Ny fomba hamantarana ny tena minisitr’Andriamanitra
AMIN’NY 1948 isika izao. Mandeha amin’ny fiarabe efa ratsiratsy eo amin’ny lalana mikitoantoana ny minisitra roa, Vavolombelon’i Jehovah. Avy any amin’ny tanàna iray any avaratr’i Espaina izy ireo ary mankany Pyrénées mba hitsidika minisitra kristiana mitokan-toerana iray. Rehefa nijanona teo amin’ny toerana akaikin’ny vohitra nisy ilay kristiana indrindra ny fiarabe, dia tazan’izy ireo izy io niandry azy niaraka tamin’ny ampondrany. Nahamarika antokon’olona hafahafa teo akaiky teo koa anefa izy ireo: pretra iray sy mpiambina sivily efatra mirongo fiadiana! Nianika ny lalankely nideza nankany amin’ilay vohitra ireo minisitra kristiana raha nandray ny basipoletany ny anankiray tamin’ireo mpiambina ka nikiakiaka hoe: “Manos arriba! (Mitolora vatana)” Voasambotra ireto mpitsidika roa. Inona no antony? Nilaza tamin’ireo mpiambina sivily ilay pretra fa mpampihorohoro izy ireo. Lainga tsy misy henatra re izany! Nampidirina an-tranomaizina ireo minisitsika telo, noho izany.
Inona no asehon’io toe-javatra io? Tsy tena minisitr’Andriamanitra akory izay rehetra mitondra ny anarana hoe pretra. Raha ny marina, dia misy hantsana mampisaraka ireo tena minisitra marina amin’ny sandoka, matetika tokoa. Inona avy àry no fepetra tena lehibe tokony hofenoin’ny tena minisitra?
Ireo fepetra takina amin’ny tena minisitr’Andriamanitra
Amin’ny fotopotony, ny hoe manatanteraka minisitera iray dia ny “mitondra fanampiana na manampy”. Tokony hiaiky ny tena minisitra kristiana fa ny Baiboly no Teny ara-tsindrimandrin’Andriamanitra (Jaona 17:17). Tsy ampy anefa ny mahafeno io fepetra voalohany io. Tokony hanana fahalalana tsara sy fahafantarana mazava ny Soratra Masina koa izy, ka tsy tokony hampiasainy amim-pitiavan-tena mba hahasoa ny tenany irery izany fahalalana izany. Ilainy dia ilainy kosa ny miseho ho mpitory mafana fo ny Filazantsara, dia ny vaovao tsara momba ny Fanjakan’Andriamanitra sy ny fanantenana hiaina mandrakizay eo amin’ny tany paradisa. — Jaona 17:3; Salamo 37:11, 29.
Aoka holazaina kely aloha fa ny fitoriana ny vaovao tsaran’ny Fanjakana ataon’ny Vavolombelon’i Jehovah, tsy any Espaina ihany fa maneran-tany, dia fahatanterahan’ny faminaniana iray nambaran’i Jesosy. Izao no nambarany momba ireo andro farany ho an’ny fandehan-javatra ratsy ankehitriny nisy efa hatramin’ny an’arivony taona maromaro izao: “Ary hotorina amin’ny tany onenana manontolo ity vaovao tsaran’ny fanjakana ity, ho vavolombelona ho an’ny firenena rehetra; dia vao ho tonga ny farany.” — Matio 24:14, 33, 34, MN.
Araka ny tenin’i Jesosy mihitsy, ny tena minisitra kristiana dia tokony hahafeno fepetra takina hafa iray koa: tsy ho “naman’izao tontolo izao”. Tsy tokony hitsabaka amin’ny politika àry izy ireo (Jaona 15:19). Ilainy koa ny maneho fanetren-tena sy fitiavana ary hatsaram-po lehibe, ka ho vonona mandrakariva hanampy ireo izay mendrika izany sy sahirana. — 1 Korintiana 13:1, 4; 1 Petera 5:6.
Zava-dehibe tokoa ny hahaiza-manavaka ny minisitra marina amin’ny sandoka. Raharaha tena iankinan’ny aina izany. Tamin’ny toriteniny malaza teo an-tendrombohitra, dia nandefa izao fampitandremana izao i Jesosy: “Mitandrema hianareo, fandrao ho voafitaky ny mpaminany sandoka, izay mankao aminareo amin’ny fitafian’ny ondry, fa ao anatiny dia amboadia mitoha izy.” — Matio 7:15.
Kanefa, na dia tsy maintsy miantsoroka adidy manokana sy mahafeno fepetra sasany aza ny tena minisitra, dia manana tombontsoa maro koa izy ireny. Raha ny marina, amin’ny fitambarany, dia izy ireny no olona manana tombontsoa indrindra sy sambatra indrindra. Izany no ho hitanao amin’ny famakiana ny lahatsoratra manaraka.