Mitantara ireo mpitory ilay fanjakana
Fitondrantena mampahamendrika ny fanompoana kristiana ataontsika
MANANATRA ny kristiana toy izao ny apostoly Petera: “Aoka ho tsara ny fitondrantenanareo eo amin’ny jentilisa.” (1 Petera 2:12). Asehon’ny apostoly Paoly fa amin’ny alalan’ny fitondrantenantsika tsara no anaovantsika izay “hampahamendrika ny fampianaran’Andriamanitra, Mpamonjy antsika, amin’ny zavatra rehetra.” (Titosy 2:10). Ny Vavolombelon’i Jehovah rehetra maneran-tany dia manana laza tsara noho ny fitondrantena tsara. Mariho ireto ohatra vitsivitsy ireto.
Nisy heriny tsara teo amin’ny mpampianatra ny fitondrantena tsara
◻ Manao tatitra ny biraon’ny sampan’ny Fikambanana Watch Tower any Costa Rica fa tanora maro be any amin’io tany io no manome ohatra tsara dia tsara. Mitantara ny amin’izay nahatarika azy ho ao amin’ny fahamarinana ny rahalahy iray. Hoy ny fitantarany: “Ny zavatra nanintona ahy indrindra dia ny fitondrantena tsara dia tsaran’ireo tanora mbamin’ny olon-dehibe, indrindra fa ny tanora. Tany am-piasana, noho izaho mpampianatra, dia nanana fahafahana handinika akaiky ireo Vavolombelona tao amin’ny sekoly niasako aho. Ary satria aho nipetraka tamina fianakaviana Vavolombelon’i Jehovah iray, dia nandinika ny fitondrantenan’ireo ankizy tao koa aho.
“Tsy afaka ny tsy hanamarika ny fahasamihafana nisy teo amin’ireo mpianatra Vavolombelon’i Jehovah sy ireo mpianatra hafa tao an-tsekoly aho. Tonga ara-potoana mandrakariva ny Vavolombelona ary tsara fitondrantena, tsy nandainga mihitsy, ary nanao mandrakariva ireo zavatra nasaina nataony. Nahamarika koa aho fa nahatoky izy ireo rehefa nanao fanadinana, na dia mangalatra any am-pianarana aza ny mpianatra hafa. Ankoatra izany, dia nahalala fomba izy ireo ary nanaja ahy tamin’ny naha-mpampianany ahy. Nisy heriny tsara tamiko ny nataon’ireo Vavolombelona tanora tany an-tsekoly sy tao amin’ilay trano nipetrahako ka nanomboka nanadihady ny amin’io fivavahana io aho ary nanaiky ny fahamarinana tamin’ny farany.”
Vokatra tsara avy amin’ny fitondrantena kristiana tany amin’ny fivoriambe iray
◻ Naniry hizara ny vaovao tsaran’ilay Fanjakana tamin’ireo rahalahiny ara-nofo ny Vavolombelon’i Jehovah iray ao amin’ny kongregasiona iray any amin’ny faritra andrefan’i El Salvador. Nihaino ny iray ary nanomboka nianatra ny Baiboly niaraka tamin’ny Vavolombelon’i Jehovah. Mpikambana ao amin’ny fiangonana ara-pilazantsara antsoina hoe Andrian’ny Fiadanana ny rahalahiny hafa iray, ary niteny taminy io hoe: “Aza miresaka amiko akory; mampandroso ny tombontsoan’ny Devoly ianareo.”
Nony injay tonga ny fotoana hanaovana ny fivoriamben’ny distrika, dia nanasa an’io rahalahiny io hiaraka aminy ho any amin’ny fivoriambe ilay iray nianatra. Hoy io hoe: “Eny àry, hiaraka aminao aho; handeha aho mba hijery fotsiny izay ahazoako mamandrika ny Vavolombelon’i Jehovah.” Niara-nanatrika ilay fivoriambe izy mirahalahy. Ny hamaroan’ny mpanatrika sy ny fandaminan-javatra tsara tao amin’ilay fivoriambe, dia nanaitra ny sain’ilay anisan’ny fiangonana ara-pilazantsara izay nilaza fa mbola tsy nahita zavatra toy izany mihitsy izy teo aloha. Nony tonga tany an-trano izy io, dia niteny tamin’ny rahalahiny hoe: “Atolory ahy ny tananao”. “Inona no dikan’izao?”, hoy ny rahalahiny. “Atolory ahy fotsiny ny tananao”, hoy ny valinteny. Nifandray tanana izy ireo, ary nanambara toy izao ilay anisan’ny fiangonana ara-pilazantsara: “Manomboka izao aho dia handeha hianatra miaraka amin’ny Vavolombelon’i Jehovah. Raha ny marina, dia tsy fantatro fa very tombontsoa aho.” Izy io koa izao dia mpitory ny vaovao tsaran’ny Fanjakan’Andriamanitra marisika sady be zotom-po.