Mitantara ireo mpitory ilay Fanjakana
Velom-pankasitrahana ve ianao noho ny fanompoana?
MIORINA amin’ny Soratra Masina ny fitoriana isan-trano, ary ny Vavolombelon’i Jehovah dia fantatra maneran-tany ho manompo an’Andriamanitra ampahibemaso amin’izany fomba manokana izany (Asan’ny apostoly 20:20, 21). Izao no nolazain’i Jesosy tamin’ireo mpianany: “Fa hahazo hery hianareo amin’ny hilatsahan’ny Fanahy Masina aminareo, ary ho vavolombeloko any Jerosalema sy eran’i Jodia sy Samaria ary hatramin’ny faran’ny tany.” (Asan’ny apostoly 1:8). Ny Asan’ny apostoly 5:42 dia mampiseho fa ireny kristiana ireny dia tsy nitsahatra nandeha “tao an-trano [isan-trano, MN ]”.
Tany Haïti, ny fanompoana isan-trano ataon’ny Vavolombelon’i Jehovah dia niteraka fampitahana. Nitranga izany indray andro rehefa nisy mpitory maharitra manokana iray (mpitory manontolo andro) tafahaona tamin’ny vehivavy protestanta mafana fo iray. Tao anatin’ny resaka, dia nasain’ilay rahalahy nomarihiny fa ny Vavolombelon’i Jehovah no hany nitory isan-trano araka ny atoron’ny Baiboly. Nanohitra ilay vehivavy tamin’ny filazana fa afaka mandeha isan-trano ireo mpiangona ao aminy ary nanao izany izy ireny indraindray. Marina tokoa fa ny asabotsy nanaraka, ilay Vavolombelona dia nifanena tamin’ny antokon’olona nandeha isan-trano notarihin’io vehivavy io. Nahavory olona teo amin’ny zato izany antokon’olona izany. Nirehareha aoka izany noho ny zava-bitany ilay vehivavy ka niantso ilay rahalahy mba hahatsapany ny fahombiazany.
Herinandro taty aoriana, dia nitarika antokon’olona hafa io vehivavy io ihany, ka tsy nanadino ny nanao izay hanamarihan’ilay rahalahy izany tamim-pifaliana. Voamarik’ilay rahalahy anefa fa nihena antsasany ilay antokon’olona. Rehefa afaka asabotsy efatra, dia nidina ho 20 ny mpikambana tamin’ilay antokon’olona, ary ny asabotsy fahadimy dia ilay vehivavy iray sisa nandeha. Nanatona an’ilay rahalahy tamim-panetren-tena izy ka niaiky hoe: “Ny Vavolombelon’i Jehovah ihany no manana ny fahamarinana satria izy ireo ihany no afaka manohy ny asa fanambarana isan-kerinandro.”
Nanipy hevitra taminy ilay mpitory maharitra manokana mba hianatra Baiboly ka izany dia hampiseho aminy hoe nahoana ny Vavolombelon’i Jehovah no manohy mitory isan-trano, kanefa tsy vitan’ny hafa izany. Nanaiky ilay vehivavy. Nanomboka nianatra izy mivady ary nandroso tsara. Miaraka amin’ny Vavolombelon’i Jehovah izao izy mivady mba hitory ilay Fanjakana amin-jotom-po, ampahibemaso sy isan-trano.
Ny fanompoana isan-trano sy ireo fomba hafa fanompoana ampahibemaso dia fandaharana mahatalanjona sy feno fitiavana nataon’i Jehovah mba hitadiavana ireo olona tso-po sy hanampiana azy ireny hianatra izay takiny aminy mba hanomezana azy ireo ny fiainana. Izany no antony andraisan’ny Vavolombelon’i Jehovah anjara amin’izany amim-pifaliana, ary koa amin’ireo lafiny hafa amin’ny asa masina ataon’izy ireny ho an’Andriamanitra. Ny fihetsik’izy ireny dia sahala amin’ny an’ny apostoly Paoly izay nilaza hoe: “Misaotra an’i Kristy Jesosy Tompontsika aho, Izay nampahery ahy, fa nataony mahatoky aho ka notendreny ho amin’ny fanompoana.” — I Timoty 1:12.