Mitantara Ireo Mpitory Ilay Fanjakana
Mampiray Fianakaviana Iray ny Fahamarinana ao Amin’ny Baiboly
AMIN’IZAO andro izao, any amin’ny faritra maro amin’izao tontolo izao, dia saika anisan’ny zavatra taloha ny firaisam-pianakaviana. Ahariharin’ny Baiboly anefa ny fanalahidin’ny firaisam-pianakaviana. Diniho ireto tenin’i Jesosy ireto: “Na zovy na zovy no mandre izany teniko izany ka mankatò azy, dia hoharina amin’ny lehilahy manan-tsaina izy, izay nanorina ny tranony teo ambonin’ny vatolampy.” (Matio 7:24). Tonga tamin’ny firaisan-tsaina ny fianakaviana an’arivony maro eo amin’ny Vavolombelon’i Jehovah tamin’ny fampiharana ireo teny ireo sy tamin’ny fampiasana ny Baiboly ho fototra hanorenana fianakaviana tafaray akaiky. Misy hafa koa eo am-panatratrarana firaisan-tsaina toy izany, araka ny asehon’ny fitantarana manaraka.
Raha nanompo tao amin’ny tafika tany Frantsa i Daniel, dia nanipy hevitra taminy mba hividy Baiboly ny pretra iray tao amin’ny tafika. Nataony izany ary dia nanomboka namaky Baiboly tsy tapaka izy. Tatỳ aoriana dia nafindra toerana tany Tahiti izy. Ny miaramila sasany naman’i Daniel dia Advantista ary ny hafa Mormons. Mazàna no niompana tamin’ny fivavahana ny resaka nifanaovan’izy ireo. Indray andro, dia nampifankahalalain’ny serizà-sefo iray tamin’ny vadiny izay Vavolombelon’i Jehovah i Daniel. Nandany tolakandro iray manontolo mba hamaliana ireo fanontanian’i Daniel maro be ilay vehivavy ary nampifandray azy tamin’ny iray tamin’ireo kongregasionan’ny Vavolombelon’i Jehovah teo an-toerana any Tahiti. Tsy ela dia nanomboka fianarana ny Baiboly tsy tapaka izy.
Katolika tena tso-po ireo ray aman-drenin’i Daniel monina any Frantsa. Mpanolo-tsain-tsekoly ny rainy ary tompon’andraikitra tamin’ny fampianarana ara-pinoana tao amin’ny sekolim-piangonana katolika iray. Nirin’i Daniel ny hizara tamin’ny ray aman-dreniny ny sasany tamin’ireo vatosoa ara-panahy nianarany, koa nanomboka nampiditra niandalana hevitra ara-baiboly vitsivitsy tao amin’ireo taratasiny ho azy ireo àry izy.
Tamin’ny voalohany dia faly ny renin’i Daniel, kanefa taitra mafy izy avy eo, raha nahita ilay anarana hoe Jehovah tao anatin’ny iray tamin’ireo taratasin-janany. Andro vitsivitsy tatỳ aoriana, dia reny ny fandaharana iray tao amin’ny radio nampiseho ny Vavolombelon’i Jehovah ho toy ny “antokom-pinoana mampidi-doza”. Nanoratra tany amin’i Daniel izy ary nangataka azy hanapaka avy hatrany ny fifandraisana rehetra tamin’ny Vavolombelona. Nanohy nandroso teo amin’ny fianarany ny Baiboly anefa i Daniel ary tsy ela dia nanao fandaharana izy mba hialana tamin’ny tafika sy hiverenana tany Frantsa.
Raha vao tonga tany aminy i Daniel, dia nandany ny takariva tsirairay — indraindray hatramin’ny alina be — nifanakalozan-kevitra ara-baiboly naharitra ela tamin-dreniny. Farany, dia nanaiky hiaraka tamin’i Daniel tany amin’ny Efitrano Fanjakana izy. Tamin’ny fanatrehany fivoriana voalohany, dia tohina aoka izany ny fony, hany ka nanomboka nanana ny fianarana Baiboly ho azy manokana izy. Nanao fandrosoana haingana izy ary tsy ela dia natao batisa.
Lehilahy mahay milefitra ny rain’i Daniel kanefa tena be zotom-po tamin’ny asany sy ireo raharaha ara-pivavahana nosahaniny. Na dia izany aza, indray mandeha izy dia nanatitra ny vadiny sy i Daniel tany amin’ny fivoriamben’ny distrika. Efatra ambin’ny folo Jolay tamin’izay, ary nihevitra ny hijery ny matso lehiben’ny Andron’ny La Bastille tao an-tanàna izy. Raha teo am-piandrasana izy dia nanapa-kevitra, natosiky ny fahalianana hahafanta-javatra, ny hijery ny tao anatin’ilay efitrano fanaovana fivoriambe. Tohina ny fony nahita ny filaminana sy fiadanana teo anivon’ny vahoakan’i Jehovah, ary rehefa nandeha namakivaky ireo sampan-draharaha maro samihafa tao amin’ny fivoriambe izy, dia niantso azy hatrany hoe “rahalahy” ny rehetra. Hadinony tanteraka ilay matso lehiben’ny Andron’ny La Bastille ary dia nijanona hatramin’ny faran’ilay fivoriambe izy. Nangataka fianarana Baiboly izy ary nanao fandrosoana haingana tamin’ny fianarana ny fahamarinana. Arakaraka ny nandrosoan’ny fianarany anefa no nahatsapany ho saikatra noho ny asany, ka dia nialany ny asany rehefa 58 taona izy. Amin’izao fotoana izao, izy telo mianaka ao anatin’ny fianakaviana dia samy vita fanoloran-tena sy batisa ary miara-manompo an’i Jehovah amim-piraisan-tsaina.
Ny fahamarinana ao amin’ny Baiboly no nampiray ny fianakavian’i Daniel. Afaka mampiray fianakaviana hafa koa izy io raha mianatra sy mampihatra azy amin’ny fo rehetra izy ireo.