Mpiambina Fonja Lasa Kristianina

Nisy demonia ny ankizivavy anankiray tany Filipy, ka nahay nilaza ny hoavy. Nahazo vola be àry ny tompony. Nanaraka an’i Paoly sy Silasy io ankizivavy io nandritra ny andro maromaro, tamin-dry zareo tany Filipy, sady nataon’ilay demonia niantsoantso hoe: “Mpanompon’ilay Andriamanitra Avo Indrindra ireo lehilahy ireo!” Niteny tamin’ilay demonia i Paoly tamin’ny farany hoe: ‘Amin’ny anaran’i Jesosy, mivoaha amin’io ankizivavy io!’ Dia niala taminy ilay demonia.

Tezitra be ireo tompon’ilay ankizivavy satria tsy hahazo vola be intsony. Notaritaritin-dry zareo nankany amin’ny manam-pahefana àry i Paoly sy Silasy. Dia hoy ry zareo: ‘Nandika lalàna ireto lehilahy ireto sady manakorontana ny tanàna.’ Dia nasain’ny manam-pahefana nokapohina i Paoly sy Silasy, ary avy eo nogadraina. Natao tany anatiny indrindra, tany amin’ny toerana maizina indrindra, tao amin’ilay fonja ry zareo sady nasiana gadra hazo.

Nihira fiderana an’i Jehovah izy roa lahy tao am-ponja, ary nihaino an-dry zareo ny gadra hafa. Nisy horohoron-tany mahery be tampoka tamin’ny 12 alina, dia nihozongozona be hatrany amin’ny fototr’ilay fonja. Nivoha ho azy daholo ny varavarana, ary nivaha ny rojo vy sy ny gadra hazo tamin’ireo voafonja. Dia nihazakazaka haingana niditra tany anatiny ilay mpiambina, ka hitany fa nivoha daholo ny varavarana. Nieritreritra izy hoe tafatsoaka ny gadra rehetra, dia naka sabatra izy ka saika hamono tena.

Niantsoantso anefa i Paoly hoe: ‘Aza mamono tena fa ato daholo izahay!’ Tonga dia nikoropaka niditra tao amin-dry zareo ilay mpiambina, dia nandohalika teo an-tongotr’i Paoly sy Silasy. Dia hoy izy: ‘Inona no tokony hataoko, amin’izay izaho voavonjy?’ Hoy izy roa lahy: ‘Mila mino an’i Jesosy ianao sy ny fianakavianao.’ Dia nampianarin’i Paoly sy Silasy ny tenin’i Jehovah ry zareo, ary natao batisa daholo.