Te-hidera an’i Jehovah aho na dia ao aza ny takaitra mahazo ahy
IREO izay manompo an’i Jehovah amim-pahatokiana na dia ao aza ny takaitra lehibe dia manana porofo foana fa manohana azy ireny izy. “Tsy havelany hangozohozo mandrakizay ny marina.” — Salamo 55:22.
Ireo teny fampaherezana ireo dia tena mifono heviny tokoa ho an’i Bill sy Janice, samy telopolo taona eo ho eo. Mpivady hatramin’ny telo taona eo ho eo izy ireo ary anisan’ny kongregasionan’ny Vavolombelon’i Jehovah iray any Washington (Etazonia). Mpitory maharitra i Bill — izany hoe mpitory manontolo andro — ary miara-mianatra Baiboly amin’olona maromaro izay marenina ny efatra aminy.
Narenina hatramin’ny nahaterahany i Janice, ary ny fanampin’aretina nanampy ny karazan-tsy fandrenesana nahazo azy dia nahatonga azy ho jamba koa. Tamin’ny fivoriamben’ny distrika “Ny fitomboan’ilay Fanjakana” natao tamin’ny taona lasa, dia naka toerana teo amin’ny natokana ho an’ny marenina i Janice ka teo dia nisy olona nampita taminy ny tenin’ny mpandahateny tamin’ny alalan’ny fihetsehana. Noho i Janice jamba koa, dia mazava ho azy fa tsy afaka nahazo ny hafatra tamin’izany fomba izany izy. Noho izany antony izany dia tsy maintsy nisy mpandika teny nipetraka teo anilany. Tamin’ny fametrahana ny tanany teo amin’ny tanan’ilay mpandika teny nitarika, dia afaka “nandre” ny fandaharana i Janice.
Nandritra ny fanaovana hira iray, dia hadinon’ilay mpandika teny ny niseho teo anatrehan’ny mpanatrika noho ny fahadisoana tamin’ny fandehan’ny fandaharana. Tamin’izay fotoana izay i Bill izay nandika teny ho an’i Janice dia niara-niakatra taminy teny ambony lampihazo ary nandika ilay hira tamin’ny alalan’ny famantarana. I Janice kosa dia nametraka ny tanany teo amin’ny azy ary niara-nihira tamin’ny hafa. Be dia be no nanganohanon-dranomaso rehefa nahita izany.
“Mandeha araka ny fahamarinana” efa ho hatramin’ny roa taona izao i Bill sy Janice (III Jaona 4). Ary na dia jamba sy marenina aza i Janice, dia manampy olon-kafa hahita sy handre ny fahamarinana momba an’Andriamanitra. Manana tombontsoa izy mitarika fampianarana Baiboly telo, samy amin’ny fiteny ara-pihetsehana, any amin’olona mankafy ny fahamarinana izay marenina koa. Araka ny porofoin’io ohatra io, rehefa manana faniriana amim-pahatsorana ny hidera an’i Jehovah sy hanampy ny hafa amin’ny lafiny ara-panahy ny tena, dia afaka manao izany foana.
[Sary, pejy 24]
Bill sy Janice Adams “mihaino” lahateny momba ny Baiboly.