Aoka Isika Hankamamy ny Fiainana Izay Fanomezana Sarobidy

NY FIAINANA — fananana sarobidy tokoa! Raha tsy misy azy io isika dia tsy afaka manao na inona na inona. Raha vao very izy io, dia tsy azon’ny fomba araka ny olombelona averina. Raha tandindomin-doza ny aintsika, dia manao izay rehetra azon’ny saina ekena isika mba hiarovana azy. Misy aza miantso fanampiana ambonin’ny an’ny olombelona mihitsy rehefa ao anatin’ny fahoriana!

Izany dia mampahatsiahy antsika ilay fitantarana ao amin’ny Baiboly ny amin’ny sambo iray izay tratran’ny tafiodrivotra mahery iray teny an-dranomasina. Rehefa nila ho vaky ilay sambo, dia “raiki-tahotra ny matilo, ka samy nitaraina tamin’ny andriamaniny avy”. Tatỳ aoriana, izy rehetra dia niantso an’ilay Andriamanitra marina ka nanao hoe: “Mifona aminao izahay, Jehovah ô, aoka tsy ho faty izahay”. Milaza koa ilay fitantarana ao amin’ny Baiboly hoe: “Nariany tany anaty ranomasina ny zavatra tao an-tsambo mba hampahatony ny loza.” — Jona 1:4-6, 14; ampitahao amin’ny Asan’ny Apostoly 27:18, 19.

Vonona ny hamoy fananana ara-nofo nankamaminy mihitsy aza ireo matiloa ireo mba hiarovana ny ainy. Afaka manolo fananana ara-nofo isika — fa tsy afaka manolo ny aina. Ary satria isika mankamamy tsy amim-pisainana akory ny aintsika, dia mihemotra ho azy eo anoloan’ny loza. Mamahana sy mitafy ary mamelona ny vatantsika isika, ary mitady fitsaboana rehefa marary.

Kanefa ilay Mpanome ny fiainana dia mitaky mihoatra noho ny hanarahantsika fotsiny ireo zavatra ataontsika tsy amim-pisainana mba hiarovan-tena ireo. Rehefa dinihina tokoa, ny fiainana dia fanomezana tsy azo vidim-bola aman-karena, ary azo avy amin’ilay Persona lehibe indrindra eo amin’izao rehetra izao manontolo. Noho ny fankasitrahana amim-pahatsorana ilay Mpanome sy ilay fanomezana, moa ve isika tsy tokony hankamamy ny fiainana? Ary moa ve izany tsy hahafaoka ny fanehoana fiheverana ny ain’ny hafa?

Tsy tokony hahagaga antsika àry raha nisy didy natao mba hiarovana ny ain’ny hafa sy ny fahasalamany, ny Lalàna nomen’i Jehovah Andriamanitra ny firenen’ny Isiraely. (Eksodosy 21:29; Deoteronomia 22:8). Tokony hoheverin’ny Kristiana amin’izao andro izao toy izany koa ny fanehoana fiarovana ara-batana. Ohatra, raha misy zazakely ao an-tranonao, moa ve ianao mametrapetraka tsy amim-pitandremana paingotra na paingo-jaza na zavatra maranitra hafa izay mety handratra mafy ny zaza iray milalao amin’izy ireny na mitelina azy ireny noho ny tsy fahafantarana? Voatahirinao amin’ny toerana tsy mora takatry ny ankizy ve ireo zavatra simika na fanafody mampidi-doza? Raha misy rano raraka amin’ny ngorodona, moa ve ianao manadio izany haingana mba tsy hisian’ny loza? Moa ve ianao mitandrina mba hanamboatra avy hatrany ireo fitaovana mandeha amin’ny aratra misy fahasimbana? Moa ve ny fiaranao mahazo ny fikojakojana tsy tapaka tokony ho azy? Moa ve ianao mpamily fiara mahay mitandrina? Raha tena mankamamy tokoa ny hasarobidin’ny fiainana ianao, dia ho voatosika hanaraka lalàm-pitandremana azo ekena amin’ireo lafin-javatra ireo sy ny mitovy aminy.

Mampalahelo anefa fa misy tsy miraharaha akory na dia ny ain’ny tenany manokana aza. Ohatra, iza ankehitriny no tsy mahalala fa tsy mahasalama ny mifoka sigara? Kanefa olona an-tapitrisany maro no andevon’io fahazarana io, sady mihasimba ihany ny fahasalamany isaky ny mifoka ilay setroka feno poizina izy. Ny hafa mampiasa zavatra mahadomelina, ary ny hafa koa misotro zavatra misy alkaola tafahoatra, ka samy manimba ny tenany. Ny SIDA dia aretina mamono izay tsy fantatra ny fanafodiny. Maro anefa no ho afaka nisoroka tsy ho voan’izy io, raha nandositra ny fahalotoam-pitondrantena eo amin’ny lahy sy ny vavy, ny fampiasana karazan-javatra mahadomelina sasany ary ny fampidirana ra. Tsy fahampian’ny fankamamiana ny fiainana mampalahelo re izany! — Romana 1:26, 27; 2 Korintiana 7:1.

Azo atao ny miova!

Ireo izay mankasitraka an’i Jehovah, ilay Mpamorona azy Lehibe, dia manana antony mahery tokony hiheverana ny fiainana ho sarobidy. Fanomezana masina avy aminy ny fiainana. Noho izany, dia vonona ny hanao izay fiovana ilaina rehetra izy ireo mba handraisana azy io ho toy ny fanomezana avy amin’Andriamanitra. Diniho ny zavatra nitranga tamin’i Kwaku, lehilahy mpampianatra iray any Ghana. Mpidoroka sahy zavatra sady nanimba ny fiainany izy io.

Hoy ny tsaroan’i Kwaku: “Nanandrana nanery ny vadiko hanaja ahy aho, ka izany matetika dia niteraka fifandirana sy ady mafy, indrindra rehefa mamo aho. Noho ny fanaranam-poko tamin’ny alkaola, dia tsy nanam-bola matetika aho, ary mazàna koa dia tsy nahavita ny adidiko hanome vola mba hamelomana ny fianakaviako. Takatra mora foana fa nahasosotra ny vadiko tokoa izany. Isaky ny lany vola aho (zavatra izay nitranga imbetsaka tokoa), dia nanao izay rehetra azoko natao mba hanomezana fahafaham-po amin’io fahazaran-dratsiko io. Indray mandeha aho dia tonga hatramin’ny fampiasana mihitsy ny volan’ireo mpianatro izay nangoniko mba handoavana ny fisoratan’izy ireo anarana hanao fanadinana. Nanao koranam-pitsotroana aho ary nividy zava-pisotro ho an’ireo mpiara-misotro tamiko koa. Tsy ela dia tonga ny fotoana nampamoahana ahy noho ny nataoko. Raha tsy nisalovana tamin’ny fotoana nety ny talen’ny sekoly niasako, dia ho namoy ny asako aho.

“Nisavorovoro ny fiainako. Nahatsiaro ho menatra aho nefa tsy naharitra ela izany. Tamin’izay aho dia nanomboka nieritreritra ny hamono tena satria nihevitra aho fa tsy nahomby na tamin’inona na tamin’inona teo amin’ny fiainana. Na dia izany aza, dia mbola tsy nety afaka tamin’ny fahazarako tamin’ny alkaola ihany aho. Indray andro anefa dia tafiditra tao amin’ny adin’ny mpimamo tao amin’ny trano fisotroan-toaka iray aho ary voatsatoky ny antsy. Tonga tao an-tsaiko tamin’izay ny fahatakarana tsy nahafinaritra fa, indray andro any, dia hamoizako ny aiko ny fitiavako alkaola.

“Nandritra izany fotoana rehetra izany, dia nisy Vavolombelon’i Jehovah tonga nitsidika anay matetitetika ary niezaka ny hanaitra fahalianana tamin’ny Baiboly tao aminay. Nandositra azy ireo foana izahay mivady, satria nihevitra azy ireo ho mpanelingelina. Indray mandeha anefa, dia nanapa-kevitra ny hihaino azy ireo aho, noho ny fangorahako azy ireo. Tsy ela dia nahatonga ahy hahafantatra ny amin’ny fanantenana mahatalanjona ny hiaina mandrakizay ao amin’ny fandehan-javatra vaovaon’Andriamanitra ny fianarana ny Baiboly. Arakaraka ny nianarako ny Baiboly niaraka tamin’ny Vavolombelon’i Jehovah nanampy ahy, no nitomboan’ny fankasitrahako lalina an’i Jehovah ho Mpanome Fiainana sy ny fiainana izay fanomezana avy aminy. Nihatohina hatrany koa ny foko teo anoloan’ny torohevitry ny Baiboly izay azo ampiharina tokoa. Izany dia nampirisika ahy koa hanadio ny fiainako. Tsy mora ilay izy, satria tsy maintsy nanohitra tsy an-kijanona ny fisotroan-toaka sy ireo namako taloha aho. Nahita ny fahatapahan-kevitry ny foko anefa i Jehovah, ilay Mpihaino vavaka, ary nahare ahy.a

“Na dia tsy Vavolombelon’i Jehovah aza ny vadiko, izao izy dia manam-panajana lalina ahy sy ny fivavahako, noho ilay fiovana lehibe hitany teo amin’ny fiainako sy ny fifandraisanay eo amin’ny fanambadianay. Tsy mila ny misalovana eo amin’ny adinay mivady intsony ireo mpifanila trano aminay. Mankamamy ny fiadanan-tsaina ananako ankehitriny aho. Tena marina fa ny fankasitrahana an’i Jehovah Andriamanitra ho ny Mpanome Fiainana antsika, ny fandraisana ny fomba fiheviny momba ny hasarobidin’ny fiainana, ary ny fankatoavana ireo toromarika nomeny momba ny fomba tokony hiainantsika, no hany fomba fiaina mendrika harahina.”

Manolotra fiainana mandrakizay Andriamanitra

Olona an’arivony maro, toa an’i Kwaku, no nampian’ny Vavolombelon’i Jehovah ‘hitafy ny toetra vaovao, izay noforonina araka an’Andriamanitra amin’ny fahitsiana sy ny fahamasinana momba ny fahamarinana.’ (Efesiana 4:24). Nanjary nankamamy, tsy ny fiainany ankehitriny ihany, fa ny fanantenany fiainana mandrakizay ao amin’ny paradisa eto an-tany koa, izy ireo. Mampanantena ny Baiboly fa, ao amin’izany Paradisa hataon’Andriamanitra izany, dia tsy hisy mponina amin’ny tany intsony mihitsy hiharan’ny fanaintainana noho ny hanoanana mikiky, satria “Jehovah, Tompon’ny maro, dia hanao fanasana ho an’ny firenena rehetra (...), dia fanasana amin’ny zavatra matavy”. — Isaia 25:6.

Amin’izao fotoana izao, ny fiainana, na dia fanomezana mahatalanjona aza, dia mihelina ihany. Miatrika fahafatesana ny rehetra, ary famelezana mafy toy inona moa ny fahafatesana! Tena mampahory tokoa ny mahita ny olona iray tian’ny tena mandao ny faritra misy ny velona ka miditra ao amin’ny fahanginan’ny fasana, ary tsy teny manitatra akory izany. Eo ambanin’ny Fanjakan’Andriamanitra, izay hotapahin’i Kristy, anefa, dia ho tanteraka ny fampanantenan’i Jehovah manao hoe: “Tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.” — Apokalypsy 21:4.

Amin’izany fotoana izany, dia hitarina amin’ny fomba mahatalanjona ny fiainana izay fanomezana. Hanana fahafahana hahazo ny fiainana amin’ny fomba feno ireo ho tafita velona amin’ny fahoriana farany hihatra amin’ity tany ity. Ary amin’izay, amin’ny alalan’ny fananganana amin’ny maty, na hoe ny famerenana ho amin’ny fiainana indray, i Jehovah Andriamanitra dia hamerina koa io fanomezana tsy azo vidim-bola aman-karena io, amin’ireo matory ao amin’ny fahafatesana. (Jaona 5:24, 28, 29). Izany dia hidika fa hiverina indray ireo olon-tiana sy olona natahotra an’Andriamanitra fahiny nody mandry!

Tsara loatra ve izany rehetra izany ka hoe tsy azo inoana ho marina? Tsia, satria “tsy hisy tsy ho tanteraka ny teny rehetra ataon’Andriamanitra.” — Lioka 1:37; ampitahao amin’ny Joba 42:2.

Ankoatra izany, ny tenan’i Jehovah Andriamanitra mihitsy dia nanome antoka ho an’ny taranak’olombelona fa ho tanteraka izany rehetra izany. Tamin’ny fomba ahoana? Tamin’ny fanomezana ho sorona ilay mamin’ny fony indrindra, dia ny Zanany malala, i Jesosy Kristy, mba hanavotana antsika amin’ny fahotana sy ny fahafatesana. Manome toky antsika toy izao ny Romana 8:32: “Izay [Jehovah Andriamanitra] tsy niaro ny Zanani-lahy, fa natolony hamonjy antsika rehetra Izy, tsy homeny antsika miaraka aminy maimaimpoana koa va ny zavatra rehetra?” Milaza amintsika ny Baiboly fa ho anisan’izany ny fanadiovana ny taranak’olombelona amin’ny fikororosiana ara-pitondrantena sy ny fanafoanana ny endrika rehetra amin’ny tsy rariny, ny heloka bevava ary ny herisetra. (Isaia 11:9). Tsy horaisina ho toy ny tsy misy vidiny intsony mihitsy ny fiainana.

Na dia ankehitriny aza, ao anatin’ny tarehin-javatra tsy tanteraka, dia afaka ny hahafinaritra tokoa ny fiainana. Iza no tsy ravoravo noho ny fofon-tsakafo mampitelin-drora, ny fahatsapana ny tsiotsio-drivotra amin’ny andro mafana iray, ny fahitana tendrombohitra mijoalajoala iray, ny masoandro mody tsara tarehy, ny renirano mikoriana amim-pahatoniana, ireo voninkazo feno loko mahafinaritra ny maso aoka izany, ny feon’ny mozika malefaka, na ny siokan’ny vorona? Miatoa kely hoe, ary mieritrereta: hanao ahoana izany hoe hankafỳ mandrakizay ireo zavatra ireo?

Ho fahendrena àry ve ny hanariana tsy amin’ny antony ny tombontsoa sarobidy hiaina mandrakizay, noho izay fahafinaretana mihelina mety hatolotry ny fomba fiaina mampiseho hadalana sy fanaranam-po amin’ny danin’ny kibo? (Ampitahao amin’ny Hebreo 11:25.) Mampirisika antsika amim-pahendrena ny Baiboly ‘mba tsy handaniantsika ny andro sisa iainantsika amin’ny nofo araka ny filan’ny olona intsony, fa araka ny sitrapon’Andriamanitra.’ (1 Petera 4:2). Mampirisika anao, eny mandrisika anao, amin-kafanam-po izahay mba hanao izany, amin’ny fianarana ny Tenin’Andriamanitra, ny Baiboly, sy amin’ny fampiharana ireo zavatra ianaranao. (Jaona 13:17). Amin’izany fomba izany ianao dia hanjary hanana fifandraisana tsara amin’i Jehovah, ilay Andriamanitra feno hatsaram-po sy famindram-po, izay afaka ny hanome fiainana mandrakizay anao ho valisoa!

[Fanamarihana ambany pejy]

[Sary, pejy 5]

Moa ve ny fomba fiainanao manome taratry ny fankamamianao ny fiainana?

[Sary, pejy 7]

Ny tontolo vaovaon’Andriamanitra dia hamela antsika hankafỳ mandrakizay ireo fahafinaretana eo amin’ny fiainana!