Mitantara Ireo Mpitory Ilay Fanjakana
Manao Fitoriana Tsy Ara-potoana Ahitana Vokatra Tsara ny Vavolombelon’i Jehovah
OLONA maro be no sambany vao nahafantatra ny fahamarinana ao amin’ny Baiboly rehefa nisy Vavolombelon’i Jehovah nitory taminy tsy ara-potoana. Amin’io lafiny io, ny Vavolombelona dia manaraka ny ohatra navelan’i Jesosy Kristy, izay nitory tsy ara-potoana tamin’ny vehivavy samaritana iray teo amin’ny fantsakana iray, rehefa tonga mba haka rano izy io. (Jaona, toko faha-4). Tatsy Afrika Atsinanana, dia nisy Vavolombelon’i Jehovah iray nitory tsy ara-potoana tamina masera katolika iray. Mitantara toy izao ny amin’ny vokatr’izany ny biraon’ny sampan’ny Fikambanana Watch Tower:
◻ Indray maraina be, teny an-dalana ho any an-tanàn-dehibe ny Vavolombelona iray dia nifanena tamina masera katolika iray. Nanararaotra ny fahafahana izy mba hanontaniana an’ilay masera hoe: “Handeha ho aiza sahady amin’izao ora izao ianao?” Izao ny valiny: “Handeha hivavaka amin’ny Andriamanitro aho.” Nanontany toy izao an’ilay masera izy avy eo: “Fantatrao ve ny anaran’ny Andriamanitrao?” “Fa angaha moa tsy Andriamanitra indray no anarany?” hoy ny navalin’ilay masera. Nilaza taminy ilay Vavolombelona fa ho tonga any an-tranony ny tolakandron’io mba hiresaka aminy momba ny anaran’Andriamanitra. Taorian’ilay resadresaka dia lasa nankany am-piangonany ilay masera ary nanontany iray tamin’ireo pretra raha fantany ny dikan’ny teny hoe “Jehovah”. Izao ny valiny: “Anaran’Andriamanitra izany.” Tena taitra ilay masera nandre fa nahalala ilay pretra nefa tsy mba nampianatra izany azy mihitsy.
Nitsidika an’io vehivavy io ilay Vavolombelona nandritra ny sivy andro nisesy, ary nampianatra azy ny fahamarinana momba ny Trinite, ny fanahy (âme), ny afobe, ary ny fanantenana ho an’ny maty. Nandray ny zavatra rehetra ilay vehivavy ary avy eo dia nangataka an’ilay Vavolombelona mba hanome azy fotoana hisaintsainana lalina ny amin’izany fampianarana vaovao rehetra izany. Rehefa afaka tapa-bolana, dia nifandray tamin’ilay Vavolombelona indray izy ary nangataka fifanakalozan-kevitra fanampiny taminy. Taorian’izay ilay masera dia nanapa-kevitra ny handao ny fiangonana ary efa namotika ireo sary sy sapileny ary lakroany. Nanandrana nandresy lahatra azy hiverina ilay pretra, nefa tapa-kevitra ny hanaraka ny fahamarinana izy. Vita batisa izy tatỳ aoriana ary nanompo tamin’ny naha-mpitory maharitra mpanampy tsy tapaka nandritra ny volana maro na dia tsy salama sy efa be taona aza.
Koa satria malalaka ny tranony, dia nanolotra izany hampiasain’ny kongregasiona hatao Efitrano Fanjakana izy. Nanolo ireo tafo tranainy ireo rahalahy, nandrava ireo rindrina tao anatiny, ary nanao ny tapany lehibe tamin’ilay trano ho toeram-pivoriana manintona. Mipetraka ao amin’ny efitra iray ambadik’ilay efitrano io masera katolika taloha io. Tena faly tokoa izy afaka nanao io fanomezana ho an’ny fanompoam-pivavahana amin’i Jehovah io.
◻ Misy fanandraman-javatra hafa iray koa mampiseho ny maha-fahendrena ny fanaovana fanambarana tsy ara-potoana, avy any Kampala, any Ouganda. Teny an-dalana ho any amin’ny biraom-panjakana, dia niresaka tsy ara-potoana tamin’ilay niaraka taminy tao anaty “ascenseur” ny misionera Vavolombelona iray. Ny lehilahy iray, atao hoe Atoa. L————, dia naneho faniriana ny handray ilay zavatra vita an-tsoratra natolotra azy saingy tsy afaka naka azy io izy tamin’io fotoana io. Noho izany, dia nomeny an’ilay misionera ny anarany sy ny adiresin’ny biraony. Tatỳ aoriana ilay misionera dia tonga tany ary nangataka ny hihaona tamin’Atoa. L————. Izy no nantsoina nefa gaga ilay misionera fa lehilahy hafa no nipoitra. Misy lehilahy roa mitovy anarana mantsy miasa ao amin’ilay birao. Nisy fanambarana fohy natao tamin’ilay Atoa. L————, faharoa, ary naneho fahalianana niavaka izy io. Na dia namela ny fahalianany aza ilay Atoa. L—————, voalohany, dia natomboka ny fianarana Baiboly niaraka tamin’ilay Atoa. L————, faharoa. Vavolombelona vita batisa izy io izao, ary eo am-panaovana fandrosoana tsara ho amin’ny batisa ny vadiny sy ny zanany lahy.
I Jesosy Kristy no ilay Mpiandry tsara ary mahafantatra ireo olona tahaka ny ondry, izay manana fo mirona ho amin’ny fahamarinana izy. Ireo fitantarana ireo dia mampiharihary fa mitarika ireo mpanara-dia azy ho any amin’ireo olona toy izany izy. Afaka mitondra vokatra ny fitoriana tsy ara-potoana! — Jaona 10:14.