Jesosy, ny fiainany sy ny fanompoany
Ny nahaterahan’i Jesosy: taiza ary oviana no nitranga izany?
NAHOANA i Josefa no nampandeha lavitra an’i Maria kanefa izy nadiva hiteraka? Satria Aogosto Kaisara, emperoran’i Roma, dia namoaka didy fa ny tsirairay avy tamin’ny vahoakany dia tokony hosoratana tao amin’ny tany nahaterahany. Nankany Betlehema toerana nahaterahany àry i Josefa.
Vahoaka maro be no tonga mba hosoratana ho isam-bahoaka tany Betlehema, ka ny hany toerana hitan’i Josefa sy Maria mba handaniana ny alina dia tranom-biby iray nametrahana boriky sy biby hafa. Tao no hahaterahan’i Jesosy. Avy hatrany dia hanafy azy amin’ny lamban-jaza i Maria ka hampandry azy tao anatin’ny fihinanam-bilona iray, dia fasiana sakafom-biby.
Azo antoka fa Andriamanitra no nanosika an’i Aogosto Kaisara hampanao izany fanisam-bahoaka izany. Noho io fanapahan-kevitra io tokoa, dia tany Betlehema no teraka Jesosy; nanambara mialoha ela anefa ny Soratra masina fa ho teraka ao Betlehema ilay Mpanjaka nampanantenaina.
Hafa dia hafa tanteraka io alina io. Tany ivelany, tany an-tsaha, dia nisy fahazavana namirapiratra nanodidina ny antokon’olona mpiandry ondry iray. Ny voninahitr’i Jehovah izany! Hoy ny anjelin’i Jehovah tamin’izy ireo: ‘Vao teraka eto Betlehema ny Mpamonjy anareo. Kristy Tompo io! Hahita azy eo am-pihinanam-bilona ianareo.’ Tsitapitapitr’izay, dia niseho ny anjely tsy tambo isaina ka nihira hoe: ‘Voninahitra any amin’ny avo indrindra ho an’Andriamanitra, ary fiadanana ho etỳ ambonin’ny tany eo amin’ireo olona ankasitrahana!’
Rehefa lasa ireo anjely, dia nifampiresaka toy izao ireo mpiandry ondry: ‘Andeha hojerentsika any Betlehema haingana izay nambaran’i Jehovah antsika!’ Nandeha haingana àry izy ireo ka nahita an’i Jesosy teo amin’ny toerana notondroin’ilay anjely tamin’izy ireo indrindra. Rehefa nitantara ny tenin’ny anjely ireo mpiandry ondry, dia gaga izay rehetra nihaino azy ireo. I Maria kosa dia hitadidy toy ny zava-tsarobidy izany fahatsiarovana rehetra izany ao am-pony.
Amin’izao andro izao, dia be dia no mino fa teraka tamin’ny 25 desambra i Jesosy. Mangatsiaka sy manorana anefa ny volana desambra any Betlehema. Tsy hisy mihitsy mpiandry ondry handany ny alina miaraka amin’ny andian’ondriny any ivelany amin’io fotoana ao anatin’ny taona io. Ambonin’izany, dia azo inoana fa ny emperoran’i Roma dia tsy ho nangataka tamin’ny vahoaka mora mikomy, hanao fifindran-toerana lehibe tao anatin’ny ririnina indrindra mba hanaovana fanisam-bahoaka. Ny zavatra rehetra kosa dia mahatonga hino fa teraka teo amin’ny fiandohan’ny fararano i Jesosy. Lioka 2:1-20; Mika 5:2.
◆ Nahoana moa Josefa sy Maria no nankany Betlehema?
◆ Inona no fisehoan-javatra nahatalanjona nitranga tamin’ny alina nahaterahan’i Jesosy?
◆ Ahoana no ahafantarantsika fa tsy nety ho teraka tamin’ny 25 desambra i Jesosy?
[Feno sary ny pejy 9]