Moa ve ny Hoavinao Miankina Amin’ny Lahatra?

RAHA toa ka afa-nandositra loza mahafaty iray ianao, moa ve ianao hihevitra fa notsimbinin’ny lahatra? Sa kosa velom-pankasitrahana ianao noho ianao tamin’ny toerana nety fotsiny tamin’io ora io?

Niteny toy izao ilay lehilahy hendry atao hoe Solomona: “Ary hitako atỳ ambanin’ny masoandro indray fa tsy ho an’ny haingan-tongotra ny fihoarana, ary tsy ho an’ny mahery ny ady, ary tsy ho an’ny hendry ny hanina, ary tsy ho an’ny mazava saina ny harena, ary tsy ho an’ny manam-pahalalana ny fitia; fa ny fotoana sy ny sampona [fisehoan-javatra tsy nampoizina, MN] dia samy mahazo azy rehetra.” (Mpitoriteny 9:11). Impiry akory no mitranga ireo fisehoan-javatra tsy nampoizina: Maratra ny mpihazakazaka mahay iray ka mandresy ilay tokony ho resy. Mitondra fahavoazana ara-bola ho an’ny mpanao raharaham-barotra marina iray ny loza tsy nampoizina iray ka namela ny mpifaninana aminy tsy marina ho tonga mpanankarena. Nefa, moa ve i Solomona nanankina ireo tsy fetezan-javatra ireo tamin’ny anjara? Tsy izany velively! Vokatry ny “fotoana sy ny sampona” fotsiny ireo.

Nanao fanamarihana iray nitovy tamin’io i Jesosy Kristy. Rehefa niresaka ny amin’ny fisehoan-javatra iray izay toa fantatr’ireo mpihaino azy tsara izy, dia nanontany hoe: “Ary ireny valo ambin’ny folo ireny, izay nianjeran’ny tilikambo tao Siloama ka maty, ataonareo va fa mpanota mihoatra noho ny olona rehetra izay monina ao Jerosalema ireny? (Lioka 13:4). Tsy nanankina izany loza nahafaty izany tamin’ny anjara mifono zava-miafina na tamin’ny sitrapon’Andriamanitra i Jesosy, na koa nino fa na manao ahoana na manao ahoana dia mendrika ny homelohina mihoatra noho ny hafa ireo olona niharam-pahavoazana ireo. Ohatra hafa iray ny amin’ny fotoana sy ny sampona mitranga fotsiny io loza nahatsiravina io.

Na aiza na aiza ao amin’ny Baiboly dia tsy misy fanohanana mihitsy ny hevitra hoe nametra mialoha ny fotoana hahafatesantsika Andriamanitra. Marina fa milaza ny Mpitoriteny 3:1, 2 hoe: “Ny zavatra rehetra samy manana ny fotoany avy, ary samy manana ny androny avy ny raharaha rehetra atỳ ambanin’ny lanitra: ao ny andro ahaterahana, ary ao ny andro ahafatesana; ao ny andro ambolena, ary ao ny andro anongotana ny nambolena.” Niresaka fotsiny ny amin’ny tsingerim-piainana sy fahafatesana mitohy izay mampahory ny olombelona tsy tanteraka anefa i Solomona. Teraka isika, ary rehefa tonga ny fotoana, amin’ny fotoana ahatratrarana ny antsalan’ny halavan’ny androm-piainana ara-dalàna — mandrakariva aorian’ny 70 na 80 taona na ny toy izany — dia maty isika. Na dia izany aza, dia samy tsy noferan’Andriamanitra na ny fotoana hentitra ahafatesana na ny fotoana anapahan’ny mpamboly iray hevitra ‘hamboly’ na ‘hanongotra izay nambolena’.

Raha ny marina, dia nasehon’i Solomona tatỳ aoriana kokoa fa mety ho faty alohan’ny fotoana ny olona iray, rehefa niteny izy hoe: “Aza ratsy loatra hianao, ary aza adala; nahoana no ho faty hianao, raha tsy efa tonga ny andronao?” (Mpitoriteny 7:17). Inona no dikan’io torohevitra io raha toa ka voafetra mialoha tamin’ny fomba tsy azo ovana ny fotoana ahafatesan’ny olona iray? Ny Baiboly, araka izany, dia mandà ny finoana ny anjara. Nomelohin’Andriamanitra mafy ny Isiraelita mpivadi-pinoana nanaraka an’io hevitry ny mpanompo sampy io. Hoy ny Isaia 65:11 hoe: “Fa ny aminareo izay mahafoy an’i Jehovah sy manadino ny tendrombohitro masina, sady mamelatra latabatra ho an’i Gada (Zara, fanamarihana ambany pejy) sy mampidina divay noharoharoan-javatra ho an’i Menỳ (Vintana, fanamarihana ambany pejy).”

Ho hadalana toy inona àry ny filazana ireo loza sy zava-mitranga tsy nampoizina ho avy amin’ny anjara na ny mbola ratsy kokoa, avy amin’Andriamanitra mihitsy! “Andriamanitra dia fitiavana”, hoy ny Baiboly, ary ny fiampangana azy ho ny loharanon’ny fahorian’olombelona dia mifanohitra an-kitsirano amin’io fahamarinany tena lehibe io. — 1 Jaona 4:8.

Ireo fikasan’Andriamanitra momba ny hoavy

Inona àry no holazaina ny amin’ny fahatsinjovantsika famonjena? Moa ve ny hoe tsy misy anjara tsy azo ihodivirana mifehy ny fiainantsika, midika fa tsy maintsy mizotra fotsiny tsy misy zava-kendrena isika? Tsy izany velively satria namaritra ny hoavin’ny taranak’olombelona amin’ny ankapobeny Andriamanitra. Ny Baiboly dia miresaka ny amin’ny famoronana “tany vaovao” izay “hitoeran’ny fahamarinana”. — 2 Petera 3:13.

Mba hanatanterahana izany, dia hisalovana mivantana amin’ny raharahan’ny olombelona Andriamanitra. Tamin’ny tsy fahafantarana, dia mety ho nivavaka mba hahatongavan’izany ianao tamin’ny famerenana ilay vavaka manao hoe: “Ho tonga anie ny fanjakanao. Hatao anie ny sitraponao etỳ an-tany tahaka ny any an-danitra.” (Matio 6:10). Io Fanjakana io dia tena fitondram-panjakana iray miorina any an-danitra. Amin’ny fivavahana mba hahatongavan’izy io, dia mivavaka ianao mba handraisan’io Fanjakana io ny fanapahana ny tany eo am-pelatanan’ireo fitondram-panjakana amin’ny andro ankehitriny. — Daniela 2:44.

Fiantohana ny hoavinao manokana

Ny ikasihan’izany fisehoan-javatra mampangitakitaka izany ny hoavinao dia miankina, tsy amin’ny anjara na ny fotoana sy ny sampona, fa amin’ny lalana nofidinao harahina. Tsarovy ilay loza teo amin’ny tilikambon’i Siloama. Nampiasa an’io fisehoan-javatra nampalahelo io i Jesosy mba hampianarana lesona lalina iray. Tsy afa-nandositra an’izay nihatra taminy ireo olona maty tamin’io tilikambo nirodana io. Tetsy an-danin’izany kosa, ireo mpihaino an’i Jesosy dia afaka nisoroka ny fandringanana vokatry ny tsy fankasitrahan’Andriamanitra. Nampitandrina azy ireo toy izao i Jesosy: “Raha tsy mibebaka hianareo, dia ho ringana tahaka azy koa hianareo rehetra.” (Lioka 13:4, 5). Mazava ho azy fa afaka nifidy izay hoaviny izy ireo.

Mahakasika antsika koa ny fahafahana toy izany amin’izao andro izao — manatratra ny famonjena ny tenantsika. (Filipiana 2:12). Irin’Andriamanitra ny “karazan’olona rehetra (...) ho tonga amin’ny fahalalana marina momba ny fahamarinana.” (1 Timoty 2:4). Ary na dia voamariky ny toetra nolovana sy ny fiaviana amin’ny fetra sasany aza ny tsirairay amintsika, dia nanome antsika safidy malalaka Andriamanitra — dia ny fahaiza-mametra ny fomba tiantsika hampiasana ny fiainantsika. (Matio 7:13, 14). Afaka manao izay mety na izay tsy mety isika. Afaka mahazo laza tsara amin’i Jehovah Andriamanitra isika ary afaka mahazo ny fiainana, na koa afaka hivadika aminy ary ho faty.

Maro be no mifidy ny hiaina tsy miankina amin’Andriamanitra. Manokana ny fiainany hikatsahana zavatra ara-nofo, fahafinaretana, na laza izy ireny. Nefa nampitandrina toy izao i Jesosy: “Mitandrema, ka miarova tena mba tsy ho azon’ny fieremana hianareo; fa ny ain’ny olona tsy miankina amin’ny habetsahan’ny zavatra ananany.” (Lioka 12:15). Miankina amin’inona àry ny aintsika? Manazava toy izao ny Baiboly ao amin’ny 1 Jaona 2:15-17: “Aza tia izao tontolo izao, na izay zavatra eo amin’izao tontolo izao. (...) Fa ny zavatra rehetra eo amin’izao tontolo izao, dia ny filan’ny nofo sy ny filan’ny maso ary ny rehaka momba izao fiainana izao, dia tsy avy amin’ny Ray, fa avy amin’izao tontolo izao ihany. Ary mandalo izao fiainana izao sy ny filany; fa izay manao ny sitrapon’Andriamanitra no maharitra mandrakizay.”

Fisafidianana ny fiainana

Ahoana no ahazoanao antoka fa eo am-panaovana marina ny sitrapon’Andriamanitra ianao? Nanambara toy izao i Jesosy: “Izao no fiainana mandrakizay, dia ny mahafantatra Anao, Izay Andriamanitra tokana sady marina, sy Jesosy Kristy, Izay efa nirahinao.” (Jaona 17:3). Ny fahalalana marina avy ao amin’ny Baiboly dia manome fototra ho an’ny finoana. “Fa raha tsy amin’ny finoana, dia tsy misy azo atao hahazoana sitraka aminy; fa izay manatona an’Andriamanitra dia tsy maintsy mino fa misy Izy sady Mpamaly soa izay mazoto mitady Azy.” (Hebreo 11:6). Ho azonao mora foana ny fahalalana ilainao. Nanampy olona an-tapitrisany maro hahazo izany ny Vavolombelon’i Jehovah tamin’ny alalan’ny fianarana ny Baiboly tsy tapaka.a

Mba hankasitrahan’Andriamanitra anao, dia tsy maintsy manao fiovana sasany ianao. Mety hisy fahazaran-dratsy sasany tsy maintsy resena na fanao maloto mihitsy aza izay tsy maintsy atsahatra. Nefa aza miala mihitsy, toy ny hoe tsy ho vitanao ny hiova. Ny hevitra ny amin’ny hoe tsy afaka miova ny zavatra, dia hevitra hafa fotsiny avy amin’ny foto-pampianarana diso momba ny finoana ny anjara. Noho ny fanampian’i Jehovah, dia azon’ny olona na iza na iza atao ny ‘manavao ny sainy’ sy mitafy “ny toetra vaovao”. (Romana 12:2; Efesiana 4:22-24). Tsy hoe tsy misy mahita akory ny fiezahanao hanao izay hankasitrahan’Andriamanitra anao. Vonona hatrany Izy hitahy ireo izay manao ny sitrapony.

Ekena aloha fa tsy handamina ny zava-manahirana anao rehetra ny fianarana ny Baiboly. Ireo mpanompon’Andriamanitra marina dia mety hiharan’ny loza sy ny fitrangan-javatra manahirana, sahala amin’ny hafa ihany. (Jakoba 1:5). Eo koa ny fifaliana amin’ny fahafantarana fa manana fifandraisana tsara amin’Andriamanitra ny tena. “Izay matoky an’i Jehovah no ho sambatra”, hoy ny Ohabolana 16:20.

Ao amin’ny paradisa voaorina indray eo ambanin’ny Fanjakan’Andriamanitra, dia tsy hahatsapa horahonan’ny fotoana sy ny sampona intsony isika. Hanaisotra ireo zavatra rehetra manimba ny fahasambaran’ny olombelona tokoa Andriamanitra. “Hofafany ny ranomaso rehetra amin’ny masony [ny antsika], ary tsy hisy fahafatesana intsony, sady tsy hisy alahelo, na fitarainana, na fanaintainana”, hoy ny fampanantenan’ny Baiboly. (Apokalypsy 21:4). Ho velona indray ireo olona tsy tambo isaina maty niharan-doza. — Jaona 5:28, 29.

Handova izany hoavy be voninahitra izany ve ianao? Rehefa nadiva hiditra ny Tany Nampanantenaina ny Isiraelita, dia hoy i Mosesy tamin’izy ireo: “Efa nataoko teo anoloanao ny fiainana sy ny fahafatesana ary ny fitahiana sy ny fanozonana; koa mifidiana ny fiainana, mba ho velona hianao sy ny taranakao, dia ny ho tia an’i Jehovah Andriamanitrao hianao ka hihaino ny feony sy hifikitra aminy; fa izany [izy, fanamarihana ambany pejy] no fiainanao sy fahamaroan’ny andronao.” — Deoteronomia 30:19, 20.

Tsia, tsy andevo tsy manan-kamonjy eo am-pelatanan’ny anjara tsy mifaditrovana akory isika. Eo am-pelatananao ny fahasambaranao ho avy, eny, ny hoavinao mandrakizay. Mampirisika anao indrindra izahay mba hifidy ny fiainana.

[Fanamarihana ambany pejy]

[Teny notsongaina, pejy 5]

Nomelohin’Andriamanitra mafy ireo Isiraelita mpivadi-pinoana izay nanaraka ny hevitry ny mpanompo sampy momba ny anjara.