Mitantara Ireo Mpitory Ilay Fanjakana
Mahalala ny Fahamarinana ny Tovolahy Iray Mafana Fo Amin’ny Lalamby
RAHA voasinton’ny fahamarinana ny fon’ny olona iray, dia tsy maintsy hataon’i Jehovah Andriamanitra izay hifampikasohan’izany olona tahaka ny ondry izany amin’ny vaovao tsaran’ilay Fanjakana amin’ny farany, amin’ny fampiasana an’i Kristy Jesosy sy ireo anjely any an-danitra. Amin’ny fotoana mety, dia mety hahazo toeram-pankasitrahana eo an-kavanan’i Jesosy izany olona izany. (Matio 25:31-33). Marina izany raha ny amin’ny tovolahy iray tany Aotrisy, nafana fo tamin’ny lalamby, izay nanjary nahafantatra manokana ny fahamarinana tamin’ny fomba niavaka.
Ny tapany nahaliana indrindra tamin’ny fanalana andron’itỳ tovolahy itỳ dia ny fandehanana tao anaty lohamasinina, noho ny famelan’ny mpitantan-draharaha tao amin’ny lalamby. Noraisiny tamin’ny fakan-tsary vidéo ny dia rehetra nataony mba hahafahany hijery izany indray rehefa nody tany an-tranony izy. Tamin’ny dia iray nataony avy tany Vienna nankany Salzbourg, dia Vavolombelon’i Jehovah iray no namily ny fiarandalamby. Nampiasa izany fahafahana izany izy mba hiresahana momba ilay Fanjakana tamin’ilay tovolahy mafana fo amin’ny lalamby. Taitra ilay tovolahy tamin’ny voalohany nandre ilay mpamily niresaka momba an’Andriamanitra sy ny Baiboly, nefa nandritra ilay dia, dia nifantoka bebe kokoa tamin’ny faritra taza-maso izy noho ny tamin’izay nolazain’ilay mpamily taminy.
Rehefa nody tany an-tranony io tovolahy nafana fo io dia nijery ny sarimihetsika nalainy, tsy indray mandeha fa impolo, satria tena liana tamin’io diany io izy. Koa satria noraisiny koa ny feo, dia reny imbetsaka izay nolazain’ilay Vavolombelona taminy. Isaky ny nijery ilay sarimihetsika izy, dia vao mainka nifankazatra tamin’izay nolazaina taminy. Nanomboka nieritreritra momba izany izy izao, ary tamin’ny farany, dia nanjary feno hafanam-po tamin’ny fanazavana mahatalanjona naseho avy tao amin’ny Baiboly. Naniry hahafantatra bebe kokoa izy.
Tsaroany ny anaran’ilay mpamily ary fantany fa tany Vienna tany izy no nipetraka. Noho izany, dia nandeha tany amin’ny biraon’ny paositra izy ary nanomboka niantso tamin’ny nomeraon’ny telefaonina rehetra tao anatin’ny annuaire teo ambanin’izany anarana izany. Ny fanontaniana nataony tamin’ireo izay namaly tao amin’ny telefaonina dia hoe: “Mpamily fiarandalamby ve ianao?” Raha tsia no valiny, dia niantso tamin’ny nomerao hafa indray izy. Tamin’ny farany, dia nahazo ilay mpamily izy. Nilaza taminy ny tantarany izy ary koa fa liana tamin’ilay hafatry ny Baiboly reny tamin’ny vidéo.
Nanao fandaminana tamin’ny alalan’ny biraon’ny sampana ilay Vavolombelona mba hisian’ny olona nipetraka tany akaikin’ilay tovolahy hitsidika azy. Sendra nisy Vavolombelona iray hafa, izay mpamily fiarandalamby koa tao amin’ilay kongregasiona teo an-toerana. Nitsidika ilay tovolahy nafana fo amin’ny lalamby itỳ mpamily faharoa, ary natomboka ny fianarana ny Baiboly. Natao batisa ilay tovolahy tamin’ny fahavaratra 1991.
I Jehovah, izay mandinika ny fo rehetra, dia tsy maintsy nahita fa nanana fitiavana amim-pahatsorana ny fahamarinana io olona io. Noho izany, dia nataony izay nifampikasohany tamin’ny fahamarinana ao amin’ny Baiboly — na dia tamin’ny fomba niavaka aza. — 1 Tantara 28:9; Jaona 10:27.
[Sary nahazoan-dalana, pejy 9]
Courtesy of the Austrian Railways