Ny fomba hanehoana fankasitrahana noho izay nataon’i Jesosy

NY TENY fotsiny dia tsy hahalaza tsara ny fisaorana toy ny atao. Noho izany antony izany, raha mahatsiaro fankasitrahana noho izay nataon’i Jesosy ho anao ianao, dia hanao izay hanehoana finoana azy sy hanekena azy ho Mpamonjy anao. Raha ny marina, dia amin’ny fanaovana toy izany ihany no azonao anantenana handray soa amin’ny soron’i Jesosy. Tadidio anefa fa ao amin’ny Jaona 3:16 (MN ) no ahitana ny fitenenana hoe ‘maneho finoana’. Izany dia mahafaoka zavatra bebe kokoa noho ny finoana an’i Jesosy sy ny fanekena fa maty ho antsika izy; ambonin’ny finoana, dia ilaina ny hanaovan-javatra.

Mariho ny amin’izany izay natoron’i Petera an’ireo mpihaino azy jiosy taoriana kelin’ny Pentekosta taona 33 amin’ny fanisan-taona iraisana: “Koa mibebaha hianareo, ka miverena hamonoana ny fahotanareo.” (Asan’ny apostoly 3:19). Misy firesahana ny amin’ny fanaovan-javatra karazany roa ao amin’io andininy io. Etsy andaniny, dia tokony hiady amim-pahatsorana amin’ny fironan’ny saintsika sy ny tenantsika hanota isika. Ary etsy ankilany, dia tokony hitalaho amin’Andriamanitra isika mba hamelany ny fahotantsika mifototra amin’ny soron’i Jesosy. — I Jaona 3:1, 2.

Araho ny ohatra nomen’i Jesosy

Rehefa nanontaniana an’i Colin, kristiana vita batisa hatramin’ny 24 taona ny antony nahatsapany fankasitrahana noho izay nataon’i Jesosy, dia izao no navaliny: “Mazava ho azy fa nanome ny ainy ho avotra izy, kanefa ny ohatra nomeny indrindra no manosika ahy hankasitraka azy. Ohatra hotahafiko ny fiainany.”

Raha tena velom-pankasitrahana tokoa isika, moa ve isika tsy hahatsapa faniriana ny hanaraka ny ohatra nomen’i Jesosy izay naneho fanetren-tena, fanekena sy fitiavana tonga hatramin’ny fanaovana sorona ny tena? Miray hevitra amin’izany angamba ianao, nefa inona no ahariharin’ny fihetsikao sy ny ataonao? Ohatra, ahoana no ho fihetsiky ny ankamaroan’olona raha nanankinana asa ho an’ny fanompoam-pivavahana marina toy ny famafana efitrano fivoriana kristiana izy? Ary ianao, ahoana no ho fihetsikao? Ho vonona ve ianao, noho ny fankasitrahana an’i Jesosy sy ny Rainao any an-danitra, hanaiky an-tsitrapo andraikitra hitan’ny maro fa tsy mendrika azy ireo sy mahasosotra loatra? Jesosy kosa dia nanetry tena tamin’ny fanompoana ny hafa toy izany. — Jaona 13:2-17; Filipiana 2:7, 8.

Aoka isika hijery ohatra hafa iray. Matetika ny fifandisoan-dresaka no mitarika ny olona hifampitrerontrerona sy hifanisy ratsy. Ahoana no fihetsika harahin’ny ankamaroan’olona raha ao anatin’ny efitrano iray feno olona izy ka nisy olona nanafintohina azy mafy? Ary ianao, ahoana no ho nataonao? Moa ve, ho fankasitrahana an’i Jesosy sy Jehovah, dia an-tsitrapo no hanaovanao ny dingana voalohany mba handaminana ny tsy fifanarahanao sy ilay nanafintohina anao, ary izany dia amin’ny saina tony sy malefaka? Na ahoana na ahoana, dia toy izany no nataon’i Jesosy sy ny Rainy any an-danitra ho an’ny olombelona mpanota. — Romana 5:6-10; I Jaona 4:9-11.

Tsy vitan’ny hoe namoy ny voninahiny tany an-danitra Jesosy mba hahatongavana ho olombelona, avy eo dia nanao sorona ny fiainany teto an-tany mba hanavotana ny olombelona, fa ambonin’izany dia nitondra zavatra be dia be ho an’ny taranak’olombelona izy tamin’ny fampianarany. Tsy nisy mihitsy olona afaka nanosika ny olombelona hanao ny tsara tahaka ny nataon’i Jesosy. Mpampianatra tsy nanan-tsahala izy io. Nampahafantariny ny olona ny anaran’Andriamanitra, ny maha-izy azy, ny fikasany sy ny sitrapony ny amin’ny zavaboary olombelona. — Jaona 7:45, 46.

Anisan’ny tapany miavaka indrindra tamin’ny fampianarany ny Toriteny teo an-tendrombohitra. Tao amin’izany no nanononan’i Jesosy ity fehezanteny malaza ity, fantatra amin’ny anarana hoe fitsipika volamena: “Koa amin’izany na inona na inona tianareo hataon’ny olona aminareo, dia mba ataovy aminy kosa tahaka izany.” (Matio 7:12). Nolazainy koa ny hoe inona no didy roa lehibe indrindra ao amin’ny Lalàna, dia ny hoe: “Tiava an’i Jehovah Andriamanitrao amin’ny fonao rehetra sy ny fanahinao rehetra sy ny sainao rehetra ary ny herinao rehetra (...) [ary] tiava ny namanao tahaka ny tenanao.” (Marka 12:29-31). Tsy tokony hohadinoina koa ireo faminaniany izay ny fahatanterahany dia mampiseho amintsika mazava dia mazava hoe aiza ho aiza isika izao ao amin’ny fandaharan’Andriamanitra. — Matio toko faha-24 sy 25.

Nanamafy ny fampianarany i Jesosy tamin’ny fampiharan’ny tenany mihitsy izany; tamin’izany izy dia namela ohatra tanteraka ho antsika. Nanomboka ny fanompoany izy tamin’ny fisehoana tsy nisy fepetra mba hanatanteraka ny sitrapon’ny Rainy, avy eo dia hanamarika izany voady izany amin’ny fanekena hatao batisa ao amin’ny rano. Nirahin’Andriamanitra ho eto an-tany izy mba hanambara ny marina, voalohany indrindra, ary talohan’ny hahafatesany, dia afaka nilaza toy izao tamin’ny Rainy i Jesosy: “Izaho efa nankalaza Anao tetỳ ambonin’ny tany; vitako ny asa nomenao Ahy hataoko”, ary koa: “Nasehoko tamin’ny olona izay nomenao Ahy avy tamin’izao tontolo izao ny anaranao.” — Jaona 17:4, 6.

Nanantena ny hanarahan’ny hafa ny ohatra nomeny i Jesosy. Miharihary amin’ny teniny mihitsy izany. “Andeha hanaraka Ahy”, sy: “Avia hanaraka Ahy”, hoy izy ao amin’ny Matio 4:19 sy Matio 19:21. Izao koa no nosoratan’i Petera sy Paoly apostoly: “Kristy aza efa nijaly hamonjy anareo ka namela fianarana ho anareo, mba hanarahanareo ny diany”, sy hoe: “Aoka hanahaka ahy hianareo, dia tahaka ny anahafako an’i Kristy.” — I Petera 2:21; I Korintiana 11:1.

Mba hampisehoana ny fankasitrahanao noho izay nataon’i Jesosy ho anao amin’ny maha-Mpampianatra lehibe sy Ohatra tanteraka, dia manohiza mifankazatra amin’ny fampianarany. Amin’izany dia ilainao ny mianatra tsy tapaka ny Tenin’Andriamanitra, indrindra fa ny Soratra grika kristiana izay itantarana ny zavatra nampianarin’i Jesosy. Koa satria hila fanampiana ianao mba hahatakarana sy hankamamiana izay vakinao, dia ho fahendrena ny hampiasana boky fianarana ny Baiboly natonta pirinty sy naely noho ny fikendrena izany indrindraa. Ambonin’izany, dia miezaha amim-pieritreretana tsara mampihatra eo amin’ny fiainanao andavanandro izay ianaranao. Eny, ilaina ny hanaovan-javatra mifanaraka amin’izany, araka ny nasain’i Jesosy nomarihina tamin’izao teny izao: “Tsy izay rehetra manao amiko hoe: Tompoko, Tompoko, no hiditra amin’ny fanjakan’ny lanitra, fa izay manao ny sitrapon’ny Raiko Izay any an-danitra.” — Matio 7:21; 4:17; Lioka 4:17-21.

Ataovy ho zavatra mitana ny sainao lehibe indrindra ny fanompoam-pivavahana amin’i Jehovah

Amin’izao andro izao, dia olona maherin’ny 1 056 000 000 no milaza tena fa kristiana. Ny ankamaroany anefa dia tsy maneho afa-tsy fankasitrahana kely dia kely noho izay nataon’i Jesosy ho azy ireo. Be dia be no mieritreritra fa manao zavatra tsara tanteraka rehefa miangona indroa isan-taona amin’ireo fety lehiben’ny fivavahana lazaina fa kristiana. Ny hafa hilaza hoe: “Tia an’Andriamanitra aho, satria mino ny Didy Folo.” Firy anefa no manaraka izany? Io fitambaran-dalàna tanteraka izay nitari-dalana ny firenen’Isiraely taloha io dia nametraka ny fanompoam-pivavahana marina tamin’i Jehovah Andriamanitra ho eo amin’ny toerana voalohany, indrindra fa ao amin’ireo didiny efatra voalohany. — Eksodosy 20:1-11.

Firy amin’ireo izay manizingizina fa kristiana ny tenany no tena manaraka tokoa ny ohatra nomen’i Jesosy amin’ny fampiharana ireo fotopoto-pitsipika ao amin’ny Didy Folo eo amin’ny fiainany andavanandro? Moa ve izy ireo manolotra ho an’Andriamanitra “fifikirana tsy voazarazara”, raha raisina indray ny teny ampiasaina ao amin’ny didy faharoa? Sahala amin’ny nataon’i Jesosy, moa ve izy ireo mampahafantatra sy manome voninahitra ny anaran’i Jehovah antitranterin’ny didy fahatelo? Tsy mianina amin’ny hatsaran-toetra ny kristiana marina, fa mametraka ny fanompoam-pivavahana amin’i Jehovah eo amin’ny toerana voalohany amin’ny fiainany. — Matio 6:33.

Maro amin’ireny kristiana ireny no mahalala fa anisan’ny fanompoam-pivavahana atolony ho an’Andriamanitra ny fiaraha-mivory. Mba efa noeritreretinao anefa ve fa ny famonjena tsy tapaka ireo fivoriana kristiana dia fomba iray fampisehoana ny fankasitrahan’ny tena? Nahatsapa izany ny apostoly Paoly. Manazava izany izy ao amin’ny toko faha-10 amin’ny taratasiny ho an’ny Hebreo. Afa-tsy izany koa, dia asehony fa mampidi-doza ny tsy fahampiam-piheverana ireo fivoriana kristiana. Ny fihetsika toy izany dia mety hitarika kristiana iray ho kivy sy tsy hanao asam-pinoana intsony. Ny anankiray hafa dia mety hamela hihena ny fankasitrahany ny fomba famonjena nomanin’Andriamanitra, izany hoe Kristy. Raha izany no izy ka tsy mitsahatra voakiky ny finoany, izany dia mety hitarika azy hinia hanota, na hivadi-pinoana mihitsy aza. Ny fanaovana toy izany dia fiheverana ny fanomezan’Andriamanitra ho “zavatra tsy masina”, tsinontsinona; ho fanevatevana an’i Jehovah sy Jesosy izany. — Hebreo 10:23-31.

Mariho ny fampitandremana nataon’i Paoly, ho an’ireo izay tsy vitan’ny hoe tsy miraharaha ireo fivoriana, fa tonga hatramin’ny fandavana izay natolotr’Andriamanitra mba hahazoana famonjena. Hoy izy: “Izay manohitra ny lalàn’i Mosesy dia maty amin’ny tenin’ny vavolombelona roa na telo ka tsy asiana famindrampo; manao ahoana kosa ary no hamafin’ny fampijaliana ataonareo tokony hihatra amin’izay nanitsaka ny Zanak’Andriamanitra ka nanao ny ran’ny fanekena izay nanamasinana azy ho zavatra tsy masina sady naniratsira ny Fanahin’ny fahasoavana?” — Hebreo 10:28, 29.

Andriamanitra, tamin’ny alalan’i Mosesy, no nanome ny Lalàna. Nampahatsiahivin’i Paoly an’ireo mpamaky azy anefa fa raha toa ireo izay nandika an’io lalàn’Andriamanitra io sady tsy nibebaka ka nampiharana fanamelohana ho faty, dia vao mainka mendrika ny hosazina ireo izay manamavo ny fanomezana sarobidy indrindra natolotr’Andriamanitra tamin’ny alalan’i Jesosy Kristy, ilay Mosesy Lehibe. Ireo izay manevateva ny Zanak’Andriamanitra amin’ny fandavana azy tsy ho Mpamonjy ary tsy miraharaha mihitsy ny sorony dia tokony hanampo ny hiharan’ny “fahafatesana faharoa”, dia sazy mafy, satria manaisotra amin’izy ireny izay rehetra mety ho fanantenana fananganana amin’ny maty. — Apokalypsy 21:8; Deoteronomia 13:6-10; 17:2-7.

Araka izany dia nasehon’i Paoly fa nanjary tsy nahay nankasitraka aoka izany ny mpanota an-tsitrapo na ny mpivadi-pinoana iray. Ny olona toy izany dia manao ny fanevatevana lehibe indrindra, ary izany dia amin’ny fomba telo. Voalohany indrindra, dia “nanitsaka ny Zanak’Andriamanitra” izy. Na, mety ho mihevitra an’i Jesosy ho fahavalo izy izao, satria ireo mpanafika taloha dia nametraka ny tongony teo amin’ny hatoky ny fahavalony resy, na, nijery an’i Jesosy tamim-panarabiana izy, satria ny olona manitsaka izay hamavoiny (jereo Matio 7:6). Manaraka izany, dia “nanao ny ran’ny fanekena izay nanamasinana azy ho zavatra tsy masina” izy. Nohamavoiny ny fomba nanambarana azy fa madio, dia ny ran’i Kristy. Tsy noheveriny ho sarobidy kokoa noho ny ran’ny olona tsy tanteraka ny ra nanaovana ho ara-dalàna ny fanekena vaovao; tsy noheveriny ho masina izy io. Farany, dia “naniratsira ny Fanahin’ny fahasoavana” izy. Niteny ratsy ny hery miasan’Andriamanitra izy ka ninia nanohitra tamin’izany ny herin’i Jehovah, tamin’ny filazana fa tsy misy vidiny mihitsy izany ary noho izany dia tsy misy ilàny azy mihitsy. — Efesiana 4:30.

Azo atao ny manalavitra ny fanaovan-javatra amim-panamavoana toy izany raha heverina ho sarobidy tokoa foana ny fanomezana natolotr’Andriamanitra ho famonjena ny olona. Ireo fivoriana dia fomba iray hanampy antsika hankamamy foana an’io fanomezana io. Koa satria manatrika tsy hita maso ao amin’ireny fihaonana ireny Jehovah sy Jesosy, ireo kristiana velom-pankasitrahana dia tsy hanao tsirambina izany toy ny ataon’ireo mpivadi-pinoana, fa hiezaka hanatrika izany tsy tapaka. — Jereo Malakia 3:16; Matio 18:20.

Aoka àry ianao ho velom-pankasitrahana noho izay nataon’i Jehovah ho anao. Manehoa finoana amim-pahatsorana ny sorom-panavotany. Manaraha ny ohatra omeny eo amin’ny fifandraisanao amin’ny hafa. Omeo ny toerana voalohany eo amin’ny fiainanao ny fanompoam-pivavahana amin’ny Rainy, dia Jehovah Andriamanitra. Ho azonao atao amin’izany ny hilaza hoe: “Isaorana anie Andriamanitra noho ny fanomezany tsy azo tononina”, dia ny fankasitrahany an’izay tsy mendrika akory amin’ny alalan’i Jesosy! — II Korintiana 9:15.

[Fanamarihana ambany pejy]

[Sary, pejy 6]

Ny fomba azonao anehoana ny fankasitrahanao an’i Jesosy.