Ireo biby voalazan’ny Apokalypsy: Nahoana no manintona ny saina izany?
NY APOKALPSY! Izany no anankiray amin’ireo anarana manaitra omena ny boky farany ao amin’ny Baiboly. Antsoina hoe bokin’ny Fanambarana koa izy io. Io zavatra voasoratra io dia feno sary voalazalaza amin’ny teny velona, ka anisan’izany ny niavaka indrindra dia ny an’ny dragona iray sy ny biby dia telo. Misy raiki-tahotra noho ireo biby ireo. Ny hafa mihevitra izany ho vokatry ny fanaovana sary an-tsaina feno rediredin’ny anti-dahy iray. Inona, raha izany no izy, no antony tokony hamakianao ny fitantarana ny amin’ireo biby voalazalazan’ny Apokalypsy? Satria mifamatotra amin’izay hanjo azy ireo ny fahasambaranao.
Marina fa efa be taona tokoa ny apostoly Jaona rehefa nanoratra ny bokin’ny Fanambarana, eo amin’ny 1 900 taona izao. Kanefa milaza ve izany fa ny filazalazana ny amin’ireo biby ireo dia vokatry ny fahitan-javatra tsy misy ao an-tsain’antitra? Tsia, sady tsy i Jaona rahateo no lehilahy voalohany nanana fahitana karazan’izany. Tao anatin’ny fahanterany, ny lehilahy iray natao hoe Daniela dia nahita biby tamin’ny nofy koa. Niharihary fa ireny fahitana ireny dia faminaniana marina nanambara fiovan’ny fitondram-panjakan’olombelona (Daniela toko faha-7 sy 8). Afa-tsy izany koa, ny tenan’i Jesosy mihitsy dia nanamarina fa nahazo tsindrimandry avy tamin’Andriamanitra i Daniela, satria izy niresaka azy io ho toy ny mpaminany sy nanonona ireo zavatra nosoratany. — Matio 24:15.
Nasehon’i Jesosy an’ireo apostoliny fa aorian’ny hahafatesany dia haharay toromarika amboniny avy amin’Andriamanitra izy ireo (Jaona 16:12, 13). Lafiny maro amin’ny bokin’ny Apokalypsy anefa no tanteraka tamin’ny fomba miavaka. Matoky noho izany isika ka afaka mahazo antoka fa avy amin’ny tsindrimandrin’Andriamanitra koa ireo fahitana momba ny biby voalazan’ny Apokalypsy hitan’i Jaona. — II Timoty 3:16.
Manomboka amin’izao teny izao ny bokin’ny Apokalypsy: “Ny fanambaran’i Jesosy Kristy, izay nomen’Andriamanitra Azy (...), ary naniraka ny anjeliny Izy hanambara [hampiseho ho famantarana, MN] amin’i Jaona mpanompony.” (Apokalypsy 1:1). Miharihary àry fa ireo sary raketin’ny bokin’ny Fanambarana, anisan’izany ny an’ireo biby, dia ara-panoharana fa tsy tokony horaisina ara-bakiteny. Tsy misy tokony hampangovitra velively amin’ny famakiana ny filazalazana azy ireo. Ireny biby ara-panoharana ireny dia mitondra fahalalana fototra ho an’ny kristiana amin’ny fanomezana azy fahafahana hiaro ny fifandraisany amin’Andriamanitra. Noho izany antony izany no nahafahan’ny apostoly Jaona nanoratra toy izao: “Sambatra izay mamaky sy ny mihaino ny tenin’ity faminaniana ity ka mitandrina izay voasoratra ato anatiny; fa antomotra ny andro.” Ny fahalalana tsara ireo fanoharana ireo dia mety hitondra fahasambarana ho anao dieny izao sy amin’ny ho avy. — Apokalypsy 1:3.