Mitantara ireo mpitory ilay Fanjakana
Miharihary ny fitahian’Andriamanitra any Venezuela
TENA mahazo fitahiana tokoa ny asa tanterahin’ny Vavolombelon’i Jehovah any Venezuela (Salamo 3:8). Tamin’ny 1985, dia nitombo 16 isanjato ny isan’ny mpitory raha oharina tamin’ny taon-dasa, mba hahatratra tampon’isa tsy manan-taloha 31 247 amin’ny isan’ny mpitory ny vaovao tsara tamin’ny febroary 1986. Nanjary 2 291 ny isan’ny mpitory maharitra mandavantaona tamin’ny febroary; izany no tampon’isa faha-38 nifanesy. Ary ny fitambaran’ny fampianarana Baiboly notarihina tamin’ny olona tsara fikasa dia 50 659, ka ny sasany dia nahita ny fahamarinana tao anatin’ny toe-javatra tsy dia mahazatra loatra:
◻ Malaza ho mpanenjika vehivavy ny lehilahy vady tanora iray. Niodina ho ratsy ho azy ny toe-javatra. Tena ninoany mihitsy fa nandeha tany amin’ny mpimasy vavy ny vadiny ary nampanisy vitan-dratsy azy noho ny asam-panitsakitsahany azy. Dia nanomboka nitady mpimasy vavy iray àry izy mba hampihataka aminy ny loza, ary dia nisy nanoro azy vehivavy iray. Io anefa, dia efa nianatra ny Baiboly niaraka tamin’ny Vavolombelon’i Jehovah ary efa nitsahatra tsy ho mpimasy intsony. Nanambara taminy izy io fa tsy afa-manao na inona na inona ho azy intsony izy, afa-tsy ny hoe manome azy adiresy azony aleha mba handraisana fanampiana. Ny adiresin’ny Efitrano Fanjakana izany. Tonga tany ilay lehilahy, ny volo lava, ny volombava tsy voakarakara, ary ratsy fitafy. Tena nahafaly be azy ny fivoriana, koa niverina tany izy ny faran’ny herinandro niaraka tamin’ny zanany kely telo. Tamin’izao kosa, ny volony dia efa voatapaka, nitafy tsara izy ary niala volombava tsara. Amin’izao andro izao izy dia mpitory ny vaovao tsara. Faly ve ny vadiny noho izy tsy manenjika vehivavy intsony? Mifanohitra amin’izany, fa lasa nanohitra be izy. Nefa ny fiovana nataony tamin’ny fiainany dia tena nahatalanjona aoka izany ny maro tamin’ireo olom-pantany ka nanome azy ireo fahafahana handre koa ny hafatry ny fahamarinana.
◻ Tao amin’ny tanàna akaikin’ny sisintany kolombiana, ny pretra iray dia nandamina fandaharana hanoherana ny Vavolombelona. Napetany amin’ny sora-baventy mena teo amin’ny takelaka fametahana fampandrenesan’ny fiangonany ny anarana hoe “Vavolombelon’i Jehovah”, ary nanampiny teo ambany ny fiampangana tsy marina sasany ny amin’izy ireo. Ny vehivavy iray mpikambana tao amin’io fiangonana io, raha nahita ilay anarana niharihary be ary tsy namaky akory ny soratra tohiny, dia nanatsoaka hevitra avy amin’izany fa nankasitrahan’ny Fiangonana ny Vavolombelon’i Jehovah. Noho izany izy dia nandeha tany amin’ny fivoriana iray nataon’ny Vavolombelona ary nankasitrahany izay hitany sy reny tany. “Raha ny marina, hoy ilay fitantarana, ny fandaharana nataon’ilay pretra dia nanaitra be lavitra noho ny zavatra hafa.” Ankehitriny, dia olona maro no maniry hianatra ny Baiboly; manatona mihitsy ny Vavolombelona izy eny an-dalàna ary manontany azy ireo ny fotoana hitsidihany manaraka.
◻ Nisy fianakaviana venezoeliana iray nandre firesahana ny fahamarinana noho ny lahateny fandevenana fohy natao teo amin’ny fasan’ny vehivavy kristiana iray vita batisa vao haingana. Ny manamboninahitra iray amin’ny tafika sy ny ankohonany, fianakavian’ilay maty, dia nihaino tamim-pitandremana io lahateny niorina tamin’ny Soratra masina io ary avy eo dia nanasa ilay mpandahateny ho any aminy mba handinika akaiky kokoa ireo andininy amin’ny Baiboly notononiny. Inona no vokatr’izany? Aoka hohenointsika ilay manamboninahitra mamaly:
“Taitra fahalianana, izahay mivady dia naniry hamantatra ny Baiboly. Teo am-boalohany, dia tiako ny hampiseho fa nanana antony ara-drariny hijanonana ho katolika aho. Na dia izany aza, isaky ny nanohitra fanaporofoan-kevitra iray aho, ilay Vavolombelona niara-nianatra tamiko dia namaly ahy tamin’ny fomba fihevitra ara-dalàna avy ao amin’ny Baiboly. Tamim-panetren-tena dia niaiky aho tamin’ny farany fa nanana ny fahamarinana ny Vavolombelon’i Jehovah. Amin’izao fotoana izao, dia Vavolombelon’i Jehovah izaho sy ny vadiko ary mianatra ny Baiboly ireo zanakay. Misaotra ilay Andriamanitra tokana sady marina, Jehovah, aho noho izany, ary sambatra aho manompo azy amin’ny maha-miaramila, tsy amin’ny fitaovam-piadiana ara-nofo, fa amin’ny fitaovana omen’ny fanahin’Andriamanitra, araka ny II Korintiana 10:4, 5.”
Eny, Jehovah dia nitahy betsaka tokoa ny mpanompony any Venezoela. Ny isan’ny mpanatrika tena niavaka tamin’ny Fahatsiarovana, avo efatra heny amin’ny isan’ny mpitory, dia mamela hitsinjo fitomboana lehibe ao anatin’ireo taona ho avy.
[Tabilao, pejy 21]
Tampon’isa sasany tratra tany Venezuela tamin’ny febroary 1986:
31 247 mpitory tsotra
2 291 mpitory maharitra
50 659 fampianarana baiboly
“Ho amin’ny olonao anie ny fitahianao.” — Salamo 3:8.