Ny fanambarana ataontsika sy ny fitomboan’ilay Fanjakana
“Jehovah (...) anie hampitombo anareo ho arivo toraka izao ka hitahy anareo, araka izay efa nolazainy taminareo!” — DEOTERONOMIA 1:11.
1, 2. a) Inona no nampanantenain’i Jehovah ny Isiraely? b) Ahoana no nahatanterahan’ny fampanantenany? Niankina tamin’inona anefa ny fahatanterahany?
“HO ARIVO TORAKA IZAO!” Izany no fitomboana nirin’i Mosesy ho an’ny Isiraely, ‘firenena masin’Andriamanitra’. Nanome fampanantenana lehibe tokoa Jehovah ho an’io firenena io (Eksodosy 19:5, 6; jereo koa Genesisy 12:2, 3). Nitana ny teny nataony ve izy?
2 Tokony ho 500 taona taorian’ny nanononan’i Mosesy ireo teny voalaza eo ambony ireo, dia azo natao ny nahatsapa toy izao: “Ary ny Joda sy ny Isiraely dia maro, tahaka ny fasika amoron-dranomasina ny hamarony, sady mihinana sy misotro ary mifaly.” Tonga avy any lavitra ny mpanjakavavin’i Sheba mba handinika ny lazan’ny fanjakan’ny Isiraely. Teo anoloan’izany fisehoan-javatra izany anefa, dia nihiaka toy izao izy raha niteny tamin’i Solomona: “Na dia ny antsasany aza tsy voalaza tamiko akory: fa, indro, ny fahendrenao sy ny voninahitrao dia mihoatra lavitra noho izay laza efa reko. (...) Isaorana anie Jehovah Andriamanitrao (...) noho ny fitiavan’i Jehovah, izay itiavany ny Isiraely mandrakizay.” (I Mpanjaka 4:20; 10:7-9). Marina tokoa fa raha mbola nitondra tena koa tamin’ny naha-vavolombelon’i Jehovah nahatoky ny Isiraelita, dia tsy diso ny nanome azy ireo fanambinana sy fitomboana Jehovah.
3. a) Inona no fanambarana nataon’i Petera ny amin’ny vahoaka tafangona ‘ho fankalazana ny anaran’Andriamanitra’? b) Nahoana no mety amin’izany vahoaka izany ny anarana hoe Vavolombelon’i Jehovah?
3 Arivo taona mahery taty aorian’i Solomona, ny apostoly Petera dia nanao fanambarana teo anatrehan’ny kolejy foiben’ny kongregasiona kristiana izay nivory tany Jerosalema. Tamin’izay fotoana izay izy dia “nanambara izay nitsinjovan’Andriamanitra ny jentilisa tamin’ny voalohany hanalany olona aminy hankalazana ny anarany.” (Asa. 15:14.) Olona nankalazana ny anaran’i Jehovah ny Isiraely. Tamin’izany fotoana izany anefa Andriamanitra dia nanangona olona hafa “hankalazana ny anarany”. Tamin’io dia Isiraely ara-panahy, ny kongregasiona kristiana. Io firenena vaovao io koa dia natao hanao fanambarana ny amin’i Jehovah amin’ny fampahafantarana ny fikasany momba ny Fanjakany (Galatiana 6:16). Ara-dalàna àry raha toa ireo izay mahaforona azy ka fantatra maneran-tany amin’ny anarana hoe ‘Vavolombelon’i Jehovah’, anarana izay ny Mpamorona mihitsy no nampahafantatra azy ny rehetra ao amin’ny Isaia 43:10-12. Fa amin’ny heviny ahoana izy no mahaforona vahoaka ho an’ny anaran’i Jehovah?
“Vavolombeloko”
4. a) Nahoana moa ny Vavolombelon’i Jehovah no ‘vavolombelon’i Jesosy’ koa? b) Araka ny Soratra masina, ohatra inona no navelan’i Jesosy ho antsika raha ny amin’ny fanaovana fanambarana ny amin’i Jehovah?
4 Jesosy koa, tetsy andaniny, dia nanankina asa nanirahana tamin’io vahoaka io tamin’ny fanambarana hoe: “Ho vavolombeloko (ianareo) (...) hatramin’ny faran’ny tany.” (Asa. 1:8). “Vavolombeloko...” Nilaza ve izany fa tsy hanao fanambarana afa-tsy ho an’i Jesosy ihany izy ireo fa tsy ho an’i Jehovah? Tsy izany velively. Tamin’izay fotoan-tsarotra izay, nialan’ny fankasitrahan’Andriamanitra avy eo amin’ny Isiraely araka ny nofo ho eo amin’ny Isiraely ara-panahy, dia nilaina ny hanaovana fanambarana feno ny amin’i Kristy, satria izy no nahaforona ny fanorenan’ilay firenena vaovao. Jesosy anefa dia nanaiky ny Rainy foana. Nanome ohatra ho antsika tokoa izy tamin’ny fanaovan’ny tenany fanambarana ho an’ny anarana sy ny Fanjakan’i Jehovah. — Jaona 5:30; 6:38; 17:6, 26; 18:37.
5. a) Raha ny amin’i Jesosy, tokony hanao fanambarana ny amin’inona isika? b) Amin’ny fanaovana toy izany, amin’ny ahoana isika no manaraka ny diany?
5 Jesosy Kristy no Mpanalalana amin’ny fanekena vaovao izay noho izany no mahatonga ireo kristiana voahosotry ny fanahy masina hantsoina handova ilay Fanjakana. Izy no “Fiasana lehibe indrindra hahazoana fiainana”, ilay nampiasain’i Jehovah mba hanavotana ny olona amin’ny fahafatesana. Mpanjaka koa izy, ary amin’ny maha-izany azy, dia “tsy maintsy manjaka izy” mandra-panaikin’ny fahavalon’Andriamanitra sy ny olona rehetra azy ka ho voaova ho paradisa kanto ny planetantsika. Farany, izy dia “Zanak’Andriamanitra” izay miantso ireo maty ao am-pasana mba hananganana azy ireny (Hebreo 9:15; Asa. 3:15; Salamo 110:1, 2, 5; I Korintiana 15:25-28; Lioka 23:42, 43, MN; Jaona 5:25-29). Amin’izany, raha Vavolombelon’i Jehovah isika, dia manao fanambarana koa ny amin’ny anjara asa lehibe raisin’ny Zanaka amin’ny fanamarinana ny anaran’Andriamanitra. Amin’ny fanaovana toy izany, dia arahintsika koa ny dian’ny Tompontsika izay “Vavolombelona mahatoky”, ny vavolombelon’i Jehovah lehibe indrindra. — Apokalypsy 1:5; 3:14; Jaona 18:37; I Petera 2:21.
Ny Vavolombelona — Iza moa izany?
6. a) Iza moa amin’izao andro izao no hany vahoaka manao fanambarana ny amin’ilay Fanjakana? b) Amin’ny heviny ahoana izy no manatanteraka “asa lehibe kokoa” noho ny an’i Kristy?
6 Amin’izao andro izao dia misy vahoaka tafaray izay manao fanambarana “hatramin’ny faran’ny tany”. Izany dia ‘vahoaka tafangona ho an’ny anaran’Andriamanitra’, dia ny vahoaka noresahin’ny apostoly Petera ka manao fanambarana ho an’i Jehovah sy ny Fanjakany mesianika. Ny amin’izany, dia izao no nolazain’i Jesosy ho an’ireo mpianany: “Izay mino Ahy, ny asa ataoko no hataony koa; ary hanao asa lehibe noho izany aza izy, satria Izaho mankany amin’y Ray.” (Jaona 14:12). Mipetraka eo ankavanan’ny Rainy any an-danitra Jesosy Kristy Mpanjaka ka mitarika ankehitriny ny asa fanambarana lehibe indrindra nalamina teto an-tany hatramin’izay. Araka ny nambarany anefa, rehefa ho ‘voatory any amin’ny tany onenana manontolo ho vavolombelona amin’ny firenena rehetra’ “ity vaovao tsaran’ny fanjakana ity”, “dia vao ho tonga ny farany”. — Matio 24:14, MN.
7. a) Nahoana moa ireo fivavahana ao amin’ny finoana lazaina fa kristiana no tsy manao fanambarana? b) Mifanohitra amin’izany, nahoana ireo Vavolombelon’i Jehovah no mampiseho zotom-po aoka izany amin’ny asany?
7 “Ity vaovao tsaran’ny fanjakana ity” no tena vaovao mahaliana indrindra amin’izay natao ho ren’ny olona. Marina fa tsy milaza izany mihitsy ireo Fiangonana ao amin’ny fivavahana lazaina fa kristiana. Kanefa noho izy ireo tsy manantena ny Fanjakan’Andriamanitra, dia tsy mahagaga loatra raha tsy manao fanambarana ny amin’izany izy. Tsy voamariny akory aza ny fisehoan-javatra lehibe indrindra teo amin’ny Tantara rehetra, dia: ny fahatongavan’ny Zanak’olona ao amin’ny voninahitry ny Fanjakana, rehefa nipetraka teo amin’ny seza fiandrianana any an-danitra izy mba hitsara ireo firenena. Zava-nitranga mendrika ny hanaovana fanambarana anefa izany. Noho izany, dia ny Vavolombelon’i Jehovah sy Kristy izao, eo ambany fitarihan’ireo anjely, no manambara “filazantsara mandrakizay (...) amin’izay monina ambonin’ny tany sy amin’ny firenena sy ny fokom-pirenena sy ny samy hafa fiteny ary ny olona rehetra”. Mandray anjara amim-pahadodonana amin’io fanambarana io ve ianao?. — Apokalypsy 14:6, 7; Matio 25:31-33.
Fanambarana niavaka tamin’ny 1984
8. a) Nahoana isika no afaka mifaly noho ny rapaoron’ny taom-piasana 1984? b) Inona no manintona ireo mpianatra vaovao?
8 Ny rapaoro maneran-tany, taom-piasana 1984, izay mitana toerana ao amin’ny pejy faha-20 ka hatramin’ny 23 amin’ity gazety ity dia mampiharihary fa mitahy aoka izany ireo fiezahana amim-pahatsorana ataon’ny Vavolombelony Jehovah. Amin’ny fitambarany, dia 203 ny firenena voalaza ao. 172 amin’ireo no manamarika fitomboana isan’ny mpitory ilay Fanjakana. Miaiky an-tsitrapo ireo Kristiana ao amin’ireo tany ireo fa ‘ny Tompo no nampitombo sy nampandroso azy ireo tamin’ny fifankatiavana sy ny fitiavana ny olona rehetra’. (I Tesaloniana 3:12.) Ny fitiavana sy ny firaisan-tsaina izay manjaka eo amin’ireo Vavolombelon’i Jehovah dia miaraka amin’ny fanambarana ny amin’ilay Fanjakana mba hanintona mpianatra vaovao maro be. Mihatra amin’izy ireo amin’izao andro izao ireto tenin’i Jesosy manaraka ireto: “Ho fantatrareo ny marina, ary ny marina hahafaka anareo tsy ho andevo.” — Jaona 8:31, 32.
9. a) Inona no anjara izay tombontsoanao ny nandray azy teo amin’ny fanaovana an’io filazana asa io? b) Mampiseho inona ny tarehi-marika hita eo raha ny amin’i Jehovah sy ny vahoakany?
9 Ahoana no nahafahana nanorina io rapaoro manaitra ny saina io? Noho ireo filazana asa rehetra nomenao tamim-pahatokiana isam-bolana raha mpitory ilay Fanjakana ianao. Amin’izany, moa ve tsy mahafaly anao ny nandray anjara kely tamin’io filazana asa lehibe io? Ahariharin’ireo tarehi-marika fa tena ‘nampidina’ ny fitahiany tokoa Jehovah teo amin’ireo Vavolombelony, teo amin’ny “vahoaka” nampiraisiny “noho ny anarany” sy mba hanao ny asany tamin’ny fatoran’ny fitiavana mampiray hatraiza hatraiza.” — Malakia 3:10; Salamo 56:10, 11; Kolosiana 3:14.
10. a) Nahoana moa ny vavolombelona rehetra no tokony haneho fitiavana fandavan-tena? b) Inona no lazain’ny Soratra masina ny amin’ny olona tsy mivadika sy ny valisoan’izy ireo?
10 Kristiana maro be no mila fahafoizan-tena lehibe rehefa manao ny fanambarany noho ny fanenjehana na ny fahasahiranana hafa. Tsy mahagaga izany satria ny teny hoe “vavolombelona”, araka ny ampiasantsika azy eto, dia mandika ny teny grika hoe martus na martur niavian’ny anarana hoe “maritiora” fampiasantsika. Io teny io anefa dia manondro olona iray izay mamoy ny ainy noho ny fanambarana ataony. Noho izany, raha Vavolombelon’i Jehovah isika, dia tokony haneho fitiavana fahafoizan-tena. Zava-dehibe ny hisehoantsika ho tapa-kevitra foana ny handany hery tsy hikely soroka sy tsy hivadika hatrany na manao ahoana na manao ahoana toe-javatra, hatramin’ny fahafatesana raha ilaina izany. — Lioka 9:23; Jereo Joba 2:3; 27:5; 31:6; Asa. 22:20; Apokalypsy 2:10.
Ireo fitahiana voatokana ho an’ny kristiana tsy mivadika
11, 12. a) Inona no toky omen’i Jehovah antsika? b) Ahoana no nandresen’ireo mpanompony ny fampahorian’ny fitondrana jadona maromaro?
11 Tamin’ny fotoam-panenjehana, ireo izay nangonina ‘ho fankalazana ny anaran’i Jehovah’ dia nila “hery mihoatra noho ny hery fahita” mba hanohanana ireo fanafihana mahery vaikan’i Satana sy ireo demoniany. Tsy vitan’ny hoe manome izany hery izany ho an’ireo vavolombelony mahatoky Jehovah, fa manafaka azy ireo koa izy ary manome fanambinana azy (II Korintiana 4:7-9 MN; Isaia 54:17; jeremia 1:19). Ho ohatra, dia aoka hotadidiantsika ny tarehin-javatra nisy tamin’ny fotoan’ny Ady Lehibe Faharoa teo anivon’ireo Fanjakana lehibe tao amin’ny “Axe”, izany hoe Alemaina, Italia sy Japon. Tamin’ny alalan’ny fitondrana jadona lian-dra, Satana dia ‘nandoa avy amin’ny vavany, onibem-panenjehana’ noho ny fanantenana ny hitelina ny asa fanambarana tarihin’ny fandaminan’Andriamanitra any an-danitra, dia fandaminana oharin’ny Soratra masina amin’ny vehivavy. Tratrany ve ny zava-nokendreny? Tsy izany velively. Nitarika ny fisehoan-javatra Jehovah, hany ka navarin’ireo firenena demokratika any amin’ny hantsana io “onibe” io. Araka izany, dia ‘nofongorana ny ratsy fanahy’, fa salama tsara kosa ireo Vavolombelona nahatoky tany amin’ireo tany resahina. — Apokalypsy 12:15, 16 MN; Salamo 37:28, 29.
12 Tsy ela izay, tany amin’ireo tany telo voatonona eo aloha, ny Fikambanana Watch Tower dia voatery nanorina sy nanisy fitaovana tao amin’ny trano fanontam-pirinty lehibe nipoiran’ny onibe iray karazany hafa hatreo: Baiboly sy boky manazava ireo fampianarana ao amin’ny Soratra masina momba ilay Fanjakana an-tapitrisany maro, ho fampandrosoana ny Vavolombelon’i Jehovah mbamin’ny olon-kafa mangetaheta ny fahamarinana. Any Alemaina, any Italia sy any Japon, dia mpitory maherin’ny 300 000 amin’izao andro izao no mikely aina mitondra ny fanambarany any amin’ny mpiara-belona aminy. Ary maneran-tany, dia mitahy ireo mpanompony tsy mivadika Jehovah amin’ny fanomezana fitomboana azy ireo. — Jereo Salamo 115:12-15.
13. a) Tapany inona amin’ny rapaoro maneran-tany no mampiharihary fa ireo vavolombelona mahatoky dia nampihatra ny teny fototra tamin’ny taona 1984? b) Amin’ny ahoana izany no tokony hamporisika antsika?
13 Kanefa ny Devoly, noho ny fahafantarana fa kely sisa ny androny dia mbola manohy miady ihany ‘amin’izay mitandrina ny didin’Andriamanitra sy mitana ny filazana an’i Jesosy’. (Apokalypsy 12:12, 17.) Mahery vaika indrindra ny famelezany any amin’ireo firenena isaina eo amin’ny fizarana hoe “Tany hafa 28”. Ireo Vavolombelona any dia mampihatra amin’ny fomba mahagaga ny teny fototra amin’ny taona 1984: ‘Miseho ho mitory tsy amin-tahotra ny tenin’Andriamanitra kokoa izy ireo’. (Filipiana 1:14, MN.) Tsara homarihina fa tamin’ny fitambarany dia nitombo 3,1 isan-jato ny isan’ny mpitory tany amin’ireo tany ireo. Enga anie àry isika ka handray soa amin’ny ohatra mampahery omen’izy ireo ary hanohy amin-jotom-po hanolotra ho an’Andriamanitra “fanati-piderana, izany hoe vokatry ny molotra izay manao fanambarana ampahibemaso ho an’ny anarany”. — Hebreo 13:15, MN.
14. a) Inona no mety hiafara amin’ny “fanambarana” ho antsika? b) Ao anatin’ny toe-javatra manao ahoana isika no tokony hanohy hanao fanambarana amin-kerim-po? Nahoana?
14 Arakaraka ny hiharatsian’ny toe-piainana maneran-tany, dia tsy isalasalana fa henjehina ny kristiana hafa, hotarihina eo anoloan’ny fitsarana sy hampidirina am-ponja. Araka ny nampiomanan’i Jesosy antsika, ny fitsapana toy izany dia anisan’ny zavatra “ho tonga” alohan’ny farany. Nanao izao fanamarihana izao koa anefa Kristy: “Ho tonga ho vavolombelona aminareo izany.” Amin’izany, na manao ahoana na manao ahoana toerany, ny Vavolombelon’i Jehovah dia tokony hanao fanambarana foana ho an’Andriamanitra sy ho an’i Kristy. Be dia be no efa manao izany sahady na dia ao aza ny fanoherana mafy avy amin’ny fianakaviany, ny fanesoesoan’ny mpiara-miasa aminy na ny mpiara-mianatra aminy sy ny fanarabian’ireo olona itoriany. Raha ny amin’izay mikasika anao, manao fanambarana amin-kerim-po ve ianao na dia ao aza ny toe-javatra sarotra? Raha izany no izy, dia miantefa aminao koa izao fampaherezan’i Jesosy izao: “Amin’ny faharetanareo no hahatananareo ny ainareo.” — Lioka 21:7, 9-19.
Ny fitomboan’ilay Fanjakana
15. Manonòna tarehi-marika miavaka sasany amin’ny tabilao eo ambony.
15 “Ny fitomboan’ilay Fanjakana” — Azo natao ve ny nieritreritra foto-kevitra nety kokoa noho io ho an’ireo fivoriamben’ny distrikantsika tamin’ny 1984? Ny taona lasa no nahazoantsika ny fitomboana lehibe indrindra hatramin’izay, araka ny porofoin’ny tabilao eto ambony; naorina izy io noho ireo rapaoron’ny sampan’ny Fikambanana Watch Tower, izay mandahatra ny asan’ny Vavolombelon’i Jehovah any amin’ny tany 203.
16. Tonòny ny sasany amin’ny fanazavana mafana natao tany amin’ny faritra samy hafa amin’ny gilaoby.
16 Tsy hanana toerana ampy mihitsy isika mba hamoahana ny famelabelarana tamin-kafanam-po nampiarahin’ireny sampana ireny tamin’ny rapaorony isan-taona. Ireto anefa misy santionany vitsivitsy avy any amin’ny faritra isan-karazany eo amin’izao tontolo izao.
Alaska: Nivory ny vohitr’i Metlakatla manontolo mba hijery Vavolombelon’i Jehovah 230 manorina Efitrano Fanjakana tsara tarehy iray tao anatin’ny 32 ora. Natao haingana ny fitokanana azy, ny alahady ihany.
Honduras: Tratranay ny tampon’isan’ny mpitory 3 663. Koa satria olona 17 005 no nanatrika ny Fahatsiarovana, dia mbola be ny asa.
Brésil: Eo amin’ny farany amin’ny tampon’isa nisesy, dia mpitory 160 927 izahay izao. 474 450 no isan’ny nanatrika ny Fahatsiarovana.
Thaïlande: Tsara ny fitiavana ny asan’ny mpitory maharitra: 22 isan-jato tamin’y mpitory no nanao an’io asa io tamin’ny volana aprily.
Papouasie-Nouvelle-Guinée: Nitombo 91 isan-jato ny tampon’isan’ny mpitory maharitra mpanampy; olona 7 704 no nanatrika ny Fahatsiarovana tarehi-marika nihoatra 1 000 mahery noho ny tamin’ny taona teo aloha.
Autriche: Manomboka mitsiry ny fitiavana ny asan’ny mpitory maharitra. Isa be indrindra dimy nisesy no voamarikay tamin’io lafiny io. Tetsy andaniny koa, ny isan’ny mpitory dia nahitana tampon’isa fito nisesy, ka 15 618 ny farany.
Zambie: Nahatratra isan’ny mpitory be indrindra 58 925 izahay. Nahavory olona 393 431 ny Fahatsiarovana, izany hoe nihoatra 110 447 noho ny tamin’ny taona teo aloha.
17. a) Inona no fandrosoana voamarika teo amin’ireo mpitory maharitra? b) Zava-kendrena inona avy no tsara raha ferana? Mety amin’iza indrindra izany? d) Isa be indrindra inona no tratran’ireo mpitory? Inona no nety ho nanampy hahazoana izany vokatra izany?
17 Asehon’ireo rapaoro koa fa manohy manome ohatra ireo misionera sy mpitory maharitra amin’ny fanaovana fanambarana amim-pahatokiana any amin’ireo faritany tsy mbola niasana sy any amin’ireo efa niasana hatramin’ny ela. Mampahery indrindra ny fitomboan’ny isan’izy ireo. Tamin’ny fitambarany, dia mpitory maharitra mpanampy 323 644 no nitory ny vaovao tsara tamin’ny volana aprily, tarehi-marika mbola tsy hita mihitsy izay mampiseho fitomboana 49 isan-jato. Tamin’ireo dia mihoatra ny iray no efa nahazo tombontsoa vaovao rehefa nanatevin-daharana an’ireo mpitory maharitra mandavantaona. Afa-tsy izany koa, dia mpitory ilay Fanjakana tanora maro no nametra ho zava-kendrena ny ho tonga mpitory maharitra, ary manao fandaharana azo ampiharina izy ireny mba hiomanana amin’izany ao anatin’ireo taona faramparany ianarany. Izany anton-javatra rehetra izany dia nandray anjara tamin’y fitomboana mahagaga teo amin’ny isan’ny mpitory maharitra. Izany dia nanampy koa tamin’ny famelomana ny zotom-pon’ireo kongregasiona, ka izany dia azo antoka fa tsy hoe tsy misy fifandraisana amin’ny tampon’isa vaovao maneran-tany azontsika tamin’ny isan’ny mpitory 2 842 531, dia tarehi-marika izay nihoatra 7,2 isan-jato noho ny tampon’isa voamarika tamin’ny 1983. Moa tsy faly ve ianao nandray anjara tamin’izany fitsambikinana nandroso izany?
18. a) Tamin’ny lafiny hafa inona moa no nanamarihana fitomboana niavaka tamin’ny 1984? b) Rehefa heverina amin’ny filazana momba ny Fahatsiarovana, fandrosoana inona koa no azo ampoizina? Ahoana no azon’ireo mpamaky Ny Tilikambo Fiambenana andraisana anjara amin’izany?
18 Azo an-tsaina tsara kokoa ny fanambarana nataon’ny kristiana tamim-pifaliana tamin’ny 1984 rehefa heverina ny fandrosoana voamarika tamin’ny fizarana ireo gazetintsika sy ny bokintsika hafa, ny isa be indrindra tamin’ny ora natokana hitoriana, ary koa ny fitomboana be dia be hita tamin’ny isan’ny fiverenana mitsidika sy ny fianarana ny Baiboly natao hanampiana ireo olona tsara fikasa. Tsy andrintsika izay hahafantarana ny ho vokatry ny fanompoana amin-jotom-po ataontsika amin’ny ho avy. Mbola afaka hitatra ny fijinjana rehefa heverina amin’ny vahoaka tafavory tamin’ny Sakafon’ny Tompo tamin’ny 15 aprily tamin’ny taona lasa. Ao amin’ireo kongregasionan’ny Vavolombelon’i Jehovah amin’ny tany manontolo, dia olona 7 416 974 no nanatrika an’io fahatsiarovana io. Tamin’io isa io, dia 9 081 no nampiseho fa anisan’ny ‘ondry vitsin’i’ Jesosy izy tamin’ny fandraisana ny mofo sy divay natao marika. Ny faniriana mamin’ny fonay indrindra dia ny hanohizan’ny mpamaky ny gazetinay rehetra hitombo eo amin’ny lafiny ara-panahy mba handraisana anjara amin’ny fanambarana lehibe sy amin’ny fijinjana miandry antsika. — Jereo Efesiana 4:15; Filipiana 1:9-11.
19. Ny amin’inona no azontsika isaorana an’i Jehovah? Inona no hangatahintsika aminy amin’ny ho avy?
19 Tsy azo lavina fa azontsika atao ny mindrana ny tenin’i Mosesy mba hilazana amin’ny Vavolombelon’i Jehovah izay mahaforona amin’izao andro izao ny vahoaka tafangona ‘ho fankalazana ny anaran’ny’ Mpamorona: “Jehovah Andriamanitrareo efa nahamaro anareo, ary, indro, efa maro toy ny kintana eny amin’ny lanitra hianareo izao.” (Deoteronomia 1:10). Mivavaka isika mba hanohizan’i Jehovah Mpanjaka Tompontsika manitatra ny fanambarana ataontsika ho an’ny Fanjakany sy hanampy amin’ny fitomboantsika.
Araka ny hevitrao...
◻ Nahoana moa ny Vavolombelon’i Jehovah no tokony ho ‘vavolombelon’i Jesosy’ koa?
◻ Inona no fanambarana miavaka nataon’ny olon’Andriamanitra tamin’ny 1984?
◻ Ahoana no ahafantarantsika fa mitahy ireo vavolombelony mahatoky Jehovah?
◻ Tokony hanosika antsika ho amin’inona ny rapaoro taona 1984?
[Efajoro, pejy 26]
‘Faly, sambatra, velom-pankasitrahana’
Avy any amin’ny tany iray anasiana fepetra amin’ny asan’ny Vavolombelon’i Jehovah hatramin’ny 40 taona mahery no naharaisanay izao fitantarana manaraka izao: “Ny fifaliana lehibe indrindra tsapanay dia ny fahitana fitaran’ny asa fitoriana sy fampianarana. Be dia be no nanomboka ny asan’ny mpitory maharitra mpanampy. Naneho toy izao ny fihetseham-pony ny anankiray tamin’izy ireny: ‘Feno fifaliana sy ravoravoana ary fahasambarana sy fahafahampo lalina ny foko.’ Nilaza toy izao ny mpitory maharitra mpanampy hafa iray: ‘Sambatra aoka izany aho manao zavatra ankasitrahan’i Jehovah. Izany dia efa namela ahy hanomboka fianarana Baiboly dimy vaovao.’ Nanampy teny toy izao ny fahatelo: ‘Velom-pankasitrahana an’i Jehovah aho noho ny nanampiany ahy hamboly fitiavana nilaiko mba hamonjena ny mpiara-belona amiko.’ Tao amin’ny kongregasiona iray misy mpitory 61, dia rahalahy sy anabavy 38 no nanompo tamin’ny naha-mpitory maharitra mpanampy tamin’io volana io. Tamin’ny asa nataon’izy ireo, dia fampianarana ny Baiboly vaovao 66 no natomboka.”
[Tabilao, pejy 20-23]
RAPAORO MANERAN-TANIN’NY VAVOLOMBELON’I JEHOVAH, TAOM-PIASANA 1984
(Jereo ny gazety)
[Tabilao, pejy 25]
Famakafakana ny rapaoro maneran-tany
1984 1983 Fitomboana
Sampan’ny Fikambanana Watch Tower 95 94
Tany voalaza 203 205
Tampon’isan’ny mpitory 2 842 531 2 652 323 7,2%
Ara-kevin’ny mpitory 2 680 274 2 501 722 7,1%
Ara-kevin’ny mpitory maharitra 258 936 206 098 25,6%
Mpitory maharitra mpanampy (aprily) 323 644 217 860 48,6%
Ora niasana 505 588 037 436 720 991 15,8%
Boky voazara 36 639 925 36 039 400 1,7%
Famandrihana 1 812 221 1 756 153 3,2%
Gazety 287 358 064 258 698 636 11,1%
Fiverenana mitsidika 195 819 093 174 687 309 12,1%
Ara-kevin’ny fianarana Baiboly 2 047 113 1 797 112 13,9%
Isan’ny nanatrika ny Fahatsiarovana 7 416 974 6 767 707 9,6%
Nandray anjara tamin’ny Fahatsiarovana 9 081 9 292