Aoka isika hanorina ho amin’ny mandrakizay
“Fa ny trano rehetra dia samy nisy mpanao azy; fa Izay nanao ny zavatra rehetra kosa dia Andriamanitra.” — HEBREO 3:4.
1, 2. a) Iza moa no nanorina ny planin’ny sambo fiara, ary nanao ahoana ny naha-hentitra ireo toromarika nomena mba hanorenana azy io? b) Nahoana moa no iankinan’ny aina ny hankatoavantsika tahaka an’i Noa?
TOKONY ho 4 400 taona eo ho eo izao, dia nandidy an’i Noa i Jehovah mba hanorina ilay sambo fiara niarovana ny aina. Kanefa tsy namela azy hanorina izay rehetra mety ho karazan-trano afaka mitsinkafona eny ambony rano izy. Tsia, nomeny azy ny toromarika hentitra ny amin’ny fifidianana fitaovana, ny fandrafetana azy, ny halavany, ny sakany, ny haavony, ny fampidiran-drivotra aminy ary ny famitana ny ivelany sy ny atin’ilay sambo fiara. “Dia nataon’i Noa izany; araka izay rehetra nandidian’Andriamanitra azy no nataony.” — Genesisy 6:13-16, 22.
2 Ohatra tsara tokoa izany ho an’ny Vavolombelon’i Jehovah amin’izao androntsika izao! Sahala amin’i Noa, dia manana andraikitra isika hanatontosa asa famonjena. Amin’izao indray mandeha izao anefa izany dia mahakasika ‘olona an-tapitrisany maro velona ankehitriny izay mety tsy ho faty mihitsy’. Zava-dehibe tokoa àry ny hankatoavantsika, sahala amin’ny nataon’i Noa. Tokony tsy hangataka andro isika hanaraka ny ohatra navelan’ilay Noa Lehibe, dia Jesosy Kristy, ho antsika, amin’ny maha-“mpitory ny fahamarinana”. — II Petera 2:5.
Asa fanorenana ara-panahy
3. a) Inona no mitranga eo amin’izay rehetra manorina amin’ny tenin’i Jesosy? b) Nahoana moa ny fitorian’i Jesosy no afaka nampitombo ny finoana?
3 1 956 taona izay dia nampangitakitaka ny mponina tany Galilia i Jesosy tamin’ny fanambarana hoe: “Mibebaha hianareo, fa efa akaiky ny fanjakan’ny lanitra.” Izay rehetra nankatò ny teniny ka nanorina teo amin’izany dia nampitahainy tamin’ny “lehilahy manan-tsaina (...) izay nanorina ny tranony teo ambonin’ny vatolampy”. Niorina mafy sy tsy azo nohozongozonina ny finoan’izany lehilahy izany. Tsy mirodana noho ny fanerena izany. Nampiorina ny finoan’ireo izay nihaino azy ny fitorian’i Jesosy. Nanohina ny fon’izy ireo izany ka nahatonga azy ho hafa dia hafa noho ireo lahateny feno anatranatra nataon’ny filoha ara-pivavahana jiosy. Talanjona tokoa ny sarambabembahoaka noho ny fomba fampianatr’i Jesosy. Indray andro aza ireo miaramila tokony hisambotra azy dia niverina tsy nitondra azy ka nilaza toy izao tamin’ireo izay naniraka azy ireo: “Tsy mbola nisy olona niteny tahaka izany.” — Matio 4:17; 7:24, 25, 28; Jaona 7:46.
4. a) Ahoana no nanorenan’i Jesosy ho an’ny ho avy? b) Fisehoan-javatra tena lehibe inona teo amin’ny asa fanorenana ara-panahy no nitranga tamin’ny Pentekosta taona 33?
4 Nanorina ho an’ny ho avy i Jesosy. Naka namana hanampy azy izy, tahaka an’i Petera, antsoina koa hoe Kefasy, anarana izay ny dikany dia hoe “vatolampy”. Io mpianany io no nanambarany hoe: “Hianao no Petera, ary ambonin’ity vatolampy ity no haoriko ny fiangonako.” Taty aoriana i Petera dia tonga ny anankiray tamin’ireo “vato velona” maro naorina teo amin’i Jesosy, ilay ‘vato fehizoron’ny’ kongregasiona naorina tamin’ny Pentekosta taona 33. Tamin’io andro io i Jesosy tafatsangana tamin’ny maty sy nasandratra ho eo ankavanan’Andriamanitra any an-danitra dia nandatsaka ny fanahy masina teo amin’ireo mpianatra tafavory. — Matio 16:18; I Petera 2:4-6; Asan’ny apostoly 2:2-4, 32, 33.
5. Amin’izao androntsika izao, fisehoan-javatra inona avy no mitarika ny kongregasiona kristiana handray anjara tena lehibe amin’ny asa fanorenana ara-panahy?
5 Amin’izao androntsika izao, ny kongregasiona kristiana dia mandray anjara tena lehibe eo amin’ny fahatanterahan’ny fikasan’i Jehovah. Isika izao dia miaina amin’ny andron’ny “apokalypsy”, na “fanambarana”, fotoana anambarana amin’ny ‘mpanompon’Andriamanitra’ eto an-tany “ireo zavatra tsy maintsy ho tonga tsy ho ela” (Apokalypsy 1:1-3, NW misy fanamarihana, filazana eo ambany amin’ny pejy). Amin’izao fotoana izao ireny mpanompo ireny no tokony ‘hitory ny vaovao tsaran’ny Fanjakan’Andriamanitra amin’ny tany manontolo ho vavolombelona’, alohan’ny hampiharana ny fanamelohana ny fandehan-javatra ratsin’i Satana. Amin’izao fotoana izao Jesosy Kristy Mpanjaka nomena fiandrianana any an-danitra no manavaka ny olona manetry tena, azo ampitahaina amin’ny ondry, amin’ny olona mafy hatoka, azo ampitahaina amin’ny osy, izay tsy tia an’io Fanjakana io. Ireny “ondry” ireny dia akambany amin’ny kongregasionan’ireo ‘rahalahiny’ ara-panahy, alohan’ny hipoahan’ny “fahoriana lehibe”. — Matio 24:14, 21; 25:31-40.
6. Mifanitsy amin’inona ny “sambo fiara” amin’izao androntsika izao, ary ahoana no mety hahatafita velona antsika?
6 Inona moa ny sambo fiara amin’ny andro ankehitriny hahafahana ho tafita velona? Izany dia ny toe-piainana ara-panahy misy ireo Vavolombelon’i Jehovah nanomboka tamin’ny 1919, dia paradisa ara-panahy. Sahala amin’ireo mpianakavin’i Noa, ny sisa amin’ny kristiana voahosotra sy ireo namany dia tokony hitoetra ao anatin’io sambo fiara amin’ny andro ankehitriny io ka hiasa amim-pankatoavana sy amin’ny fo rehetra mba hanatanteraka ilay fikasana lehibe amin’ny lafiny ara-panahy noforonin’i Jehovah. Io fikasana io dia natao ‘hanangonana ny zavatra rehetra ho iray ao amin’i Kristy, na ny any an-danitra [ireo kristiana manana fanantenana ny ho any an-danitra izay nanomboka tamin’ny taona 33 ny fanangonana azy], na ny etỳ an-tany [ny “olona betsaka” kristiana maneran-tany izay manantena ny hiaina mandrakizay eto an-tany ka tamin’ny 1935 indrindra no nanomboka ny fanangonana azy]”. — Efesiana 1:10; Apokalypsy 7:9, 14.
‘Aoka isika hanorina sy hamboly’
7. Asa roa sosona inona no tanterahina amin’izao fotoana izao, ary ahoana no mety hahitantsika fifaliana sahala amin’ny an’i Noa sy Jeremia?
7 Jehovah dia nanome ho an’ny sisa amin’ny kristiana voahosotra mbola eto an-tany, asa tahaka ny nataon’i Jeremia mpaminany, dia ny “hanam-pahefana amin’ny firenena sy ny fanjakana hanongotra sy hanjera sy handrava sy handrodana ary hanorina sy hamboly”. Noho izany antony izany, dia misy asa roa sosona tanteraka amin’izao androntsika izao: 1) ny fanambarana ny fanamelohana notononin’i Jehovah teo amin’ny fandehan-javatra ratsin’i Satana ary 2) ny fampandrosoana sy ny fampiorenana mafy ny vahoakan’Andriamanitra voalamina voatokana ho tafita velona (Jeremia 1:10; 24:6, 7; Isaia 26:20, 21). Endrey ny fahasambarana ho an’ny sisa amin’ny kristiana voahosotra sy ho an’ny olona betsaka namany mihamaro hatrany, afaka mandray anjara amin’io asa io amin’izao andro izao! Tsy maintsy ho nahatsapa fahasambarana sahala amin’izany Noa, lehilahy be zotom-po, sy ny ankohonany, tamin’ny androny.
8. a) Inona no fitomboana azo marihina eo amin’ny isan’ny mpitory tao anatin’ireo 22 taona farany? b) Amin’ny fampiasana ny pejy faha-20 ka hatramin’ny faha-23, tonòny ny tany sasany nahitana fitomboana niavaka tamin’ny 1985.
8 Ho an-tapitrisany maro ve ny olona ho tafita velona amin’ny andro fahatezeran’i Jehovah? Manana antony tsara tokony hieritreretana izany isika rehefa mandinika ny filazana asan’ny Vavolombelon’i Jehovah tamin’ny taom-piasana 1985, dia filazana asa izay ho hitanao ao amin’ny pejy faha-20 ka hatramin’ny 23 amin’ity gazety ity ny antsipiriany aminy. Ho voamarikao amim-pahalianana ny fitomboana miavaka amin’ny isan’ny mpitory ilay Fanjakana. Izany dia tafakatra ho tampon’isa 3 024 131. Tratra ny tanjona 1 000 000 tamin’ny 1963, ny 2 000 000 tamin’ny 1974, ary ny 3 000 000 dia nihoarana tamin’ny 1985. Tao anatin’ireo 22 taona farany isika dia nanamarika fitomboana isa 200 isan-jato. Diboky ny fankasitrahana an’i Jehovah isika noho ny nampitomboany, tamin’ny alalan’ny fanahiny, ireo voan’ny fahamarinana nafafy. — Zakaria 4:6; I Korintiana 3:6.
9. a) Nahoana moa ny fitomboan’ny isan’ny mpitory maharitra no mbola miavaka kokoa ihany? b) Inona no torohevitra omena an’izay rehetra mety ho afaka ny hanao io asa io, ary nahoana?
9 Tao anatin’izany vanim-potoana izany ihany, ny isan’ny mpitory ilay Fanjakana manontolo andro dia nitombo tamin’ny fomba mbola miavaka kokoa ihany. Na dia tsy nitsahatra ny niharatsy aza ny toe-karena maneran-tany, ny ara-keviny isam-bolana amin’ny isan’ireny “mpitory maharitra” be herim-po ireny dia tafakatra haingana ho 322 821 tamin’ny 1985, ilay 38 573 tamin’ny 1963, ka izany dia mampiseho fitomboana 737 isan-jato! Mampiseho inona izany? Fa ny olon’Andriamanitra dia mampiseho fitiavana fahafoizan-tena mahatalanjona, mifanaraka amin’ny tenin’i Jesosy voasoratra ao amin’ny Lioka 9:23. Mandrakariva dia ilaina ny mametra fandaharam-potoana tsara sy maneho fahafoizan-tena mba hahombiazana amin’ny asan’ny mpitory maharitra. Mandray valisoa be dia be ireo izay manao toy izany. — Romana 12:1, 2; Malakia 3:10.
10. a) Nahoana no tokony hoderaina ireo mpitory? b) Manonòna tampon’isa vaovao telo ary lazao izay ambarany.
10 Ireo mpitory an-tapitrisany maro dia tokony hanohitra koa ireo fitaomana ampiharin’i Satana sy izao tontolo izaony eo amin’izy ireo. Izy ireo koa anefa dia manolotra ho an’Andriamanitra ny ‘fanati-piderany’. (Hebreo 13:15; Romana 10:9, 10.) Ry mpitory mahatoky, na maro na tsia ny ora voalazanareo isam-bolana, izany dia tafiditra ao amin’ny tampon’isa vaovao 590 540 205 ora niasana izay tratra tamin’ny 1985. Io tarehi-marika io dia mampiseho fitomboana 16,8 isan-jato amin’ny tamin’ny 1984! Ny tampon’isa vaovao amin’ny fiverenana mitsidika 224 725 918 sy ny an’ny fampianarana Baiboly 2 379 146 any an-tokantranon’ny olona mankafy ny fahamarinana dia mampiseho fa ireo mpitory ilay Fanjakana dia miezaka daholo mba sady ho mpampianatra tsara no ho mpitory be zotom-po. — Matio 28:19, 20.
Aoka isika hanorina ho an’ny tena fiadanana sy filaminana
11. Ahoana no anambarana amin’izao fotoana izao ny tena fanantenana fiadanana sy filaminana, ary amin’ny ambaratonga manao ahoana?
11 Teo amin’ny faramparan’ny taona 1985, ny Firenena mikambana dia nanambara ny 1986 ho Taonan’ny fiadanana iraisam-pirenena, ary vao haingana io fandaminana io dia niresaka be dia be ny amin’ny fiadanana sy filaminana. Misy anefa fanambarana lehibe lavitra, ny an’ny fanantenana araka ny Baiboly momba ny fiadanana sy filaminana, natao tamin-jotom-po niavaka tamin’ny 1985. Maneran-tany tokoa ny Vavolombelon’i Jehovah dia nizara Baiboly sy boky ary bokikely 38 805 561 ary gazety 300 545 609. Izy ireny dia nahazo famandrihana vaovao 1 719 930 amin’ny Ny Tilikambo Fiambenana sy ny Réveillez-vous!. Am-bava sy an-tsoratra, dia nisy fanambarana tsy mbola nisy toy izany natao ny amin’ny Fanjakan’ilay tena “Andrian’ny fiadanana” efa miorina. Tsy azo lavina fa “ny fitomboan’ny empirany sy ny fiadanana dia tsy hanam-pahataperana”. — Isaia 9:6, 7, Darby.
12. Niteraka zavatra ilaina lehibe inona moa ny fitaran’ny asa, ary ahoana no nanakambanan’ireo mpanompon’i Jehovah ny fiezahany mba hanomezana fahafahampo tamin’izany?
12 Ny fitaran’ny asa mahatalanjona dia nitarika fitomboan’ny rafitry ny fandaminana. Tamin’ny 1985, ny isan’ny kongregasionan’ny Vavolombelon’i Jehovah amin’ny fitambarany dia tonga 49 716 ilay 47 869. Nilaina àry ny hahitana toeram-pivoriana vaovao an-jatony maro. Mampahery ny mahatsapa fa any amin’ny tany maro, ireo fiezahana ataon’ny Vavolombelona mba handoavam-bola ho an’ny Efitrano Fanjakana dia voatahy. Any amin’izay nahatsapana fa nila izany, dia nisy fanomezana tamim-pahalalahan-tanana nataon’ireo kongregasiona sy olon-kafa manokana, nahatonga ho azo atao ny fanatanterahana volavolan-kevi-panorenana, hany ka nisy “fitoviana” nitranga teo anivon’ny fianakaviana maneran-tanin’ireo rahalahintsika. — II Korintiana 8:14, 15.
13. Ahoana no azon’ny tsirairay avy andraisana anjara amin’ny fanatanterahana volavolan-kevitra momba ny fanorenana Efitrano Fanjakana?
13 Any amin’ireo tany amelan’ny tarehin-javatra hanao izany, ireo sampan’ny Fikambanana Watch Tower koa dia nanohana volavolan-kevi-panorenana Efitrano Fanjakana. Any Etazonia sy any Kanada, ohatra, dia maro be no manao fanomezana voatokana ho amin’ny fanangonam-bola manokana natokana hanorenana Efitrano Fanjakana. Araka izany, dia nisy fampisamborana azo natao mba hanampiana tamin’ny fanatanterahana volavolan-kevitra maro kokoa. Ny sasany nitondra fanampiana tamin’ny heriny sy ny fahaizany, hany ka nisy aza Efitrano Fanjakana voaorina tao anatin’ny faran’ny herinandro iray monja. Tamin’ny fiasana ‘tamin’ny fanahiny rehetra, tahaka ny ho an’i Jehovah’, ho amin’ny fanatanterahana volavolan-kevitra toy izany, ny Vavolombelona dia afaka manatanteraka zavatra toa tsy mety ho vitan’ny olona eo amin’izao tontolo izao. — Kolosiana 3:23, MN.
14. Ahoana no nataontsika mba hahafahana mampiasa Efitrano fanaovana fivoriambe nilaintsika?
14 Any amin’ny tany sasany, ireo rahalahintsika dia mahita fahasahiranana lehibe amin’ny fitadiavana toerana hanaovana ireo fivoriamben’ny fizaran-tany fanaony isaky ny enim-bolana. Nanangana fandaharam-panorenana indray àry izy ireo, tamim-pifaliana sy nitovy toe-tsaina tamin’ireo mpanompon’Andriamanitra tamin’ny lasa. Rehefa nilaina tokoa ny hanangonana ireo fitaovana hanorenana ny tabernakely, ohatra, dia nanaraka tamim-piraisan-tsaina izao didin’Andriamanitra izao ny fitambaran’ny vahoaka Isiraely: “Manalà ao aminareo fanatitra ho an’i Jehovah: izay rehetra amporisihin’ny fony, dia aoka hitondra fanatitra ho an’i Jehovah.” Nanome zavatra nihoatra noho ny nilaina ny Isiraelita, ary vita vetivety ny asa. — Eksodosy 35:5-19; 36:7.
15. a) Inona no fanitarana nitranga tao amin’ireo sampan’ny Fikambanana? b) Ahoana no nahafahana nanatanteraka ny asa?
15 Koa satria tsy mitsahatra ny mitombo ny fangatahana Baiboly sy boky momba ny Baiboly, dia sampan’ny Fikambanana Watch Tower be dia be izay tafakatra ho 94 ny isany maneran-tany, no voatery manitatra ireo tranony. Ny fanontam-pirinty any Brooklyn sy ny an’i Wallkill (Watchtower Farms) no mbola lehibe lavitra foana, kanefa sampan’ny Fikambanana 36 izao no manonta pirinty ny gazetiny, ary ny 6 aminy dia ampy fitaovana koa mba hanontana pirinty sy hamonosana boky. Mamoaka Baiboly koa aza ny sampana any Alemaina, Italia sy Japon. Miasa haingana amin’ny fomba feno ny fanontam-pirinty vaovao any Selters, any Alemaina. Any amin’ny Betelan’i Japon, any Ebina izao dia ampiana rihana enina amin’ny fanontam-pirinty ary aorina ny trano tsara tarehy iray misy rihana fito izay hahatonga ho afaka hanome fonenana ho an’ny mpiasa 280 amboniny. Toy ny nanohanan’ny mpanompon’i Jehovah “tamin’ny fony rehetra” ny fanorenana ny tempolin’i Solomona, dia toy izany koa amin’izao androntsika izao, any amin’ny tany samihafa izy ireny dia ‘mazoto manatitra ho an’i Jehovah’. Noho Jehovah manome azy ireo ny fitahiany, dia tontosa ny asa. — I Tantara 22:14, 15; 29:7, 9; NW misy fanamarihana, filazana eo ambany amin’ny pejy.
16. Nahoana moa no ilaina io asa fandaminana sy fanorenana amboniny io?
16 Tena ilaina anefa ve izany asa fandaminana sy fanorenana rehetra izany? Izany dia izany tokoa. Tokony hotontosaina izany mba hahafahan’ny “mpanompo mahatoky sy manan-tsaina” manohy manome ny ‘hanina ara-panahy amin’ny fotoana’. Tena ilaina izany sakafo izany mba hitomboan’ny “ankohonan’Andriamanitra” sy ny fitoriana maneran-tany izay atao amin’ny fiteny 200 mahery (Matio 24:45; Efesiana 2:19; 4:15, 16). Ireo mpanompon’i Jehovah mihitsy no nampiasa ny fahalalany mba hanamboaran’ny tenany ihany fandaharana elektronika amin’ny fakana sary rehefa manao pirinty fiteny maro indray miaraka (photocomposition multilingue) (MEPS), ary sampan’ny Fikambanana 26 izao no manana amin’izany. Izany dia mahatonga an’ireo sampana rehetra ireo ho afaka hampiasa ny fomba fanontam-pirinty “offset” ka mahatonga ho azo atao ny fanontana miaraka ny hafatra momba ilay Fanjakana any amin’ny faritra maro amin’ny tany. — Jereo Isaia 52:7-9.
17. Inona no tsapa fa ilaina ao amin’ny foibe iraisam-pirenen’ny Fikambanana, ary inona no kasaina hatao mba hahazoana fahafahampo amin’izany?
17 Toa tsy tokony hitsahatra ny fanitarana hitan’ny fandaminana amin’izao fotoana izao. Ankehitriny, ny mpianakavin’ny Betela miasa ao amin’ny foibe iraisam-pirenen’ny Fikambanana, any Brooklyn, dia nitombo aoka izany, hany ka tsy misy efitrano foana intsony ao amin’ny anankiray amin’ireo trano misy. Raha izany no sitrapon’i Jehovah, ny Fikambanana dia hanorina tilikambo iray eo amin’ny tany ananany ao amin’ny faritr’i Columbia Heights mba hahafahana manome fialofana ho an’ny mpiasa arivo amboniny. Raha tsy tanteraka anefa izany volavolan-kevitra izany, dia mbola hitady ny fitarihan’i Jehovah isika mba handaminana ilay zava-manahirana. Mba hiatrehana izany fitomboana rehetra izany, dia haintsika ny miantehitra amin’ny vavaka sy ny fanohanana amim-pahatokiana ataon’ny fianakaviana manontolon’ireo rahalahintsika maneran-tany. — Jereo Asan’ny apostoly 21:14; II Tesaloniana 3:1.
18. Na dia antomotra aza Hara-Magedona, nahoana no atao ny volavolan-kevitra be dia be toy izany momba ny fanorenana, amin’izao andro izao?
18 ‘Fa nahoana no manao volavolan-kevitra ny amin’ny fanorenana be dia be toy izany kanefa isika akaiky dia akaiky an’i Hara-Magedona?’, hoy angamba ny sasany manontany tena. Izao no valiny: ‘Tsy manakatona ny varavarany akory’ ny fandaminan’i Jehovah rehefa manakaiky an’i Hara-Magedona. Tsy ‘ora fikatonana’ afa-tsy ho an’ny fandaminan’i Satana izao. Manorina ho mandrakizay ny fandaminan’i Jehovah. Na ho voaro na tsia ireo zavatra naorina hita maso mandritra ny Hara-Magedona, dia fantatsika fa hiroborobo foana ny fandaminan’Andriamanitra ka hampiasain’i Jehovah izany sy ireo izay manohana azy amim-pahatokiana, mba hanorenana fiadanana sy filaminana mandrakizay ao anatin’ny Paradisa an-tany kanto nampanantenainy. — Apokalypsy 7:9, 14-17; 21:1, 4, 5.
Aoka isika hanorina amin’ny fananana zava-kendrena hentitra
19. Fanaingana inona no tokony ho hita amin’ny isan’ny mpanatrika ny Fahatsiarovana tamin’ny 1985?
19 Sahala amin’i Noa, dia tokony hanorina amin’ny fananana zava-kendrena hentitra isika. Momba izany, ny anankiray amin’ireo tarehi-marika amin’ny rapaoron’ny taom-piasana 1985 dia mampieritreritra. Izany dia ny isan’ny mpanatrika niavaka tamin’ny Fahatsiarovana ny nahafatesan’i Jesosy izay nankalazaina tamin’ny 4 aprily: olona 7 792 109 no tonga tamin’izany, izany hoe nihoatra 375 135 noho ny tamin’ny 1984. Tsy mahatalanjona ve izany? Mitaky fiezahana anefa io tarehi-marika io. Koa satria tokoa ny tampon’isan’ny mpitory dia 3 024 131, ireo olon-kafa maherin’ny 4 000 000 niara-nivory tamintsika tamin’io takariva io dia mbola tokony hanorina, amin’ny fetra sasany fara fahakeliny, ho an’ny ho avy, amin’ny fandraisana anjara amin’ny fanompoana kristiana. Ahoana no azontsika anampiana azy ireny?
20. Inona no tokony hataontsika dieny izao mba hamaliana izany fanaingana izany, ary amin’ny fomba ahoana?
20 Fantatry ny tenantsika manokana ny ankamaroan’ireny olona ireny izay mankafy ny fahamarinana. Angamba izany mpianakavintsika, olona miara-mianatra ny Baiboly amintsika, olona nanao famandrihana tamin’ireo gazetintsika, na hafa koa. Ny sasany aza nety ho nankafy ny fahamarinana nanomboka tamin’ny Fahatsiarovana farany. Afaka manao fiezahana manokana dieny izao ve isika mba hamahanana azy ireny sy hampandrosoana azy ara-panahy amin’ny alalan’ny fianarana Baiboly, mba hahafahany mahita fialofana ao amin’ny toerana tsy ahitana ahiahy nomanin’i Jehovah “mandra-pahalasan’ny loza”? (Salamo 57:1.) Ny “fahoriana lehibe” dia hamela an’i Jehovah hanamarina ny tenany amin’ny fomba mbola miavaka kokoa sy raikitra kokoa noho ny nataony tamin’ny andron’i Noa tamin’ny alalan’ny safodrano. Irintsika àry ny hampandroso ny olona izay maneho fahalianana amin’ny fampianarana azy ireny fahamarinana mety hitarika azy ho amin’ny famonjena, mba ‘hiantsoany ny anaran’i Jehovah’ ka tsy ho ringana (Matio 24:21, 22, 39; Zefania 2:3; 3:8, 9). Aoka isika hiara-mianatra ny Baiboly aminy mifototra amin’ilay boky hoe Azonao atao ny hiaina mandrakizay ao amin’ny paradisa eto an-tany na izay rehetra mety ho boky hafa momba ny Baiboly hanatanjaka ny finoany.
21. Ahoana no azontsika ampitomboana ao amin’ny tenantsika sy ao amin’ny mpiara-belona amintsika, finoana sahala amin’ny nananan’i Noa?
21 Jehovah Andriamanitra no Mpanorina lehibe sy Ilay manome be dia be ny zavatra rehetra ho an’ny olombelona (Salamo 127:1; 145:16; Mpitoriteny 3:10-13). Izy no nanome ho an’i Noa ny planin’ny sambo fiara sy ireo toromarika ilaina mba hanorenana izany. Noho ny fiaraha-miasa an-tsitrapo amin’ilay Noa Lehibe, dia Jesosy Kristy, dia nomaniny ny fanavotana ny olombelona mankatò amin’ny fahotana sy ny fahafatesana. Tamin’ny alalan’ny Zanany, dia naoriny koa ny “sambo fiara” amin’ny andro ankehitriny, dia ny paradisa ara-panahy miroborobo mety hahitan’ny lehilahy sy ny vehivavy manam-pinoana fiarovana ka hamelomana fanantenana ny hahazo ny fiainana mandrakizay (Matio 20:26-28; Jaona 3:16; 17:3). Enga anie isika mbola hanampy betsaka amin’ny mpiara-belona amintsika hampitombo ny finoany sy hampifamatotra fifandraisana akaiky amin’i Jehovah sy ny Zanany! Enga anie isika ho afaka hanampy azy ireny koa ho tia ny rariny sy hankahala ny faharatsiana (Hebreo 1:9)! Amin’ny fanaovana toy izany, hetsehin’ny finoana sahala amin’ny an’i Noa, dia ho azontsika atao ny hanohy hiara-hanorina ho an’ny mandrakizay. — I Timoty 4:15, 16.
FANONTANIANA VITSIVITSY HO FAMERENANA:
◻ Ahoana no nanorenan’i Jesosy ho an’ny mandrakizay?
◻ Inona avy no tarehi-marika miavaka voamarikao tao amin’ny rapaoro taona 1985?
◻ Nahoana moa no ilaina ireo volavolan-kevitra momba ny fanorenana teokratika?
◻ Ahoana no azontsika rehetra anorenana amin’ny fananana zava-kendrena hentitra?
[Efajoro, pejy 24]
Ny kongregasiona iray any amin’ny tany iray atsy Afrika andrarana ny asa dia voaforon’ny mpitory 95, izay mandray anjara daholo amin’ny asa isam-bolana. Ny isan’ny mpanatrika ireo fivoriana marihiny amin’ny ara-keviny dia 130, nefa 160 amin’ny lahateny ampahibemaso. Miisa ho 3 ny mpitory maharitra mandavantaona ao aminy, ary vao haingana dia 8 ny mpitory maharitra mpanampy. Tao anatin’ny enim-bolana monja, dia 21 no vao nanomboka nitory.
[Efajoro/Sary, pejy 16, 17]
NY VAVOLOMBELON’I JEHOVAH DIA MANORINA HATRAIZA HATRAIZA
Maneran-tany, dia mpitory maharitra 322 821 no niasa isam-bolana (fitomboana 24,7 isan-jato).
Tafakatra ho 3 024 131 ny isan’ny mpitory rehetra (fitomboana 6,4 isan-jato).
Isan’ny fiverenana mitsidika: 224 725 918 (fitomboana 14,8 isan-jato).
Isan’ny fampianarana Baiboly: 2 379 146 (fitomboana 16,2 isan-jato).
[Sary]
Mpitory maharitra miainga mba hitory isam-baravarana any Brooklyn (New York).
Fivoriambe tany Montréal (Québec, Canada): Natao tamin’ny fiteny efatra ambin’ny folo ny fandaharana.
Vavolombelona mitory any Castle Comb (Wiltshire, Angletera).
Antokon’olona iray mianatra ny Baiboly any Yap (Micronésie).
Trano vitsivitsy ampiasaina mba hampitomboana ny asa fampandrosoana ara-panahy maneran-tany:
Any Brooklyn, ny Baiboly sy ny boky momba ny Baiboly dia alefa any amin’io trano miorina ao amin’ny 360 Furman Street io. 92 000 metatra toradroa ny velarany eo amin’ny tany.
Voaorina tao anatin’ny 31 ora io Efitrano Fanjakana io (Downpatrick, Irlande Avaratra).
Io Efitrano naorina tany Roma io no anankiray amin’ireo Efitrano fanaovana fivoriambe maro ampiasain’ny Vavolombelon’i Jehovah maneran-tany.
Aorina amin’izao fotoana izao io trano tsara tarehy io ho fanampin’ny Betela any Japon.
[Tabilao, pejy 20-23]
RAPAORO MANERAN-TANIN’NY VAVOLOMBELON’I JEHOVAH, TAOM-PIASANA 1985
(Jereo ny gazety)
[Tabilao, pejy 25]
Tamin’ny 1985, dia tany valo no nilaza fa nahazo tampon’isa mihoatra ny mpitory 100 000:
Etazonia 723 220
Brésil 177 904
Meksika 173 037
Italia 127 526
Nizeria 121 729
Alemaina 115 604
Grande-Bretagne 103 522
Japon 103 117