Jesosy, ny fiainany sy ny fanompoany

Eo am-pikarohana an’ireo izay very

JESOSY dia nikaroka tamim-pahadodonana ireo izay vonona hanompo an’Andriamanitra tamim-panetren-tena. Nankany amin’ny olona rehetra àry izy, ary na dia tany amin’ireo hita niharihary fa mpanota aza, mba hiresaka taminy amin’ilay Fanjakana. Mpanota izao no nanatona mba hihaino azy.

Ny Fariseo sy ny mpanora-dalàna nanatrika teo dia nanakiana an’i Jesosy satria nifanerasera tamin’olona ratsy teo imasony izy. Nimonomonona izy ireo: “Ilehity mandray ny mpanota ka miara-mihinana aminy.” Tsy hanambany tena mihitsy amin’ny fanaovana toy izany ny tenan’izy ireo! Ny Fariseo sy ny mpanora-dalàna tokoa dia nitondra ny olon-tsotra tahaka ny vovoka ao ambany tongony. Nantsoiny mihitsy hoe ‘am ha’arets, “olon’ny tany” izy ireny mba hanehoana ny fanamavoany azy.

Jesosy kosa dia nandray ny olona tsirairay avy tamim-pahamendrehana sy tamin-katsaram-po ary tamim-pangorahana. Noho izany, dia naniry fatratra hihaino azy ny maro tamin’ireny mpandefitra ireny, anisan’izany ireo olona fantatra ho zatra nanota. Ahoana anefa no handraisana ny fanakianan’ny Fariseo sosotra tamin’ny fiezahan’i Jesosy ho an’ireo izay noheverin’izy ireo ho tsy mendrika?

Namaly ny fanamarihana manafintohina nataony tamin’ny fanoharana iray Jesosy. Niainga tamin’ny fisainan’ny Fariseo, izay nihevi-tena ho marina sy tsy nanana ahiahy teo anilan’Andriamanitra, nifanohitra tamin’ireo ‘am ha’arets ambany izay naniasia sady very izy ka namaly toy izao: “Iza moa no olona aminareo, izay manana ondry zato, ka very ny anankiray, no tsy mandao ny sivy amby sivi-folo any an-efitra ka mandeha hitady ilay very mandra-pahitany azy? Ary rehefa hitany iny, dia ataony eo an-tsorony, ka dia faly izy; ary rehefa tonga ao an-trano izy, dia mamory ny sakaizany sy ny namany ka manao aminy hoe: ‘Avia hiara-mifaly amiko; fa efa hitako ilay ondriko very’.”

Avy eo dia nanao fampiharana ny tantarany izy tamin’izao teny izao: “Lazaiko aminareo fa hisy fifaliana toy izany any an-danitra ny amin’ny mpanota iray izay mibebaka noho ny amin’ny olona marina sivy amby sivi-folo, izay tsy misy tokony hibebahany.”

Nihevitra ny tenany ho marina ny Fariseo ary noho izany dia tsy nila ny hibebaka. Roa taona talohan’izay, rehefa nanome tsiny an’i Jesosy ho niara-nihinana tamin’ny mpamory hetra sy ny mpanota ny sasany tamin’izy ireo, dia hoy izy taminy: “Tsy tonga hiantso ny marina Aho, fa ny mpanota.” Ny Fariseo, nirehareha ny amin’ny fahamarinany ka tsy nahita ny ilàna hibebaka, dia tsy nahatonga fifaliana tany an-danitra mihitsy. Izany kosa no miseho rehefa mibebaka amim-pahatsorana ny mpanota.

Mba hanamafisana ny hevitra hoe mitarika fifaliana lehibe ny fahasitranan’ny mpanota naniasia, dia nanome fanoharana hafa iray i Jesosy. “Iza moa no vehivavy manana farantsakely folo, ka very ny anankiray, no tsy mampirehitra jiro ka mifafa trano sy mitady fatratra mandra-pahitany azy? Ary raha hitany iny, dia mamory ny vehivavy sakaizany sy ny namany izy ka manao hoe: ‘Avia hiara-mifaly amiko; fa efa hitako ny farantsakely izay very!”

Nanao fampiharana mitovy i Jesosy tamin’ny filazana hoe: “Lazaiko aminareo fa misy fifaliana toy izany eo anatrehan’ny anjelin’Andriamanitra ny amin’ny mpanota iray izay mibebaka.”

Mahavariana ny fahalianana feno fitiavana ananan’ny anjely amin’ny fahasitranan’ny mpanota. Vao mainka mahavariana kokoa ny fahafahan’ireny ‘am ha’arets manetry tena ireny ho tonga mpikambana amin’ny Fanjakan’Andriamanitra any an-danitra. Ary, amin’ny farany aza dia ho tonga amin’ny toerana ambony noho ny an’ny anjely izy ireny any an-danitra! Kanefa toy izay hialona na ho sosotra dia fantatr’ireo anjely amim-panetren-tena fa ireny olombelona mpanota ireny, dia miatrika sady mandresy tarehin-javatra izay hampiofana azy hanompo any an-danitra amin’ny maha-mpanjaka sy mpisorona mangoraka sady mamindra fo. Lioka 15:1-10; Matio 9:13; 1 Korintiana 6:2, 3; Apokalypsy 20:6.

◆ Nahoana moa i Jesosy no nifanerasera tamina mpanota fanta-bahoaka, ary ahoana no nanakianan’ny Fariseo azy tamin’izany?

◆ Ahoana moa no nitondran’ny Fariseo ny sarambabembahoaka?

◆ Inona avy moa no fanoharana nampiasain’i Jesosy, ary inona no fianarana azo tsoahina avy amin’izany?

◆ Nahoana no mahavariana ny hoe ifalian’ny anjely?