Inona no nitranga tamin’ny toetra mampiavaka ny olombelona?
“Nahoana no misy fampijaliana ny ankizy amin’izao andro iainantsika izao? Nahoana no misy fampijaliana biby? Nahoana no misy ny herisetra? (...) Nahoana ny olona no mitodika any amin’ny fampihorohoroana? Nahoana ny olona no mitodika any amin’ny zava-mahadomelina? (...) Nahoana, rehefa manana ny zava-drehetra ianao, no misy olona sasany miverina amin’ireny toetra lalim-paka izay manimba ny sivilizasiona manontolo ireny?
IREO fanontaniana ireo dia notononin’ny praiminisitra any Grande-Bretagne tamin’ny feo avo. Angamba ianao efa nampipoitra fanontaniana toy izany imbetsaka. Efa nahita valiny nahafapo ve ianao?
Raha nanazava ny fanontaniany araka ny tokony hahitana azy ilay praiminisitra, dia nanao hoe: “Nandritra ny taona maro, fony aho mbola tanora ary tao amin’ny politika niaraka tamin’ny fanantenako sy ny nofinofiko ary ny faniriako laza rehetra, dia noheveriko sy ny maro tamin’ireo niara-niaina tamiko tamin’izany fa raha tonga amin’ny taona izay hananantsika fonenana tsara, fanabeazana tsara, ary fari-piainana azo ekena isika, dia hilamina ny zava-drehetra ary tokony hanana hoavy mahavelom-panantenana sy mora kokoa isika amin’izay. Fantatsika izao fa tsy izany no izy. Miatrika tena zava-manahirana momba ny toetra mampiavaka ny olombelona isika.” — Izahay no nanao sora-mandry.
Ny toetra mampiavaka ny olombelona dia azo faritana ho “ny fitambaran’ny toe-tsaina sy ny lafin-toetra fototra eo amin’ny olombelona”. Mazava ho azy fa ny fifanoherana eo amin’ny toe-tsaina sy ny lafin-toetra dia mety hiteraka zava-manahirana eo amin’ny olona, eo amin’ny firenena, na eo amin’ny ambaratonga iraisam-pirenena mihitsy aza. Hatraiza anefa no azo anomezan-tsiny ny toetra mampiavaka ny olombelona noho ny fironana mampidi-doza hita ankehitriny eo amin’ny herisetra, ny fampihorohoroana, ny fanaovana varo-maizina zavatra mahadomelina, ary ny toy izany?
Moa ve ny toetra mampiavaka ny olombelona irery no azo tsinina noho ny toe-javatra izay mandrahona ny ‘hanimba ny sivilizasiona manontolo’? Sa kosa misy anton-javatra hafa tokony hoheverintsika mba hanazavana ny antony mahatonga ny olona ho voasintona mora foana ho amin’ny fanao mampietry sy feno fitiavan-tena kanefa dia azony atao tsara ny maniry zavatra ambony kokoa sy mendri-kaja kokoa? Aoka hojerentsika ny amin’izany.