Ny tena fahafahana tokoa eo ambanin’ilay Fanjakana
“ Izao zavatra ary rehetra izao aza dia hovotsorana amin’ny fahandevozana, dia ny fahalòvana, ho amin’ny fahafahana izay momba ny voninahitr’ireo zanak’Andriamanitra —ROMANA 8:21.
1. Iza no persona tokana afaka hitondra ho an’ny taranak’olombelona ny fahafahana izay ilainy fatratra, ary nahoana?
NY taranak’olombelona dia mila marina tokoa ny hafahana amin’ireo fahoriana mitambesatra aminy hatramin’ny taonjato maro. Nefa ny Tantara dia nampiseho indrindra fa tsy mahay manafa-tena tanteraka ny olona. “Maro ny hevitra ao am-pon’ny olona; fa ny fisainan’i Jehovah no haharitra.” (Ohabolana 19:21). Kanefa, araka ny “fisainany” sy ny fampanantenany, Jehovah dia ‘hamafa ny ranomaso rehetra amin’ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana’. (Apokalypsy 21:4). Endrey izany fahitan-javatra mahafaly aoka izany? Ao anatin’io foto-kevitra io ihany, ny Baiboly dia milazalaza amin’izao teny izao ny tena fahafahana izay homen’i Jehovah ny olombelona: “Izao zavatra ary rehetra izao aza dia hovotsorana amin’ny fahandevozana, dia ny fahalòvana, ho amin’ny fahafahana izay momba ny voninahitr’ireo zanak’Andriamanitra.” — Romana 8:21.
2. Amin’ny alalan’ny fiasana inona no hampitoeran’Andriamanitra io fahafahana io?
2 Jehovah dia hampiorina io fahafahana mahagaga io amin’ny alalan’ny fitondram-panjakana izay noforoniny hitondra ny tany, izany hoe ny Fanjakany any an-danitra. Noho io fiasana io, ny sitrapon’Andriamanitra dia hatao “etỳ an-tany tahaka ny any an-danitra”. (Matio 6:10.) Aoriana kely, io Fanjakana io dia ‘hanorotoro sy handevona ireo fanjakana rehetra ireo [ireo misy amin’izao fotoana izao], fa izy kosa hitoetra mandrakizay”. — Daniela 2:44.
3. Nahoana isika no tsy tokony ho voafitaky ny drafitra izay mety hoforonin’ny olona mba handaminana ireo zava-manahirana eo amin’izao tontolo izao?
3 Araka izany àry, Andriamanitra dia tsy manan-kevitra velively ny hanova izao tontolo izao ratsy; ankoatr’izany dia tsy azo ovana velively izy io. Noho izany, raha misy olona milaza aminao fa noho ny fampiharana ny drafitra toy itsy na iroa, ny olona dia ho afaka handamina ireo zava-manahirana an’izao tontolo izao, dia aza mino azy. Ny Tenin’Andriamanitra, etsy andaniny, dia mampiseho ara-drariny fa ny fanandraman-javatra namohehatra nandritra ny 6 000 taona nanapahan’ny olombelona dia efa lasa lavitra tokoa amin’ny ‘andro farany’. — II Timoty 3:1-5, 13.
Fitondram-panjakana tokana
4. Inona no hoentin’ny fanapahan’ny Fanjakana tokana ho an’ny taranak’olombelona?
4 Eo ambany fanapahan’Andriamanitra dia tsy hisy afa-tsy fitondram-panjakana tokana intsony ho an’ny tany manontolo, dia ilay Fanjakana tarihin’i Jesosy Kristy sy antokon’olom-bitsy mpanompon’Andriamanitra mahatoky hafa avy amin’ny tany izay hanjaka eo anilany. Eritrereto izay rehetra azon’io fitondram-panjakana tokana io, tapahin’ny lalàna sy fotopoto-pitsipik’Andriamanitra, omena ny tany! Ny sisin-tany rehetra manasaratsaraka ireo firenena ankehitriny ka mahatonga azy ireo ho mpifandrafy dia hanjavona. Ho tafaray toy ny fianakaviambe anankiray ny olona, ka ho afaka hifamoivoy eran’ny planeta manontolo tsy misy manakantsakana. Tsy hilaina intsony ny pasipaoro, ny sonia fanamarinana na birao fisavana amin’ny sisin-tany! — Filipiana 2:9, 10; Apokalypsy 14:4; 20:6.
5. Tamin’ny teny ahoana no nanasoritana ny ilàna hanorenana fitondram-panjakana tokana ho an’ny tany manontolo?
5 Ny olona sasany dia nahatakatra hatramin’ny ela be ny ilàna hanorina fitondram-panjakana iray hanerana izao rehetra izao. Tao amin’ny boky iray any Philippines (Bulletin Today), ilay mpanao gazety atao hoe Gwynne Dyer dia nanoratra hoe: “A. Taylor, ny anankiray amin’ireo mpanoratra tantara teo amin’ny androntsika dia nanazava tamiko vao haingana fa, araka ny heviny, ny hany fomba tokana hisorohana ady maneran-tany iray mahatsiravina izay hamongotra ny sivilizasiona dia ny fiforonan’ny empire maneran-tany (...). Na manao ahoana na manao ahoana, dia tsy maintsy mivoaka avy amin’izao tarehin-javatra ankehitriny izao isika, avy amin’izao tontolo izao voazarazara [maherin’ny dimampolo amby zato] ho Fanjakana tompom-piandrianana sy mahaleotena, mirongo fiadiana avokoa ary samy mora tohina raha ny hanaiky fahefana tokana maneran-tany. (...) Ary tsy maintsy atao haingana izany. Ny fahalemena mahonena sy fisaratsarahana raikitampisaky ny Firenena mikambana dia mampahafantatra antsika ny amin’ny lalana sisa tsy maintsy hodiavina (...). Mbola ampiasaina amin’izao fotoana izao ilay fomba fiteny tranainy tamin’ireo taona dimampolo manao hoe: “Izao tontolo izao iray ihany na tsy misy na inona na inona mihitsy.’”
6. Ho fitondram-panjakana hanao ahoana moa ilay Fanjakana?
6 Ary dia hisy izao tontolo izao tokana tokoa eo ambanin’ny fitondram-panjakana tokan’Andriamanitra. Ho toy inona ny fifaliana hanana fitondram-panjakana manerana izao rehetra izao izay hitondra ny vahoakany rehetra amin-katsaram-po, araka ny rariny ary tsy amim-pizahan-tavan’olona! Raha ny momba ny Mpanjakany any an-danitra, Jesosy Kristy, ny faminaniana anankiray ao amin’ny Baiboly dia manambara hoe: “Hotsarainy amin’ny fahamarinana ny malahelo; ary homeny rariny ny mpandefitra amin’ny tany”. (Isaia 11;3, 4). Eny, hiseho ho marina Kristy. Nanome porofon’izany izy fony tetỳ an-tany, satria nilaza ny fahamarinana izy ary nanala sarona ireo mpihatsaravelatsihy. Niaro ireo nampahorina izy. Tsy nitady sitraka manokana tamin’ireo mpanan-karena sy nanan-kery izy, nefa kosa tsy nanorina fanavakavahana ho fanoherana azy ireo. Araka izany, noho io mpitondra mahay sy voasedra io izay hiasa eo ambany fitarihan’i Jehovah, ‘ny fahamarinana dia hitsimoka amin’ny tany, ary ny rariny hitsinjo eny an-danitra’. — Salamo 85:11, 12.
Ny tena fiadanana sy fanambinana
7. Inona moa no ho efa nataon’ireo izay harovan’Andriamanitra sy hampidiriny ao amin’ny fandaharan-javany vaovao?
7 Hahafinaritra loatra izany hoe tsy hahita ny fisaratsarahana tsy misaraka amin’ny fanapahan’olombelona, ny tafiny goavana ary ireo adiny tsy misy farany! Tsy holanilanina foana intsony ireo haren’ny tany mba handravana. Mifanohitra amin’izany kosa fa hampiasaina ho fikendrena zavatra mitondra fandriampahalemana sy manorina izany. Marina tokoa fa izay rehetra hotsimbinin’Andriamanitra amin’ny famaranana tsy ho ela izao fandehan-javatra ankehitriny izao dia ho efa nahatanteraka ny faminanian’i Mika 4:3, toy izao: “Hanefy ny sabany ho fangady ireny ary ny lefony ho fanetezam-boaloboka; ny firenena tsy hanainga sabatra hifamely na hianatra ady intsony.” Amin’ireo firenena eto ambonin’ny tany, iza no mahatanteraka dieny ankehitriny io faminaniana io? Araka izay asehon’ny tantara ankehitriny dia ny Vavolombelon’i Jehovah izany. Ny fisian’izy ireo mihitsy dia manaporofo fa ny fiadanana maneran-tany dia hanjaka marina tokoa eo ambanin’ny Fanjakan’Andriamanitra, satria efa tena misy hatramin’izao izy io eo amin’izy ireo.
8, 9. Hatraiza no hahitana ny fiadanana sy ny fanambinana ao ambanin’ny Fanjakan’Andriamanitra?
8 Ao amin’ny fandaharan-javatra vaovao nampanantenain’Andriamanitra, ny fiadanana dia hitatra hatrany amin’ny faran’ny tany. Ny Isaia 32:17, 18 dia milaza ‘ny amin’ny “fiadanana sy fahatokiana mandrakizay”, ary manampy hoe: “Ny oloko hitoetra ao amin’ny fonenana mandry fahizay sy ao amin’ny fitoerana mahatoky ary ao amin’ny fialan-tsasatra feno fiadanam-po.” Hahafinaritra àry izany hoe hahatsiaro tsy fananana ahiahy ka tsy hila intsony hanidy varavarana! Hevero ange: Ho afaka hitsangantsangana na aiza na aiza ianao, na amin’ny firy na amin’ny firy antoandro na alina, tsy hatahotra ny famelezana na ny fisavihana. Takatra àry ny anambaran’ny Baiboly hoe: “Hiravoravo amin’ny haben’ny fiadanana” tokoa izy ireo. — Salamo 37:11.
9 Ny fanambinana dia hifanindran-dalana amin’ny fiadanana. Tsy ho hita intsony ny olona an-tapitrisany maro matin‘ny tsy fahampian-tsakafo isan-taona, toy ny amin’izao fotoana izao. Raha afaka nanome sakafo olona an’arivony maro Jesosy fahiny tamin’ny fampitomboana tamin’ny fomba mahagaga mofo vitsivitsy sy hazandrano vitsivitsy monja, dia tsy isalasalana velively fa eo ambany fitondram-panjakany, ny olombelona dia hahita ny fahatanterahan’ny Salamo 72:16, izay amakiantsika toy izao: “Hahavoka-bary betsaka ny tany, na dia any an-tampon’ny tendrombohitra aza”. Ankoatr’izany, koa satria ny Fanjakan’Andriamanitra hanafoana izay rehetra fefy ara-politika, ny fitiavan-karena fatratra ara-barotra sy ireo firobarobana vokatry ny tondraka ho an’ny rehetra. Tsy ho anjaran’ny olom-bitsy intsony ny fanambinana. Ny fahatsiarovana mahatsiravina ireny ankizy mahia taolam-potsiny sy be kibo noho ny hanoanana ireny dia hanjavona mandrakizay.
Asa mahasoa sy mahafinaritra
10. Ao amin’ny fandaharan-javatra vaovao, amin’ny ahoana moa no haha-samy hafa ny asa amin’izay misy ankehitriny?
10 Amin’izao fotoana izao dia maro be ny olona miferinaina noho ny karazana asa tsy maintsy ataon’izy ireny mba hivelomana. An-tapitrisany maro hafa no mitovy fihetseham-po amin’izany satria tsy manana asa. Mifanohitra amin’izany, ao amin’ny fandaharan-javatra vaovao nampanantenain’Andriamanitra, ny olombelona dia hahita fahafinaretana be dia be amin’ny asany. Ankoatr’izany, dia tsy mety ho tojo intsony fahitana ny fiezahany ho foana noho ireo faharatsian’ny toe-karena, ny loza na ny ady izy ireo. “Hanao trano ny olona ka hitoetra ao; ary hanao tanimboaloboka ny olona ka hihinana ny vokatra aminy. Tsy hanao trano hitoeran’olon-kafa izy, na hamboly zavatra hohanin’olon-kafa. (...) Ireo voafidiko dia hanaram-po amin’ny asan’ny tanany. Tsy hisasatra foana izy.” — Isaia 65:21-23.
11. Inona no hataon’ireo vahoakan’ny Fanjakan’Andriamanitra ho an’ny tany sy ny fiainana entiny?
11 Amin’ny toe-javatra hiasana hampientana toy izany, ary noho ny fitiavany amim-pahatsorana ny namany, ireo vahoakan’ilay Fanjakana dia hanatanteraka, ho fanomezana endrika ny tany sy ho fanatsarana ny fiainana entiny, asa mbola mampitolagaga lavitra noho ireo zava-bita rehetra teo amin’izao tontolo izao ankehitriny. Izany no antony nahafahan’i Jesosy niresaka mialoha ny amin’ny Paradisa (Lioka 23:43, MN). Tetsy ankilan’izany dia nanambara Isaia hoe: “Aoka ho ravoravo ny efitra sy ny tany karankaina! Aoka ny tanihay hifaly sy hamony tahaka ny lilia. (...) Ny Tompo nanome azy ny voninahitry ny tendrombohitr’i Libanona, ny famirapiratry ny tendron’i Karmela sy ny lemak’i Sarôna. (...) Hisy rano hiboiboika any an’efitra, hisy renirano hisononoka any amin’ny tany karankaina. Ny fasika mandoro dia hiova ho farihy, ary ny tany mangetana ho loharano miboiboika (...). Fifaliana mandrakizay no hanazava ny endriny. Faharavoravoana lehibe no hanenika azy ireo fa ho efa nanjavona kosa ny alahelo sy ny fisentoana.” — Isaia 35:1, 2, 6, 7, 10, Bible en fran<u481>ais courant.
Faran’ny aretina sy ny fahafatesana
12. Ahoana no nanaovan’i Jesosy izay hahazoantsika an-tsaina ny fandaharam-panasitranana lehibe izay hotarihiny ao amin’ilay Fanjakana?
12 Nefa dia ho fatiantoka aoka izany ny hamoizana izany rehetra izany noho ny aretina, ny fahanterana ary ny fahafatesana. Soa ihany fa amin’ny alalan’ny Fanjakany, Andriamanitra dia hanatanteraka izay tsy hain’ireo mpitsabo sy manam-pahaizana atao. Marina tokoa fa izy no namorona ny vatana, ny saina ary ny fihetseham-pon’ny olombelona. Fantany izay ilain’io mba hahitana ny fahafinaretana sy ny fahatanterahana. Nandritra ny fandalovany tetỳ an-tany Jesosy dia nampiseho ny fahefany hahay hanasitrana izay noraisiny avy tamin’Andriamanitra, ary dia mbola hampiasa izany izy ao amin’ny fandaharan-javatra vaovao. “Ary nisy vahoaka betsaka nankeo aminy nitondra ny nandringa, ny jamba, ny moana, ny kilemaina, ary ny maro hafa koa, ka nametraka azy teo akaikin’ny tongotr’i Jesosy; dia nahasitrana azy Izy; ka dia talanjona ny vahoaka, raha nahita ny moana miteny, ny kilemaina sitrana, ny mandringa afaka, ary ny jamba mahiratra.” (Matio 15:30, 31). Ary ambonin’izany, rehefa hasandratr’Andriamanitra ho amin’ny fahalavorariana ny taranak’olombelona, ‘ny fahafatesana dia ho foana mandrakizay’. (Isaia 25:8.) Ankoatr’izany, Jehovah dia hanitatra koa ny fitiavany amin’ireo izay maty hatry ny ela be, satria hanome azy ireo ny fahafahana hiaina ao amin’ny fandehan-javatra vaovao ampanantenain’Andriamanitra noho ny fitsanganana amin’ny maty. Ny fifaliana tsy mitsahatra ny mihavao izay hanaraka ny fiverenan’ireo maty tsy hita isa ho amin’ny fiainana dia hampahatsiahy izay tsapa tamin’ilay andro nananganan’i Jesosy zazavavikely iray. Ireo vavolombelona nahita maso io zava-niseho io tokoa dia “talanjona indrindra”. — Marka 5:41, 42; Jaona 5:28, 29.
13. Asa inona avy no ho azon’ny olona atao ao amin’ny fandaharan-javatra vaovao?
13 Andramo alaina sary an-tsaina izay mety ho azonao atao amin’ny vatana sy ny saina lavorary ao amin’ny fandaharan-javatra marina miavaka noho ny fiadanana sy ny fanambinana, nefa tsy ho faty mandrakizay. Eritrereto ireny nofinofy rehetra ireny izay tsy azonao notanterahina noho ny fisian’ny fotoana na ny vola. Hevero ny fahafinaretana mahita sy mankafỳ ny fahalehibeazan’ny tendrombohitra, ny fanginan’ny ala, ny famirapiratry ny saha sy ny zaridaina rakotry ny voninkazo, ny zava-mahatalanjona eo amin’ny antokon’ny biby, ny fanjelajelatry ny renirano sy ny farihy afaka amin’ny fandotoana, ary ny sakafo matsiron’ireo firenena isan-karazany. Eritrereto ny talenta ho azon’ireo lehilahy sy vehivavy ambolena amin’ny lafiny isan-karazany aoka izany toy ny fanaovana taozavatra, ny fahaizana manao mari-trano, ny fandaminana ny tany tsinjo manodidina, ny fandravahana, ny zava-kanto ary ny mozika. Tsy misy aloky ny fisalasalana fa ireo toe-javatra ireo dia hanandratra ny taranak’olombelona ho amin’ny tampony vaovao raha ny momba ny fampisehoan-kevitra sy ny hatsaran-tarehy. Hevero koa ny fahalalana mety ho azonao momba an’i Jehovah, Izay hahatonga izany rehetra izany hety. Ambonin’izany, ny fahitana izao rehetra izao tsy hita refy izay noforoniny, ny vahin-danitra eo aminy, ny kintany sy ny planetany, dia hiharihary koa fa hahatalanjona. Amin’izany no ho marina fa “izao zavatra ary rehetra izao aza dia hovotsorana amin’ny fahandevozana, dia ny fahalòvana, ho amin’ny fahafahana izay momba ny voninahitr’ireo zanak’Andriamanitra”. — Romana 8:21.
Ekeo ny fahamarinana
14. Nahoana isika no afaka mitoky tanteraka amin’ireo fampanantenan’i Jehovah rehetra?
14 Azo atao marina ve ny mino ireo fampanantenan’Andriamanitra rehetra ireo? Izany tokoa. Azonao atao ny mitovy fihetseham-po amin’i Josoa izay nanambara hoe: “Fantatrareo ao amin’ny fonareo rehetra sy ny fanahinareo rehetra fa tsy misy latsaka na dia zavatra iray akory aza ny zava-tsoa rehetra izay nilazan’i Jehovah Andriamanitrareo anareo; efa tanteraka taminareo avokoa izy rehetra: tsy nisy latsaka izy na dia zavatra iray akory aza.” (Josoa 23:14). Eny, azonao atao ny mitoky amin’ireo fampanantenan’Andriamanitra satria marina izy ireo ary ho tanteraka tsy misy diso. — Isaia 46:9-11.
15. Fihetsika mampiavaka izao tontolo izao ankehitriny inona no arian’ny mpanompon’Andriamanitra?
15 Araka izany, ny Baiboly dia mampiseho tsy misy isalasalana fa misy marina tokoa ny fahamarinana ary hazavainy hoe inona izany, aiza no ahitana azy, ary iza no manana azy. Ny fanontaniana tena lehibe indrindra mipetraka amintsika tsirairay avy àry dia ity manaraka ity: Mitady tokoa ny fahamarinana ve isika? “Nefa hoy angamba ianao hoe, tsy izany ve no irin’ny ankamaroan’ny olona ho hita?” Tsy izany mihitsy, satria Jesosy dia nilaza fa ny lalan’ny fiainana mandrakizay dia tery ary vitsy no mandeha amin’izany (Matio 7:13, 14). Amin’izao fotoana izao, ny ankabeazan’ny olona dia manaraka ny hevitra voalazalaza ao amin’ny Joba 21:14-16 amin’izao teny izao: “Kanefa anie ireo no manao amin’Andriamanitra hoe: Mialà aminay! Fa tsy mba irinay ny hahalala ny làlanao. Zinona izay Tsitoha, no hotompoinay? Ary inona no soa ho azonay, raha mivavaka aminy?” Nefa tetsy andanin’izany, Joba dia nanampy hoe: “Ho lavitra ahy anie ny fisainan’ny ratsy fanahy!” Marina tokoa fa ny fomba fihevitr’izy ireo dia tsy mifototra amin’ny fahamarinana, fa amin’ny laingan’i Satana, izay milaza fa tombontsoa ho an’ny olombelona ny hanjary tsy hiankina amin’Andriamanitra.
16. Nahoana moa isika no afaka matoky fa izay rehetra maniry amim-pahatsorana hahafantatra ny fahamarinana dia hahita izany amin’ny farany?
16 Izay maniry amim-pahatsorana hahita ny fahamarinana ary mivavaka amin’Andriamanitra mba hanampy azy amin’izany dia hotarihina ho amin’izany tsy amim-piovaovana. Marina hatrany izany na aiza na aiza toerana onenany na tarehin-javatra misy azy. Nahoana? Satria na dia nanankina tamin’ireo mpanompony mahatoky éty an-tany ny fitoriana ity vaovao tsaran’ny Fanjakana ity aza Jehovah alohan’ny hahatongavan’ny farany, ny asa fitadiavana ireo sakaizan’ny fahamarinana dia tsy asan’olombelona tsotra fotsiny. Jesosy Kristy, ilay Mpanjaka any an-danitra, sy ireo tafiny mahery ara-panahy dia manohana tokoa ny hafatra izay ambara amin-kery bebe kokoa hatrany manerana ny tany. — Matio 25:31, 32; Apokalypsy 14:6, 7.
17. Inona no tokony hataon’izay maniry marina hahita ny fahamarinana?
17 Ankehitriny dia fandehan-javatra iray manontolo no madiva hanjavona. Raha mitady amim-pahatsorana ny fahamarinana ianao ary maniry marina ny ho velona, dia tsy maintsy asehonao an’Andriamanitra sy ny olona izany. Miezaha àry mandray ny fahalalana marina ny Tenin’Andriamanitra. Mivoria miaraka amin’ireo mpanompony. ‘Manohiza aloha mikatsaka ny fanjakany sy ny fahamarinany’. — Matio 6:33; Jaona 17:3; Hebreo 10:24, 25.
18. Inona no soa azon’ireo miaina ny fahamarinana sahady dieny izao?
18 Amin’ny fanaovana izany dia hahazo soa betsaka dieny izao ianao. Ireo izay mianatra ny fahamarinana ka mitana izany dia mahazo fahafahana lehibe ara-tsaina sy ara-pihetseham-po. Marina tokoa fa fantatr’izy ireo ny antony maha-sarotra aoka izany ny andro ankehitriny, ary tsy hoe tsy fantatr’izy ireo izay tehirizin’ny ho avy ho azy ireo. Afaka ihany koa izy amin’ny fomba fiaina tsinontsinon’ireo olona eo amin’izao tontolo izao izay tsy mikatsaka afa-tsy ny harena hita maso, nefa hamoy ny zavatra rehetra amin’ny fifaranan’ity fandehan-javatra ity (I Jaona 2:15-17). Ankoatr’izany dia mahatsiaro fanamaivanan lalina izy ireo afaka tamin’ny fahadisoan-kevitra teo amin’ny lafiny ara-pivavahana.
19. Inona no hataonao raha tia marina ny fahamarinana ianao?
19 Mahatsapa marina fitiavana ny fahamarinana ve ianao? Raha izany no izy dia ho tianao ilay Andriamanitry ny fahamarinana. Ho tianao ireo fahamarinana kanto tiany hambara amintsika momba ny Fanjakany. Ho tianao ny fandaminany hita maso izay voaforon’ny olona nangonin’Andriamanitra ho tafita velona (Isaia 2:2-4). Ary tsy hisy na inona na inona, tsia, na inona na inona any an-danitra na etỳ an-tany hahasakana anao tsy hanompo amim-pahatokiana an’ilay Andriamanitry ny fahamarinana izay afaka manafaka anao. — Jaona 8:31, 32.
Ho hainao ve ny hamaly?
□ Ahoana no hanomezan’i Jehovah ny tena fahafahana ho an’ny taranak’olombelona?
□ Midika inona ho an’ny olombelona ny fisian’ny fitondram-panjakana tokana?
□ Inona no porofo velona manamarina fa hanjaka marina tokoa ny fiadanana eo ambanin’ilay Fanjakana?
□ Inona no fifanoherana azo lazaina amin’ny asa eo amin’izao tontolo izao ankehitriny sy izay hatao ao amin’ny fandaharan-javatra vaovao?
□ Nahoana no azontsika antoka fa ireo izay mitady amim-pahatsorana ny fahamarinana dia hotarihina ho amin’izany?
[Sary, pejy 17]
Ireo ho tafita velona amin’ny faran’ity fandehan-javatra ity dia ho efa ‘nanefy ny sabany ho fangady’.
[Sary, pejy 19]
Ao amin’ny fandehan-javatra vaovao nampanantenain’Andriamanitra, ny olona dia hahita fahafinaretana amin’ny asa mampientana izay hataony ao anatin’ny toe-piainana hahafinaritra.