“Eo anatrehan’ireo mpanjaka”

“Hilaza ny teni-vavolombelonao [fampiomananao, MN] eo anatrehan’ireo mpanjaka aho, ka tsy ho menatra”, izany no hira nataon’ny mpanao salamo nahazo tsindrimandry (Salamo 119:46). Na dia mikasika ny fitondram-panjakana iray any an-danitra aza ny “vaovao tsaran’ny fanjakana”, dia tokony handre ny fampiomanan’Andriamanitra (Matio 24:14, MN). Izany tokoa ve no miseho? Eny tokoa. Ny filazana manaraka avy amin’ny misionera anglisy taloha iray dia manazava ny fomba nandrenesan’ny olom-panjakana iray ireny fampiomanana ireny:

“Indray andro izay, teo amin’ny faramparan’ireo taona 40, dia nitory isan-trano tany amin’ny faritr’i Kent aho. Raha teo am-piresahana tamin’ny lehilahy iray tao an-tranony teny ambanivohitra aho, dia tonga ny mpitsidika iray. Izany dia sir Winston Churchill. Tapaka ny resadresaka nataonay, nefa rehefa voamarik’i sir Winston Churchill Ny Tilikambo Fiambenana dia nidera ahy izy noho ny asa notontosaiko.

“Andro maromaro taty aoriana, raha teny am-pitoriana indray aho, dia nampaneno lakolosy teo am-baravaran’ny trano lehibe iray. Namoha varavarana ahy ny mpitandrin-draharaha iray ka rehefa nambarako taminy ny faniriako hiresaka amin’ny tompon-trano, dia nanontany ahy izy raha fantatro ny toerana nisy ahy. Tsy fantatro mihitsy. ‘Eto Chartwell tranon’i sir Winston Churchill, ianao, hoy izy. Tamin’izay fotoana izay indrindra dia nipoitra sir Churchill. Nahatsiaro ny fihaonanay vao haingana izy ka nanasa ahy handroso. Nanomboka resadresaka fohy izahay, nandray ny boky telo natolotro izy ary nanasa ahy hiverina.

“Tapa-bolana taty aoriana, tamin’ny tolakandro nafana iray, dia niverina nitsidika azy aho ka nampandrosoiny indray. Nanome ranom-boasary makirana kely hosotroiko izy, ary taorian’ny teny vitsivitsy fiarahabana dia hoy izy tamiko: ‘Omeko antsasakadiny ianao mba hanazavana amiko hoe inona ny Fanjakan’Andriamanitra; nefa avy eo dia avelao aho hilaza aminao izay heviny amiko.’ Izany tokoa no nataonay. Nihevitra izy fa ny Fanjakan’Andriamanitra dia ho tafaorina amin’ny alalan’ny olona mpanao politika matahotra an’Andriamanitra, ary aminy, dia tsy ho tonga izy io raha tsy efa mianatra miaina ao anatin‘ny fandriampahalemana ny olombelona. Afaka nanazava taminy izay lazain’ny Baiboly momba ny Fanjakana sy ny fitahiana hoentiny ho an’ny olombelona aho. Sir winston dia nampiseho fisakaizana tokoa ary nilaza izy fa nanaja ny asa tontosaintsika.

“Mampalahelo anefa fa tsy afaka nihaona taminy intsony aho. Tombontsoa lehibe ho ahy izay zatovolahy 17 taona tamin’izay anefa ny nampiasana ahy hanao fanambarana taminy, na dia tamin’iny indray mandeha iny monja aza.”