Ry tanora — Moa ve ianareo handalo amim-pahombiazana ny fitsapana ny fahatokiana kristiana?
“TSY mihevitra ianao fa tsy fahatokiana ny fahalotoam-pitondrantena. Mahatsiaro fahafinaretana fotsiny ianao. Marina fa fantatrao hoe raha hitan’ny ray aman-dreninao na ireo loholona izany dia hiteraka alahelom-po sy olana be dia be. Nefa rehefa mahita fahafinaretana ianao dia mikosoka izany eritreritra rehetra izany fotsiny.”
Ilay zatovolahy resahina eto dia nanohy nanao fijangajangana niafina. Nanana fiainana roa sosona izy ka namitaka ny ray aman-dreniny sy ny kongregasiona kristiana. Zara izy tamin’izay fotoana izay raha nahatsapa fa tsy nahomby teo amin’ny fitsapana ny fahatokiana kristiana.
Tanora kristiana an’arivony maro no tsy nahomby toy izany teo amin’ny fitsapana ny fahatokiana. Ary tsy mahagaga izany! Satana devoly dia ‘miady’ amin’ny vahoakan’Andriamanitra, ary manao izay rehetra azony atao mba hanapahana ny tsy fivadihan’izy ireo. (Apokalypsy 12:17) Nataony fikendry indrindra ireo tanora teo amin’ny “asa fifetsena” fanaony. (Efesiana 6:11, Kingdom Interlinear). Araka izany, dia ilaina ny tena fiezahana sy fahavononana mba hitoerana ho mahatoky.
Inona indrindra moa ny fahatokiana? Ao amin’ny Soratra hebreo ny teny tany am-boalohany nilazana ny hoe “fahatokiana” dia manondro fifikirana amim-pitiavana amin’olona iray noho ny fikasana iray efa fantatra. (Salamo 18:25) Tsy milazalaza fatorana marefo azo tapahina mora foana izany fa fifikirana mitoetra ho tsy azo hozongozonina mandra-pahatanterak’ilay fikasana mifandray amin’io olona io. Ao amin’ny Soratra grika, ny teny tany am-boalohany nilazanany “fahatokiana”, dia manana heviny hoe fahamasinana, fahamarinana, na fanajana lalina.
Araka izany, ny fahatokiana dia mahafaoka fifandraisana mahitsy amin’Andriamanitra. Milaza amintsika ny Efesiana 4:24 mba ‘hitafy ny toetra vaovao, izay noforonina (...) amin’ny fahitsiana sy ny fahamasinana momba ny fahamarinana.’ Irinao ve ny ho mahatoky eo imason’i Jehovah? Raha izany no izy, dia tsy maintsy mamboly fifikirana amim-pahatokiana aminy sy fatorana tsy azo tapahina ary fahavononana hanao izay hahafaly azy amin’izay rehetra ataonao ianao. Tsy maintsy mifikitra amin’ireo fari-pitondrantena marin’i Jehovah ianao, na manao ahoana na manao ahoana fakam-panahy mety hipoitra amin’ny fomba hafa noho izany!
Ireo fanerana hahatonga anao tsy hahatoky
Mendri-piderana, fa eo am-piadiana mba hitoerana ho mahatoky ny ankamaroan’ny tanora eo amin’ny Vavolombelon’i Jehovah, ary manana fieritreretana madio izy ireny ho valin’izany. Na dia izany aza, ny apostoly Paoly dia naminany fa mandritra ny “andro farany”, dia hiavaka noho ny tsy fahatokiana ny olona amin’ny ankapobeny. (2 Timoty 3:1, 2, MN). Mampalahelo fa misy tanora kristiana namela ity tontolo tsy mahatoky ity ‘hangeja azy ireny ao amin’ny lasitra misy azy’. (Romana 12:2, Phillips). Ahoana no nanatanterahan’i Satana izany?
Ny fanerena hitovy amin’ny namana sahala amin’ny tena dia fiasana mahery iray ho an’i Satana. Maniry hahazo sitraka amin’ny hafa ny ankamaroan’ny olona, ary fantatr’i Satana ny fomba fampiasa izany faniriana voajanahary izany. Noho ny faniriana ho hita ho ara-dalàna, dia nisy tanora kristiana nandray anjara tamin’ny fanaovana resadresaka maloto, fitondrantena maloto, fifohana sigara, fisotroana, ary fanaranam-po amin’ny zava-mahadomelina mihitsy aza, ka izany rehetra izany dia mba hahatonga azy heken’ireo tanora toa azy.
Irin’i Satana ny ‘hitondrantsika tena araka ny filan’ny nofontsika, ka hanaovantsika ny danin’ ny nofo sy ny saina.’ (Efesiana 2:3) Fantany tsara hoe manao ahoana ny mety ho herin’ny faniriana momba ny lahy sy ny vavy mandritra ny “fivelaran’ny fahatanorana”. (1 Korintiana 7:36, MN). Ary iriny ny hanekenao ho resin’izany faniriana izany. Misy tanora kristiana tsy mahatsapa akory fa mitolo-batana aminy amin’ny fijerena boky sy sarimihetsika ary video, samy misy sary maloto, na amin’ny fikasikasihana ny faritra maha-lahy na maha-vavy (masturbation) mba hahazoana fahafinaretana. Ireo zavatra ireo kosa anefa, dia mazana no mitarika ho amin’ny fanaovan-javatra mampiseho tsy fahatokiana tena lehibe. Moa ve izao tontolo izaon’i Satana ‘nangeja anao tao amin’ny lasitra nisy azy’ tamin’ny sasany tamin’ireo lafin-javatra ireo?
Fananana fiainana roa sosona
Raha mbola raharaha tena lehibe amin’ny maha-izany azy ny fanaovana fahadisoana lehibe toy ny fijangajangana, dia misy tanora manampy trotraka ny fahasahiranany. Sahala amin’ireo “olona tsy marina” resahina so amin’ny Salamo 26:4 [MN], “izay manafina ny maha-izy azy” izy ireny. Manana fiainana roa sosona ny tanora toy izany, amin’ny fanarahana fomba iray rehefa miaraka amin’ny ray aman-dreniny na amin’ny kristiana matotra hafa, ary manaraka fomba hafa kosa rehefa miaraka amin’ny tanora toa azy.
Ny fananana fiainana roa sosona anefa dia fanimban-tena ary mampidi-doza. Saika mitarika ho amin’ny fanaovan-javatra ratsy hafa mandrakariva ny fanaovan-javatra ratsy tsy misy mpahita. Ary na dia mety ho voahelingelina aza ny fieritreretan’ny olona iray eo am-boalohany, dia arakaraka ny mampiziriziry azy amin’ny fanaovan-dratsy no vao mainka tsy mampihontsina ny feon’ny fieritreretany manoloana ny fanaovandratsy. Mety ‘hitsahatra tsy hahatsapa fahoriantsaina’ ara-bakiteny amin’ny fanaovan-dratsy ny olona iray. — Efesiana 4:19, Kingdom Interlinear.
Amin’izay fotoana izay, dia manjary faran’izay sarotra ny hieken’ny olona iray ny ratsy nataony ka hahazo fanampiana. Izany indrindra no mitranga raha toa ka misy tanora kristiana hafa tafiditra amin’ilay fanaovan-dratsy. Mahazo vahana matetika ny fahatsapana fahatokiana diso. Nanazava toy izao ilay tanora resahina ery am-piandohana: “Mahatsapa ny zavatra ataonao ianao, ary mahafantatra fa ratsy izany. Mba tsy hampahitana fahasahiranana ireo olona hafa voakasika dia aleo tsy miteniteny na amin’iza na amin’iza.”
Na dia mety ‘hanafina ny maha-izy azy’ amin’ ny ray amen-dreniny na ny kongregasiona aza ny olona iray, dia tsy afaka hanafina amin’i Jehovah izy. “Tsy misy zavatra ary na inona na inona izay tsy miseho eo anatrehany; fa ny zavatra rehetra dia mihanjahanja sy aharihary eo imason’Izay iafaran’ny ataontsika.” (Hebreo 4:13) Manome antoka antsika toy izao ny Baiboly: “Izay manafina ny fahotany tsy hambinina.” (Ohabolana 28:13) Amin’ny farany dia haharihary ihany ny ratsy. Tsy afaka hihoatra an’i Jehovah fotsiny izao ny olona iray amin’ny fahendrena. Hoy ny Ohabolana 3:7: “Aza manao anao ho hendry; matahora an’i Jehovah, ka mifadia ny ratsy.” Tadidio koa fa “ny mason’i Jehovah amin’izao rehetra izao, mijery ny ratsy fanahy sy ny tsara fanahy.” — Ohabolana 15:3.
Ilay tanora resahina etsy am-piandohana, niaraka tamin’ny hafa maromaro tafiditra tamin ilay fanaovan-dratsy niafina àry dia tratra, ary voatery noroahina tsy ho anisan’ny kongregasiona kristiana izy sy ireo namany. Nanao fanarenana ny fiainany ara-panahy izy ireo tatỳ aoriana ary voaray indray. Na dia izany aza, dia tena zava-tsarotra ny mahatakatra ny hevitry ny fahatokiana!
‘Aoka isika hifandamina amin’Andriamanitra’
Ary raha efa hita fa tsy nahatoky tamin’ny lafin-javatra sasany ny olona iray, angamba tamin’ny fanaovan-javatra ratsy? Mora ny mamita-tena sy mandà ny ilàna ny hanitsiana ny raharaha. Nilaza toy izao ny tanora iray nijangajanga tamim-piafenana: “Nampitomboiko ny asa fanompoako, tamin’ny fiheverana fa hahonitra ny fahadisoana izany na manao ahoana na manao ahoana.” Nanandrana nampitony an’i Jehovah toy izany tamin’ny fanatitra ny firenen’ny Isiraely mpiodina. Nefa nolavin’i Jehovah ny fivavahana feno fihatsarambelatsihy toy izany. Nampirisika azy ireo toy izao izy: “Misasa hianareo, diovy ny tenanareo, esory tsy ho eo anoloan’ny masoko ny ratsy fanaonareo; mitsahara, fa aza manao ratsy.” Tsy nanaiky ny fanatitra nataon’izy ireo i Jehovah raha tsy efa avy ‘nifandahatra [nifandamin-draharaha, MN] taminy’izy ireo. — Isaia 1:11, 15-18.
Tsy afaka hifandamin-draharaha amin’i Jehovah ny olona iray amin’ny filazana izany fotsiny amina namana iray. Voalohany indrindra, dia mazàna ireo namana no tsy manome ny fanampiana tsara indrindra satria matetika koa aza no voafetra ny fanandraman-javatra hitan’izy ireny teo amin’ny fiainana. Ny mbola zava-dehibe kokoa, dia tsy afaka hamela ny fahotanao izy ireny. Andriamanitra irery ihany no afaka manao izany. Noho izany, dia “loary eo anatrehany ny fonao” amin’ny fieken-keloka. (Salamo 62:8) Na dia mety ho menatra mafy noho ny fitondrantenanao aza ianao, dia matokia fa ‘mamela heloka dia mamela heloka tokoa’i Jehovah. — Isaia 55:7
Hila fanampiana fanampiny ianao. “Aoka ho fantatry ny ray aman-dreninao izany, ary aoka ho fantatr’ireo loholona avy hatrany, hatrany am-boalohany mihitsy”, hoy ny fampirisihan’ny tanora kristiana iray nandray soa avy tamin’ny fanampiana toy izany. Eny, azo inoana fa ho tsara toerana mba hanampy anao ny ray aman-dreninao. ‘Atolory azy’ ireo ny fonao, amin’ny famelana azy hahafantatra tanteraka ny halehiben’ny zava-manahirana anao. (Ohabolana 23:26) Afaka manao fandaharana izy mba handraisanao fanampiana fanampiny avy amin’ireo loholon’ny koagregasiona rehefa ilaina izany. — Jakoba 5:14, 15.
Fanehoana fahatokiana marina — Ahoana izany?
Mazava ho azy fa tsara ny tsy hahalatsahana mihitsy amin’ny fitondrantena tsy mahatoky dieny eo am-boalohany. Hoy ny Salamo 18:25 amintsika: “Ny olona tsara [mahatoky, MN] no isehoanao [Jehovah] fa tsara [mahatoky, MN]; ny ‘tena olo-marina no isehoanao fa marina.” Mitahy be dia be an’ireo izay mihazona amim-pahatokiana fari-pitondrantena ambony i Jehovah.
Misy anefa fomba hafa mety hisedrana ny fahatokianao. Ohatra, aoka hatao hoe nanomboka fanaovan-javatra tsy ara-dalàna ny namanao iray. Moa ve ianao hamela ny fahatokiana dison’ io namanao io hanamatroka ny fahatokianao eo imason’i Jehovah? Ny zavatra tokony hatao amim-pitiavana dia ny manatona izany namanao izany sy mampirisika azy hiresaka ny amin’ilay raharaha amin’ny ray aman-dreniny na ny loholona. Lazao an’ilay namanao fa raha tsy manao izany ao anatin’ny fe-potoana mety izy, dia ianao mihitsy no tsy maintsy hanao izany. Hoy ny Ohabolana 27:5: “Aleo anatra imaso toy izay fitia afenina.” Amin’ny fanampiana ilay namanao amin’ izany fomba izany, no ampisehoanao, tsy ny fahatsoran’ny fisakaizanao fotsiny, fa ny halalin’ny fahatokianao eo imason’i Jehovah koa.
Na manao ahoana na manao ahoana fitsapana, ny hery hoenti-maneho fahatokiana dia azo avy amin’ny fananana fifandraisana manokana mafy orina amin’i Jehovah. Tena ilaina ny vavaka misy heviny sy ny fianarana manokana tsy tapaka raha tokony hanana fifandraisana toy izany isika. Mahaliana fa samy miaiky ireo tanora nania rehetra noresahina teo aloha fa ny vavak’izy ireo sy ny fianarany manokana dia nanjary fahazarana fotsiny ary tsy nisy rehefa ela ny ela. Tsy tena nisy intsony i Jehovah ho azy ireo, ary tsy ela dia nanaraka izany ny fitondrantena tsy madio. Moa ve ianao, amin’ny alalan’ny vavaka sy ny fianarana manokana, manamafy ny fifandraisanao amin’i Jehovah mba hitoerana ho mahatoky?
Marina fa mety hanontany tena ianao indraindray sao tsy mba mahita fahafinaretana. “Indraindray dia toa mahita fahafinaretana ny olon’izao tontolo izao”, hoy ny vehivavy tanora iray. “Nefa rehefa tratranao ny fenitra iray dia afaka mahita ianao fa tsy mahafinaritra velively ilay izy.” Niresaka ny amin’ny nanjo azy izy, ny amin’ny nanarahany fahalotoam-pitondrantena momba ny lahy sy ny vavy, ka niafara tamin’ny fananana anaka sy ny fanalana zaza. “Fiarovana ny maha-ao anatin’ny fahamarinana”, hoy ny lazainy izao, lesona izay sarotra taminy ny nianatra azy. Mampahatsiahy antsika ny Salamo 119:165 fa ‘be fiadanana izay tia ny lalàn’Andriamanitra.’
Noho izany, dia ataovy izay farany azonao atao mba hitoerana ho mahatoky. Miezaha manorina fifandraisana maharitra amin’i Jehovah. Mankahalà izay ratsy ary mifikira amin’izay tsara. (Romana 12:9) Hoy ny Salamo 97:10 amintsika: “Hianareo izay tia an’i Jehovah, mankahalà ny ratsy; miaro ny fanahin’ny olony masina Izy ary mamonjy azy amin’ny tanan’ny ratsy fanahy.” Eny, amin’ny maha-tanora kristiana anao, dia handray soa avy amin’ny fiarovan’i Jehovah ianao ary hahazo ny fiainana mandrakizay raha mandalo amim-pahombiazana ny fitsapana ny fahatokiana kristiana.