Novalian-tsoa Izy Ireo Noho ny Nitondrany Tena Tsy Nanan-tsiny
MITAHY sy mamaly soa ireo mpanompony mahatoky i Jehovah. Mety ho tsy maintsy miandry mandritra ny fotoana sasany izy ireo mba hahitana ny fahatanterahan’ireo fikasan’Andriamanitra, kanefa hafaliana re izany rehefa mitranga eo amin’ny fiainan’izy ireo ny fitahiany!
Niseho tsara izany tokony ho roa arivo taona lasa izay, tamin’izay nitranga tamin’i Zakaria mpisorona jiosy sy i Elizabeta vadiny, izay samy avy tamin’ny taranak’i Arona. Nampanantena ny hitahy ireo Isiraelita tamin’ny fanomezana taranaka Andriamanitra raha nanompo azy tamim-pahatokiana izy ireo. Nilaza izy fa valisoa ireo zanaka. (Levitikosy 26:9; Salamo 127:3, NW ). Kanefa dia tsy nanan-janaka i Zakaria sy i Elizabeta ary efa antitra. — Lioka 1:1-7.
Milaza ny Soratra Masina fa i Zakaria sy i Elizabeta dia “samy marina teo anatrehan’Andriamanitra (...) sady [“satria”, NW ] nitondra tena tsy nanan-tsiny araka ny didy sy ny fitsipika rehetra nomen’[i Jehovah, NW ]”. (Lioka 1:6). Tia an’Andriamanitra aoka izany izy ireo, hany ka tsy enta-navesatra taminy ny nanaraka lalana marina sy nitandrina ny didiny. — 1 Jaona 5:3.
Fitahiana tsy nampoizina
Aoka isika hiverina any amin’ny faran’ny lohataona na any am-piandohan’ny fahavaratra tamin’ny taona 3 al.f.i. Nanapaka tamin’ny naha-mpanjakan’i Jodia i Heroda Lehibe. Indray andro, dia niditra tao amin’ny Masina tao amin’ny tempolin’i Jerosalema i Zakaria mpisorona. Rehefa niangona mba hivavaka tany ivelan’ny tempoly ny olona, dia nandoro ditin-kazo manitra teo amin’ny alitara volamena izy. Azo inoana fa noheverina ho ny fanompoana isan’andro mendri-kaja indrindra izy io ka natao taorian’ny nanolorana ny fanatitra. Nety ho tsy nanana io tombontsoa io afa-tsy indray mandeha teo amin’ny fiainany ny mpisorona iray.
Saika tsy nino izay hitan’ny masony i Zakaria. Nisy anjelin’i Jehovah nijoro teo amin’ny ilany havanan’ilay alitara volamena! Nanjary taitra sy raiki-tahotra ilay mpisorona be taona. Kanefa hoy ilay anjely: “Aza matahotra, ry Zakaria; fa efa nohenoina ny fangatahanao, ka Elizabeta vadinao dia hiteraka zazalahy aminao, ary Jaona no hataonao anarany.” Eny, nohenoin’i Jehovah ireo vavaka tamim-pahatsorana nataon’i Elizabeta sy i Zakaria. — Lioka 1:8-13.
Nanampy teny ilay anjely hoe: “Ho faly sy ho ravoravo hianao; ary maro no hifaly amin’ny hahaterahany. Fa ho lehibe eo anatrehan’[i Jehovah, NW ] izy ary tsy hisotro divay na toaka sady hofenoina ny Fanahy Masina hatrany an-kibon-dreniny aza.” Ho Nazirita feno ny fanahy masin’Andriamanitra mandritra ny fiainany i Jaona. Nanohy ny teniny toy izao ilay anjely: “Maro amin’ny Zanak’Isiraely no hampodiny amin’i Jehovah Andriamaniny. Ary izy handeha eo alohany amin’ny fanahy sy ny herin’i Elia mba hampody ny fon’ny ray ho amin’ny zanaka, ary ny tsy manoa ho amin’ny fahendren’ny marina, hamboatra firenena voaomana ho an’[i Jehovah, NW ].” — Lioka 1:14-17.
Nanontany i Zakaria hoe: “Inona no hahafantarako izany? fa izaho efa antitra, ary efa antitra koa ny vadiko.” Namaly toy izao ilay anjely: “Izaho no Gabriela, izay mitsangana eo anatrehan’Andriamanitra; ary nirahina hiteny aminao aho ka hilaza aminao izany teny mahafaly izany. Koa, indro, ho moana hianao ka tsy hahay miteny ambara-pahatongan’ny andro hisehoan’izany zavatra izany, ho valin’ny tsy ninoanao ny teniko, izay ho tanteraka amin’ny fotoany.” Rehefa nipoitra avy tao amin’ny tempoly i Zakaria, dia tsy afaka niteny, ary nahatakatra ny olona fa nahita fahitana nahagaga izy. Ny hany azony natao dia ny nanao baikon’ny moana, ka nampiasa fihetsehan-tanana mba hampitana ny heviny. Rehefa tapitra ny fanompoam-pivavahany, dia niverina nody izy. — Lioka 1:18-23.
Antony hifaliana
Marina, araka ilay fampanantenana, fa tsy ela dia nanana antony hifaliana i Elizabeta. Nitoe-jaza izy, ka nanaisotra ny fahafaham-baraka tamin’ny naha-momba azy. Nanjary falifaly koa i Maria havany, satria ilay anjely Gabriela ihany dia nilaza taminy hoe: “Indro, hitoe-jaza hianao ka hiteraka zazalahy, ary ny anarany dia hataonao hoe Jesosy. Izy ho lehibe ka hatao hoe Zanaky ny Avo Indrindra; ary Jehovah Andriamanitra hanome Azy ny seza fiandrianan’i Davida rainy”. Vonona ny hanatontosa ny anjaran’ny “ankizivavin’[i Jehovah, NW ]” i Maria. — Lioka 1:24-38.
Nandeha faingana nankany amin’ny tranon’i Zakaria sy i Elizabeta tany amin’ny tanàna iray tany amin’ny tanin’i Jodia be tendrombohitra, i Maria. Nony nandre ny fiarahaban’i Maria ilay zaza tao an-kibon’i Elizabeta dia niantsambotra. Teo ambanin’ny herin’ny fanahy masina, dia niantso tamin’ny feo mahery toy izao i Elizabeta: “Voatahy samy vehivavy hianao, ary voatahy ny hateraky ny kibonao. Avy aiza no ahatongavan’izao amiko, no mba vangian’ny renin’ny Tompoko aho? Fa, indro, raha vao ren’ny sofiko ny feon’ny fiarahabanao, dia nibitaka [“niantsambotra”, fanamarihana ambany pejy] noho ny hafaliana ny zaza ato an-kiboko. Ary sambatra hianao izay nino; fa hefaina izay zavatra nampilazain’[i Jehovah, NW ] taminao.” Namaly tamim-pifaliana lehibe i Maria. Naharitra tokony ho telo volana ny fijanonan’i Maria tao amin’i Elizabeta. — Lioka 1:39-56.
Teraka i Jaona
Tamin’ny fotoany, dia nisy zazalahy iray teraka ho an’i Elizabeta sy i Zakaria be taona. Tamin’ny andro fahavalo, dia noforana ilay zaza. Naniry ny hiantso ilay zazalahy hoe Zakaria ireo havany, kanefa hoy i Elizabeta: “Tsy izany, fa hatao hoe Jaona izy.” Nanaiky ve ilay vadiny tsy afa-niteny? Nanoratra teo amin’ny fafana izy hoe: “Jaona no anarany.” Niaraka tamin’izay, dia afaka niteny ny lelan’i Zakaria, ary niteny izy ka nidera an’i Jehovah. — Lioka 1:57-66.
Feno ny fanahy masina ilay mpisorona falifaly ka naminany. Niteny izy toy ny hoe efa nitsangana sahady ilay Mpanavotra nampanantenaina — ‘ny tandro-pamonjena amin’ny taranak’i Davida’ — nifanaraka tamin’ny fanekena abrahamika momba ny Taranaka iray hitondra fitahiana ho an’ny firenena rehetra. (Genesisy 22:15-18). Amin’ny maha-mpialoha lalana ny Mesia, ilay zanakalahin’i Zakaria teraka tamin’ny fomba nahagaga dia ‘hialoha eo anatrehan’[i Jehovah, NW ] hanome ny olona ny fahalalam-pamonjena’. Rehefa nandeha ireo taona, dia nitombo sy nihanahery tamim-panahy hatrany i Jaona. — Lioka 1:67-80.
Novalian-tsoa be dia be
Ohatra tsara dia tsara tamin’ny finoana sy ny faharetana i Zakaria sy i Elizabeta. Nanohy nanompo an’i Jehovah tamim-pahatokiana izy ireo na dia tsy maintsy niandry an’Andriamanitra aza, ary tsy tonga ny fitahiana azy ireo lehibe indrindra raha tsy rehefa antitra izy ireo.
Kanefa fitahiana re izany hitan’i Elizabeta sy i Zakaria izany! Teo ambanin’ny herin’ny fanahin’Andriamanitra, dia samy naminany izy roa. Nahazo tombontsoa ho tonga ray aman-dreny sy mpampianatra an’ilay mpialoha lalana ny Mesia, dia i Jaona Mpanao Batisa, izy ireo. Ambonin’izany, dia nihevitra azy ireo ho olo-marina Andriamanitra. Toy izany koa, ireo izay manaraka lalana araka an’Andriamanitra amin’izao andro izao dia afaka manana ny toeran’olo-marina eo anatrehan’Andriamanitra ary handray valisoa feno fitahiana maro noho ny fitondrany tena tsy nanan-tsiny araka ny didin’i Jehovah.