Fampandrenesana
Fanampiana ho An’ireo Komitin’ny Kolejy Foibe
Manohy manompo amim-pahatokiana amin’ny asa nanendrena azy ireo mpikambana ao amin’ny Kolejy Foiben’ny Vavolombelon’i Jehovah, izay miisa ho 12 amin’izao fotoana izao. Ankasitrahan’izy ireo mandrakariva ireo mpikambana tsy mivadika amin’ny “olona betsaka” mitombo isa hatrany, noho ny fanohanany amin-jotom-po. (Apokalypsy 7:9, 15). Noho ny fitomboana mahatalanjona maneran-tany, dia toa mety amin’izao fotoana izao ny hanomezana fanampiana fanampiny sasany ho an’ny Kolejy Foibe. Noho izany, dia notapahina fa hisy mpanampy maromaro, avy eo amin’ny olona betsaka indrindra, hasaina mba handray anjara amin’ny fivoriana ataon’ny Komity tsirairain’ny Kolejy Foibe, dia ny komitin’ny mpiasa, ny an’ny fampanontana, ny an’ny fanompoana, ny an’ny fampianarana, ary ny komitin’ny fanoratana. Araka izany, dia hampitomboina ho fito na ho valo ny isan’ireo mpanatrika amin’ny fivorian’ireny komity tsirairay ireny. Eo ambanin’ny fitarihan’ireo mpikambana amin’ny komitin’ny Kolejy Foibe, ireo mpanampy ireo dia handray anjara amin’ny dinidinika ary hanatanteraka asa isan-karazany hanendren’ilay komity azy ireo. Io fandaharana vaovao io dia hanan-kery amin’ny 1 May 1992.
Nandritra ny taona maro izao, ny isan’ireo sisa amin’ny Vavolombelona voahosotra dia nihena hatrany, raha mbola nitombo mihoatra noho izay rehetra nampoizina ny isan’ny olona betsaka. (Isaia 60:22). Toy inona moa ny fisaorantsika an’i Jehovah noho io fitarana mahatalanjona io! Rehefa nekena tamim-pankasitrahana ilay anarana vaovao hoe Vavolombelon’i Jehovah tamin’ny 1931, dia 39 372 no tampon’isan’ny mpitory ilay Fanjakana, ka ny ankamaroany dia nilaza ny tenany ho rahalahin’i Kristy voahosotra. (Isaia 43:10-12; Hebreo 2:11). Enimpolo taona tatỳ aoriana, tamin’ny 1991, ny tampon’isan’ireo mpitory maneran-tany dia 4 278 820, ka tamin’ireo, dia 8 850 monja no nilaza ny tenany ho anisan’ny sisa voahosotra. Araka ny efa tsinjo mialoha tao amin’ny Soratra masina, dia ihoaran’ny “olona betsaka” izao ny isan’ny sisa amin’ny “ondry vitsy”: eo amin’ny 480 mahery isaky ny “ondry vitsy” 1. (Lioka 12:32; Apokalypsy 7:4-9). Azo antoka fa mila sy mankasitraka ny fiaraha-miasa sy ny fanohanan’ny olona betsaka ny sisa voahosotra amin’ny fikarakarana ny tombontsoan’ilay Fanjakana izay miitatra hatrany.
Araka ny voazava tao amin’ny nomeraon’ny Ny Tilikambo Fiambenana teo aloha (wMG 15/5/1992), dia misy antokon’olona manompo miaraka amin’ny Isiraely ara-panahy amin’izao andro izao izay azo ampitahaina amin’ny Netinima sy ny taranaky ny mpanompon’i Solomona izay niverina avy tany amin’ny fahababoana tany Babylona niaraka tamin’ireo sisa amin’ny Jiosy; nihoatra noho ny isan’ireo Levita niverina mihitsy aza ny isan’ireo tsy Jiosy ireo. (Ezra 2:40-58; 8:15-20). “Ireo nomena” izay avy eo amin’ny olona betsaka amin’izao andro izao, dia lehilahy kristiana matotra izay manana fanandraman-javatra betsaka vokatry ny fikarakarana ny fiandraiketana tao amin’ny sampana, tamin’ny asa fitetezam-paritany, na tao amin’ireo kongregasiona 66 000 miorina maneran-tany izao.
Tsy ela izay, dia natao maneran-tany ny Sekolin’ny Fanompoana ilay Fanjakana ho fampianarana ireo mpiandraikitra sy ireo mpikarakara momba ny asa mpanampy azy. Tany Etazonia fotsiny, dia nisy mpiandraikitra 59 420 nanatrika izany. Amin’izany ireny “loholona” ireny dia ampy fitaovana mba hanatanterahany amin’ny fomba mandaitra kokoa ny andraikiny. — 1 Petera 5:1-3; ampitahao amin’ny Efesiana 4:8, 11.
Ao amin’ny foiben’ny Vavolombelon’i Jehovah any Brooklyn, dia nanompo hatramin’ny taona maro be “ireo nomena” sasany. Tafiditra amin’izany ireo mpiandraikitra matotra avy amin’ny olona betsaka izay nahazo fahaizana sy fanandraman-javatra maro be. Araka izany, dia nifidy vitsivitsy avy amin’ny mpiandraikitra toy izany ny Kolejy Foibe mba hanampy amin’ny fivoriana ataon’ireo komitin’ny Kolejy Foibe. Tsy voatery ho ny lehilahy nahavita fanompoana naharitra indrindra akory izy ireo. Lehilahy matotra sy ampy fanandraman-javatra kosa izy ireo, manana ireo toetra ilaina izay mety amin’izy ireo mba hanomezany fanampiana amin’ny lafin-javatra manokana. Ny fanendrena azy ireo hiasa miaraka amin’ny komity iray dia tsy manome azy ireo toerana manokana. “Hianareo rehetra dia mpirahalahy avokoa” hoy i Jesosy ny amin’ny mpianany. (Matio 23:8). Na dia izany aza, dia hanankinan-javatra betsaka ireny lehilahy ireny, ary noho izany dia “be no hotadiavina aminy”. — Lioka 12:48.
Faly isika noho ny fandroson’ny fandaminan’i Jehovah amin’izao andro izao. Nandritra ireo folo taona farany, dia nisy fitomboana efa ho 100 isan-jato teo amin’ny isan’ireo nanompo teny amin’ny saha, mifanaraka amin’ilay faminaniana mikasika an’i Davida Lehibe, dia i Jesosy Kristy hoe: “Tsy hisy farany ny fitomboan’ny fitondrany sy ny fiadanana”. (Isaia 9:7, Fandikan-tenin’ny Mpanjaka Jacques). Amin’ny fomba mitovy amin’ireo Netinima izay niasa teo anilan’ny mpisorona fony izy ireo nanamboatra ny mandan’i Jerosalema, dia toy izany koa fa eo am-pahatanterahany amin’izao fotoana izao ilay faminaniana momba ny fandaminan’i Jehovah hoe: “Ary ny hafa firenena no hanangana ny màndanao”. (Isaia 60:10; Nehemia 3:22, 26). Ireo Netinima amin’izao andro izao dia tokony hoderaina noho ny zotom-po asehony eo amin’ny fampandrosoana ny fanompoam-pivavahana marina, eo amin’ny fanampiana ireo “mpisoron’i Jehovah” na amin’inona na amin’inona asa na fanompoana mety hanendrena azy ao amin’ny fandaminan’i Jehovah maneran-tany. — Isaia 61:5, 6.