Mitantara ireo mpitory ilay Fanjakana
‘Aoka isika ho tia amin’ny asa sy amin’ny marina’
◻ HOY ny apostoly Jaona: “Aoka tsy ho tia amin’ny teny na amin’ny lela isika, fa amin’ny asa sy amin’ny marina.” (1 Jaona 3:18). Nambaran’i Jesosy fa tokony ‘ho tia ny namantsika tahaka ny tenantsika’ isika. (Matio 22:39.) Amin’ny fanehoantsika ny fitiavantsika amin’ny asa no anaovantsika fanambarana ho fanohanana ny fahamarinana araka ny asehon’ity zava-nitranga tany Grande-Bretagne manaraka ity.
Mazàna, rehefa nitsidika ny reniny izay voan’ny “sclérose en plaques” i Pauline, dia irery ao an-tranony foana izy io. Tamin’io andro io anefa, rehefa niditra tao an-trano izy, dia nandre ny fihodinan’ny milina fanasan-damba ary nisy olona namafa trano tamin’ny milina mpitroka vovoka (aspirateur) tany ambony rihana. “Inona no mitranga? Iza no ao?” hoy ny fanontaniany an-dreniny. Nohazavain’io taminy àry fa nandondòna tao am-baravarany ny vehivavy Vavolombelon’i Jehovah roa ka nahita ny toe-javatra sarotra nisy azy ary nijanona mba hanampy azy. Rehefa avy nanadio ny trano sy nahandro sakafo izy ireo, dia nipetraka ary nanontany hoe: “Vonona ve ianao?” “Vonona ho amin’inona?” hoy ny fanontanian’i Pauline. Nohazavain-dreniny taminy fa nanaiky fianarana ny Baiboly izy. Nisalasala ny hijanona i Pauline, nefa noho izy vao avy nanao dia lavitra, dia nanontany izy raha afaka manatrika ny fianarana. Nankasitrahany aoka izany ilay izy ka nanao fandaharana izy mba hiverina amin’io andro io isan-kerinandro mba hanatrika izany tsy tapaka. Rehefa ela ny ela, dia nisy namany iray niaraka taminy ary amin’izao fotoana izao izy roa vavy dia samy vita batisa. Noho io fianarana voalohany io, dia mpikambana folo amin’io fianakaviana io ihany no Vavolombelon’i Jehovah amin’izao fotoana izao! Eny, tokony hanampy “amin’ny asa” isika!
Nanaiky ny fahamarinana ny pastora iray any Nouvelle-Guinée
◻ Tamin’ny andron’i Jesosy, dia nisy mpisorona nanaiky ny fampianarany. Izany no ataon’ny mpitondra fivavahana tso-po amin’izao androntsika izao, araka ny porofoin’ity zava-nitranga tena niainana tany amin’ireo faritra be tendrombohitra any Nouvelle-Guinée, izay notantarain’ny mpiandraikitra ny fizaran-tany ity: “Nanorina fiangonana kely teo akaikin’ny Efitrano Fanjakana ny pastora pentekôtista tanora sy nahita fianarana iray. Nanao fanambarana tamin’io lehilahy nampiseho fitiavana io ny mpikambana iray tao amin’ny kongregasiona. Fotoana fohy taorian’izay, dia nitsidika ilay kongregasiona ary nitoetra tao amin’ilay rahalahy aho, trano iray arabe amin’ny an’ilay pastora. Ny hariva voalohany nanaraka ny nahatongavako, dia tonga tao an-trano io pastora io sy ny Baiboliny niaraka tamina antokon’olona maro anisan’ny kongregasionany. Ta handre ny hafatra momba ny Fanjakana izy rehetra. Nanontany zavatra maro izy, ary nitohy hatramin’ny alina be ny ady hevitra. Nandritra ny fitsidihana manontolo nataoko, dia tonga isan-kariva izy niaraka tamin’olon-kafa naneho fahalianana mba hahazo valiny amin’ny fanontaniana hafa. Nasaiko tamin’ny fivoriamben’ny fizaran-tany izay tokony hitranga ny herinandro nanaraka izy, ary dia tonga izy niaraka tamin’ilay Vavolombelona niresaka taminy ny fahamarinana tamin’ny voalohany. Nanohy nianatra ny Baiboly io lehilahy io, nandao ny Fiangonana pentekôtista, ary mpitory tsy tapaka ny vaovao tsara izy izao.”
Marina tokoa fa Andriamanitra dia “tia ny olona [karazan’olona, MN ] rehetra hovonjena, ka ho tonga amin’ny fahalalana ny marina”. — 1 Timoty 2:4.