Tano ny finoana an’Andriamanitra sy Kristy
Hevi-dehibe ao amin’ny Kolosiana
ILAINA tokoa amin’ny famonjena ny finoana an’i Jehovah Andriamanitra sy Jesosy Kristy. Zava-tsarotra anefa ny mitana finoana toy izany. Marina izany tamin’ireo kristiana tany Kolosia, tanàna any atsinanan’i Efesosy, any Azia Minora. Nahoana? Satria nisy mpampianatra sandoka tany nilaza hevi-diso manokana fa ny famonjena dia niankina tamin’ny famorana sy tamin’izay nohanina, ary tamin’ny fitandremana fombafomba sasany.
Takatra mora foana àry fa niahy ny amin’izay hahasoa ara-panahy ny kristiana tany Kolosia ny apostoly Paoly, ary azo antoka fa niriny izy ireo hitana ny finoany an’Andriamanitra sy Kristy. Koa tany amin’ny faramparan’ny fanaovana an-tranomaizina voalohany an’ilay apostoly tany Roma (tany amin’ny taona 60-61 am.fan.ir. tany ho any), dia nanoratra taratasy ho an’ny Kolosiana izy, nataony hanoherana fomba fiheverana diso sy hanatanjaka ny finoan’izy ireo. Aoka hojerentsika ny fomba azontsika andraisan-tsoa koa avy amin’ireo teniny feno fitiavana.
Fantaro tsara ny toeran’i Kristy
Teo am-piandohan’ny taratasiny, dia nasongadin’i Paoly ny tokony hahafantarana tsara ny toeran’i Jesosy. (1:1–2:12) Nidera ny Kolosiana izy noho ny finoan’izy ireo an’i Kristy ary noho ny fitiavany an’ireo mpiray finoana taminy. Notononin’i Paoly ny fahambonian’i Kristy tamin’ny naha-ilay nahariana ny zava-drehetra azy sy tamin’ny naha-Lohan’ny kongregasiona ary Lahimatoa amin’ny maty azy. Ny fihavanana amin’Andriamanitra dia azo amin’ny alalan’i Kristy, izay ao aminy no iafenan’ny rakitry ny fahendrena sy ny fahalalana rehetra. Mifanaraka amin’izany rehetra izany, ny kristiana dia tokony hanohy handeha ao amin’i Kristy ary tsy hamela na iza na iza hahalasa azy ho babon’ny filôzôfian’olombelona.
Tamin’ny alalan’i Kristy, dia nesorin’Andriamanitra tsy ho eo ny Lalàna. (2:13-23). Nohomboana ara-panoharana tamin’ny hazo fijaliana nahafatesan’i Jesosy izany. Tsy inona akory ny fitakian’ny Lalàna fa “aloky ny zavatra ho avy (. . .), fa ny tenany dia an’i Kristy.” Amin’ny fifikirana mafy amin’i Kristy, dia tsy hamela na iza na iza hanaisotra aminy ny lokan’ny fiainana tsy mety maty any an-danitra izy ireo.
Fantaro tsara Andriamanitra sy Kristy
Manaraka izany, i Paoly dia nampirisika ny Kolosiana hitafy ny toetra vaovao ary hanaiky ny fahefan’i Jesosy Kristy. (3:1-17) Amin’ny fisainana ny zavatra any ambony, dia hametraka ny tombontsoa ara-panahy eo amin’ny laharana voalohany eo amin’ny fiainana izy. Izany dia nitaky ny hanesorana ireo fihetsika sy fitenenana tsy mety. Ho toy inona ny fitahiana azy ireo raha nitafy toetra tsara toy ny fangorahana sy fanetren-tena ary fitiavana izy ireo! Ho nanapaka tao am-pony ny fiadanan’i Kristy raha tamin’ny anaran’i Jesosy no nanaovany ny zavatra rehetra, ary raha nisaotra an’Andriamanitra tamin’ny alalany izy.
Ny fahafantarana tsara an’i Jehovah Andriamanitra sy Jesosy Kristy dia tokony hisy heriny koa eo amin’ny fifandraisan’ny kristiana amin’ny hafa. (3:18–4:18) Ireo vehivavy sy lehilahy manambady, zanaka, mpanompo ary tompo dia tokony hanatanteraka ny andraikiny amin’ny fahatahorana an’Andriamanitra sy amin’ny fanekena an’i Kristy. Ary toy inona moa ny ilàna haharetana amin’ny fivavahana sy handehanana amim-pahendrena!
Ny taratasin’i Paoly ho an’ny Kolosiana dia afaka manampy antsika handa ny fampianaran-diso izay ho nanaisotra tamintsika ny lokan’ny fiainana. Ny fanamafisan’ilay apostoly ny fanekena ny fahefan’i Jehovah sy ny Zanany dia afaka manan-kery amin’ny fomba tena tsara eo amin’ny fifandraisantsika amin’ny hafa. Ary omena toky isika fa handray fitahiana manana amby ampy raha mitana ny finoantsika an’Andriamanitra sy Kristy.
[Efajoro/Sary, pejy 27]
Taratasy nalefa tany Laodikia: “Ary rehefa voavaky atỳ aminareo ity epistily ity, dia asaovy hovakina ao amin’ny fiangonan’ny Laodikiana koa; ary vakionareo kosa ilay avy amin’ny Laodikiana”, hoy ny nosoratan’i Paoly ho an’ny Kolosiana. (Kolosiana 4:16) Tanàna nanankarena tany amin’ny tapany andrefan’i Azia Minora i Laodikia, ampifandraisin’ny lalana amin’ny tanàna toa an-dry Filadelfia sy Efesosy izy io. Azo inoana fa nahatratra hatrany Laodikia ny asan’i Paoly tany Efesosy na dia tsy nanompo tany aza izy. Nandefa taratasy ho an’ny kristiana Laodikiana izy, na dia misy aza manam-pahaizana manokana sasany mino fa izany dia kopian’ilay nosoratany ho an’ny Efesiana. Tsy hita ao amin’ny Baiboly io taratasy nalefa tany Laodikia io, mety ho noho izy tsy nirakitra fanambarana ilaintsika ankehitriny, na angamba satria izy io namerina hevitra izay voafaoka amin’ny fomba mety ao amin’ny taratasy hafa ao amin’ny Baiboly.
[Sary]
Sisan-tanàna rava any Laodikia