Mitantara ireo mpitory ilay fanjakana
Nianatra ny fahamarinana tamin’ny farany ny masera nandritra ny 25 taona iray
NANAMBARA mialoha ny Baiboly fa hisy “olona betsaka” avy amin’ny firenena rehetra ho tonga hanolotra fanompoam-pivavahana ao amin’ny tempoly ara-panahin’i Jehovah. (Apokalypsy 7:9). Mitranga izany amin’izao andro izao, ary faly isika mahita olona maro manapaka ny fatoran’ny fivavahan-diso, noho ny fanampian’ny fahamarinan’Andriamanitra. Manazava izany ireo fitantarana manaraka eto.
◻ Mitantara toy izao ny vehivavy iray any Roma, any Italia: “Hatramin’ny fahazazako, ny faniriako lehibe indrindra dia ny ho tonga masera, satria naniry tamin’ny foko manontolo ny hanompo an’Andriamanitra aho. Afaka nanatanteraka ny faniriako aho teo amin’ny faha-32 taonako, tamin’ny 8 Desambra 1960, rehefa nanao ny voadiko voalohany ho amin’ny fankatoavana sy fahantrana ary fahadiovana ara-pitondrantena. Ny asa nanendrena ahy dia ny fikarakarana andro aman’alina zaza mahantra sy narian-dray sy reniny 30 teo ho eo, izay kamboty na zanak’olona mpigadra. Nahita fahafahampo tamin’ny asa nanendrena ahy aho.
“Voahozongozona ny finoako rehefa niasa folo taona aho, rehefa nisy fifandirana nitranga tao anatin’ilay fikambanana. Nanontany tena aho hoe: raha nitarika anay Andriamanitra, nahoana izy no namela ny fifandirana sy fikorontanana toy izany hisy ao amin’ny tranony?”
Nanana rahavavy izay nipetraka tany Frantsa sady Vavolombelon’i Jehovah ilay masera. Nanao fanambarana an-taratasy tamin’ilay masera izy io, ary nandefa tany aminy Ny Soratra Masina — Fandikan-tenin’izao tontolo izao vaovao. Mitantara toy izao ilay masera: “Io no fifandraisako voalohany tamin’ny Tenin’Andriamanitra taorian’ny 23 taona.” Tamin’izay no nanekeny fianarana ny Baiboly niaraka tamin’ny Vavolombelon’i Jehovah. Hoy izy: “Arakaraka ny nandrosoako tamin’ny fianarana, dia nanjary nahafantatra an’i Jehovah Andriamanitra sy izay takiny mbamin’ny toetrany mahatalanjona aho. Sorena be aho rehefa nahafantatra fa tsy ankasitrahany ny fampiasana sary satria feno izao karazan-tsary rehetra izao tao amin’ilay fikambanana. Takatro fa raha naniry hahazo sitraka tamin’i Jehovah aho, dia tsy afaka nijanona tao amin’io toerana io. Rehefa avy nanokan-tena tanteraka tamin’ny asana masera nandritra ny 25 taona aho, dia nahita ny fahamarinana tamin’ny farany. Koa, tamin’ny 1 Oktobra 1985, dia nametraka ny taratasy fialako aho ka nahavery hevitra ireo lehibeko.
“Sady nanampy ahy ara-panahy no nanampy ahy ara-nofo ireo anadahiko sy rahavaviko feno fitiavana. Noho ny fankasitrahako an’i Jehovah sy ny fandaminany, dia natao batisa aho tamin’ny 30 Aogositra 1986, ary nanomboka nandeha tamin’ny lalana ho amin’ny fiainana mandrakizay.”
Mitahy ny fanirian’ny zatovovavy iray hanompo an’Andriamanitra i Jehovah
◻ Nahamarika ny mpampianatra iray izay Vavolombelon’i Jehovah tany Brésil, teo am-pitsarana ny entimodin’ny mpianatra, fa nisy mpianatra iray 14 taona nanoratra ny amin’ny faniriany hahafantatra bebe kokoa momba an’Andriamanitra. Nanomboka fampianarana Baiboly niaraka tamin’ilay mpianatra izy, saingy arakaraka ny nandrosoan’ilay zazavavy, dia nandrara ilay fianarana sady nanapotika ny zavatra vita an-tsoratra nananany ny fianakaviany izay katolika. Nanomboka nianatra ny Baiboly nandritra ny fotoam-piatoana tany an-tsekoly ilay mpianatra tanora, kanefa tratra izy. Koa notohizina an-taratasy àry ny fianarana. Tsy ela anefa, dia hitan’ny fianakaviana ny taratasiny ary nodorany. Nanomboka nanery azy hamonjy lamesa ny rainy. Nandeha izy saingy nitondra gazety Ny Tilikambo Fiambenana iray hovakiny mandritra ny fotoam-pivavahana, nafeniny tao anelanelan’ireo pejin’ny bokim-pivavahana. Naharitra enim-bolana izany, hatramin’ny andro izay nandaozany an-tsokosoko ny trano mba ho any amin’ny Efitrano Fanjakana. Nandritra ny fivoriana, dia nipoitra teo am-baravarana ny rainy ary nilaza tamin’ireo rahalahy mba hilaza amin’ny zanany vavy fa hikapoka azy izy rehefa any an-trano. Very maina ny fiezahan’ireo rahalahy nampisaintsaina azy.
Ny ampitson’iny, faly sady velon-tsiky ilay zazavavy nankany amin’ireo rahalahy. Nasehony azy ireo ny faritra mangana maro be teo amin’ny tenany izay vao avy nokapohin-drainy. Nahoana àry no faly izy? Rehefa niala avy tao amin’ny Efitrano Fanjakana ny rainy dia nanontany olona maromaro teo an-tanàna, anisan’izany ny ben’ny tanàna, ny amin’ny maha-tsara sy maha-ratsy ny maha-Vavolombelon’i Jehovah ny zanany vavy. Nilaza ilay ben’ny tanàna fa ny Vavolombelona dia olona tsara, mendrika itokiana. Nanampy teny izy fa manana fitsipi-pitondrantena tsara dia tsara izy ireo ary ho tena tsara ny fananan-janaka manana ireo fari-pahatsarana ireo izay tena ambony aoka izany raha oharina amin’ny an’ny tanora amin’ny ankapobeny.
Na dia teo aza izany, dia nahazo kapoka ihany ilay zazavavy. Nilaza taminy anefa ny rainy fa nikapoka azy izy noho ny nialany tao an-trano tsy nisy fierana. Ary nilaza izy fa hikapoka azy indray izy raha sanatria ka mijanona tsy mianatra ny Baiboly izy na tsy manatrika ny fivorian’ny Vavolombelon’i Jehovah! Mpitory be zotom-po izao ilay zanakavavy, ary maneho fahalianana amin’ny fahamarinana ny sasany amin’ny fianakaviany.
Marina tokoa fa mitahy ireo tanora izay manam-paniriana amim-pahatsorana ny hanompo azy i Jehovah, araka ny asehon’io fitantarana io. — Salamo 148:12, 13.