Indray mitopy maso amin’ny vaovao
Varavarana mankamin’ny fiainana iray teo aloha hoe?
Volana vitsivitsy lasa izay, dia nisy ankizivavy telo mpianatra any amin’ny sekoly fanabeazana fototra sy ambaratonga faharoa fototra hita nitsitra tsy nahatsiaro tena teo amin’ny lalana iray any Tokushima, any Japana, vokatry ny fanandramana namono tena. Inona no nanosika azy ireo hanao izany? Mitantara toy izao ny Asahi Shimbun: “Nino izy ireo fa vatana vaovao nidiran’ny fanahin’andriambavy fahiny efa maty ny tenany, ary nampiaiky ny tenany izy fa afaka hahita kely miserana ny fiainany teo aloha raha toa ka tonga teo ambavahoanan’ny fahafatesana.” Ny tao ambadik’io fitrangan-javatra io, hoy ilay gazety, dia “ny fironana hita eo amin’ny ankizy mitady fialofana any amin’ny tontolon’ny any ankoatra, [izay] niely betsaka tokoa nandritra ireo taona vitsivitsy lasa.” Mpamaky fatratra tantara an-tsary mahatsikaiky mampiseho indrindra ny fidirana indray ao amin’ny nofo hafa ireo ankizivavy ireo.
Tsy misy hafa amin’ny mivembena hanatratra “mirage” (fahitana toa rano vokatry ny tara-masoandro) any an’efitra anefa ny finoana ny amin’ny vatana vaovao iray nidiran’ny fanahy iray, fa foana tsy misy antony tahaka izany. Ny Baiboly dia mampahafantatra fa eo amin’ny fahafatesana dia ‘miverina ho amin’ny taniny ny olona iray; ary amin’izay indrindra no hahafoanan’ny fikasany.’ (Salamo 146:4). Io fahamarinana momba ny fahafatesana io dia notakonan’ilay fampianarana mamitaka hoe mbola velona ihany aorian’ny fahafatesany ny fanahin’ny olona iray. Tsy mampianatra ny Baiboly fa hoe manana fanahy tsy mety maty ny olombelona fa milaza kosa izy fa maty ny fanahy. (Ezekiela 18:4). Nefa ho an’ireo izay ao anatin’ny fitadidian’Andriamanitra, dia eo ny fanantenana mahatalanjona ny amin’ny fitsanganana amin’ny maty. (Jaona 5:28, 29). Ny Baiboly koa dia mampiharihary hoe iza ilay mpanorina lehibe indrindra ny fampianarana ny amin’ny tsy fahafatesan’ny fanahy sy ny vatana vaovao idiran’ny fanahy iray; Satana Devoly ilay “rain’ny lainga” izy io. — Jaona 8:44; ampitahao amin’ny Genesisy 3:4.
Ny katolika sy ny fanalana zaza
Efa ho folo taona izay no lasa hatramin’ilay fitsapana safidim-bahoaka momba ny fanalana zaza natao tany Italia izay naharesy ny Eglizy katolika. Kanefa, tao amin’ny tahirin-kevitra iray navoakan’ireo evekan’i Italia vao haingana, ireo mpitarika ny fiangonana katolika dia nanintona ny saina indray fa “ny fandavana tsy hanao fanalana zaza na handray anjara amin’izany fotsiny aza dia andraikitra mahakasika fitsipi-pitondrantena lehibe iray, miorina amin’ny lalàna voasoratra ao am-pon’ny olona tsirairay ary nohamafisin’ny Eglizy indray ao amin’ny lalàny, izay manasazy amin’ny alalan’ny fanonganana ireo kristiana manala zaza na mandray anjara amin’ny fanaovana izany.”
Ahoana ny hevitry ny Italiana ny amin’ny fanalana zaza? Nampiharihary ny fanadihadiana iray natao vao haingana tamin’olona 2 040 fa, mifanohitra amin’ny didy tsy maintsy arahin’ny Eglizy, ny Italiana dia mankasitraka ny fanalana zaza amin’ny toe-javatra efatra. 1) Raha mahatandindomin-doza ny ain’ilay reny ny fananana anaka ao am-bohoka, ny 83 isan-jato dia mankasitraka ny fanalana zaza. 2) Rehefa mety hisy fahasamponan’ny tsaika (zaza am-bohoka), ny 76,3 isan-jato dia mifidy ny hamarana ny maha-bevohoka. 3) Rehefa tandindomin-doza ny fahasalaman’ilay vehivavy, ny 71,1 isan-jato dia mankasitraka ny fanalana zaza. 4) Raha vokatry ny fisavihana ny naha-bevohoka, ny 55,2 isan-jato dia manaiky daholo fa tokony hanomezan-dalana ny fanalana zaza. Italiana mihoatra ny 1 amin’ny 4 no mankasitraka ny fanalana zaza “amin’ny toe-javatra rehetra anirian’ny vehivavy iray izany”, hoy ny tatitra nataon’ny La Repubblica. Fanalana zaza ara-dalàna sy tsy ara-dalàna eo amin’ny 300 000 eo ho eo no atao any Italia isan-taona.
Miharihary fa amin’ny raharaha manokana toy izany, ireo mpitarika ny fiangonana katolika dia tsy nahavita nanome an’ireo mpivavaka ao aminy ny toromarika marina ampy araka ny Soratra masina nilainy, izay ho nitarika ny fankatoavan’izy ireo izany. Ny kristiana marina kosa anefa dia nampianarina izay lazain’ny Soratra masina momba io raharaha iankinan’ny aina io. Noho ny fanajany ireo zavatra takin’ny fitsipi-pitondrantena ambony ao amin’ny Baiboly, dia tsy manala zaza izy ireo amin’ireo toe-javatra efatra voalazalaza etsy ambony. — Eksodosy 21:22-25; jereo koa Salamo 139:14-17; Jeremia 1:5.