Zava-miafina iray: Iza moa Babylona Lehibe, ilay vehivavy janga?

VEHIVAVY iray, vehivavy janga maloto izay manan-kery eo amin’ny fiainan’ny olona an’arivony tapitrisa maro, no novonoina ho faty. Tsy famonoana ho faty mahazatra anefa izany. Amin’ny heviny ahoana? Ny mpamono ilay voaheloka ho faty dia biby iray, biby dia iray izay mampitanjaka azy tanteraka, mihinana ny nofony ary mamela ny sisa tsy laniny taminy ao amin’ny afo. Iza io vehivavy mampihatra fitaomana mahery io? Nahoana no biby dia no mamely azy? Inona no nataony mba ho mendrika ny fiafarana mahery vaika toy izany?a — Apokalypsy 17:16, 17.

Mety ho fiandohan’ny tantara mifono zava-miafina iray izany, nefa tsy ambangovangon’ny tantara noforonina mampitaintaina akory. Izany dia zavatra tena izy, izay madiva hitranga ary mahakasika anao, satria, ankehitriny, dia angamba manan-kery eo amin’ny fiainanao io vehivavy janga maloto io. Ambonin’izany, dia hiharan’ny fahafatesana ianao na hahazo ny fiainana arakaraka ny hoe hijanona miaraka aminy ianao na handositra azy. Iza àry izy io?

Ireo mpifampiraharaha miafina amin’io vehivavy io

Lazalazain’i Jaona ao amin’ny boky ara-paminanian’ny Apokalypsy io vehivavy mamohehatra sy mpanangoly sahisahy ratsy io; izao no vakintsika ao: “Dia nentiny [ny anjely] tamin’ny Fanahy ho any an-efitra aho ary nahita vehivavy nitaingina bibi-dia mivolon-jaky, feno anarana fitenenan-dratsy sady manan-doha fito sy tandroka folo. Ary ravehivavy dia nitafy lamba volomparasy sy jaky ary niravaka volamena sy vato soa ary pèrila sady nitana kapoaka volamena teny an-tànany, feno zava-betaveta, dia ny zava-maloto momba ny fijangajangany; ary nisy anarana voasoratra teo amin’ny handriny nanao hoe: ‘Zava-miafina, Babylona Lehibe, Renin’ny mpijangajanga sy ny zava-betaveta amin’ny tany’.” — Apokalypsy 17:3-5.

“Babylona Lehibe” àry izany dia tokony ho vehivavy mahatahotra, satria milaza amin’ny fomba hentitra ny fitantarana eo amin’ny andininy 1 fa “mipetraka eny ambonin’ny rano maro” izy. Inona no tiana holazaina amin’izany? Nanazava tamin’i Jaona ny anjelin’Andriamanitra hoe: “Ny rano efa hitanao, izay ipetrahan’ilay vehivavy janga, dia olona sy vahoaka betsaka sy firenena maro ary samy hafa fiteny.” (Apokalypsy 17:15). Tsy isalasalana mihitsy fa mihatra manerana ny tany manontolo ny heriny. Nefa tsy vehivavy janga araka ny fahita izy. Izy io dia “renin’ny mpijangajanga”, ilay mitarika ny fikambanana ratsy. Raha ny amin’ny fijangajangana dia izy no manome ny baiko. Manana sakaiza ratsy manokana mihitsy koa anefa izy.

Asehon’ilay anjely ny sakaiza ankasitrahan’ilay vehivavy janga lehibe indrindra. Ahoana no ilazalazany azy? Lazainy fa Babylona Lehibe dia “ilay nijangajangan’ny mpanjakan’ny tany, sady natao leon’ny divain’ny fijangajangany ny mponina tamin’ny tany”. (Apokalypsy 17:2.) Tsy maintsy ho manintona aoka izany sady manana fifandraisana be dia be tokoa izy matoa afaka mitaona ny mpitondra politika eo amin’izao tontolo izao, eny, ny “mpanjakan’ny tany” mihitsy! Iza àry izy io?

Milaza mazava ilay anjely fa manana anarana izy, anarana mifono zava-miafina: “Babylona Lehibe.” Izany àry dia famantarana roa ny amin’ny maha-izy azy: ny voalohany dia mahakasika ireo izay anehoany fitiavana, ny faharoa dia ny anarany, Babylona Lehibe. Mitarika antsika ho amin’ny famaranan-kevitra inona moa ireo filazana roa ireo?

[Fanamarihana ambany pejy]