Fampaherezana ho an’ireo mpihazona tsy fivadihana
“Nanohana ahy noho ny tsy fivadihako ianao.” — SALAMO 41:12, MN.
1. Noho ny antony inona avy moa no ilàn’ny olon’i Jehovah fampaherezana?
MILA fampaherezana ireo vavolombelon’i Jehovah tsy mivadika satria ianjadian’ny fanenjehana. Raha ny marina, dia tsy tokony hahagaga azy ireny izany karazam-pisedrana izany, satria nampiomana ireo mpianany tamin’izao teny izao Jesosy Kristy: “Ny mpanompo tsy lehibe noho ny tompony. Raha nanenjika Ahy izy, dia hanenjika anareo koa.” (Jaona 15:20). Mila fampaherezana indrindra anefa ireo mpanompon’Andriamanitra amin’izao andro izao. Nahoana? Satria ilay voalohany niala tamin’ny tsy fivadihany, Satana Devoly, dia nazera ho etỳ akaikin’ny tany ary kely sisa ny androny. Noho izany dia mitarika ady farany ho fanoherana an’Andriamanitra sy ireo mpanompony izy. — Apokalypsy 12:7-9, 17.
2. Inona no tsapan’ny kristiana rehefa fantany fa mijaly ireo namany?
2 Amin’ny maha-mpanompon’i Jehovah, dia mivavaka amin-kafanam-po isika ho an’ireo rahalahintsika sy anabavintsika miasa ao anatin’ny fandrarana na rahonana, ampiharan’ireo mpanenjika azy fitondrana ratsy mihitsy aza (Asan’ny apostoly 12:1; II Tesaloniana 1:4). Derainay ireo namantsika izay mizaka amim-pahatokiana ny fanevatevan’ireo mpivadi-pinoana na olon-kafa (Matio 10:34-36). Miahy amim-pitiavana ireo izay tsy maintsy misetra fanoheran’ny fianakaviany na miaina ao anatin’ny tokantrano voazarazara isika (Matio 5:11). Ary mahatsapa fangoraham-po isika ho an’ny olona tsy mivadika voan’ny aretina maharitra na ny takaitra. Fa nahoana no misy kristiana maro be toy izany mijaly? Ary inona no fampaherezana mety ho hitan’ny lehilahy sy ny vehivavy tsy mivadika ao anatin’ny tarehin-javatra toy izany?
Nahoana no misy ireny fitsapana ireny, ary aiza no hahitana fialofana?
3. Noho ny fikendrena inona moa no anenjehan’i Satana ny kristiana?
3 Amin’ny alalan’ny olona na ireo demoniany, ny Devoly dia mitady ‘handrapaka’ ny kristiana (I Petera 5:8). Eny, Satana dia mampipoitra fanenjehana sy fitsapana hafa ho antsika mba hanandramana manimba ny fifandraisana tanantsika amin’i Jehovah, mba hitadiavana izay hanimbana ny tsy fivadihantsika. Tokony hiharan’ireny fanafihana ireny ve isika ka tsy ho afaka hiaro tena? Azo antoka fa tsy izany!
4. Rehefa ianjadian’ny fanenjehana na ny fitsapana hafa izy, afaka matoky ny amin’ny inona moa ireo mpihazona tsy fivadihana?
4 Ho Fialofantsika Jehovah raha mitady ny fanampiany ao amin’ny vavaka isika. Rehefa mahazo antsika avy amin’ny lafiny rehetra ny fanenjehana sy ny fahoriana, dia afaka mitalaho aminy isika toy ny nataon’i Davida mpanao salamo hoe: “Mamindrà fo amiko, Andriamanitra ô, mamindrà fo amiko; fa Hianao no ialofan’ny fanahiko; eny, ao amin’ny aloky ny elatrao no ialofako, mandra-pahalasan’ny loza.” (Salamo 57:1). Raha tsy mivadika hatrany isika, dia mahazo matoky fa amin’ny fotoana mety, Jehovah Fialofantsika dia hitondra fanamaivanana ho antsika. Azontsika atao ny hatoky tahaka an’i Davida izay nanambara toy izao tao amin’ny vavaka iray natao tamin’Andriamanitra: “Nanohana ahy noho ny tsy fivadihako ianao, ary hametraka ahy eo anoloan’ny tavanao hatramin’ny fotoana tsy voafetra.” — Salamo 41:12, MN.
5. Tokony hamboly toetra inona moa ireo kristiana enjehina, ary inona no fanantenany?
5 Mety haharitra elaela ny fitsapana antsika ka tokony hamboly fiaretana isika. Nananatra an’ireo kristiana hebreo ny apostoly Paoly mba ‘hahatsiaro ny andro fahiny naharetan’izy ireo ny ady mafy tamin’ny fahoriana’. Izao no teny nanampiny: “Fa tokony hanana faharetana hianareo mba hahazoanareo izay lazain’ny teny fikasana, rehefa vitanareo ny sitrapon’Andriamanitra.” (Hebreo 10:32-36). Ho an’ireo kristiana voahosotra, ny fahatanterahan’ny fampanantenan’Andriamanitra dia milaza fiainana tsy hahitam-pahafatesana any an-danitra. Etsy andaniny koa, ireo anisan’ny “olona betsaka” dia manantena ny hiaina mandrakizay eo amin’ny tany Paradisa (Apokalypsy 7:9; Lioka 23:43, MN). Marina tokoa fa izay rehetra hiaritra hatramin’ny farany amin’ny tsy fivadihana hatrany dia hahazo ny fiainana mandrakizay. — Marka 13:13.
6. Nahoana moa ny Vavolombelon’i Jehovah sasany no mila fiaretana indrindra, ary mandray soa amin’ny fanampiana inona izy ireo?
6 Any amin’ny tany sasany, dia hatramin’ny am-polony taona maro izao ny Vavolombelon’i Jehovah no ‘mila fiaretana’. Inona no antony? Satria izy ireo tsy maintsy manatanteraka ny asany masina any amin’ny faritany sarotra na satria izy ireo tojo fitsapana samihafa, anisan’izany ny fandraran’ny fitondram-panjakana ny asany. Raha ny amin’izay mahakasika anao, dia mety mahita fahasahiranana ara-pahasalamana ianao na manohitra ny asa kristiana ataonao ny fianakavianao. Ny fahasahiranana toy izany dia mahakivy an’ireo izay tsy miantehitra afa-tsy amin’ny herin’ny tenany, kanefa tsy mahasakana ny Vavolombelon’i Jehovah satria ‘ny famonjena azy dia avy amin’i Jehovah, Mpanao ny lanitra sy ny tany’. — Salamo 121:1-3.
7. a) Manome antsika fahafahana hanao inona moa ireo fitsapana maharitra? b) Inona no mahatonga antsika ho afaka hino izay ambaran’i Paoly ao amin’ny Filipiana 4:13?
7 Misy tarehin-javatra izay angamba tokony hiaretantsika hatramin’ny faran’izao fandehan-javatra izao. Kanefa ny fitsapana maharitra dia manome antsika fahafahana hanaporofo ny fifikirantsika amin’Andriamanitra sy fampifaliana ny fony (Ohabolana 27:11). Ao anatin’izany fotoana izany ihany, dia omen’Andriamanitra antsika ny hery ilaintsika mba hiaretana amim-pahatokiana. Izao no nosoratan’ny apostoly Paoly: “Mahay ny zavatra rehetra aho ao amin’Ilay mampahery ahy.” (Filipiana 4:13). Afaka matoky ireo teny mahafaka ahiahy ireo ianao, satria miharihary ho marina foana izany ho an’ny ‘rahalahy rehetra maneran-tany’. — I Petera 5:9, 10.
Mampahery antsika ny tsy fivadihan’ireo namantsika
8. Asehoy hoe amin’ny fomba ahoana no mety handraisan’ny kristiana tsy mivadika miaina ao anatin’ny tokantrano voazarazara, soa.
8 Mahazo fampaherezana mafy isika noho ny tsy fivadihan’ny ‘rahalahy mpianakavy rehetra maneran-tany’. Ao anatin’ny toe-javatra sasany, ny tsy fivadihan’ireo namantsika miaina ao anatin’ny tokantrano voazarazara dia novalian-tsoa aoka izany. Rehefa nanomboka nianatra ny Baiboly ny vehivavy Irlanday iray avy amin’ny finoana katolika, dia tojo fanoherana mafy avy tamin’ny vadiny izay nandrahona ny hisaraka aminy. Na dia tao aza izany, dia nanohy nianatra izy. Indray andro, dia nomeny ny vadiny ny anankiray tamin’ny boky Azonao atao ny hiaina mandrakizay ao amin’ny paradisa eto an-tany. Nanaitra ny sainy ny fahazavana sy ny fahatsorana ary ireo sary kanto tao amin’io boky io, ka avy hatrany ilay vadiny dia nanaiky hianatra ny Baiboly tamin’ny alalan’io boky io. Avy eo dia nitsahatra tsy nifoka sigara izy. Fotoana fohy taorian’izany izy mivady dia nangataka ny hamonoana ny anarany tao amin’ny rejisitry ny Eglizy katolika sy nanafoana ny sary “masina” nananany. Tsy ela ilay vehivavy dia natao batisa sy nandray anjara tamin’ny asan’ny mpitory maharitra mpanampy, fa ilay lehilahy kosa dia nanohy nandroso tsara tamin’ny fanompoana. Ny zava-nitranga karazan’izany dia mety ho tena fampaherezana ho an’ireo izay tsy mivadika hatrany ao anatin’ny tokantrano voazarazara iray. — I Korintiana 7:12-16.
9. Ahoana no mety hanampian’ny kristiana kilemaina tsy mivadika hatrany an’ireo rahalahiny?
9 Misy mpihazona tsy fivadihana hafa mijanona ho mahatoky na dia ao aza ny takaitra. Any Grande-Bretagne, ny kristiana kilemaina iray mandeha amin’ny seza mikorisa dia mahita fahafaham-po ihany amin’ny fanompoana. Izao no nosoratany: “Na dia tsy afaka nahita asa aza aho nanomboka tamin’ny 1949, dia sitrak’i Jehovah ny hampiasa ahy nandritra izany fotoana rehetra izany. Nandalo haingana dia haingana àry ireo taona. Tsapako fa na dia ny olona kilemaina be aza dia mety ho fanampiana lehibe ho an’ny hafa. Izahay mivady dia karazam-batofantsika ho an’ireo mpikambana isan-karazany ao amin’ny kongregasionanay. Noho ny toeranay, dia ao foana izahay, azo nampiasaina foana.” Araka izany, ireo namantsika kilemaina dia tsy tokony hanaiky ho ketraka, satria afaka ny ho loharanom-pampaherezana ho an’ireo izay manodidina azy izy ireo.
10. Ahoana no azon’ny kristiana anampiana ireo namany amin’ny alalan’ny fiaretany ao anatin’ny fanenjehana?
10 Tsy resin’ny fanenjehana ny kristiana tsy mivadika. Ny rahalahy nampidirina an-tranomaizina noho izy nialanalana hatrany dia nitantara toy izao: “Nanjary nahazatra ny sazy ara-batana (...); nihamatetika sy nihamafy izany. Noho izaho tsy nomena hanina, dia nihaosa isan’andro aho. Nivavaka tamin’i Jehovah mandrakariva aho, ary afaka milaza aho fa tsy nahafoy ahy izy. Arakaraka ny nikapohany ahy tokoa no nihenan’ny fahatsapako ny kapoka.” Na dia nomelohina roa taona mahery an-tranomaizina aza io Vavolombelon’i Jehovah io dia tsy nivadika hatrany (Isaia 2:2-4; Jaona 15:19). Kristiana tsy nivadika maro hafa no nanaraka fihetsika sahala amin’izany. Tsy isalasalana mihitsy fa ny ohatra mampahery omen’izy ireny dia mety hanosika ireo namany hiseho ho mahatoky.
Loharanom-pampaherezana tsy mety ritra
11. Inona moa no fampanantenana fampaherezana hitantsika ao amin’ny Baiboly?
11 Zava-misy vitsivitsy monja ireo — ho afaka hanonona maro hafa amin’izany isika — manaporofo fa manohana ireo mpanompony mahatoky Jehovah. Izy no “Rain’ny famindrampo sady Andriamanitry ny fampiononana rehetra, Izay mampionona anay amin’ny fahorianay rehetra”. (II Korintiana 1:3, 4.) Eny, “Andriamanitra no aro sy hery ho antsika; Mpamonjy mora azo indrindra amin’ny fahoriana Izy”. (Salamo 46:1-3.) Tsy mampahery ve ny mahafantatra fa hanohana antsika izy, dia isika sy ireo namantsika, amin’ny fahoriantsika rehetra?
12. Inona moa no herin’ny tsy fivadihan’i Paoly teo amin’ireo namany?
12 Mahazo famporisihana isika noho ny fiaretan’ireo rahalahintsika sy ireo anabavintsika mahatoky tojo fitsapana isan-karazany. Izany no hita taloha tamin’izay rehetra nandinika ny tsy fivadihan’ny apostoly Paoly. Izao no nosoratan’izy io: “Izay zavatra nanjo ahy dia efa tonga fampandrosoana ny filazantsara kosa; ka ao amin’i Kristy ny fifatorako dia [fantatra] (...); ary ny ankabiazan’ny rahalahy dia efa matoky ao amin’ny Tompo noho ny fifatorako ka mihasahisahy kokoa hitory ny tenin’Andriamanitra tsy amin’ny tahotra.” — Filipiana 1:12-14.
13. Mety hiteraka vokany inona moa ny tsy fivadihantsika?
13 Eny, rehefa rentsika fa tsy mivadika hatrany ny sasany amin’ireo namantsika na dia ao aza ny fanenjehana, izany dia manosika antsika tsy hivadika hatrany. Mifamadika amin’izany, amin’ny tsy fivadihan’ny tenantsika ao anatin’ny fitsapana, dia mamporisika ireo rahalahintsika hiresaka tsy amin-tahotra ny Tenin’Andriamanitra isika. Ary raha tsapantsika fa loharanom-pampaherezana sy soa ho azy ireny ny tsy fivadihantsika, dia azo antoka fa mandray fahafaham-po lehibe avy amin’izany isika.
14. Tonòny ny anankiroa amin’ny fomba ampiasain’i Jehovah mba hampaherezana antsika.
14 Manohana antsika amin’ny alalan’ny fanahiny masina Jehovah. Marina tokoa fa, araka ny nosoratan’i Petera, dia ‘sambatra isika, raha haratsina noho ny anaran’i Kristy; fa ny Fanahin’ny voninahitra, dia ny Fanahin’Andriamanitra, mipetraka ao amintsika’. (I Petera 4:12-16.) Etsy andaniny koa, Andriamanitra dia mampahery an’ireo izay sedraina amin’ny famaliana ny vavaka ataony. “Aza manahy na inona na inona, hoy ny torohevitra nomen’i Paoly, fa aoka ny fivavahana sy ny fifonana mbamin’ny fisaorana no ho entinareo manambara ny fangatahanareo amin’Andriamanitra amin’ny zavatra rehetra. Ary ny fiadanan’Andriamanitra, izay mihoatra noho ny fahalalana rehetra, hiaro ny fonareo sy ny hevitrareo ao amin’i Kristy Jesosy.” (Filipiana 4:6, 7). Moa ve ianao mitoky koa amin’Ilay ‘mihaino vavaka’? — Salamo 65:2.
Aoka isika hitady fampaherezana ao amin’ny Tenin’Andriamanitra
15. Ahoana no hanaporofoanao fa marina ny fanambarana voarakitra ao amin’ny Romana 15:4?
15 Loharanom-pampaherezana tsy azo atao tsinontsinona koa ny Teny masin’Andriamanitra. Izany no nasain’ny apostoly Paoly nomarihina tamin’izao teny izao: “Fa izay rehetra voasoratra fahiny dia nosoratana ho fianarantsika hananantsika ny fanantenana amin’ny faharetana sy ny fiononana avy amin’ny Soratra Masina.” (Romana 15:4). Ohatra, rehefa mamaky isika fa nafahana tamin’ny fomba mahagaga avy tany Egypta ny Isiraelita na notsimbinina ny Jiosy tamin’ny andron’i Estera vadin’ny mpanjaka, moa ve izany tsy manamafy ny fiaikentsika fa Mpamonjy tsy manam-paharoa Jehovah? Ary inona no holazaina ny amin’ny fitantarana ilazana fa tsy nivadika hatrany i Joba na dia tao aza ny fitsapana nahatsiravina? Noporofoiny tamin’ny fomba tsy azo lavina fa ireo mpanompon’i Jehovah amin’ny andro ankehitriny dia afaka ny hiaritra fahoriana noho ny hery omen’Andriamanitra azy ireo. “Ny fiononana avy amin’ny Soratra Masina” dia tsy azo lavina fa afaka mameno fanantenana sy herim-po ireo kristiana izay miezaka tsy hivadika hatrany.
16. Fampanantenana mampahery inona no hitantsika ao amin’ny I Petera 5:6, 7 sy ao amin’ny I Korintiana 10:13?
16 Inona no hatao raha ketraka isika noho ireo zava-manahirana mamely antsika? Ireo fampanantenana mampahery ao amin’ny Soratra Masina dia azo antoka fa mahatonga antsika ho afaka hanana fitokisana ny fiarovan’i Jehovah ary afaka manampy antsika handresy ny fahakiviantsika. Izao no nosoratan’ny apostoly Petera: “Manetre tena ambanin’ny tàna-maherin’Andriamanitra, mba hanandratany anareo amin’ny fotoan’andro; ary apetraho aminy ny fanahianareo rehetra; fa Izy no miahy anareo.” (I Petera 5:6, 7). Eny, ‘miahy anao’ Jehovah. Hevitra mampahery re izany! Tsy misy na inona na inona mitranga ka tsy hitan’Andriamanitra na tsy mety ho azony fehezina. Afa-tsy izany koa, dia manome toky antsika toy izao i Paoly: “Mahatoky Andriamanitra ka tsy hamela anareo halaim-panahy mihoatra noho izay zakanareo; fa momba ny fakam-panahy dia hasiany làlana hahafahanareo koa mba hahazakanareo izany.” (I Korintiana 10:13). Raha tapa-kevitra ianao ny tsy hivadika hatrany, dia afaka matoky izany fampanantenana izany.
17. Amin’ny fomba hafa inona avy no mety hahitantsika fampaherezana?
17 Ao anatin’ny fotoam-pihenjanana lehibe, dia afaka mahita fampaherezana isika ao amin’ny vavaka sy amin’ny fianarana Baiboly mbamin’ireo boky nosoratan’ny “mpanompo mahatoky sy manan-tsaina”. (Matio 24:45-47; Salamo 119:105.) Mety hampahery antsika koa ireo torohevitra mampiseho fahendrena notsoahina avy ao amin’ny Soratra Masina omen’ireo loholona antsika amim-pahamoram-panahy. Ankoatra ny zavatra hafa, ny Tenin’Andriamanitra dia mitaky amin’ireo loholona mba ‘hanome toky ny malemy saina, hampahery ny reraka, handefitra amin’ny olona rehetra’. — I Tesaloniana 5:14.
18. Inona no mety hampahery ireo izay tsy manam-pananana firy?
18 Inona no mety hampahery ireo izay tsy manam-pananana firy? Azo antoka fa mahafaly ny mahafantatra fa ao anatin’ny fandaharan-javatra vaovaon’Andriamanitra ny olona dia hanam-ponenana hampiadana, sakafo tondraka sy soa ara-nofo hafa koa (Salamo 72:16; II Petera 3:13; jereo Isaia 65:17-25). Dieny ankehitriny anefa, ny fomba fiaina kristiana narahintsika dia misakana antsika tsy handanilany foana ny vola miditra amintsika mba hanomezana fahafahampo fahazarana manimba toy ny fampiasana sigara na paraky, ny fisotroana zavatra misy alikaola tafahoatra, ny filokana mbamin’ny fahazaran-dratsy hafa. Ny vola voatsitsy toy izany dia ampiasaina hoenti-misahana izay ilain’ny ankohonantsika. Ny fampiharana ny Tenin’Andriamanitra dia mety hanampy antsika koa hianina amin’ny zavatra kely eo amin’ny lafiny ara-nofo, sahala amin’ny nataon’i Paoly izay nanambara hoe: “Fa misy tombony lehibe tokoa ny toe-panahy araka an’Andriamanitra omban’ny fianinana. Fa tsy nitondra na inona na inona ho amin’izao tontolo izao isika, sady hita fa tsy hahatondra na inona na inona hiala. Fa raha manan-kanina sy fitafiana isika, dia aoka hianina amin’izany.” (I Timoty 6:6-8; Filipiana 4:11, 12). Amin’ny fampifantohana ny saintsika ho amin’ireo tombontsoa raisintsika ao amin’ny asan’i Jehovah, dia mahazo soa maro izay miantoka ny tena harena ho antsika isika. — Ohabolana 10:22.
19. Ahoana no hisetrana aretina maharitra?
19 Ary raha voan’ny aretina maharitra isika? Ny fanampian’i Jehovah sy ny fampaherezana omeny antsika amin’ny alalan’ny Teniny dia mahatonga antsika ho afaka hizaka tarehin-javatra toy izany. Izao, ohatra, no nosoratan’i Davida mpanao salamo: “Sambatra izay mahatsiaro ny malahelo (...). Jehovah hanohana azy eo ambonin’ny farafara itsaboana azy.” (Salamo 41:1-3). Mbola tsy miaina amin’ny fotoan’ny fanasitranana mahagaga isika. Na dia izany aza, ireo kristiana marary izay mametraka ny tombontsoan’ilay Fanjakana eo amin’ny toerana voalohany amin’ny fiainany dia mandray avy amin’Andriamanitra ny fahendrena sy ny herin-tsaina ilaina mba hisetrana ny tarehin-javatra. — Matio 6:33; II Korintiana 12:7-10.
20. Ahoana no azontsika andresena ny alahelo ateraky ny famoizana olon-tiana iray?
20 Ahoana no azontsika izakana ny fahoriana ateraky ny famoizana olon-tiana iray? Loharanom-pampaherezana ny fanantenana araka ny Baiboly momba ny fananganana ny maty (Jaona 5:28, 29; Asan’ny apostoly 24:15). Araka izany, na dia miteraka alahelo ho antsika aza ny fahafatesan’ny olon-tiana iray, dia tsy ‘malahelo tahaka ny sasany izay tsy manana fanantenana’ isika. (I Tesaloniana 4:13.) Tsy azo lavina fa ny olona tsy mivadika dia manovo fampaherezana lehibe amin’ny fampanantenana fananganana ny maty.
Aoka isika hatoky mandrakariva an’ilay Andriamanitry ny fampaherezana
21. Inona no mitranga matetika rehefa miaritra fanenjehana isika?
21 Matokia fa Jehovah, “ilay Andriamanitry ny fampiononana rehetra”, dia tsy hahafoy na oviana na oviana ireo izay nanolo-tena ho azy sy tsy mivadika aminy (II Korintiana 1:3; Salamo 94:14). Ilaina koa ny mahatsiahy fa rehefa miaritra fanenjehana ny kristiana dia manome voninahitra an’i Jehovah. Izany fanenjehana izany dia mitarika ny olona hihaino ny olon’Andriamanitra sy ny hafatra momba ilay Fanjakana ambarany. Matetika izany no miteraka fitomboan’ny isan’ireo izay midera ny anaran’i Jehovah. — Jereo Asan’ny apostoly 8:4-8; 11:19-21.
22. Tokony ho tapa-kevitra ny hanao inona moa isika?
22 Noho ny fahafantarana fa azontsika atao ny miantehitra amin’ny fanampian’Andriamanitra, dia aoka isika ho tapa-kevitra ny tsy ho latsaka ao anatin’ireo fandriky ny Devoly izay velariny mba hanapahana ny tsy fivadihantsika. Hetsehin’ny finoana miasa isika, ka aoka tsy hitsahatra ny hametraka ny fitokisantsika amin’i Jehovah. Aoka tsy hohadinointsika na oviana na oviana izay rehetra ataony mba hitahiana antsika, hanohanana sy hampaherezana antsika. Aoka isika hanome porofo fa nanolo-tena ho azy, manaraka ireo fotopoto-pitsipiny marina ary manohana ny fiandrianany. Ankoatr’izany, dia aoka hotadidintsika fa voakasika manokana ny tenantsika. Koa aoka isika tsy hitsahatra ny hanao ny sitrapon’Andriamanitra sady miara-miasa amin’ny fandaminan’i Jehovah amin’izao vanim-potoana isehoan-java-tsarotra izao. Aoka isika ho velom-pankasitrahana afaka mampifaly ny fon’i Jehovah amin’ny tsy fivadihantsika, ary aoka isika tsy hanadino na oviana na oviana fa loharanom-pampaherezana tsy mety ritra ho an’ireo mpihazona tsy fivadihana Andriamanitra.
Inona no havalinao?
◻ Nahoana moa ireo mpanompon’i Jehovah no mila fampaherezana indrindra?
◻ Nahoana moa Satana no manenjika ireo kristiana?
◻ Ahoana no mety hampaherezan’ny tsy fivadihan’ireo namantsika antsika?
◻ Ahoana no azontsika anovozana fampaherezana ao amin’ny Tenin’Andriamanitra?
◻ Toky inona no omena antsika ao amin’ny I Petera 5:6, 7 sy I Korintiana 10:13?
[Sary, pejy 16]
Mitady izay handrapahana an’ireo mpanompon’i Jehovah i Satana, nefa tsy hoe tsy manam-piarovana akory ireo.
[Sary, pejy 18]
Mihaino ny vavaky ny olona tsy mivadika Jehovah. Mivavaka aminy tsy tapaka ve ianao?