Mahatsiaro ny Marary sy ny Be Taona i Jehovah
METY ho tena sarotra ny ho voatery hiatrika ny “andro fahoriana”. (Salamo 37:18, 19). Mety ho tonga amin’ny endriky ny fahanterana sy ny fahosana miaraka aminy, ny andro toy izany. Miditra amin’ny andro fahoriana ny sasany rehefa miaritra aretina mitaiza sy mafy. Mety hahatsapa izy ireny fa toa ny aretiny no mifehy ny fiainany ary manapaka ny fiheviny sy ny asany rehetra.
Manome toky anefa ny fitadidiana fa mandinika ny mpanompony rehetra i Jehovah. Mahafaly ny fony rehefa mampiseho tsy fivadihana sy fahendrena hatrany ireo mpanompony nanolo-tena ho azy, na dia eo aza ny aretina, ny fahanterana na ny toe-javatra hafa misedra. (2 Tantara 16:9a; Ohabolana 27:11). Manome toky antsika toy izao i Davida Mpanjaka: “Jehovah dia eo akaikin’izay rehetra miantso Azy, (...) ary hihaino ny fitarainany”. Eny, mahafantatra ny ady ataon’izy ireo izy; manatanjaka azy ireo amin’ny fanahiny izy. ‘Ary hamonjy azy Izy’. Mahatsiaro azy ireo izy ary manampy azy hiaritra. (Salamo 145:18, 19). Nefa ahoana ny amintsika? Moa ve isika, tahaka an’i Jehovah, mahatsiaro ny marary sy ny be taona?
Zava-misy eo amin’ny fiainana ny fahosana vokatry ny aretina na ny fahanterana ao anatin’itỳ fandehan-javatra itỳ. Zava-misy tsy maintsy setraina izany mandra-pahatanterak’i Jehovah ny fikasany ho an’ny tany sy ny taranak’olombelona. Amin’izao andro izao, dia olona mihamaro hatrany no tratrantitra, noho izany, dia be dia be no mahafantatra manokana ny fahosana miaraka amin’izany. Ankoatra izany, dia maro ireo iharam-pahavoazana, na dia mbola tanora aza, noho ny voina na aretina mahatandindomin-doza ny aina na mitondra takaitra. Mandra-pifaran’itỳ tontolo tranainy itỳ, dia ho zava-tsarotra lehibe tsy maintsy setraina hatrany ny aretina sy ny fahanterana.
Ankasitrahantsika tokoa ireo marary sy ireo be taona eo amintsika izay manohy manome ohatra amin’ny “fiaretana fahoriana sy fampisehoana faharetana”! Eny, “ambarantsika fa sambatra ireo izay efa niaritra.” (Jakoba 5:10, 11, NW ). Olona be taona maro, izay nihena ny heriny ankehitriny, no nandray anjara nandritra ny am-polony taona maro tamin’ny fampianarana sy ny fampiofanana ary famolavolana ireo izay mitondra ao anatin’ny kongregasiona izao. Olona be taona maro no faly koa mahita ny zanany mandray anjara amin’ny fanompoana manontolo andro. — Salamo 71:17, 18; 3 Jaona 4.
Tahaka izany koa, isika dia mankasitraka ireo izay marary mafy eo anivontsika, kanefa na dia eo aza ny fijaliany, dia mampahery antsika noho ny fahatokiany. Rehefa manome porofon’ny fanantenany tsy mihozongozona izy ireny, dia mitondra fandrisihina sy fanatanjahana indrindra ho an’ny finoana. Ny fiadanan-tsaina sy ny fahafaham-po ananany dia mampiseho finoana tena mendrika hotahafina.
Miteraka fahatairana mafy ho an’ny olona iray ny hoe manjary marary tampoka noho ny homamiadana, ny fahatapahan’ny lalan-dra, na noho ny toe-pahasalamana hafa sasany, izay manova tanteraka ny fiainan’ny tena. Fisedrana mafy ho an’ny ray aman-dreny koa ny fahitana ny zanany manjary marary na mijaly noho ny voina iray. Inona no fanampiana azon’ny hafa entina? Ny andro fahoriana rehetra toy izany dia fisedrana ho an’ny fianakavian’ny mpirahalahy kristiana manontolo. Izany dia fahafahana mampiseho fa ‘izay tena sakaiza tokoa dia rahalahy hamonjy amin’ny fahoriana’. (Ohabolana 17:17). Mazava ho azy fa tsy afaka ny hanantena fanampiana manokana avy amin’ny mpikambana tsirairay ao amin’ny kongregasiona avokoa ny marary sy ny be taona rehetra. Nefa hataon’i Jehovah izay hisian’ny olona maro ho voatosika, noho ny fanahiny, hanolotra ny fanampiany amin’ny fomba samihafa. Ary tokony ho mailaka ireo loholona hanao izay hahazoana antoka fa tsy misy olona atao tsirambina. — Jereo ny Eksodosy 18:17, 18.
Miezaha mahatakatra ny toerany
Rehefa miezaka manampy olona iray, dia zava-dehibe ny hananana fifandraisana tsara aminy, ary mitaky fotoana sy faharetana ary fahatakarana ny toerany izany. Amin’ny maha-mpanampy anao, dia mazava ho azy fa maniry ‘hampahery amin’ny vavanao’ ianao; nefa mihainoa amim-pitandremana alohan’ny hitenenanao na hanaovanao zavatra, raha tsy izany dia mety hanjary “mpampionona mahasorisorena” ianao. — Joba 16:2, 5.
Hitan’ny marary sy ny be taona ho sarotra indraindray ny manafina ny fahadisoam-panantenany. Maro no nanolokolo fanantenana ny ho tafita velona amin’ny fahoriana lehibe, ary mahatahotra izy ireo sao ho tonga alohan’izany ny fotoana hahafatesany. Mandreraka sy mampitebiteby azy ireo koa ny toe-pahasalamany matetika. Ady ny fitanana ny finoana ho velona sy ho matanjaka, indrindra rehefa tsy afa-manaraka ny fanirian’ny fony intsony ny olona iray, amin’ny fandraisana anjara feno amin’ny fanompoana kristiana. Nitsidika anabavy be taona iray ny loholona kristiana; rehefa niara-nivavaka taminy izy, dia nangataka ny hamelan’i Jehovah ny helotsika. Taorian’ny vavaka dia nanamarika izy fa nitomany ilay anabavy. Nanazava ilay anabavy fa nahatsapa izy fa nila famelan-keloka manokana avy tamin’i Jehovah noho ny tsy fahafahany nandray anjara tamin’ny fitoriana isan-trano intsony. Eny, ny fahatsapan-tena ho tsy afaka manao zavatra na tsy afaka manao firy, na dia tsy voamarina aza matetika, dia mety hahatonga ny olona iray ho tena halahelo am-po.
Fantaro fa ny tebiteby sy ny faharerahana dia mety hisy heriny eo amin’ny fandanjalanjana ara-tsaina. Noho ny fahosana entin’ny fahanterana na noho ny fihenjanana vokatry ny aretina mampahalemy, dia mety hihevitra ho nafoin’i Jehovah ny olona iray, angamba amin’ny filazana hoe: “Inona no nataoko? Nahoana no izaho no mijaly?” Tadidio ireo teny ao amin’ny Ohabolana 12:25 manao hoe: “Ny alahelo ao am-pon’ny olona dia mampitanondrika azy; fa ny teny soa no mahafaly azy.” Miezaha mitady teny tsara izay hampionona. Mety hilaza ny faniriany ho faty mihitsy aza ireo olona be taona izay ao anatin’ny fangirifiriana mafy, tahaka an’i Joba. Tsy tokony hanafintohina izany; miezaha mba hahatakatra ny toerany. Tsy voatery ho porofon’ny tsy fahampiam-pinoana na fitokiana ny fitarainana toy izany. Nivavaka mba ‘hanafenana azy any amin’ny sheola’ i Joba, kanefa izay nambarany avy hatrany taorian’io fitenenana io dia mampiseho ny finoany mafy orina fa hanangana azy i Jehovah any aoriana any. Ny finoana mafy orina dia hahafahana hiaritra ireo fotoam-pangirifiriana mafy sy fahaketrahana, kanefa hitoetra ho akaiky an’i Jehovah. — Joba 14:13-15, NW.
Fanehoana fanajana ireo marary sy ireo be taona
Zava-dehibe indrindra ny hitondrana ireo marary sy ireo be taona amim-panajana sy amim-pahamendrehana. (Romana 12:10). Raha toa izy ireny tsy manao zavatra haingana toy ny taloha na tsy afaka manao zavatra betsaka, dia manehoa faharetana. Aza mailaka ny hisalovana sy hanao fanapahan-kevitra ho azy ireo. Na inona na inona fikasana tsara ananantsika, raha mitondra tena amin’ny fomba manjakazaka na mandidindidy isika, dia hanaisotra amin’ny olon-kafa ny fahatsapan-tena ho manana haja foana. Tao amin’ny bokiny nahazoany ny mari-pahaizana ho dokotera, navoaka tamin’ny 1988, ny mpikaroka iray atao hoe Jette Ingerslev, dia nanazava izay noheverin’ny antokon’olona 85 taona ho zava-dehibe indrindra mba hahatsara ny fiainany: “Lafiny telo no nomen’izy ireo ny laharam-pahamehana indrindra: fiarahana amin’ny havana; fahasalamana; ary farany, nefa tsy ny kely indrindra, ny fahafahana mandray ny fanapahan-kevitr’izy ireo manokana.” Mariho fa i Jakoba patriarika dia tsy nohivaivain’ireo zanany lahy rehefa nihantitra; nohajaina ny faniriany. — Genesisy 47:29, 30; 48:17-20.
Tsy maintsy entina amim-pahamendrehana koa ireo izay marary. Namoy ny fahaizany miteny sy mamaky ary manoratra ny loholona iray noho ny fahadisoana nandritra ny fandidiana natao taminy. Famelezana mafy izany, nefa nanapa-kevitra ny hanao izay rehetra azony atao ireo loholona namany mba tsy hahatsapany fa tsy ilaina izy. Mamaky aminy ny taratasy rehetra momba ny kongregasiona izy ireo izao ary mampiditra azy ao amin’ny fandaminana ireo raharaha hafa mahakasika ny kongregasiona. Miezaka mahafantatra ny heviny izy ireo amin’ny fivorian’ny loholona. Mampahafantatra azy fa mbola mihevitra azy ho loholona foana izy ireo ary mankasitraka ny maha-eo azy. Afaka miezaka isika rehetra ao anatin’ny kongregasiona kristiana mba tsy hisy marary na be taona mihitsy hahatsiaro ho ‘nariana’ na nafoy. — Salamo 71:9.
Fanampiana mba hahazoana tanjaka ara-panahy
Mila sakafo ara-panahy isika rehetra mba hihazonana ny finoantsika ho velona sy hatanjaka. Izany no antony ampirisihana antsika mba hamaky isan’andro ny Baiboly sy ireo zavatra vita an-tsoratra momba ny Baiboly ary handray anjara amin-jotom-po amin’ireo fivoriana kristiana sy ny asa fitoriana. Matetika dia mila fanampiana ireo marary sy ireo be taona mba hanatontosana izany, ary zava-dehibe ny hanaovan-javatra araka ny tena izy amin’ny toe-javatra manokana misy azy. Soa ihany fa maro no mbola afaka manatrika ireo fivoriana rehefa omena fitaterana sy fanampiana kely ao anatin’ny Efitrano Fanjakana. Fampirisihana lehibe ho an’ny kongregasiona ny fanatrehan’izy ireo ny fivoriana toy ireny. Mandrisika sy manatanjaka ny finoana ny fiaretany.
Amin’ny toe-javatra maro, dia afaka manana anjara misy heviny amin’ny fanompoana kristiana koa ireo marary sy ireo be taona. Azo ampidirina ao amin’ny antokon’olona mandeha amin’ny fiara iray mba hitory ny sasany, ary tsy isalasalana fa hahatsapa famelombelomana izy ireo raha afaka hanao fitsidihana vitsivitsy. Rehefa tsy azony atao intsony izany dia afaka ny hahita fifaliana izy ireo amin’ny fanaovana fanambarana tsy ara-potoana amin’ny olona mifandray aminy. Nanapa-kevitra ny handany izay fotoana sisa iainany hanaovana fiezahana manokana mba hampandrosoana ny vaovao tsara, ny anabavy iray mararin’ny homamiadana. Fampirisihana ho an’ny rehetra ny fitoriana feno herim-po nataony. Nalaminy mialoha mihitsy aza ny fandevenana azy mba hisy fanambarana tsara dia tsara homena ireo havana tsy mpino sy ireo mpiara-miasa ary ireo mpifanila trano. “Tonga fampandrosoana ny filazantsara” àry ny toe-javatra nampahory nahazo azy, ary nampisy heviny manokana ireo androny farany ny fahatapahan-keviny hanambara ny finoany sy ny fitokiany. — Filipiana 1:12-14.
Tsara ny manampy ireo marary sy ireo be taona mba hatanjaka ara-panahy. Afaka manasa azy ireny mba hiara-mandany takariva mahafinaritra aminy ny fianakaviana, na azony atao any an-tokantranon’izay tsy afa-mivoaka indraindray ny ampahany amin’ny fianaram-pianakaviany. Nentin’ny renim-pianakaviana iray tany an-tranon’ny anabavy be taona iray ireo zanany roa kely indrindra mba hahafahan’izy ireo hiara-mamaky Ny Bokiko Misy Fitantarana avy ao Amin’ny Baiboly. Nahafaly ilay anabavy be taona izany, ary nahafaly ireo ankizy ny fiheverana nasehony tamin’izy ireo.
Misy fotoana anefa tsy tokony hanabatabana loatra ny olona efa osa iray, ary amin’izay dia mety ho tsara indrindra ny tsy hamakiana zavatra aminy afa-tsy indraindray. Tadidio anefa fa raha misy olona malemy ara-batana aoka izany ka tsy afa-mandray anjara amin’ny resaka, dia mety mbola hila sy haniry fiarahana ara-panahy sasany izy. Afaka miara-mivavaka amin’izy ireny isika, mamaky teny ho azy ireny, na mitantara aminy zavatra nitranga tamin’ny fiainana; nefa tokony hitandrina isika mba tsy hijanona ela be kokoa noho izay mety ho zakany.
Misy endriny iray amin’ny fanompoana masina mbola azon’ny ankamaroan’ireo marary sy be taona atao: ny mivavaka ho an’ny hafa. Nihevitra io fanompoana io ho zava-dehibe indrindra ireo mpianatra tamin’ny taonjato voalohany. Indray mandeha dia nitsinjara ny andraikitra tao anatin’ny kongregasiona izy ireo tamin’ny fomba izay nahafahan’ireo apostoly nifantoka tamin’ny fivavahana. Voalaza fa ‘nikely aina mandrakariva tamin’ny fangatahana ho an’ny hafa’ i Epafra nahatoky. (Kolosiana 4:12; Asan’ny Apostoly 6:4). Zava-dehibe sy mitera-boka-tsoa indrindra ny vavaka toy izany. — Lioka 2:36-38; Jakoba 5:16.
Mahatsiaro ny marary sy ny be taona i Jehovah ary mikarakara azy ireny amin’ny andro fahoriany. Ara-drariny, dia antenainy koa isika mba hihevitra izay azontsika atao mba hanampiana sy hanohanana azy ireny. Ny fiahiana asehontsika dia manome taratry ny fahatapahan-kevitsika hihazona ny tsy fivadihantsika manokana. Ary faly isika mieritreritra ireo teny nataon’i Davida Mpanjaka toy izao: “Fantatr’i Jehovah ny andron’ny mahitsy; ary ny lovany ho mandrakizay.” — Salamo 37:18.
[Efajoro, pejy 28, 29]
Fanomezana Fanampiana Mahasoa Amim-pahatakarana ny Heviny
TOKONY hanana fahalalana tsotsotra nefa marina ny amin’ny fomba fikarakarana ireo marary sy ireo be taona ny sakaizany sy ny havany. Ambonin’ny zavatra rehetra, izy ireny dia azo ampaherezina mba hihazona toe-tsaina manorina momba ny fiainana sy hahatsapa fa ilaina sy ankasitrahana ary hahatsapa tena ho mendrika. Amin’izany fomba izany dia tsy hiovaova ny hatsaran’ny fiainany, ka hiaro ny fifaliany ao amin’i Jehovah izany, na dia eo aza ny faharariany sy ny fanaintainany. Nomarihina fa maro amin’ireo Vavolombelon’i Jehovah no ela velona. Tsy isalasalana fa anisan’ny anton-javatra iray mahery mahatonga izany, ny fahalianany mafy amin’ny fanantenana hoavy, ny toe-tsainy falifaly ary ny fandraisany anjara betsaka indrindra araka izay azony atao amin’ny asan’ilay Fanjakana. Ohatra miavaka ny amin’izany i Frederick W. Franz, prezidàn’ny Fikambanana Watch Tower, izay nody mandry tamim-piadanana teo amin’ny faha-100 taonany rehefa nanana fiainana feno sy nitondra fifaliana. — Ampitahao amin’ny 1 Tantara 29:28.
Amin’ny ankapobeny, ny fitandremana ireo zavatra fototra ilaina isan’andro dia mety hidika zavatra betsaka: fahadiovana ampy, sakafo sahaza, ranon-javatra sy sira ampy, fampiasan-tena amin’ny antonony, rivotra madio, fiotrorana malefadefaka, ary resadresaka mandrisika. Afaka mahatsara ny fandrenesana, ny fahitana, ny fiasan’ny saina sy ny fahasalamana ara-batana, ary koa ny fahatoherana aretina, ny sakafo sahaza. Ho an’ny olona be taona, ny fihinanana sakafo sahaza sy ny fisotroana ranon-javatra betsaka fotsiny dia afaka hidika ho tsy fitoviana eo amin’ny toe-pahasalamana tsara sy ny fahosana. Mety hitaky fieritreretana sasany ny fitadiavana karazam-pampiasan-tena iray izay mifanentana amin’ny olona iray. Ny anabavy iray izay tonga mba hanao famakian-teny ho an’ny anabavy iray be taona sady efa pahina, dia manomboka sy mamarana ny fitsidihana isan-kerinandro fanaony amin’ny firahana mandihy moramora aminy eran’ny trano. Vonona amin’ny mozika voafantina foana ny fitaovana fandraisam-peo ary samy afa-po amin’io “fampiasan-tena” io izy mirahavavy.
Any amin’ny tany maro, ireo fikambanana mpanome fanampiana dia afaka manolotra fanampiana sarobidy mahasoa sy afaka manome fanazavana sy torohevitra momba ireo tarehin-javatra voafaritra tsara sy ny fomba handravonana azy ireny. (Mazava ho azy, fa tokony hitandrina foana ny Kristiana iray mba tsy ho voavily amin’ny fanaovan-javatra izay hahavariana azy ka hanadino ny tena fanompoana kristiana tokony hataontsika.) Indraindray, ny fanampiana dia omena amin’ny endriky ny fampindramana fandriana azo ampiakarina sy ampidinina, fitaovana enti-manohana ny olona malemy, beritelo, seza mikorisa, fitaovana fandrenesana, sy ny sisa. Koa satria olona be taona maro no mihevitra fa tsy mila na inona na inona izy na tsy ilaina ny hananana zava-baovao toy ireny, dia tsy maintsy manome torohevitra amim-pahaiza-mitsara zavatra na mandresy lahatra azy ireny mihitsy aza ny havany matetika. Mety ho tena hahafaly kokoa noho ny fehezam-boninkazo iray ny hidim-baravaran’ny efitrano fidiovana izay mora ampiasaina.
Mety hiteraka fihenjanana mafy ara-tsaina ny fikarakarana ireo be taona, indrindra fa rehefa mihaosa ilay olona. Mandroso amin’ny fomba tsy miharihary matetika ny fahosana. Afaka miezaka manohitra izany ny olona iray amin’ny fisakanana ilay marary amin’ny tsy fanaovana na inona na inona tsy mahasoa. Ny olona osa iray dia mety ho tezitra tampoka amin’ny olona iray izay tena iraiketan’ny fony. Tsy maintsy ho tsapan’ny havany fa mety hanadino ny zavatra rehetra mifandray amin’ny fahamarinana mihitsy aza ny olona antitra — vokatra mampalahelo entin’ny fahosana ara-batana, fa tsy porofon’ny fahaverezan’ny finoana.
Raha any amin’ny hopitaly ilay marary na any amin’ny trano mikarakara manokana ireo be taona, dia ilaina ny mifandray tsara amin’ireo mpiasa ao mba hahalalan’izy ireny ny tokony hataony momba ny fankalazana andro nahaterahana, ny Krismasy, na ireo fety hafa eo amin’izao tontolo izao. Raha ilaina ny hanaovana fandidiana, ny havany dia afaka manazava sy manome ireo taratasy firaketana manamarina ny fomba fijery efa notanan’ilay marary momba ny fampidiran-dra.