Tanora kristiana nahatoky anankiroa maty maritiora ho an’ny Fanjakan’Andriamanitra
INDRAY marainan’ny volana oktobra tamin’ny valo ora sy sasany tamin’izay. Nilalao teo anoloan’ny tranony i Elmer, 16 taona, sy Alex, 14 taona. Tany San Salvador, renivohitr’i Salvador, tany voarotidrotiky ny herisetra no niseho ny tantara. Tsitapitapitr’izay, dia indro tonga teo amin’ilay toerana ny lehilahy dimy mirongo fiadiana, mitaingina kamiao kely fotsy. Nidina ny roa tamin’izy ireo ary nandidy an’ireo zazalahy hiakatra tao anatin’ilay fiarakodia, izay lasa nanjavona raha mbola tsy nanampo na inona inona iny ny sisa amin’ilay fianakaviana.
Rehefa nahafantatra izay nitranga ny ray aman-drenin’izy ireo dia nampandre ireo loholona ao amin’ny kongregasionan’ny Vavolombelon’i Jehovah nisy azy, ary nanomboka, saiky tao anatin’ny fahaverezan-kevitra ny fikarohana. Efa hatramin’ny fotoana ela no fanaon’ireo mpanao politika mirehitra ao Salvador isan’andro ny fampahoriana ratsy indrindra, hany ka nanahy mafy ny hitrangan’ny loza faran’izay ratsy i Napoléon sy Orbe ray aman-dreniny. Rehefa nilazana ny toe-javatra ireo manam-pahefana dia nandray anjara tamin’ny fikarohana koa.
Ny ampitson’iny dia nilaza tamin’ny iray tamin’ireo loholona ny lehilahy nitondra tranovorona ho an’ny fiantohan-draharaharam-pandevenana malaza tao amin’ilay faritany fa hitan’izy ireo tao anatin’ny lavaka iombonana efa iampatramparan’ny fatin’ireo olona tratran’ny herisetra hafa ny sisa tavela tamin’ireo zazalahy tanora roa. Marina tokoa fa vao avy nahita ny vatan’i Elmer sy Alex, voaloadoaky ny bala izy ireo. Nisy famantarana sasantsasany nanaporofo fa nampijalina izy ireo talohan’ny namonoana azy. Noheverina fa nanandrana nandresy lahatra azy ireo hiandany aminy mba hanohitra ny fitondram-panjakana eo an-toerana ny iray tamin’ireo antoko mpanakorontana tao amin’ilay tany. Kanefa, amin’ny maha-Vavolombelon’i Jehovah ireto tanorantsika, dia tsy afaka nanaiky ny fangatahan’izy ireo izy, tamin’ny tsy fivadihana tamin’ny fialanalanany kristiana. Ny zavatra rehetra dia nahatonga hino fa noho izany antony izany no namonoana azy. Vao avy nanatevina ny laharan’ireo mpanompo mahatoky kristiana voaheloka ho faty noho ny fandavany tsy hanao politika izy ireo. Eny, naleony nanaiky an’Andriamanitra mihoatra noho ny olona.—Jaona 17:16; 18:36; Asan’ny apostoly 5:29.
Toy izany, nanomboka tamin’iny andro iny, no nahatonga ny fianakaviana Lopez izay nahitana olona dimy hanjary telo. Zava-nidona nahatsiravina izany ho an’ny ray aman-dreny. Koa satria nilaza izany indrindra izy, dia nahazo fampaherezana sy fanampiana avy tany amin’ireo rahalahiny kristiana ao amin’ny sampan’ny Vavolombelon’i Jehovah ao Salvador sy avy tany amin’ny kongregasiona misy azy ihany koa. Vao haingana izy ireo no nanoratra taratasy fisaorana izay tianay ny hampahafantatra azy amin’ny mpamaky ny gazetinay.
Ireo hery mampionona entin’ny fampanantenan’Andriamanitra
“Raiso avy amin’ny vadiko Orbe, ny zanako vavy Reyna Noémi sy izaho ny fankasitrahanay lehibe noho ny fampaherezana sy ny fampiononana natolotrareo ho anay rehefa nila mafy izany izahay. Velom-pankasitrahana lalina an’i Jehovah Rainay izahay noho ny nanomezany anay tamin’ny alalan’ny Soratra Masina ny hery ilaina mba hahazakana ny loza nihatra taminay ny 27 oktobra lasa teo. Sahala amin’ny maha-sarotra ny hanadinoanay an’ireo zanakay malalanay Elmer sy Alex no tsy ahafahanay manadino ihany koa ny fitiavana nasehonareo taminay tamin’iny fotoana iny.
“Mazava ho azy fa mbola ory dia ory foana noho ny namoizana ireo zanakalahinay izahay. Kanefa ankehitriny, vao mainka takatray fa tena ilaintsika ny fandaharan-javatra vaovao. Rehefa avy nahita akaiky izay mety ho vitan’izao fandehan-javatra ratsy ankehitriny izao izahay dia vao mainka nahatakatra bebe kokoa ny ilàna ny Fanjakan’Andriamanitra.
“Eny, ry rahalahy malala, mbola manisy vidiny bebe kokoa hatrany an’izany fampanantenana izany izahay ary misaotra an’i Jehovah noho ny nanomezany anay fampanantenana tsy mba hevi-dravina fa mifototra kosa amin’ny fitondram-panjakana marina sy tena misy iray.
“Nilaza tamiko tamim-pitiavana toy izao ny rahalahy iray: “Tsy ho hainareo hadinoina na oviana na oviana i Elmer sy Alex. Ny hany fanafody ho an’ny fahorianareo dia ny fampahafantarana amin’ny hafa ny fanantenanareo. Miresaha ny amin’ny Fanjakan’Andriamanitra matetika araka izay azo atao isaky ny manana fahafahana hanao izany ianareo.” Endrey izany fahamarinan’ny teniny! Ny hariva dia mifanakalo hevitra ny amin’izany matetika amin’ireo mpifanila trano aminay izahay ary manatanjaka anay izany. I Orbe vadiko dia afaka nanome fanambarana tamin’ireo “olo-manan-kaja” naniry hahafantatra ny momba ny finoanay. Indray andro, ohatra, ny dokotera iray dia nanontany azy hoe: ‘Manana finoana ve ianao?’ Rehefa namaly azy hoe eny izy, dia hoy izy taminy: ‘Hazavao amiko àry ny amin’izany.’ Nihaino azy tamim-pitandremana fatratra nandritra ny ora iray izy na dia tao aza ireo marary niandry azy mba hozahany. Natolotr’i Orbe azy ny boky Ny fahamarinana izay mitarika ho amin’ny fiainana mandrakizay ary noraisiny an-tsitrapo izany.
“Indray andro koa ny tale ambony indrindra ao amin’ny tranombarotra iasako dia nampiantso ahy ary nilaza tamiko hoe: ‘Naniry hahita anao aho, ry Napoléon, mba hametraka fanontaniana iray aminao. Mino ve ianao fa efa manakaiky ny fiafarany izao tontolo izao? Io lehilahy io dia pretra tao amin’ny Eglizy katolika saingy niala tamin’ny raharahany. Rehefa nohazavaiko taminy fa ny Soratra Masina dia manome antony tsara ho antsika iheverana fa miaina amin’ny andro farany ho an’ny fandehan-javatra ratsy isika, dia namaly izy fa misalasala ny amin’ny fahamarinan’ny Baiboly. Manaraka izany, rehefa noresahiko taminy ny fandaminan’ny Vavolombelon’i Jehovah, dia nasehony fa gaga izy nahafantatra fa tsy anisan’ny fihetsiketsehana evanjelika isika. Tamin’izay indrindra aho no nanazava taminy fa tsy mba mino ireo fitompoan-teny fantatra ara-pivavahana isika. Niriny ny hanomezako ohatra iray. ‘Araka izany, hoy aho taminy, izahay dia tsy mino fa renin’Andriamanitra i Maria.’ ‘Ahoana hoe, hoy ny fihiakany, tsy mino ve ianareo fa Andriamanitra i Jesosy ary noho izany dia renin’Andriamanitra i Maria?’ ‘Tsia, hoy ny navaliko azy, satria izany fampianarana izany dia tsy mifototra amin’ny Baiboly.’ Talanjona izy ka tafatsangana ary niteny tamiko hoe: ‘Aiza no misy ny toerana fivorianareo? Omeo ahy ny adiresy fa maniry hanatrika izany aho?’ ‘Fa nahoana?’, hoy aho nanontany azy. Nohazavainy tamiko àry fa nandritra ny nivahiniany tany amin’ny seminera dia tsy mbola tonga tamin’ny finoana izany fampianarana izany na oviana na oviana izy, nefa kosa dia niafara tamin’ny fanatsoahan-kevitra fa ny fivavahana rehetra dia nanao izany ho anisan’ny finoana. Tsy nanampo velively ny hahita pretra iray tsy mino ny trinite aho!
“Eny, ry rahalahiko, amin’izao fotoana izao mihoatra noho ny tamin’ny lasa rehetra, izahay dia mangataka amin’i Jehovah ‘mba ho tonga ny fanjakany’ hamarana ny faharatsiana rehetra. Marina tokoa fa tsy mbola tena mionona tanteraka izahay. Isan’andro izahay dia mieritreritra foana ireo zanakay lahy, ary indraindray dia toa miaina ao anatin’ny nofy ratsy mampahatahotra. Kanefa dia sambatra aoka izany izahay mahalala fa manampy anay i Jehovah. Eny, tsapanay ny hatsaram-pony miasa ao anatin’ny kongregasiona. Ary endrey izany fankasitrahanay azy noho ny fampanantenany manome toky anay fa noho Kristy, ireo matory ao amin’ny fahafatesana dia HO VELONA INDRAY (Asan’ny apostoly 24:15)! Ho fifaliana toy inona moa rehefa ho tafaverina ireo zanakay lahy ny hitantara amin’izy ireo hoe tamin’ny ahoana ny ‘fahalasanan’izy ireo’ no namela anay hiresaka ny Fanjakan’Andriamanitra tamin’ny olona izay tsy nety ho tratranay tamin’ny fomba hafa na oviana na oviana!
“Na dia mahatsiaro tena indraindray fa itambesaran’ny fahoriana aza izahay ka mavesatra aminay ny tsy maha-eo ny zanakay, dia misaotra an’i Jehovah isan’andro izahay noho ny nanomezany anay ny fahalalana ny fahamarinana, noho ny nanehoany hatsaram-po be dia be taminay sy ny nanolorany anay rahalahy sy namana toa anareo izay nanampy anay tamin’ireny fotoam-pahoriana ireny.
“Misaotra be dia be,
Napoleón sy Orbelina López”
Ry tanora Vavolombelona, aoka ianareo rehetra hanatanjaka ny finoanareo amin’ny fianarana ny Tenin’Andriamanitra toa an’i Elmer sy Alex, “mba hahafahana hitoetra tsy hivadika” na inona na inona fitsapana mety hitranga.—Efesianina 6:11; MN; 1 Petera 5:8-10.