Jehovah — Ilay Mpanan-talenta lehibe

“MANAO sary hosodoko fiposahan’ny masoandro sy filentehany tsy tambo isaina ireo mpanan-talenta, ary an-jatony na an’arivony dôlara maromaro mihitsy aza ny vidin’ny sary ataon’izy ireny. Manome anankiray amin’izany ho antsika isa-maraina sy isan-kariva anefa Jehovah Andriamanitra, ilay Mpanan-talenta lehibe, ilay niandohan’ny fiposahana sy ny filentehan’ny masoandro. Ary mihoatra lavitra noho ny kopiany ny voalohany aminy. Moa ve izany tsy samy antony tokony hitsaohana azy ho Mpamorona?” Izany no famakafakana nataon’ny Vavolombelon’i Jehovah iray, mpiandraikitra mpitety faritany tany Hawaii, tamin’ny lahateny natao teo anoloan’ny kongregasiona iray.

Anisan’ny nihaino azy ny vehivavy iray tsy nino an’Andriamanitra izay vao voalohany no mba nanatrika fivoriana tao amin’ny Efitrano Fanjakana. Nomarihiny ny famakafakana nataon’ilay mpandahateny, nefa mbola nisalasala mafy ny amin’ny fisian’Andriamanitra ihany izy. Roa taona teo ho eo tatỳ aoriana, rehefa nody avy niasa tamin’ny fiarakodia izy, dia tsy afa-nandroso noho ny fifanjevoana, ka izany dia nahatonga azy ho afaka hijery tamim-pahafinaretana masoandro mody hafa tanteraka. Tonga tao an-tsainy indray àry ny lahatenin’ilay mpiandraikitra mpitety faritany.

Hoy ny fitantarany: “Tsy nisafoaka noho ny fifanjevoana aho fa nijery izany masoandro mody kanto izany izay nampahatsiahy ahy ilay lahateny nampisehoana fa tokony hitsaoka an’i Jehovah Andriamanitra amin’ny maha-Mpanan-talenta sy Mpamorona azy isika. Hoy aho anakampo: ‘Mety ho marina ny voalazan’ilay mpandahateny; rehefa dinihina, dia angamba misy Mpamorona tokoa.’ Nanohy nieritreritra ny amin’io raharaha io aho sady nanohy ny diako, ka tamin’io hariva io, dia nantsoiko ilay namana nanasa ahy ho any amin’ny Efitrano Fanjakana. Nanomboka niara-nianatra ny Baiboly taminy aho, ary ankehitriny dia manompo an’i Jehovah Andriamanitro sy Mpamorona ahy koa aho.”

Tsy hoe nanjary nanaiky an’i Jehovah ho Mpanan-talenta lehibe namorona io vehivavy io, fa nanjary nidera azy koa, sahala amin’ny mpanao salamo izay nanoratra hoe: “Miderà an’i Jehovah, ry any an-danitra (...) Miderà azy, ry masoandro amam-bolana; miderà azy, ry kintana mazava rehetra (...) Aoka hidera ny anaran’i Jehovah ireo; fa Izy no nandidy, dia ary ireo.” — Salamo 148:1-5.