Jesosy, ny fiainany sy ny fanompoany

Teraka ilay mpialoha lalana

TONGA teo am-pifaranan’ny naha-bevohoka azy i Elizabeta. Nandritra ny telo volana, dia nijanona teo anilany i Maria, nefa tonga izao ny fotoana hiaingany indray. Mbola lavitra ny lalana halehany mba hodiana any Nazareta. Rehefa afaka enim-bolana eo ho eo, dia hiteraka koa izy.

Rehefa lasa kelikely i Maria, dia niteraka zazalahy i Elizabeta. Faly ny olona rehetra nahita fa nandeha tsy nisy zava-nanahirana ny fiterahana ary salama tsara ny reny sy ny zaza. Nasehon’i Elizabeta ny manodidina azy sy ny mpianakaviny ny zazakeliny ka nandray anjara tamin’ny fifaliany ny rehetra.

Amin’ny andro fahavalo, araka ny Lalàn’Andriamanitra, ny zazalahy isiraelita rehetra dia tokony hoforana. Tamin’io fotoana io dia nanipy hevitra ireo havana aman-tsakaizan’i Elizabeta mba hiantsoana hoe Zakaria an’ilay zaza, sahala amin’ny rainy. Nanohitra anefa i Elizabeta. ‘Tsia, hoy izy. Tokony hantsoina hoe Jaona izy!’ Tadidio fa io ilay anarana nasain’ny anjely Gabriela nomen’i Zakaria azy.

Tsy niray hevitra tamin’izany ireo namany: ‘Tsy misy olona antsoina hoe Jaona mihitsy ao anatin’ny fianakavianao, hoy izy ireo. Mba handaminana ilay raharaha, dia nanontaniany tamin’ny baiko moana ilay rain’ny zaza hoe iza no anarana tiany homena azy. Nangataka hazo fisaka kely i Zakaria, ary akory ny hagagan’ny rehetra fa izao teny izao no voasoratra teo: ‘Jaona no anarany.’

Tamin’izay fotoana izay indrindra dia afaka niteny indray tamin’ny fomba mahagaga i Zakaria. Tsy isalasalana fa tadidinao fa nanjary moana izy satria tsy nino an’i Gabriela rehefa nanambara taminy io fa hiteraka i Elizabeta. Koa rehefa niteny indray i Zakaria, izay rehetra nonina nanodidina azy dia gaga ka nanontany tena hoe: ‘Ho zaza hanao ahoana re io?’

Tamin’izay i Zakaria dia feno ny fanahy masina. Niteny tamin’ny zanany izy ka nanambara hoe: ‘Ary hianao, ry zaza, dia hatao hoe mpaminanin’ny Avo Indrindra; fa hialoha eo anatrehan’ny Tompo hianao hamboatra ny làlany. Hanome ny olony ny fahalalam-pamonjena amin’ny famelana ny helony.’

Tamin’izay fotoana izay, Maria, izay niharihary tokoa fa mbola tsy nanambady, dia nody tany an-tranony, tany Nazareta. Inona no hitranga aminy rehefa hahatsikaritra ny olona rehetra fa manana anaka izy? Lioka 1:56-80; Levitikosy 12:2, 3.

◆ Zokin’i Jesosy hafiriana i Jaona?

◆ Inona no nitranga rehefa teraka valo andro izy?

◆ Asa inona no tsy maintsy notontosainy?