Jesosy, ny fiainany sy ny fanompoany

Ilay toriteny nalaza indrindra

NY FISEHOAN-JAVATRA dia anankiray amin’ireo fahatsiaro indrindra amin’ny tantaran’ny Baiboly: nipetraka teo antenatenan’ny havoana iray Jesosy ka nanao ilay toriteniny nalaza teo an-tendrombohitra. Izany dia nitranga tany akaikin’ny ranomasin’i Galilia, azo inoana fa tsy lavitra an’i Kapernaomy. Nandany ny alina manontolo i Jesosy nivavahana tamin’Andriamanitra ary ny ampitso maraina izy dia nifidy 12 tamin’ireo mpianany mba ho apostoliny. Rehefa avy eo, dia nidina teo amin’io toerana lemaka tokoa amin’ny tendrombohitra io izy, niaraka tamin’izy ireo.

Mety hisy hilaza anakampo fa tokony ho sasatra i Jesosy ka tsy isalasalana fa ta-hatory kely. Vahoaka betsaka anefa no tonga, ny sasany avy tany Jodia sy Jerosalema, izany hoe avy tany amin’ny 100 ka hatramin’ny 110 kilaometatra. Ny hafa nanao ny dia avy any amin’ny moron-tsiraka avaratra amin’ny ranomasina, avy any Tyro sy Sidona. Tonga izy ireo mba hihaino an’i Jesosy sy hositraniny amin’ny aretiny. Ny olona sasany aza niharan’ny famelezan’ny demonia.

Rehefa nidina i Jesosy, dia nanatona azy ireo marary mba hikasika azy ary dia nositraniny izy ireo. Rehefa avy eo, dia toa nianika ho eo amin’ny toerana avo kokoa tamin’ilay tendrombohitra i Jesosy. Teo izy dia nipetraka ary nanomboka nampianatra ny vahoaka niparitaka teo amin’ny toerana lemaka tokoa iray, teo anoloany. Hevero ange! Tsy misy manana takaitra intsony izao na dia iray monja aza amin’izany mpihaino rehetra izany.

Liana ny olona handre ilay mpampianatra nahavita izany fahagagana nahatalanjona izany. Alohan’ny zavatra rehetra anefa, dia nataon’i Jesosy ny toriteniny ho an’ireo mpianany izay azo inoana fa tafangona teo akaikiny kokoa. Kanefa mba hahafahantsika mandray soa avy amin’izany koa, dia samy nitantara an’io toriteny io i Matio sy i Lioka.

Ny fitantarana ilay toriteny nataon’i Matio dia eo amin’ny avo efatra heny noho ny an’i Lioka ny halavany. Afa-tsy izany koa, ny fizarana sasany notantarain’i Matio dia asehon’i Lioka toy ny hoe nolazain’i Jesosy tamin’ny fotoana hafa tamin’ny fanompoany, araka ny hita amin’ny fampitahana ny Matio 6:9-13 amin’ny Lioka 11:1-4, sy Matio 6:25-34 amin’ny Lioka 12:22-31. Tsy tokony hahagaga antsika anefa izany. Miharihary fa nampianatra zavatra mitovy nihoatra ny indray mandeha i Jesosy, ka naleon’i Lioka nitantara sasany tamin’ireny fampianarana ireny tao anatin’ny toe-javatra niseho hafa.

Raha sarobidy tokoa toy izany ny toritenin’i Jesosy, dia tsy noho ny halalin’ny hevitra ara-panahy raketiny ihany, fa satria koa tamin’ny fomba tsotra sy mazava no namelabelaran’i Jesosy izany fahamarinana izany. Nifototra tamin’ny toe-javatra fahita izy ary niresaka zavatra nahazatra ny vahoaka, hany ka izay rehetra nitady hanaraka tsara kokoa ireo lalan’Andriamanitra dia afaka nahazo ireo heviny mora foana. Ao amin’ireo nomerao manaraka, dia hodinihintsika ny sasany amin’ireo zavatra nolazainy. Lioka 6:12-20; Matio 5:1, 2.

◆ Taiza moa i Jesosy no nanonona ny toriteniny malaza indrindra, iza no tonga teo, ary inona no nitranga talohan’ny hanaovany izany indrindra?

◆ Nahoana moa no tsy mahagaga ny nitantaran’i Lioka fampianaran’i Jesosy sasany tao anatin’ny toe-javatra hafa?

◆ Nahoana moa no sarobidy tokoa ny toritenin’i Jesosy?