Vavolombelon’i Jehovah Manerana Izao Tontolo Izao — Ny Repoblikan’i Philippines

IREO nosy tropikaly mideza sy be fiakarana 7 083 izay mahaforona ny Repoblikan’i Philippines dia ny tapany ambony amin’ny tendrombohitra mitomandavana iray misy tapany any ambany rano.a Ary saika izay foto-dresaka rehetra dia tian’ireo mponina 62 000 000 ao Philippines horesahina. Io toe-tsaina tsy mihafahafa amin’olona io dia mahatonga saha lonaka iray ho an’ny fanambarana an’ilay Fanjakana.

Fanambarana any an-tsekoly

Tany amin’ny nosy Masbate, dia afaka nanao fanambarana tamin’ny mpampianatra sy ny iray kilasy taminy ny tanora iray tao amin’ny lise nandritra ny fitsapam-pahaizana an-tsoratra fohy iray nanomezana valiny ‘marina’ na ‘diso’. Nanao tatitra toy izao izy:

“Izao ilay filazana: ‘Raha tia ahy Andriamanitra, dia tsy hanome ahy zava-manahirana izy na hamela ahy hijaly’. Rehefa nitsara ny taratasim-pitsapam-pahaizana ilay mpampianatra, dia hitany fa namaly hoe ‘marina’ ny rehetra afa-tsy ny tenako ihany. Namela ahy hanazava ny antony namaliako hoe ‘diso’ ilay mpampianatra. Nilaza aho fa tsy Andriamanitra akory no manome antsika zava-manahirana, na dia mamela ny hisian’ny fahoriana sy mamela antsika hosedraina aza izy. Tamin’ny fampiasana ny Baiboliko izay entiko foana any an-tsekoly, dia nanjohy hevitra tamin’ny iray kilasy aho mikasika ireo teny ao amin’ny 1 Jaona 4:8 hoe ‘Andriamanitra dia fitiavana.’ Taorian’ny fanazavako, dia niaiky ilay mpampianatra anay ka nandona kely ny latabany izy no sady niteny hoe: ‘Marina ny an’i Marilou.’ Izaho irery no nanome ny valiny marina tamin’io fanontaniana io ka nahazo ny naoty ambony indrindra.”

Any amin’ny toerana rehetra ny hafatr’ilay Fanjakana

Teo am-panaovana ny fanompoana isan-trano tany amin’ny faritra hafa iray any Philippines ny mpisava lalana maharitra iray (mpitory ny vaovao tsara manontolo andro) dia nifanena tamin’ny renim-pianakaviana iray nanan-janaka kely telo. Naneho fahalianana lalina tamin’ny hafatr’ilay Fanjakana ilay vehivavy, ka izany dia nanamora ny fanombohana fampianarana ny Baiboly taminy. Nitohy ilay fianarana na dia tsy faly aza ny vadiny tamin’ny nahazoany fampianarana ny Baiboly, indrindra fa avy tamin’ny Vavolombelon’i Jehovah.

Nifindra tany an-tanàn-dehibe hafa ilay rangahy sy ny fianakaviany, tamin’ny fiheverana fa izany dia hamarana ny fiarahan’ny vadiny tamin’ny Vavolombelona. Tsy ela anefa dia hitan’izy ireo ny toerana nisy an’io vehivavy io, ary dia nanohy ny fianarany ny Baiboly izy io. Mazava ho azy fa sosotra be ilay vadiny. Nentin’io tany am-piasana ny fahatezerany, ka tany dia nampariny tamin’ny olona iray nampanamboatra ny fiarany tao aminy ny fihetseham-pony. Tsy fantatr’ilay rangahy fa Vavolombelon’i Jehovah io olona nampanamboatra fiara tao aminy io.

Nanazava ilay Vavolombelona fa tena hahasoa ny fianakaviana iray manontolo tokoa raha manohy ny fianarany ny Baiboly ny vadin’ilay rangahy. Ho afaka hanomboka hampihatra ireo fotopoto-pitsipika marina ao amin’ny Baiboly ao an-trano mihitsy izy. Nanaovana tsipy hevitra koa ny amin’ny hoe ny tenan’ilay rangahy mihitsy dia afaka mandray soa avy amin’ny fianarana ny amin’ny Fanjakan’Andriamanitra.

Inona no vokatr’io dinidinika io? Nanana fahafahana bebe kokoa hianarana ny Baiboly ny vadin’ilay rangahy izay nanapa-kevitra ny hampiverina ny fianakaviany tany amin’ilay tranony teo aloha. Tany ilay vehivavy dia nandroso ara-panahy, hany ka tonga mpitory ilay Fanjakana tsy vita batisa. Nanaiky fampianarana ny Baiboly koa ny vadiny, ary nanomboka nanatrika ireo fivoriana kristiana ny fianakaviana iray manontolo.

[Fanamarihana ambany pejy]

[Efajoro, pejy 8]

ANTONTAN’ISAN’Ilay Tany

Taom-piasana 1993

TAMPON’ISAN’NY MPITORY: 116 576

AMIN’NY ARA-KEVINY: Vavolombelona 1 ho an’ny olona 549

MPANATRIKA NY FAHATSIAROVANA: 357 388

ANTSALAN’NY MPITORY MPISAVA LALANA: 22 705

ANTSALAN’NY FAMPIANARANA NY BAIBOLY: 94 370

ISAN’NY NATAO BATISA: 7 559

ISAN’NY KONGREGASIONA: 3 332

BIRAON’NY SAMPANA: MANILLE

[Sary, pejy 9]

Mitondra vokany tsara dia tsara ny fanambarana eny an-tsena

[Sary, pejy 9]

Biraon’ny Fikambanana Watchtower ao Manille