Fanontanian’ny mpamaky
◼ Iza moa no nasian’i Paoly fitenenana rehefa nanoratra izy hoe: ‘Hoy ny Tompo tamiko: Ampy ho anao ny fahasoavako; fa ny heriko dia tanterahina amin’ny fahalemena? Jehovah sa Jesosy Kristy?
Tamin’ireo teny ireo, ny apostoly Paoly dia toa nanisy fitenenana ny amin’ny Tompo Jehovah. Amin’ny fametrahana indray ny teniny ao anatin’ny teny manodidina azy, dia azo atao, tsy ny mamantatra ny antony ihany, fa ny manombana bebe kokoa ny fifandraisana tanan’Andriamanitra amin’ny Zanany. Izao no nosoratan’i Paoly:
“Ary fandrao hirehareha noho ny habetsaky ny fanambarana aho, dia nasiana tsilo tamin’ny nofo, dia irak’i Satana hamely ahy, fandrao hirehareha aho. Izany no nangatahako intelo tamin’ny Tompo, mba hialan’izany amiko. Nefa hoy Izy tamiko: Ampy ho anao ny fahasoavako; fa ny heriko dia tanterahina amin’ny fahalemena. Koa mainka sitrako ny hirehareha amin’ny fahalemeko, mba hitoeran’ny herin’i Kristy amiko.” — 2 Korintiana 12:7-9.
Angamba ny tsilo tao amin’ny nofon’i Paoly faharatsian’ny maso na fitsapana naterak’ireo apostoly sandoka izay nanda ny naha-apostoly azy (Galatiana 4:15; 6:11; 2 Korintiana 11:5, 12-15). Na ahoana na ahoana, io tsilo io dia nila hanakivy azy na hisakana azy tsy hifaly ny amin’ny fanompoany, ary intelo no nangatahany mba hanesorana izany. Fa iza no nitenenany, ary iza no namaly azy tamin’ny filazana hoe: “Ny heriko”?
Koa satria misy firesahana ny amin’ny “herin’i Kristy” ao amin’ireo andinin-teny ireo, dia mety hisy hieritreritra fa ny Tompo Jesosy no nandefasan’i Paoly ny fangatahany. Tsy azo lavina fa manana hery azony ampitahaina amin’ireo mpianany i Jesosy (Marka 5:30; 13:26; 1 Timoty 1:12). Vakintsika tokoa fa ny Zanak’Andriamanitra dia “mihazona ny zavatra rehetra amin’ny herin’ny teniny”. — Hebreo 1:3; Kolosiana 1:17, 29.
Ny Tompo Andriamanitra anefa no loharano tampon’ny hery; afaka manome amin’izany izy ary tena manome izany tokoa ho an’ireo izay mivavaka aminy (Salamo 147:5; Isaia 40:26, 29-31). Izany hery avy amin’Andriamanitra izany dia nahatonga an’i Jesosy ho afaka hanatanteraka zavatra hafa koa (Lioka 5:17; Asa. 10:38). Toy izany koa, Jehovah dia nanome hery ho an’ireo apostoly sy ireo mpianatr’i Jesosy hafa (Lioka 24:49; Efesiana 3:14-16; 2 Timoty 1:7, 8). Paoly dia anisan’izy ireny, dia izy izay nanompo tamin’ny naha-minisitra ‘araka ny fanomezan’ny fahasoavan’Andriamanitra izay nomena azy araka ny fiàsan’ny heriny’. — Efesiana 3:7.
Koa satria tokony hiantefa amin’i Jehovah ireo vavaka, dia ara-dalàna ny hieritreretana fa nitodika tany amin’ny Tompo Andriamanitra i Paoly rehefa nangataka taminy mba hesorina aminy ‘ny tsilo tao amin’ny nofo, dia irak’i Satana’. (Filipiana 4:6; Salamo 145:18.) Afa-tsy izany koa, tsy nailika akory Kristy rehefa nampahery an’i Paoly i Jehovah tamin’ny filazana hoe: “Ny heriko dia tanterahina amin’ny fahalemena”. Ny hery avy amin’ny Tompo Andriamanitra tokoa dia azo naseho ho “herin’i Kristy” [toy ny lay, MN ] teo amin’i Paoly, satria Kristy dia “herin’Andriamanitra sy fahendren’Andriamanitra”. (1 Korintiana 1:24.) Araka izany, ny andinin-teny ao amin’ny 2 Korintiana 12:7-9 dia manampy antsika hahay hanavaka tsara kokoa ny anjara toerana lehibe ankinin’i Jehovah amin’ny Zanany, eo amin’ny fanatanterahana ny sitrapony.