Fifalian-dehibe eo anivon’ny vahoakan’Andriamanitra

AO AMIN’NY tenin’i Davida voatantara eo amin’ny andininy 2 ka hatramin’ny 4 amin’ny Salamo 68, dia misy fanasana mafana nalefa ho an’izay rehetra tia ny fahafahana marina: “Mihirà ho an’Andriamanitra, mankalazà ny anarany; manamboara làlana ho an’Izay mitaingina mamaky ny efitra — Jehovah no anarany — ary mifalia eo anatrehany!” Moa ve misy tombontsoa mihoatra noho ny mifaly eo anatrehan’Andriamanitsika (Isaia 12:2, 3)? Nandritra ny taona 1986, dia notohanan’i Jehovah tamin’ny fomba mahatalanjona ireo Vavolombelony, raha mbola tsy nitsahatra nanambara fahafahana ho an’ny mponina amin’ny tany.

Hanome filazalazana amin’ny ambangovangony ny asa notanterahin’ny Vavolombelon’i Jehovah tamin’ny taona 1986 ireo pejy manaraka. Misy antony tokony hifaliana tokoa! Araka ny tarehi-marika tokoa, ny tampon’isa amin’ny Vavolombelona miasa any amin’ny tany 208 mandray anjara amin’ny filazana asa dia niakatra ho 3 229 022, izany dia mampiseho fitomboana 6,8 isan-jato raha oharina amin’ny taona teo aloha; ary nisy olona 225 868 natao batisa.

Tamin’ny Fahatsiarovana ny nahafatesan’i Jesosy

Tamin’ny fivorian-dehibe indrindra amin’ny taona, ny Fahatsiarovana ny nahafatesan’i Jesosy, ny mpanatrika dia nisy 8 160 597 fara fahakeliny, na dia nisy filazana sasany tsy tonga aza noho ny fikororosian’ny toe-piainana maneran-tany. Nidina ho 8 927 ny isan’ny mpandray anjara amin’ny marika, mazava loatra fa satria nahavita ny fanompoany teto an-tany ny anisan’ny be taona indrindra amin’ny mpikambana voahosotra. — Apokalypsy 2:10.

Maro amin’ireo izay niara-niangona, nankatò ny baikon’i Jesosy, no nampiseho herim-po faka tahaka (I Korintiana 11:23-26; Jaona 16:33). Tao amin’ny tany iray atsy Afrika, izay andrarana ny asan’ny Vavolombelon’i Jehovah, dia tafavory tao amin’ny tranon’ny vehivavy kristiana iray ny kongregasiona iray mba hankalaza ny Fahatsiarovana. Vao valo minitra monja no nanombohan’ny lahateny raha niditra tampoka ny polisy, nitady hisambotra ireo rahalahy. Nodidian’ireo polisy izy ireo mba hanapaka ny fivoriana. Tamim-pitiavana, kanefa hentitra, no nanasongadinan’ireo rahalahy tamin’izy ireo fa nahazo baiko hahatsiaro ny nahafatesan’i Jesosy ho sorona izy ireo. Rehefa avy nifanakalo hevitra tamin’ny polisy sy nitalaho taminy izy ireo, dia nahazo lalana hanohy teo ambany fanatrehany. Nifarana tamim-piadanana ny fivoriana, avy eo dia nosamborina avokoa ny mpanatrika rehetra. Taorian’ny fitohitohizam-panadinkadinana, dia nisy dimy notazonina. Nijanona tao an-tranomaizina nandritra ny fotoana kelikely izy ireo, kanefa nalefa nony avy eo, faly afaka ihany nankalaza ny Sakafon’ny Tompo. — I Jaona 5:3, 4.

Tany Nigéria, izay nitomboan’ny isan’ny Vavolombelona hahatratra mpitory 128 461, dia olona 394 370 no nanatrika ny Fahatsiarovana, tarehi-marika tsy mbola hita tamin’ny lasa mihitsy. Mba hankalazana ny Fahatsiarovana, no nisian’ny fivoriana iray teo amin’ny toeram-piasana fanorenana ny fitambaran-tranon’ny Betela vaovao tao Igieduma; maherin’ny 700 ny olona tonga, saika ny isan’ny mponina manontolo teo amin’ilay tanàna teo akaiky!

Avy any Meksika ny rapaoro manaraka: “Feno hafanam-po ny mpitory, any amin’ny faritra aleha rehetra, ary ny tany manontolo no toa arehitry ny fahamarinana. Tena be zotom-po amin’ny fahamarinana ireo rahalahy, ary ampifantohany amin’izany ny fiainany. Misy fianakaviana manontolo tonga ao amin’ny fahamarinana. Maro ny olona manatrika ireo fivoriana raha vao manomboka mianatra. Izany dia manampy azy ireo hanao fandrosoana haingana.” Tao amin’ny filazany, Meksika dia nanisa mpanatrika 838 467 tamin’ny Fahatsiarovana. Tamin’ny aogositra, dia mpitory ilay Fanjakana 198 003 tao amin’io tany io no nitarika fampianarana Baiboly any an-tokantrano 327 664. Fitomboana tsara amin-kery izany!

Mitohy ny fitarana maneran-tany

Avy any amin’ny foiben’ny fivavahana lazaina fa kristiana no naharaisanay filazana mampiseho fitomboana toy izany. Nahatratra tampon’isa vaovao amin’ny mpitory 139 570 Italia tamin’ny aogositra, ary olona 301 009 no tonga tamin’ny fankalazana ny Sakafon’ny Tompo. Tsy misy iadian-kevitra tokoa fa ny Vavolombelon’i Jehovah dia ‘mampamirapiratra ny fahazavany eo imason’ny olona’. (Matio 5:16.) Ity misy ohatra iray: “Nandrotsaka vola tao anaty fitaovana mpizara karatra amin’ny fiarabe mpitatitra olona ny vehivavy kristiana iray, raha nisy olona fantany nilaza taminy fa tsy nilaina akory ny mandoa vola amin’ny lalana fohy dia fohy toy izany. Namaly azy ilay anabavy tamin’ny filazana fa ara-dalàna ny mandoa ny toerany, eny fa na dia hatramin’ny fijanonana manaraka fotsiny aza. Avy eo dia niala tamin’ilay fiarabe io olona io. Nitodika tany amin’ilay vehivavy kristiana tamin’izay ilay mpamily ary niteny taminy hoe: ‘Vavolombelon’i Jehovah ve ianao?’ ‘Eny, hoy ny navaliny azy, ahoana no namantaranao izany?’ ‘Henoko izay nambaranao momba ny karatra teo, ary fantatro fa ny Vavolombelon’i Jehovah dia anisan’ny olona vitsy an’isa tokoa mitondra tena toy izany sy miseho ho marina amin’ny zavatra rehetra.’ Volana vitsivitsy taty aoriana, dia nisy lehilahy iray nanatona io vehivavy kristiana io tao amin’ny fivoriana iray ary nanontany azy hoe: ‘Fantatrao ve aho? Izaho ilay mpitondra fiarabe izay niresaka taminao momba ny fandoavan-karatra. Tamin’ny fahitako ny fitondrantenanao, no nanapahako hevitra hianatra ny Baiboly miaraka amin’ny Vavolombelon’i Jehovah.’ ”

Nahatratra tampon’isa amin’ny mpitory ilay Fanjakana 107 767 i Grande-Bretagne, ka anisan’izany ny rahalahy iray vita batisa vao haingana: “84 taona i George. Nahafantatra ny fahamarinana izy taorian’ny naha-mpitory lahika azy tao amin’ny fiangonana teo an-tanànany nandritra ny 50 taona. Tany am-boalohany, raha vao tapitra ny fianarany Baiboly, dia nihazakazaka haingana nankao amin’ny efitra iray izy mba hifoka sigara. 70 taona no nifohany. Kanefa nanomboka tamin’ny fotoana nandinihany ny toko faha-26 amin’ny boky Azonao atao ny hiaina mandrakizay ao amin’ny paradisa eto an-tany, dia tsy nikasika sigara intsony mihitsy izy. Maherin’ny herintaona izao no nanaovana batisa an’i George, ary mitory amin-jotom-po tokoa ny soa hoentin’i Jehovah ao amin’ny fandaharan-javatra vaovaony izy.”

Ny Repoblika federalin’i Alemaina dia milaza tampon’isan’ny mpitory 118 645. Ao amin’ny Repoblika demokratika alemàna, izay mifanakaiky aminy, no iainan’ny Vavolombelona an’arivony mahatoky koa izay ‘mampamirapiratra ny fahazavany’. Any Alemaina, dia misy kristiana be taona mahatoky mandà ny hametraka “ny sabatry ny fanahy”. (Efesiana 6:16, 17.) Izao no tantarain’ny kongregasiona iray: “Misy anabavy iray 103 taona ato aminay, ary miaina irery mandrakariva izy. Nanao fandaharana ny loholona mba hisy anabavy fito na valo hiahy azy mifandimby isan-kerinandro. Efa ho efa-taona izany izao. Misy mpitsabo mpanampy, iantohan’ny fivondronana, tonga manampy azy amin’ny fidiovany sy manolo ny fitafiany. Kanefa rehefa marary na lasa miala sasatra ireny mpanampy ireny, dia ireo anabavintsika no miantsoroka ny asa. Tena fanambarana tsara ho an’ny olona eny ivelany izany fisehoan’ny fitiavana kristiana sy ny toe-tsaina tia fandavan-tena izany. Ilay anabavintsika 103 taona dia mbola mahira-tsaina foana ary mihevitra ireo mpitsabo mpanampy ho toy ny ‘faritaniny’. Mitory amin’izy ireny amin-jotom-po izy rehefa manasa azy ireo, ary manome zavatra vita an-tsoratra azy ireny. Tsy misy iadian-kevitra tokoa, fa “satroboninahitra tsara tarehy ny volo fotsy, ao amin’ny làlan’ny fahamarinana no ahazoana azy”. — Ohabolana 16:31.

Voarain’ny olona samy hafa taona ny fanasana hidera an’i Jehovah, na manao ahoana na manao ahoana, “na ny zatovolahy, na ny zatovovavy, na ny antitra na ny tanora”. Tanora maro no ‘mahatsiaro ny Mpanao azy lehibe amin’ny andro fahatanorany’. (Salamo 148:12; Mpitoriteny 12:1. Any Brésil, tany nahatratrarana tampon’isa mahatalanjona amin’ny isan’ny mpitory 196 948, dia naharay taratasy avy amin’ny tanàna mitokana iray nitorian’ny rahalahy tanora roa nandritra ny volana vitsivitsy ny Fikambanana Watch Tower. Nilaza toy izao ny tapany amin’io taratasy io: “Velom-piderana anareo aho noho ny zatovo mahafinaritra anananareo ao amin’ny fivavahanareo. Manan-draharaha amin’ny tanora aho, amin’ny maha-mpampianatra ahy, ary fantatro fa tsy toy ny taloha intsony izy ireo. Tena ohatra faka tahaka marina tokoa ireo tanoranareo. Manaja ireo zokiny, mahalala fomba, ary mitafy amim-pahamaotinana izy ireo. Ambonin’izany, mahay tsara ny Baiboly izy ireo. Izany, ka fivavahana! Mampalahelo fa tsy maintsy mandeha izy ireo.” Misy fianakaviana eo an-dalam-panorenam-ponenana any amin’ny sasany amin’ireny faritra mitokana ireny mba hanaraka ny fahalianana.

Mby aiza kosa ny fahamarinana any amin’ireo tany tsy manaraka hevitra kristiana? Namoaka lahatsoratra lava ny Wall Street Journal tamin’ny 9 jolay 1986 mitondra ny lohateny hoe “Tany iray tsy mahavokatra: mamafy ny misionera kristiana any Japon kanefa saika tsy misy maniry.” Toa hoe nanambara toy izao ny misionera iray ao amin’ny Fiangonana tafarain’i Kristy: “Tsy tena hamaka na oviana na oviana eto Japon ny kristianisma”, ary niteny toy izao ny pretra fransiskana iray: “Vita teo ny andron’ny misiona eto Japon.” Nandany hery very maina nandritra ny telopolo taona mahery izy roa ireo. Nilaza toy izao ilay lahatsoratra: “Latsaka ny iray isan-jaton’ny mponina no kristiana ary mihena hatrany izany ampahany izany na dia eo aza ny fiezahana rehetra ataon’ny misionera.” Manan-kery amin’ny fivavahana lazaina fa kristiana izany. Kanefa manao ahoana kosa ny amin’ny Vavolombelon’i Jehovah mampianatra ny kristianisma madio ao amin’io tany io? Hatramin’ny 92 taona mitohy, dia mitombo isa izy ireo, ka nahatratra tampon’isa vaovao amin’ny minisitra miasa 113 062 (ka 46 390 amin’ireo amin’ny ara-keviny no mpitory maharitra isam-bolana). Mitarika fampianarana Baiboly 146 316 amin’ny olona liana vao haingana amin’ny kristianisma ireo kristiana ireo. Tsy isalasalana fa fambara fitomboana lehibe ireo tarehimarika ireo. Tanteraka amin’ny fomba velona ny teny voarakitra ao amin’ny Isaia 65:13, 14, any Japon.

Ny asan’ny mpitory maharitra

Manao ahoana ny toe-javatra any amin’ny foiben’izany asa miroborobo izany mihitsy dia Etazonia, any Amerika? Niasa tamin’ny tampon’isan’ny mpitory ilay Fanjakana 744 919 io tany io. Nefa tena ilaina marina tokoa ve ireny ‘misioneran’ilay tany’ ireny? Izany tokoa, satria ny heloka bevava, ny zavatra mahadomelina, ny faharatsiam-pitondrantena, ny aretina ary ny fandraisana kolikoly dia miely amin’ny ambaratonga mbola lehibe kokoa noho ny any amin’ny tany hafa lazaina ho mpanompo sampy. Mila fampaherezana sy fanantenana ireo olona mikatsaka fiainana tsaratsara kokoa; nefa, izany no entin’ny hafatra ambaran’ny Vavolombelon’i Jehovah. (Isaia 61:1, 2; Matio 24:14). Nandany ora 146 673 490 ireny kristiana ireny mba hitoriana ny vaovao tsaran’ny Fanjakan’Andriamanitra tany Etazonia, tamin’ny 1986. Milaza fitomboana 12,6 isan-jato izany, na mihoatra 16 449 229 ora raha oharina amin’ny tamin’ny taon-dasa. Nampiasaina tamim-pahalalana tsara izany fotoana izany, satria nizarana boky 6 138 938 mampiseho fitomboana 23,2 isan-jato oharina amin’ny tamin’ny taon-dasa. Maherin’ny iray tapitrisa ny boky voapetraka manazava izay misy ny tena fanantenam-piadanana sy filaminana tamin’ny aprily fotsiny.

Iray amin’ny endriny mahafaly indrindra amin’ny filazana asan’i Etazonia ny fitaran’ny asan’ny mpitory maharitra. Tamin’ny aprily, dia tampon’isan’ny mpitory maharitra mandavantaona 45 786 no voatambatra, ka mampiseho fitomboana 23 isan-jato raha oharina amin’ny tamin’ny taon-dasa io. Raha ampiana ny ara-keviny amin’ny isan’ny mpitory maharitra mpanampy 43 369 sy ny mpitory maharitra manokana 279 io tarehi-marika io, dia hita fa misy mpitory maharitra 90 000 eo ho eo isam-bolana, manambara ny Fanjakan’Andriamanitra. Izany dia tanora, sy olona be taona koa, mampiasa amim-pahendrena ny fotoanany hiderana an’i Jehovah.

Aoka isika hanao fanambarana feno

Tamin’ny fampianarana ampahibemaso sy isan-trano, ny apostoly Paoly dia nanao “fanambarana feno” momba ny vaovao tsara (Asan’ny apostoly 20:20, 21, MN ). Maro ny faritra amin’ny tany mandray fanambarana toy izany amin’izao andro izao, ohatra, araka ny asehon’izao fitantarana avy any Guadeloupe izao: “Teo amin’ny faran’ny taom-piasana, dia nisy mpitory iray isaky ny mponina 72 izahay. Tsy ilaina akory ny manamarika fa mihoatra noho ny hoe fantatra fotsiny izahay tao amin’ilay tany. Raha ny marina, tany amin’ny toerana maro, dia mitsidika ny faritany iray ihany isan-kerinandro izahay. Mety hisy hihevitra fa efa leon’ny mahita anay ny olona, na koa hoe mety hahakivy ny miverina any amin’ny faritany iray ihany isan-kerinandro. Kanefa, tena ny mifanohitra amin’izany no hita; arakaraka ny itorianay ao amin’ny toerana iray ihany, no ifohazan’ny fahalianan’ny olona. Inona no porofon’izany? Izao: ny tampon’isan’ny fampianarana Baiboly any an-tokantrano 7 136 notarihin’ny mpitorinay 4 558 tamin’ny aprily farany teo. Vao haingana, no nisy gazety nitondra lohateny lehibe hoe: ‘Ny Vavolombelon’i Jehovah: ireo mpanjakan’ny isam-baravarana’ Raisinay ho voninahitra izany. Nandritra ny taom-piasana, dia rahalahy sy anabavy vaovao 458 no natao batisa.” Raha maharitra ny mafy sy falifaly isika rehefa mitsidika sy miverina mitsidika ny faritanintsika, rehefa mianatra hahafantatra ireo olona, manampy azy, ary rehefa resentsika amim-pitiavana ny fiheveran-disony, dia azontsika atao ny mahita olona maro manana fon’ny ondry.

Tahin’i Jehovah betsaka tokoa ny mpanompony ao amin’ny tany iray atsy Afrika izay andrarana ny asa sy irehetan’ny ady an-trano. Maro amin’ireo rahalahintsika no atao an-tranomaizina, ary Vavolombelona tanora maromaro no nomelohina ho faty. Kanefa, nandefa filazana asa miavaka ireny kristiana ireny tamin’ny aprily, satria nisy tampon’isa vaovao folo izany. Ny fitambaran’isa vaovaon’ny mpitory dia ahitana fitomboana 29 isan-jato raha oharina amin’ny tamin’ny taon-dasa. Zotom-po toy inona moa no asehon’ireo rahalahy malalantsika! Nitory teo amin’ny 18 ora amin’ny ara-keviny sy nitarika fampianarana Baiboly 2,6 ny tsirairay avy amin’izy ireo, tamin’ny aprily.

Ity hafatra mifono zava-miafina ity fotsiny, voarain’ny sampana miahy io tany io, dia ampy hahazoana an-tsaina ny toe-piainana manjaka ao: “Manohy mamely mafy anay ny hafanana. Ny fiezahana ilainay hatao mba hihetsehana sy hahitana olona no porofo fa mamakivaky onjan-kafanana izahay. Fantatray anefa fa natao ho afaka hifankazatra amin’izay rehetra mety ho fiovan-kafanana sy izay mety ho tontolo iainana izahay. Maharitra izahay na manao ahoana na manao ahoana ary matoky izahay fa ho tafita velona.” Fahatokiana re izany!

Fitambaran’olona tsy mivadika no mahaforona fandaminana tsy mivadika. Izany no fandaminana voaforon’ny Vavolombelon’i Jehovah maherin’ny 3 229 022. Manantena ho tafita velona amin’ny “fahoriana lehibe” tsy ho ela izao izy ireo, ary handray anjara, eo ambany fanjakan’i Kristy, amin’ny asa lehibe fanovana ny tany ho paradisa (Apokalypsy 7:14; 21:3, 4; Isaia 65:17, 21-23, 25). Mifaly izy ireo rehefa mieritreritra ny fomba efa itahian’i Jehovah ny asa ataony amin-jotom-po, na mitory ny teny amin’ny “fotoana mora” izy ireo na amin’ny “fotoan-tsarotra”. (II Timoty 4:2, MN ). Asehon’ireo pejy manaraka ny fomba nampifanarahany ny fiainany amin’ny foto-kevitra ara-baiboly ho an’ny taona 1986 hoe: “Mandehana, ka mitoria ny fanjakan’Andriamanitra.” — Lioka 9:60.

[Efajoro/Sary, pejy 7]

Fitomboana:

Tampon’isany mpitory: 3 229 022 6,8%

Fitambaran’ora nitoriana: 680 837 042 15,3%

[Tabilao, pejy 10-13]

RAPAORO MANERAN-TANIN’NY VAVOLOMBELON’NY JEHOVAH, TAOM-PIASANA 1986

(Jereo ny gazety)

[Sary, pejy 8, 9]

AOKA ISIKA HANAO FANAMBARANA “AMPAHIBEMASO SY ISAN-TRANO” “HATRAMIN’NY FARAN’NY TANY”

Davao Philippines

Venise Italia

Castle Combe Angletera

Gàlà Norvezy

Kowloon Hong Kong

Taipei Taïwan

Queenstown Nouvelle-Zélande

Bolgatanga Ghana

Paris Frantsa

Quetzalternango Guatemala

Kerala India

Banff Canada