Tapa-kevitra ny hiaina mifanaraka amin’ireo fotopoto-pitsipik’Andriamanitra
POROFOIN’NY Baiboly mazava fa raha miara-monina ny lehilahy iray sy ny vehivavy iray kanefa tsy voasoratra ara-dalàna ny fanambadiany, dia mijangajanga izy ireo ary noho izany dia tsy handova ny Fanjakan’Andriamanitra (I Korintiana 6:9, 10). Izao no nataon’ny vehivavy tanora iray tany Sainte-Lucie, nosy iray any Petites Antilles, rehefa fantany izany fahamarinana izany.
Taorian’ny nihaonany tamin’ny Vavolombelona roa, dia naneho fankafizana ny Baiboly izy ka nanomboka nianatra izany niaraka tamin’izy ireo. Rehefa nahazo fahalalana bebe kokoa izy, dia takany ny ilàna hanaovana fanovana sasany teo amin’ny fiainany raha ny amin’ny fitondrantena. Na dia niteraka efatra aza izy, dia tsy nanambady ara-dalàna fa nanao tokantranomaso. Niasa mafy izy sy ilay sakaizany mba hanorenana trano kely nonenan’izy enina mianaka.
Rehefa takany fa nifanohitra tamin’ireo fepetra marina takin’Andriamanitra ny fomba fiainany, dia tapa-kevitra ilay vehivavy tanora ny hitondra ny fiovana nilaina tamin’izany. Izay iray hataony na hanambady ilay nanaovany tokantranomaso, na hisaraka aminy. Niara-nidinika ny amin’io raharaha io taminy izy, kanefa tsy naneho faniriana ny hanambady mihitsy io. Afapo tanteraka izy niaina tao anatin’ny tokantranomaso. Hanosika azy hanao inona ny finoan’ilay vehivavy tanora? Tokony hanao fanapahan-kevitra izy raha tiany ny hahazo ny fankasitrahan’i Jehovah. Rehefa avy nandinika ilay zava-nanahirana tao amin’ny vavaka izy, dia tapa-kevitra ny hisaraka tamin’io lehilahy io. Aiza anefa no honenany miaraka amin’ireo zanany efatra?
Niresaka ny amin’izany tamin’ilay nanaovany tokantranomaso izy ka nanapa-kevitra fa hanao fandaharana ara-drariny izy ireo: samy hanana ny antsasaky ny trano avy! Nozaraina roa àry ilay trano, ny anankiray ho an’ilay vehivavy ary ny anankiray ho an’ilay lehilahy. Azo natao izany noho ny fanampiana feno fitiavana nasehon’ireo rahalahy sy ny fanampian’ilay lehilahy hilaozany. Ny antsasa-trano an’ilay vehivavy tanora dia nafindra tamin’io andro io ihany teo amin’ny tany hafa iray tany amin’ny valo kilaometatra teo ho eo. Tao anatin’ny herinandro izy io, dia tafaorina indray sy voaova ho fonenana kely nisy efitrano roa.
Koa satria io vehivavy tanora io nanao ireo dingana tena nilaina mba hampifanarahana ny fiainany tamin’ireo fotopoto-pitsipik’i Jehovah, avy hatrany izy dia nanomboka nitory, narahin’ireo zanany efatra. Nanolotra ny tenany ho an’i Jehovah izy ary natao batisa tsy ela taty aoriana. Mba hanamarihana an’io fisehoan-javatra io, dia nanomboka ny asan’ny mpitory maharitra mpanampy izy. Manana fifaliana hafa koa izy izao satria misy fianarana ny bokin’ny kongregasiona atao ao amin’ny tranony vaovao, atrehin’ny olona 17 amin’ny ara-keviny. Tena notahin’i Jehovah tokoa ny fahatapahan-keviny ho tonga anankiray tamin’ireo mpanompony madio ara-pitondrantena.