Mitantara ireo mpitory ilay Fanjakana
Fianakaviana tafaray sy sambatra noho ny fahamarinana ao amin’ny Baiboly
TANY INDIA, ny mpivady anisan’ny Fiangonana ao amin’ny fivavahana lazaina fa kristiana dia nifanditra matetika. Matetika ilay lehilahy no nikapoka ny vadiny. Ny tsirairay avy taminy aza dia efa nanandrana namono ny anankiray! Indray andro ilay vehivavy dia nampangotraka ghee (fifangaroan-dobera) ary nitondra izany ho an’ny vadiny toy ny hoe dite izany, kanefa dia natsipiny tamin’ny tarehin’io izany. Tamin’ny farany ilay vehivavy dia tapa-kevitra ny hamono tena.
Nisy zavatra nety ho nahatonga an’io fianakaviana io ho tafaray sy sambatra ve? Maro no hamaly hoe tsia. Talohan’ny hamonoana tena anefa, dia nankany an-tranon’ny zanany vavy sy ny vinantony io vehivavy io. Teo am-pianarana ny Baiboly niaraka tamin’ny Vavolombelon’i Jehovah ireo. Tiany ny hihaino ny fifanakalozan-kevitra, ary nahatohina azy lalina izay reny. Taorian’ny fianarana, dia niresaka ny amin’ireo zava-nanahirana azy tamin’ireo Vavolombelona izy; dia nasehon’ireo taminy tamin’ny alalan’ny Baiboly ny hoe inona avy no tena andraikiny amin’ny maha-vady. Nisy Vavolombelona nitsidika ny vadiny koa ary nanomboka nianatra ny Baiboly io. Inona no vokany? Rehefa samy nampihatra ireo fotopoto-pitsipika ao amin’ny Tenin’Andriamanitra izy mivady, dia afaka nandresy ireo zava-nanahirana azy ara-panambadiana. Rehefa avy eo izy ireo dia nandroso ka tonga tamin’ny fanolorana ny fiainany ho an’i Jehovah, ary vita batisa izy ireo izao.
Mpivady maro be hafa koa no nahatsapa fa ny Teny ara-tsindrimandrin’Andriamanitra dia manolotra fanafodin’ireo zava-manahirana ara-pianakaviana. Amin’ny fampiharana ireo torohevitra raketiny, toy ny hita ao amin’ny Kolosiana 3:12-14 sy ao amin’ny Efesiana toko faha-5, dia nahita fanafodin’ny zava-nanahirana azy izy ireo, ary mahita firaisan-tsaina sy fahasambarana ankehitriny.
□ Izao zava-nitranga manaraka izao voarainay avy any Liban dia manazava tsara koa ny fomba mety hampiraisan’ny fahamarinana ao amin’ny Baiboly ny fianakaviana iray. Tamin’ny 1973, ny Vavolombelon’i Jehovah iray dia nanomboka fianarana ny Baiboly niaraka tamin’ny fianakaviana iray tao amin’ny vohitra kely iray. Nanatrika izany fifanakalozan-kevitra izany koa ny zazavavy roa, mpirahavavy ara-nofo, nonina teny amin’ny manodidina. Kanefa rehefa nampiseho ny fanoherany ny pretra teo an-toerana, dia nitsahatra tsy nianatra io fianakaviana io. Nanohy nianatra an-tsoratra anefa ireo zazavavy roa tamin’ny fampiasana ny adiresin’ny zaobaviny. Rehefa nandinika ny voalazan’ireo taratasy nalefan’ilay Vavolombelona izy ireo, dia nomeny hovakin’ny zaobaviny izany, na dia nanohitra ny fahamarinana aza tamin’izay ny vadiny. Rehefa nifametraka fanontaniana izy ireo, dia nampahafantatra izany an’ilay Vavolombelona tamin’ny alalan’ny taratasy.
Niseho ho nanohitra ny fianarana foana anefa ny anadahin’izy ireo. Norovitiny ireo zavatra vita an-tsoratra momba ny Baiboly an’ireo anabaviny sy ny vadiny ary nodorany koa aza ny Baibolin’izy ireo. Na dia tao aza anefa ny tsy fankasitrahan’ny fianakaviany, ny pretra sy mponina hafa koa tao amin’ilay vohitra, dia nanohy nandalina ny Tenin’Andriamanitra ireo zazavavy ireo. Tamin’ny farany, dia natao batisa izy ireo. Nisy havany sasany nanomboka nianatra ny Baiboly koa ary natao batisa taty aoriana. Ilay anadahin’izy ireo izay niseho ho nankahala dia nanaiky ny fahamarinana koa ary natao batisa. Mpikarakara momba ny asa ao amin’ny kongregasiona izy izao ary manompo tsy tapaka amin’ny maha-mpitory maharitra mpanampy. Tamin’ny faran’ny 1985, dia mpianakavin’ireo zazavavy ireo 23 no nanaiky ny fahamarinana sy natao batisa!
Toy inona moa ny fahasambaran’ireo mpirahavavy ireo nifikitra mafy hatrany tamin’ny fahamarinana na dia tao aza ny fanoherana! Ary toy inona moa ny fifaliany mahita ny fianakaviany tafaray sy sambatra satria izy ireo nanaiky ny fahamarinana ao amin’ny Baiboly! Izany dia manamarina ireto tenin’ny mpanao salamo manaraka ireto: “Sambatra ny firenena izay manana an’i Jehovah ho Andriamaniny.” — Salamo 144:15.
□ Izao no nitranga tamin’ny lehilahy iray nonina tany New York: Nanomboka nampiasa zavatra mahadomelina izy fony vao 13 taona ary nanarampo tamin’izany ka tsy afaka nihinan-kanina mihitsy aza raha tsy avy nifoka “marijuana” (karazan-drongony) aloha. Ny filany “cocaïne” dia nandaniany 3 500 FMG isan’andro teo ho eo, ary rehefa nivarotra zavatra mahadomelina izy dia nitondra basipoleta roa tany aminy foana. Nanambady izy ary niteraka efatra. Rehefa tonga Vavolombelon’i Jehovah ny vadiny, dia nanohitra ny asany izy. Tamin’ny farany anefa, dia nankaleo azy ny tsy niaina afa-tsy mba ho “lavo”, mba “hirenireny eny amin’ny arabe” sy mba hanitsakitsa-bady.
Noho ireo fampaherezan’ny vadiny tsy ankijanona sy ny fanampian’ireo loholona feno fitiavana, rehefa afaka herintaona taorian’ny batisan’ny vadiny, dia nanaiky ny hianatra Baiboly izy. Nahazo ny fanohanana nilaina izy mba hisetrana zava-manahirana lehibe vokatry ny filana zavatra mahadomelina, anisan’izany ny fahitana zavatra tsy misy. Nandroso hatreo amin’ny batisa izy ary ankehitriny dia manana fifaliana mahita ny fianakaviany tafaray sy sambatra ary ireo zanany efatra mandroso ao amin’ny fahamarinana. Manana asa tsy mihilangilana sy fidiram-bola tsara izy izao; mikasa ny handray anjara amin’ny asan’ny mpitory maharitra mpanampy àry izy mivady.
[Teny notsongaina, pejy 21]
“Sambatra ny firenena izay manana an’i Jehovah ho Andriamaniny.” — Salamo 144:15.