matio 5:5; 25:34.

Mba hahatonga ny tany ho lova mendrika, anefa, dia tsy maintsy hisy fiovana hatrany am-potony — famerenana ny fahatanterahana! Tsy maintsy tonga tontolo iray hanjakan’ny fiadanana sy ny fifanarahana tanteraka eo amin’ny zavaboarin’Andriamanitra rehetra ny tany. (Isaia 11:6-9). Izay mety ho soritry ny tsy fahatanterahan’olombelona rehetra, anisan’izany ny fahafatesana, dia tsy maintsy kosehina. (1 Korintiana 15:25, 26). Izany dia midika fa ireo maty, izay anisan’ny taranak’olombelona voavotra koa, dia tsy maintsy atsangana amin’ny maty. Amin’izany fomba izany ihany no hahafahan’izy ireo ho tonga mpandova an’i Kristy! — Jaona 5:28, 29.

Araka izany, ny Fanjakana Arivo taonan’i Kristy dia ho vanim-potoana hahafaly izay ‘hamotsorana ny taranak’olombelona amin’ny fanandevozan’ny fahalòvana’ tsikelikely mandra-pahatrarany ny fahatanterahana. (Romana 8:21). Mahaliana fa na dia ireo zavatra vita an-tsoratra tsy ara-pivavahana aza dia manaiky fa izany no zava-kendren’ny arivo taona. Ny Webster’s Ninth New Collegiate Dictionary (rakibolana anglisy, fanontana 1985) dia mamaritra ny “arivo taona” ho toy ny “fe-potoana hisian’ny fahasambarana lehibe na fahatanterahan’olombelona.”

Hihoatra noho ny fanjakan’i Solomona izany

Io arivo taona be voninahitra io dia azo oharina amin’ireo 40 taona nandry fahizay sy nambinina nanjakan’i Solomona Mpanjaka teo amin’ny Isiraely fahizay. (1 Mpanjaka 5:4, 5, 9). Rehefa nitsidika an’i Solomona Mpanjaka ny mpanjakavavin’i Sheba, dia hoy izy: “Marina ny teny efa reko tany amin’ny taniko ny amin’ny teninao sy ny fahendrenao. Kanefa tsy nino ny filazana aho, raha tsy tonga atỳ, ka ny masoko no mahita, kanjo hay! na dia ny antsasany aza tsy voalaza tamiko akory: fa, indro, ny fahendrenao sy ny voninahitrao dia mihoatra lavitra noho izay laza efa reko. Sambatra lahy ny olonao, ary sambatra ireto tandapanao ireto, izay mijanona eto anatrehanao mandra-kariva ka mandre ny fahendrenao!” — 1 Mpanjaka 10:6-8.

Raha nihoatra, eny, maherin’ny avo roa heny, noho izay nantenain’ny mpanjakavavin’i Sheba indrindra ny fiadanana, ny fanambinana ary ny fahendren’ny fanapahana 40 taonan’i Solomona mpanjaka teto an-tany, dia azo antoka fa ny Fanjakana Arivo taonan’i Jesosy Kristy, ilay Solomona Mpanjaka lehibe any an-danitra, dia tsy ho takatry ny fiheveran’olombelona! Araka ny tenin’ny tenan’i Jesosy mihitsy, izy dia “lehibe noho Solomona.” (Matio 12:42.) Na dia manandrana maka sary an-tsaina ny tany misy ny toe-piainana madio, ambinina, mandry fahizay, marina ary sambatra indrindra azonao heverina aza ianao, dia mbola tsy ho afaka ny hahazo an-tsaina akory ny amin’ny tapany kely amin’izay hoentin’ny Fanjakana Arivo taonan’i Kristy.

Hifanandrify amin’ny arivo taona fahatelo ve izany?

Ireo zava-nitranga nanomboka tamin’ny 1914 dia mampiseho fa isika izao dia miaina amin’ny “fifaranan’ny fandehan-javatra.” Nilaza koa i Jesosy fa ilay taranaka mifanitsy amin’ireo zavatra nolazaina mialoha fa hitranga ireo dia “tsy mba ho lany (...) mandra-pahatongan’izany rehetra izany.” Midika àry ve izany fa hifanandrify amin’ny arivo taona fahatelo ny Fanapahana Arivo taonan’i Kristy? — Matio 24:3-21, 34, MN.

Nampitandrina ireo mpianany i Jesosy mba tsy hanombatombana. Hoy izy: “Tsy anareo ny hahalala ny andro na ny fotoana izay efa notendren’ny Ray amin’ny fahefany ihany.” (Asan’ny apostoly 1:7). Ary raha ny amin’ny “andro sy ora” marina hahatanterahan’ireo zavatra hitranga ireo, dia nilaza i Jesosy fa i Jehovah Andriamanitra Rainy ihany no mahalala izany. (Matio 24:36). Araka izany, ny Baiboly dia tsy manohana na iza na iza amin’ireo mpaminany loza na fihetsiketsehana mihamitombo ankehitriny izay manondro ny fipaikan’ny misasakalin’ny Taom-baovao, 1999, ho ny faran’izao tontolo izao.

Kanefa ireo zava-mitranga maneran-tany dia mampiseho mazava fa ny andro farany amin’ity fandehan-javatra maizina sy ratsy ity dia “efa ho lasa” ary “efa mby akaiky kokoa” ny Fanjakana Arivo taonan’i Kristy. (Romana 13:12.) Tsy izao no fotoana hanombatombanana ny amin’ny andro sy ora marina hahatongavan’izany, fa fotoana hahazoana fahalalana ireo fepetra takin’Andriamanitra mba hahatafitana velona kosa. (Jaona 17:3). Amin’izany fomba izany no hahafahanao hahafantatra ny fomba hahatongavana ho anisan’ireo izay hilazan’i Jesosy hoe: “Avia hianareo izay notahin’ny Raiko, mandovà ny fanjakana izay voavoatra ho anareo hatrizay nanorenana izao tontolo izao.” (Matio 25:34). Ny Vavolombelon’i Jehovah dia sady vonona no afaka ny hanampy anao ho tonga anisan’ireo izay hankafy ireo fitahiana hoentin’io Arivo taona mahatalanjona ho avy io.b

[Fanamarihana ambany pejy]

[Teny notsongaina, pejy 6]

“Avia hianareo izay notahin’ny Raiko, mandovà ny fanjakana izay voavoatra ho anareo hatrizay nanorenana izao tontolo izao.”