“Inona no mety hataoko mba hovonjena aho?”
“INONA no mety hataoko mba hovonjena aho?” Nolazain’ny mpiambina tranomaizina iray tany Filipia, Makedonia, tamin’ny taona 50 amin’ny fanisan-taona iraisana, io fanontaniana io. Namaky ny varavaran’ny tranomaizina nambenany ny horohorontany nahery vaika. Saika namono tena ilay mpiambina tranomaizina, satria nataony fa nandositra ireo mpigadra. Kanefa, niantso azy toy izao ny apostoly Paoly, iray tamin’ireo mpigadra: “Aza mamono tena fa ato ihany izahay rehetra.” — Asan’ny apostoly 16:25-30.
Paoly sy Silasy mpiara-mifatotra taminy dia tonga tany Filipia mba hitondra hafatra famonjena, ka nahiboka an-tranomaizina izy ireo, noho ny fiampangana lainga. Naniry handre ny hafatr’i Paoly sy Silasy ilay mpiambina, faly noho ny tsy nandosiran’ireo mpifatotra. Inona no tokony hataony mba hahazoana ny famonjena izay notorin’ireo misionera kristiana roa ireo?
Amin’izao androntsika izao, dia mbola mila foana ny famonjena izay notorin’i Paoly sy Silasy ny olona. Kanefa, mampalahelo fa maro amin’izy ireo no misalasala mafy raha ny amin’ny raharahan’ny famonjena. Indraindray izy ireny dia kivy noho ny avonavona sy ny fitiavam-bolan’ireo mpitondra fivavahana izay mihambo ho mampianatra azy ny fomba hahavoavonjy; na koa, voasakana izy ireny noho ny fihetseham-po tafahoatra sy tsy voahevitra mampiavaka ny fivavahana ara-pilazantsara maro izay manao dokam-barotra ny amin’ny fomba famonjena. Raha ny amin’ireny mihambo ho mpitory ny filazantsara ireny, ilay mpanao gazety anglisy atao hoe Philip Howard dia nilaza fa “mihazona bebe kokoa ny fihetseham-po sy ny taratasim-bolan’ny mpihaino azy noho ny sainy izy ireny.” — Jereo 2 Petera 2:2.
Olona hafa maro no tafintohina noho ny fiovana hita indraindray eo amin’ireo izay mihevitra ny tenany ho “voavonjy”. Ao amin’ny bokiny hoe Snapping, Flo Conway sy Jim Siegelman dia niady hevitra ny amin’ny fanandramana momba ny fivavahana maro be — tafiditra amin’izany ny amin’ny “famonjena” — izay malaza hatramin’ny am-polony taona maromaro izao. Nampahatsiahy ny “lafiny ratsy” amin’ireny fanandramana ireny izy, tamin’ny filazana fa ny olona dia “voarapaky” ny fiovana tampoka teo amin’ny maha-izy azy izay tsy nitondra ho azy ireny ny fahafaham-po sy ny fahazavana nampanantenaina, fa niteraka kosa, nofinofy, fahateren-tsaina ary tsy fahaizana miatrika ny zava-misy. Avy eo dia nanampy toy izao izy ireo: “Azo atao ny milazalaza ny zava-mahagaga ho toy ny fikatonan-tsaina, fahapotehan’ny hevitra.”
Tsy tahaka izany tsy akory no nihatra tamin’ireo kristiana tamin’ny taonjato voalohany izay nahita ny famonjena. Tsy niharan’ny fikatonan-tsaina ilay mpiambina tranomaizina filipiana rehefa namaly ny fanontaniany hoe: “Inona no mety hataoko, mba hovonjena aho?” ny apostoly Paoly. Tetsy an-daniny, Paoly sy Silasy dia tsy ‘nihazona ny fihetseham-pony’ na nangataka taminy fanatitra ara-bola be dia be. Mifanohitra amin’izany fa “nitory ny tenin’ny Tompo [Jehovah, MN ]” taminy izy roa lahy. Tamin’ny fiaraha-namakafaka tamin’io lehilahy io, dia nanampy azy izy ireo mba handray fahalalana mazava ny amin’ny fandaharana izay noraisin’Andriamanitra mba hahatonga ny famonjena ho azo atao. — Asan’ny apostoly 16:32.
“Minoa an’i Jesosy Tompo”
Nanokatra ny sain’ilay mpiambina tranomaizina ho amin’ny fahamarinana fototra ny amin’ny famonjena ireo misionera kristiana ireo. Izany fahamarinana izany dia sahala amin’izay nohazavain’ny apostoly Petera fony naorina ny kongregasiona kristiana voalohany. Nanintona ny saina ho amin’ny anjara asa fototra tanan’i Kristy momba ny famonjena i Petera tamin’ny fiantsoana an’i Jesosy ho “Tompon’ny aina, [Fiasana lehibe indrindra mitondra fiainana, MN ]”. Nilaza koa izy hoe: “Ary tsy misy famonjena amin’ny hafa; fa tsy misy anarana hafa ambanin’ny lanitra nomena ny olona izay hahazoantsika famonjena.” (Asan’ny apostoly 3:15; 4:12). Nampifantoka ny sain’ilay mpiambina tranomaizina ho amin’io Fiasana ho amin’ny famonjena io, ry Paoly sy Silasy rehefa niteny taminy hoe: “Minoa an’i Jesosy Tompo, dia hovonjena hianao.” — Asan’ny apostoly 16:31.
Kanefa, midika inona ny hoe mino an’i Jesosy Tompo? Nahoana no tsy misy anarana hafa ankoatra ny an’i Jesosy mety hamonjy antsika? Moa ve ny apostoly nino ity foto-kevitra ity: “Voavonjy indray mandeha, voavonjy mandrakizay”? Zava-dehibe ireo fanontaniana ireo, satria na dia mampihen-danja ny hevitry ny famonjena aza ny teny sy ny asan’ny mpitondra fivavahana maro be amin’ny andro ankehitriny, dia mila ihany ny famonjena isika. Mila valiny mahafa-po sy ara-drariny ny amin’ity fanontaniana ity isika rehetra: “Inona no mety hataoko mba hovonjena aho?”