Fiadanana — Ny zavatra tena hisy
VITSY no hitsikera ny zavatra tsara tratrarina ao ambadiky ny fiezahana ataon’ny Firenena mikambana mba hiarovana ny fandriampahalemana. “‘Andeha isika hanefy sabatra ho fangady’, izany no teny mampiseho ny filamatry ny Firenena mikambana momba ny fandriampahalemana, hoy ny “The World Book Encyclopedia”, ary manampy toy izao izy: “Manana filamatra lehibe indrindra anankiroa ny Firenena mikambana dia: ny fandriampahalemana sy ny zon’olombelona.”
Ny soratra eo ambanin’io tsangambato aseho eto io dia teny nadika avy ao amin’ny faminanian’ny Baiboly, ao amin’ny Isaia toko faha-2, andininy faha-4. Vakina toy izao izany, araka ny fandikan-teny amin’ny andro ankehitriny:
“Ary tokony hanefy ny sabany ho fangady sy ny lefony ho fanetezam-boaloboka ireny.”
Tena tokony ho nanome hevitra ireo fanjakana mpikambana ao amin’ny Firenena mikambana ireo teny mendri-kaja ireo mba hiarovana ny fandriampahalemana sy ny fanafoanana ny fitaovam-piadiana maharitra. Mampalahelo anefa fa zavatra hafa no nasehon’ny tantaran’ny Firenena mikambana hatramin’ny niandohany tamin’ny faran’ny ady lehibe faharoa tamin’ny 1945. Nahoana? Raha raisina amin’ny fotony, dia satria ireo teny nalaina avy ao amin’ny Isaia etsy ambony dia tsy azo raisina mitokana, toy ny nanaovan’ireo fitondram-panjakan’olombelona azy. Tena zava-dehibe ny teny manodidina azy. Diniho ny antony.
Ny hafatr’i Isaia
Mpaminany i Isaia. Miresaka ny amin’ny fahitana be voninahitry ny firaisan-kina sy fiadanana ho an’ny olona avy amin’ny foko rehetra izy. Tsy maintsy manao zavatra ny olona mba hahatanteraka an’io fahitana io. Inona izany? Diniho ny hevitry ny andininy faha-2 sy faha-3, mifandray amin’ny andininy faha-4.
“[2] Ary izao no ho tonga any am-parany: ny tendrombohitra misy ny tranon’i Jehovah dia haorina eo an-tampon’ny tendrombohitra. Ary hasandratra ho avo noho ny havoana; ary ny jentilisa rehetra hitanjozotra hankany. [3] Eny, maro ny firenena no hiainga ka hanao hoe: Andeha isika hiakatra any an-tendrombohitr’i Jehovah, mba hampianarany antsika ny amin’ny làlany, ka handehanantsika amin’ny atorony; fa avy any Ziona no hivoahan’ny lalàna, ary avy any Jerosalema ny tenin’i Jehovah. [4] Ary hitsara ny adin’ny jentilisa izy ka hampiaiky firenena maro; dia hanefy ny sabany ho fangady ireny, ary ny lefony ho fanetezam-boaloboka; ny firenena tsy hanainga sabatra hifamely na hianatra ady intsony.”
Voalohany indrindra, dia tsy maintsy ekentsika fa zon’i Jehovah, Mpamorona antsika, ny hampianatra antsika “ny amin’ny làlany” izay, araka ny voalazan’i Isaia tatỳ aoriana, dia ‘avo noho ny làlantsika’. (Isaia 55:9.) Olona maro be, indrindra fa ireo mpitondra mihevi-tena ho zavatra, no mahita izany ho toa zavatra sarotra ekena. Ny lalan’izy ireo ihany no mahitsy eo imason’ny tenany. Kanefa, ny hoe tsy mitondra ho amin’ny tena fandriampahaleman’izao tontolo izao sy ho amin’ny fanafoanana ny fitaovam-piadiana ny lalan’izy ireo, dia mampiseho ny maha-zava-poana ny hanohizana hanaraka ny lalana toy izany.
Faharoa manaraka izany, mariho ny ilàna ny hanirian’ny tsirairay mafy ny hiaina mifanaraka amin’ireo lalàn’Andriamanitra, amin’ny hoe: “Ka handehanantsika amin’ny atorony.” Mifototra amin’izany ihany no hanefena ny sabatra ho fangady sy ny lefona ho fanetezam-boaloboka amin’ny ambaratonga maneran-tany. Ahoana no mety hahatratrarana ny zava-kendrena irina fatratra toy izany?
Ny fampianarana avy amin’Andriamanitra
Olona maro be no manana Baiboly, dia ny boky izay mirakitra ireo fampianaran’i Jehovah Andriamanitra, nefa maro no mila manao zavatra mihoatra noho ny fananana azy io fotsiny. Voalazan’i Isaia fa avy any “Jerosalema” no ivoahan’ny lalàn’i Jehovah sy ny teniny. Inona no dikan’izany? Tamin’ny andron’i Isaia, dia io tanàna io no foiben’ny fahefam-panjakana izay nitodihan’ny Isiraelita nahatoky rehetra (Isaia 60:14). Tatỳ aoriana, tamin’ny andron’ireo apostolin’i Jesosy Kristy, dia mbola foiben’ny fampianarana avy amin’ny Kolejy foiben’ny kristiana tao aminy i Jerosalema. — Asan’ny apostoly 15:2; 16:4.
Ahoana ny amin’izao androntsika izao? Mariho fa tamin’izao teny izao no nanombohan’i Isaia ny hafatra nentiny: “Izao no ho tonga any am-parany.” Milaza toy izao ny fandikan-teny hafa: “Amin’ny andro farany.” (New International Version) Misy porofo omena tsy tapaka ao amin’ny pejin’ity gazety ity mba hanamafisana fa miaina ny andro faran’ity izao tontolo izao ankehitriny ity isika nanomboka tamin’ny 1914. Inona àry no tokony hantenaintsika ho hita, araka ny andininy faha-3 sy faha-4?
Olona maro be izay tsy mianatra ady intsony sady efa nanefy “ny sabany ho fangady”. Ary efa hitantsika tokoa izany! Lehilahy sy vehivavy ary ankizy mahery lavitra ny 3 tapitrisa sy sasany avy amin’ny firazanana rehetra, any amin’ny tany 200 mahery no nanaiky ho tafaray ka miara-miaina amim-pihavanana ary mitory ny hafatry ny Baiboly momba ny fiadanana amin’ny mpiara-belona amin’izy ireo. Fantatra hatrany amin’ny faran’ny tany ho ny Vavolombelon’i Jehovah izy ireny.
Manana Kolejy foibe amin’ny andro ankehitriny izy ireny, izay voaforon’ny loholona kristiana avy amin’ny faritra isan-karazany amin’ny tany, izay manao ny fiandraiketana ilaina amin’ny asa ataon’ny vahoakan’Andriamanitra maneran-tany. Ireny lehilahy ireny, sahala amin’ireo apostoly sy loholona tany Jerosalema tamin’ny taonjato voalohany, dia mpikambana voahosotra avy ao amin’ny kilasin’ny mpanompo mahatoky sy manan-tsaina notendren’i Jesosy hikarakara ny tombontsoan’ny Fanjakany rehetra eto an-tany. Nohamarinin’ny tantara fa azo itokiana izy ireny raha ny amin’ny fanekena ny fitarihan’ny fanahy masina ary tsy miankina amin’ny fahendren’olombelona izy rehefa mampianatra ny andian’ondrin’Andriamanitra ny lalan’ny tena fiadanana. — Matio 24:45-47; 1 Petera 5:1-4.
Ny fanompoam-pivavahana marina
Mihoatra noho ny fahalalana ara-tsaina sy ny faniriana hiaina mifanaraka amin’ny toromarik’Andriamanitra koa aza no tafiditra amin’ny hoe miaina amim-piadanana. Tena ilaina ny fifikirana mafy amin’i Jehovah Mpamorona antsika sy ny fanolorana fanompoam-pivavahana avy amin’ny fo ho azy, araka ny anazavan’i Isaia azy koa.
Nambaran’ilay mpaminany fa “ny tendrombohitra misy ny tranon’i Jehovah dia haorina [mafy, MN ] eo an-tampon’ny tendrombohitra” ary “hasandratra ho avo noho ny havoana”. Tamin’ny andro fahiny, ny tendrombohitra sy ny havoana sasany dia nampiasaina ho toeram-panompoam-pivavahana ho an’ireo andriamani-tsy izy. Fony Davida nitondra ny Fiaran’ny fanekena ho any amin’ny tranolay izay naoriny teo an-tendrombohitra Ziona (Jerosalema), izay 760 metatra ambonin’ny ranomasina ny haavony, dia miharihary fa teo ambany fitarihan’Andriamanitra no nanaovany izany. Tatỳ aoriana, rehefa niorina teo amin’ny tendrombohitra Moria ny tempoly lehiben’i Jehovah, ny teny hoe “Ziona” dia nanjary nahafaoka ny faritra nisy ny tempoly koa, hany ka nasandratra ho avo noho ireo toeram-panompoan-tsampy teny amin’ny manodidina ny tempoly. Nantsoina ho ‘tendrombohiny masina’ koa i Jerosalema; araka izany dia nasandratra ho avo hatrany ny fanompoam-pivavahana tamin’i Jehovah. — Isaia 8:18; 66:20.
Amin’izao andro izao koa, ny fanompoam-pivavahana amin’i Jehovah Andriamanitra dia misandratra toy ny tendrombohitra ara-panoharana. Hitan’ny rehetra ny fahalehibeazany noho izy nahavita zavatra izay tsy hain’ny fivavahana hafa natao. Inona izany? Nampiray ny mpivavaka amin’i Jehovah rehetra, izay nanefy an-tsitrapo ny sabany ho fangady sy tsy mianatra ady intsony, izy io. Miaina toy ny vahoaka tafaray sy mpirahalahy izy ireo na dia miely manerana ny firenena rehetra eo amin’izao tontolo izao aza. — Salamo 33:12.
Fotoana fanapahan-kevitra
Amin’ny ahoana izany rehetra izany no mahakasika anao? Mamaly izany indrindra ny tenin’ny mpaminany hebreo hafa iray manao hoe: “He izany vahoaka mireondreona ao amin’ny lohasaha fitsarana [fanapahan-kevitra, MN ]. Fa efa antomotra ny andron’i Jehovah ao amin’ny lohasaha fitsarana.” (Joela 4:14 [3:14, MN ]). Andro fanapahan-kevitra haingana izao ho an’ny olombelona rehetra: na hianatra ny lalan’ny tena fiadanana eo ambany fitarihan’Andriamanitra, na hanohy hanohana ny fiainana fatra-mpanao fitaovam-piadiana izay hifarana tsy ho ela.
Voalazan’i Jesosy mialoha fa hisy fitoriana lehibe hotanterahina amin’ny androntsika. Fitoriana ny “vaovao tsara” ny amin’ny hitondran’ny Fanjakan’Andriamanitra fiadanana ho an’ity tany rotidrotiky ny ady ity izany (Matio 24:14). Fampianarana Baiboly tsy tapaka any an-tokantrano mahery lavitra ny telo tapitrisa no notarihin’ny Vavolombelon’i Jehovah maneran-tany tamin’ny taona lasa. Natao niaraka tamin’olona manokana ny sasany tamin’izany fampianarana isan-kerinandro izany, nefa ny maro taminy dia natao niaraka tamina fianakaviana manontolo. Ankizy an-tapitrisany maro no omena fanantenana azo antoka momba ny hoaviny amin’izany fomba izany, ary mahazo antoka ny ray aman-drenin’izy ireny fa ny ady, toy izay efa natrehiny ary angamba nandraisany anjara mihitsy aza, dia tsy ho hita ao amin’izao tontolo izao vaovao haorin’i Jehovah Andriamanitra.
Endrey izany tontolo iray hanjakan’ny fifampatokiana sy ny fihavanana! Tsy hilaina intsony amin’izany ny hanahiana ny amin’ny fanafoanana ny fitaovam-piadiana satria ho zavatra efa lasa ny fitaovam-piadiana rehetra. Ary izany rehetra izany dia noho Jehovah, “ilay Andriamanitra manome fiadanana”, izay mampianatra antsika amim-pitiavana ankehitriny mba hahazoantsika miomana hiaina amin’ny fomba feno eo ambanin’ny Fanjakany araka ny rariny. — Romana 15:33, MN.