Mitantara Ireo Mpitory Ilay Fanjakana

Nanova ny Fomba Fiainany Izy Ireo

TSY isalasalana fa efa nahita azy ireo miresaka amin’ny hafa eny an-dalana, manao fitsidihana isan-trano, na manatrika ireo fivoriana kristiana any amin’ireo Efitrano Fanjakanany, ianao. Miresaka ny amin’ireo tanora mitafy madio sy milamina ao amin’ny Vavolombelon’i Jehovah isika. Nety ho nanatsoaka hevitra ianao fa Vavolombelona izy ireny satria nampianatra azy mba ho toy izany ireo ray aman-dreniny, ary izany no izy ho an’ny maro amin’izy ireo. Etsy an-danin’izany anefa, dia misy ny sasany amin’ireny tanora ireny miaina ao amin’ny toerana tena hafa mihitsy ary ny fomba fiainany teo aloha dia tsy mitovy velively amin’ny fiainan’izy ireo ankehitriny. Raha ny marina, ireo izay aseho eo amin’ny pejy manaraka taloha dia nifanerasera tamin’antokon’olona nitrangan’ny heloka bevava sy fanaranam-po amin’ny zava-mahadomelina isan’andro. Inona no nampiova tanteraka ny fiainan’izy ireo? Andeha isika hitsidika tanàna iray any Norvezy ka hihaona amin’ny sasany amin’ireo tanora nanao fiovana toy izany ireo.

Ny fototra ho an’ny fiovana

Rehefa tojo an’i Annette ny Vavolombelona roa teny amin’ny asa isan-trano, dia 19 taona izy tamin’izay. “Notenenina matetika aho mba tsy hiresaka na oviana na oviana amin’ny Vavolombelon’i Jehovah, nefa liana ta hahafanta-javatra aho ary nanasa azy ireo hiditra”, hoy ny fitadidiany. Mpampiasa zava-mahadomelina izy hatramin’izy vao 11 taona ary efa voarohirohy tamina vaky trano sy halatra fiara maromaro.

Nanintona azy ny vaovao tsaran’ilay Fanjakana. Nahazo fampaherezana indrindra izy tamin’ny fanantenana fitsanganana amin’ny maty, noho izy namoy ny reniny teo amin’ny fahadimy taonany. Koa dia nanaiky fampianarana Baiboly maimaim-poana izy ary nanomboka tonga tany amin’ireo fivoriana tany amin’ny Efitrano Fanjakana. Nolazainy tamin’ilay ankizilahy niarahany sy tamin’ny hafa izay nianarany. Nanao ahoana ny fihetsik’ireo? Tsy te hiraharaha izany izy ireo ary niampanga an’i Annette ho voasasa atidoha. Na dia izany aza, ny sasany tamin’ireo fatra-panohitra indrindra dia nanomboka nianatra ny Baiboly ihany tatỳ aoriana.

Raiso ho ohatra i Espen, tovolahy iray 20 taona. Nandre ny vaovao tsaran’ilay Fanjakana tamin’ilay ankizilahy niarahan’i Annette izy, ary avy hatrany dia naniry hianatra Baiboly. Kanefa mbola teo am-piandrasana ny hanefany sazy an-tranomaizina efa-bolana izy, noho izy voarohirohy tamin’ny varotra zava-mahadomelina an-tsokosoko, ary sahala amin’i Annette, dia tamin’ny vaky trano maromaro koa. Mpampiasa sigara sy marijuana ary zava-mahadomelina hafa koa izy. Ankehitriny, inona no nahatonga ny olona iray voarohirohy tamin’ny zavatra toy izany haniry hanomboka hianatra ny Baiboly? Nanomboka nahatsapa ny naha-babangoana ny fomba fiainany sy ny tsy fisian’ny zava-kendrena teo amin’izany i Espen. Mitantara izy hoe: “Voasinton’ireo fampanantenan’ny Baiboly momba ny hoavy, izay nanome ahy zava-kendrena eo amin’ny fiainana aho. Nanomboka nianatra Baiboly àry aho mba hahitana raha ny fahamarinana no nolazaina tamiko.”

Maniry hianatra Baiboly ireo hafa

Tamin’io fotoana io dia nisy zatovolahy avy tamin’io antokon-tanora io ihany nandre ny vaovao tsara, ary nanomboka nianatra sy nanatrika fivoriana koa izy io. Nanaraka izany, dia natomboka ny fianarana niaraka tamin’ny hafa iray koa anisan’ireo tanora ireo, ary nanomboka nanatrika fivoriana io. Fotoana fohy tatỳ aoriana, dia mbola nisy tovolahy hafa iray nanaraka ireo namany tamin’ny fianarana ny Baiboly sy ny fandrosoana ara-panahy. Avy eo, dia mbola nisy tanora hafa iray anisan’ilay antoko ihany tohina noho ny fiovana ho amin’ny tsara nataon’ireo namany, ary tao anatin’ny fotoana fohy monja dia naniry hianatra ny Baiboly izy io.

I Gilbert, tanora iray mpitendry zavamaneno avy tamin’io antoko io ihany, dia nanomboka nianatra ny Baiboly izao. Samy matin’ny homamiadana ny rainy sy ny reniny, koa dia nahazo fampiononana izy noho ny fampanantenan’ny Baiboly fitsanganana amin’ny maty. (Jaona 5:28, 29). Nampiasa marijuana koa izy sady nanana fiainana feno fanaranam-po tamin’ny ratsy, ary nanana faniriana hisandratra mba ho tonga malaza tamin’ny mozika rock. Kanefa rehefa nandeha ny fotoana, dia nanao fandrosoana ara-panahy tsara dia tsara izy ary tsy ela dia nanapa-kevitra ny ho tonga Vavolombelona ho an’i Jehovah. Farany, dia nanomboka nandinika akaiky ny Baiboly sy nifanerasera tamin’ny Vavolombelona ny zandrilahin’i Espen.

Manova fiainana maro ny fahamarinana ao amin’ny Baiboly

Nitranga ny fiovana lehibe iray teo amin’ireo tanora ireo izay nitafy nisavoritaka sy nanana volo tsy nihogo ary voarohirohy tamina raharaha momba ny zava-mahadomelina sy halatra ary heloka bevava maro hafa, taloha. Mpitory ilay Fanjakana tsara dia tsara i Annette ary efa nanompo tamin’ny naha-mpisava lalana nandritra ny herintaona teo ho eo. Efa nanompo tamin’ny naha-mpisava lalana mpanampy i Espen sy i Gilbert, ary mpikarakara momba ny asa koa izy ireo. Samy nanambady tao anatin’ny kongregasiona kristiana izy mirahalahy ireo. Mpitory ilay Fanjakana be zotom-po koa ny efatra hafa anisan’ilay antoko taloha!

Ahoana ny amin’ilay sazy efa-bolana tokony ho nefain’i Espen? Noho ireo fiovana nataony teo amin’ny fiainany, dia novana ho fanaovana asam-pokonolona nandritra ny 80 ora ny saziny. Noho ny faneken’ny polisy sy ireo hafa, dia nandany izany ora izany tamin’ny fiasana tao amin’ny Efitrano Fanjakanan’ny Vavolombelon’i Jehovah teo an-toerana izy. Tena nankasitraka izany fandaharana izany ny polisy.

Eny, tanora maro be hafa manerana ny tany no miaina ao amin’ny toerana anjakan’ny heloka bevava. Nefa ny fahamarinana ao amin’ny Tenin’Andriamanitra dia nanome azy ireo valin’ireo fanontaniana iankinan’ny aina sy fanantenana azo antoka momba ny hoavy. Noho izany, dia tsy mpanao heloka bevava na mpampiasa zava-mahadomelina intsony izy ireo, ary tsy mpanao fitafiana misavoritaka. Noho izy ireo nanova ny fomba fiainany, dia mitovy indrindra amin’ireo olona resahina etsy ambony izy ireo — tanora, mitafy madio sy milamina, ary Vavolombelon’i Jehovah marisika. Maniry izy ireo ny hampahafantatra amin’ny hafa ireo ala olana maharitra atolotry ny Baiboly ho an’ireo zava-manahirana hitan’ny tanora maro be aoka izany amin’izao andro izao. — Jereo 1 Korintiana 6:9-11.

[Sary, pejy 8]

Mandray tsara ny fahamarinana ireo tanora norveziana