Ireo vehivavy any am-piasana sy ny fitsapana azy ireny

ARAKA ny voalazan’ny fikambanana mpanao fikarohana iray, “tato anatin’izao telopolo taona farany izao dia maro be tsy mbola nisy toy izany mihitsy ny vehivavy niditra hiasa”. Nanohy toy izao ilay tatitra: “Na any amin’ireo tany manan-karena na any amin’ireo tany mahantra, ny fisondrotam-bidin-javatra dia manosika ny vehivavy hiasa mba handraisan-karama.” Ny amin’izany, dia nanao izao fanamarihana izao ny vehivavy nizeriana iray: “Mafy aoka izany ny fanerena ara-toe-karena ka tsy misy azoko atao afa-tsy ny miasa.”

Sahala amin’ilay “vehivavy mahay” tamin’ny andron’ny Baiboly, dia vehivavy maro be no mirehareha afaka mitondra ny fanampiany ilaina mba hampiadana ara-nofo ny fianakaviany (Ohabolana 31:10, 16, 24). Hitan’ny vehivavy sasany fa mamporisika sy mahaliana ny manao asa iray. Kanefa, na dia mety hisy tombontsoa aza amin’ny fananana asa iray, dia mety hisy tsininy koa izany.

Ohatra, namboraka toy izao ny talen’ny magazay iray: “Tiako aoka izany ny asako, indrindra fa satria tsara ny lehibeko ary mahafinaritra aoka izany ny biraoko. Mahasosotra ahy anefa rehefa maka fotoana mihoatra noho izay azoko omena azy io asa io, satria misy asa hafa miandry ahy any an-trano rehefa avy eo, ny an’ny vady sy reny.” Na dia izany aza, dia vehivavy maro be no mendrika hoderaina satria samy vitany tsara tokoa na ny andraikiny amin’ny asa, na ny raharahany ao an-tokantrano sy ny adidiny ara-pianakavianaa.

Rehefa miasa anefa ny vehivavy iray, dia misetra fahasahiranana maro be mampiavaka ny fiainana any am-piasana koa. Ho an’ny vehivavy maro be, ny zava-tsarotra tsy maintsy setraina dia ny fitanana fihetsika mahay mandanjalanja rehefa voatery miasa ao anatin’ny rivo-piainana mihenjana izy ireny (noho ny firehetan’ny fitiavana fifaninanana) na feno tsy firaikana. Etsy an-daniny koa, ny faniriana handroso, hisondrotra, dia nitarika ny sasany tamin’izy ireny hanome ho an’ny asany ny toerana voalohany eo amin’ny fiainany.

Indraindray, dia ny fihenjanana eo amin’ny lafiny ara-pitondrantena no hihatra amin’ny vehivavy any amin’ny toeram-piasany. Maro be amin’izy ireny no mitaraina satria voatery mandre resaka maloto isan’andro. Ny mbola ratsiratsy kokoa ihany, ny hafa dia iharam-pamelezana matetika eo amin’ny momba ny lahy sy ny vavy. “Rehefa nanomboka niasa aho, hoy ny fitantaran’ny vehivavy kristiana iray, dia izaho no hany vehivavy tao amin’ny birao. Nanao fanamarihana feno filazan-javatra tsy nivantana tamiko ireo lehilahy, ka sarotra aoka izany tamiko ny nizaka izany.”

Izany no tsy maintsy setrain’ny vehivavy, indrindra fa ireo maniry hitana fitsipi-pitondrantena kristiana, isan’andro. Soa ihany fa afaka mandray tena fanampiana izy ireny.

[Fanamarihana ambany pejy]