Fampiofanan’i Gileada — Ao Amin’ny Finoana Masina Indrindra
“TSARA ofana tao amin’ny finoana masina indrindra ireo mpianatsika.” Izany no fanamarihana fanokafana tao amin’ilay fandaharana fizarana diplaoma ho an’ny kilasy faha-95 amin’ny Sekoly Ara-baibolin’i Gileada An’ny Watchtower, natao tamin’ny alahady 12 Septambra 1993. Tamin’io maraina io, ireo vahiny sy mpianakavin’ny Betela 4 614 nasaina izay tafavory tao amin’ny Efitrano Fanaovana Fivoriamben’i Jersey City, dia notarihin’i George Gangas tamin’ny vavaka fanokafana. Mpianakavin’ny Betela efa hatramin’ny 65 taona ny Rahalahy Gangas, ary amin’ny maha-97 taona azy, dia izy no mpikambana zokiny indrindra ao amin’ny Fitambara-mpitantana.
Nilaza toy izao i Albert Schroeder, avy amin’ny Fitambara-mpitantana koa sady mpitari-draharaha tamin’ilay fandaharana: “Nandritra ny dimy volana ny fampianaran’i Gileada dia niorina tamin’ny finoana masina indrindra.” Fa inona anefa ilay “finoana masina indrindra”? Nohazavainy fa io ‘finoana masina indrindra’ voatonona ao amin’ny Joda 20 io, dia ny fitambarana manontolon’ireo fahamarinana ao amin’ny Baiboly. Koa ny fampianaran’i Gileada àry dia miorina amin’ny Tenin’i Jehovah, ny Baiboly, ilay boky fianarana lehibe indrindra ampiasainy.
Nahazo toromarika bebe kokoa ireo mpianatra
Ny mpandahateny voalohany dia i John Stuefloten, avy amin’ny Komitin’ny Toeram-piompian’ny Watchtower, izay niresaka mikasika ny loha hevitra hoe “Fandraisan-tsoa avy Amin’ny Fitaoman’ireo Olona Hendry”. Milaza ny Baiboly fa ireo izay “miara-dia amin’ny hendry dia ho hendry”. (Ohabolana 13:20). Nandritra ny fampianaran’i Gileada, dia nandany 900 ora mahery nianarana ny Baiboly ireo mpianatra. Nanontany toy izao an’ireo mpianatra ny Rahalahy Stuefloten: “Amin’ny ahoana ny fitaoman’i Jehovah no hisy heriny eo aminareo amin’ny hoavy? Hankany amin’ny tany 18 misy mponina eo amin’ny 170 tapitrisa amin’ny fitambarany, ianareo. Koa ahoana no hitaomanareo ireo olona ireo?” Amin’ny fanomezana taratry ny fahendren’i Jehovah, ireo misionera vaovao ireo dia ho afaka hanampy ny hafa ho tonga mpivavaka amin’i Jehovah, ilay Loharanon’ny fahendrena tsy hita fetra.
“Fahatongavana ho Zavatra Rehetra Amin’ny Olona Rehetra” no loha hevitr’ilay lahateny nanaraka novelabelarin’i Lloyd Barry avy amin’ny Fitambara-mpitantana. (1 Korintiana 9:22, King James Version). Dimy amby efapolo taona lasa teo ho eo izay, dia mpianatra tao amin’ny kilasin’i Gileada faha-11 ny tenan’ny Rahalahy Barry. Izao ilay kilasy faha-95 dia nankasitraka ny fahazoany torohevitra azo ampiharina avy amin’io misionera taloha nahita fanandraman-javatra an-taonany maro tany an-tany hafa io. Nampirisika ireo mpianatra izy mba hampitovy tena haingana amin’ireo olona any amin’ny faritany hafa vaovao hisy azy amin’ny famantarana ny kolontsaina eo an-toerana sy amin’ny fianarana ny teny eo an-toerana. Nilaza izy fa azo atao tsara izany amin’ny fifaneraserana sy amin’ny fiaraha-miasa akaiky amin’ireo olona eo an-toerana ary koa amin’ny fianarana ny fomba amam-panaon’izy ireo sy amin’ny fanarahana izany na oviana na oviana maha-mety izany.
Nanaraka izany, dia niresaka ny amin’ilay loha hevitra nanitikitika ny saina hoe “Nafahana Tamin’ny Andraikitra”, i Dean Songer avy amin’ny Komitin’ny Fanontam-pirinty. Rehefa afaka 35 taona mahery nanaovana ny fanompoana manontolo andro, dia takatry ny Rahalahy Songer ny dikan’ny hoe manana fiainana mifantoka amin-javatra voafaritra tsara sy fiainana tsotra, amin’ny fifantohana amin’ilay asa eo am-pelatanana, afaka amin’ireo fanahiana ara-nofo. Ary izany no votoatin’ilay toroheviny ho an’ireo mpianatra. Ireo mpihira tao amin’ny tempolin’i Jehovah dia nafahana tamin’ireo andraikitra niombonan’ireo Levita hafa mba hanokanan’izy ireo tena tanteraka tamin’ilay fanendrena manokana azony. (1 Tantara 9:33). Toy izany koa fa, ireo misioneran’i Gileada dia nafahana tamin’ireo raharaha mahazatra toy ny asa fivelomana mba hahafahany hifantoka amin’ilay fanompoana manokana ataon’izy ireo. Namarana ny teniny tamin’izao fananarana izao ny Rahalahy Songer: “Tano hifantoka amin-javatra voafaritra tsara ny fijerinareo ny fiainana, ary tano ho tsotra ny fiainanareo. Ny andraikitrareo, sahala amin’ireo nafahana tamin’ny adidy, dia ny ho ao amin’ny asa andro aman’alina, midera an’i Jehovah.”
Nanaraka izany tamin’ilay loha hevitra hoe “Fampianarana ny Hafa ny Amin’ny Fomba Andraisan-tsoa Be Indrindra Amin’ny Fiainana”, i Daniel Sydlik, mpikambana ao amin’ny Fitambara-mpitantana. Nampirisika ireo mpianatra izy mba “tsy hampianatra foto-pampianarana fotsiny, fa mba ho ampy fahasahiana kosa ka hampiseho amin’ny olona izay tsy maintsy ataony mba hahatonga ny fiainany hifanaraka amin’ny sitrapon’Andriamanitra”. Ny mpampianatra tsara dia tsy maintsy mandrisika sy manosika hanao zavatra. “Aoka ianareo hiahy ny amin’ny fampianarana ny olona hampitombo ireo fahamboniana ara-pitondran-tena kristiana, fa tsy hampianatra lalàna sy fitsipika fotsiny”, hoy izy, ary izao no teny nanampiny ho famaranana: “Ambonin’ny zava-drehetra, ry rahalahy malala, dia ampianaro ny tenanareo sy ampianaro ny hafa ny fomba hitiavana, satria fatorana mampiray tanteraka izy io.” — 1 Korintiana 13:1-3; Kolosiana 3:14, NW.
Taorian’ny volana maromaro niofanana, dia nanjary nihatia manokana an’ireo mpampianatra roa tao Gileada ireo mpianatra. I Jack Redford, misionera taloha, no niteny voalohany momba ilay foto-kevitra hoe: “Nanao ny Safidy Tsara Ianareo”. Teo amin’ny tontolo jiosy fahiny, talohan’ny nahatongavany ho apostoly kristiana, dia nanana toerana sy voninahitra sy hery ary tsy fananana ahiahy ara-bola i Paoly. Ao amin’ny Filipiana 3:8 anefa i Paoly dia nilazalaza izany rehetra izany ho “taimboraka”, na “fako”, araka ny fandikan-teny Phillips. Revo lalina tamin’ny fanompoana ny fony ary nanao ny safidy tsara izy. Mifanohitra amin’izany, ny ankamaroan’ny olombelona amin’izao andro izao dia mampiseho amin’ny safidiny eo amin’ny fiainana fa mihevitra ny fananana ara-nofo ho sarobidy kokoa noho ny fiainana mandrakizay izy ireo. Nanao ny safidy tsara ireo misioneran’i Gileada. Namarana ny teniny i Jack Redford tamin’ny filazana hoe: “Tsy misy na inona na inona azon’ny tontolon’ny Devoly atolotra anareo ka azo ampitahaina amin’ny fanompoana amin’ny maha-misionera. Karakarao tsara io tombontsoa tsy hay tombanana io, ary aoka izao tontolo izao hikarakara ny fakony!”
Mpampianatra tao Gileada efa hatramin’ireo 32 taona lasa i Ulysses Glass. Nanome torohevitra fanaovam-beloma sasany ho an’ireo mpianatra izy tamin’ilay loha hevitra hoe “Andriamanitra Ihany no Afaka Manao Hazo Iray”, ka nanorina ilay lahateniny tamin’ny Salamo 1:3. Ny haitao maoderina dia tsy afaka mihitsy manamboatra hazo iray mitovy tanteraka amin’ilay nataon’Andriamanitra. Amin’ny lafiny iray, ny Kristiana marina dia sahala amin’ny hazo, nambolena sy notondrahan’i Jehovah. Nomarihin’ny Rahalahy Glass fa nandritra ny dimy volana ireo mpianatra dia “notondrahana tsy tapaka tamin’ny loharanon’ny rano manome fiainana ao amin’ny Tenin’Andriamanitra”, toy ny hazo ao anatin’ny ala na paradisa ara-panahy iray. Amin’ny maha-misionera azy ireo anefa, dia tsy maintsy mitandrina ny “fakany ara-panahy amin’izay mety ho fanimbana” izy ireo. Nampirisihina izy ireo mba ‘hanohy hisotro amin’ny ranon’aina avy amin’i Jehovah satria Andriamanitra ihany no afaka manao hazo iray’.
Ny lahateny farany dia nataon’i Carey Barber, mpikambana ao amin’ny Fitambara-mpitantana. Taorian’ny fanompoana manontolo andro hatramin’ny 70 taona ny Rahalahy Barber dia afaka niresaka tamim-patokiana mikasika ilay foto-kevitra hoe “Anehoy Fifikirana Tsy Mizarazara i Jehovah”. Ny ankamaroan’ny taranak’olombelona dia tsy naneho fifikirana tsy mizarazara tamin’i Jehovah. (Deoteronomia 5:9, NW ). Araka ny nasehon’ny Rahalahy Barber anefa, na dia eo aza ny tsy fahatanterahantsika, dia “azo atao tokoa ny ho voatokana manontolo ho an’Andriamanitra”. Izao no teny nanampiny: “Tsy misy olona tena afaka milaza hoe: ‘Ny Devoly no nampanao ahy an’io.’ ” Kanefa dia afaka mandresy antsika ny Devoly raha tsy manohitra azy isika. (Jakoba 4:7). Ny fitoerana ho be raharaha hatrany eo amin’ny asan’i Jehovah no fomba voalohany anoherana an’i Satana sy ny tontolony ka hanehoana amin’i Jehovah fifikirana tsy mizarazara.
Voatendry ho misionera
Nifarana tamin’ny fanendrena tamin’ny fomba ofisialy an’ireo mpianatra 46 rehetra ho misionera ny fandaharana tamin’ny maraina. Ireo mpivady 23 dia nahazo diplaoma izay milaza amin’ny ampahany fa ireo nahazo diplaoma dia “ampy fahaizana manokana mba hirotsahana amin’ny asa fampianarana, mampirisika toe-tsaina feno fisakaizana ary miasa ho tombontsoan’ny fandriampahalemana maharitra sy ny lalàna momba ny filaminana tanteraka sy ny fahamarinana eo amin’ny olona rehetra”. Azo antoka fa hiezaka hanatanteraka io fanirahana ambony dia ambony io any amin’ireo tany 18 nanendrena azy ny kilasin’i Gileada faha-95. Ireo toerana nanendrena dia manerana izao tontolo izao ary mahatafiditra tany any Azia, Afrika, Eoropa sy Amerika Latina ary ireo Nosy Caraïbes.
Tamin’ny tolakandro, taorian’ny Fianarana Ny Tilikambo Fiambenana nohafohezina notarihin’i Charles Woody avy amin’ny Komitin’ny Sampan-draharahan’ny Fanompoana, dia nampiseho ny fandaharan’ny mpianatra ireo vao avy nahazo diplaoman’i Gileada, ka ny loha hevitra dia hoe: “Nanomana Anay Hampianatra Amin’ny Maha-misionera i Gileada”. Nifarana ny fotoam-pivoriana tamin’ilay fampisehoana tantara hoe “Ireo Safidy eo Anatrehantsika”.
Taorian’io fandaharana nandrisika io, dia vonona ny halefa any amin’ny vazan-tany efatra amin’ny tany izao ireo misionera mba hizara amin’ny hafa ilay “finoana masina indrindra”.
[Efajoro, pejy 26]
Antontan’isa Momba Ilay Kilasy
Isan’ny tany nisy solontena: 7
Isan’ny tany nanendrena: 18
Isan’ny mpianatra: 46
Isan’ny mpivady: 23
Antsalan’ny taona: 30,06
Antsalan’ny taona naha-tao amin’ny fahamarinana: 12,92
Antsalan’ny taona naha-tao amin’ny fanompoana manontolo andro: 9,4
[Sary, pejy 26]
Ny Kilasy Faha-95 Nahazo Diplaoma avy tao Amin’ny Sekoly Ara-baibolin’i Gileada An’ny Watchtower
Eo amin’ny lisitra eto ambany, ireo laharana dia tononina avy eo aloha mankany aoriana, ary avy eo ankavia miankavanana isaky ny laharana.
1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. 2) Boker, J.; Thomas, M.; Stedman, S.; Billingsby, D.; Waugh, I.; Purve, M.; Luttrell, M. 3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. 4) Numminen, P.; Numminen, H.; Buelow, M.; Olson, W.; Holt, S.; Donzé, G..; DesJardins, C.; DesJardins, D. 5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. 6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.