Vavolombelon’i Jehovah Manerana Izao Tontolo Izao — Porto Rico
EO ANELANELAN’NY Ranomasin’ny Caraïbes sy ny Oseana Atlantika no misy ny nosy mafana sady lonak’i Porto Rico. Tamin’ny 1493, dia nilaza i Christophe Colomb fa faritanin’i Espaina izy io ary nantsoiny hoe San Juan Bautista, ho fahatsiarovana an’i Jaona Mpanao Batisa. Ny tanàna lehibe indrindra tao aminy dia nantsoina hatramin’ny ela hoe Porto Rico, na “Seranan-tsambo Manankarena”. Tamin’ny farany, dia io anarana io no nanjary nampiasaina ho an’ilay nosy manontolo, kanefa kosa ilay tanàna dia nanjary nantsoina hoe San Juan.
Hita fa seranan-tsambo nanankarena i Porto Rico tamin’ny lafiny maro. Volamena be dia be no naondrana avy tao Porto Rico tamin’ireo taona voalohandohany nanapahan’i Espaina. Manondrana fary, kafe, akondro sy karazam-boasary any ivelany izao ilay nosy, na dia ireo indostria fanaovan-taozavatra sy ireo indostria miasa ho an’ny mpanjifa aza no mahaforona be dia be ny toe-kareny amin’izao fotoana izao. Kanefa, mbola hita fa seranan-tsambo iray manan-karena i Porto Rico amin’ny heviny lehibe lavitra kokoa.
Ny vaovao tsara momba ny Fanjakan’Andriamanitra dia nanomboka notorina teto Porto Rico tao anatin’ireo taona 1930. Amin’izao andro izao, dia misy mpitory ny vaovao tsara 25 000 mahery any. Tamin’ny 1993, ny mpiasa tao amin’io sampan’ny Fikambanana Watch Tower io dia nitombo avy eo amin’ny 23 ka tafakatra ho 100 mahery. Tena nilaina izany fitomboana izany mba hahafahan’ny sampana hiandraikitra ny fandikana ireo zavatra vita an-tsoratra momba ny Baiboly amin’ny fiteny espaniola, ka hisy ho azo raisin’ireo olona 350 000 000 miteny espaniola maneran-tany.
Saha vaovao iray
Manao tatitra toy izao koa ny biraon’ny sampana: “Nisy saha vaovao iray nisokatra eto Porto Rico satria nanao fiezahana izahay mba hitondra ny hafatra momba ilay Fanjakana any amin’ny marenina. Ny anabavy iray dia mitantara izao fanandraman-javatra manaraka izao: ‘Niasa teo amin’ireo marenina aho ary nitsidika vehivavy iray nanan-janaka kely roa. Rehefa fantany fa Vavolombelona aho, avy hatrany dia tsy nandray ahy izy satria ny vadiny, izay marenina koa, dia tsy tia ireo Vavolombelon’i Jehovah.
“ ‘Volana vitsivitsy tatỳ aoriana, dia nitsidika namana iray, izay niara-nianatra Baiboly tamin’ny Vavolombelona, io vehivavy io ihany. Nandray anjara tamin’ny fianarana izy ary nahafinaritra azy erỳ izany. Notsidihiko indray ilay vehivavy, ary naveriny indray fa tsy tian’ny vadiny ireo Vavolombelona. Kanefa izy ta hahazo ny hevitry ny Baiboly no sady tofoka tamin’ny fiangonany satria tsy nampianatra na inona na inona izy io. Nanomboka nianatra izahay, tamin’ny fampiasana taratasy mivalona iray. Indray andro, dia nilazany aho mba hiverina ny asabotsy, satria ho eo ny vadiny amin’izay. “Kanefa izy tsy tia anay, sa tsy izany?”, hoy aho. Namaly izy hoe: “Ta hahafantatra marina izay ampianarin’ny Vavolombelon’i Jehovah izy.”
“ ‘Ny ampitson’iny dia tonga nandondona tao am-baravarako izy mivady! Koa satria nanana fanontaniana maro ilay lehilahy, dia nasaiko tamin’ireo fivoriantsika ho an’ny marenina izy ireo. Tonga tao talohako ilay rangahy ary hatramin’izay izy dia mivory tsy tapaka. Mitory amin’ireo olona hafa marenina izy, nanatrika fivoriambe iray, sy miandrandra ny hatao batisa.’ ”
Mitohy toy izao ny tatitra ataon’ny sampana: “Tamin’ny fivoriamben’ny distrika nataonay tamin’itỳ taona itỳ, dia naseho tamin’ny fiteny baiko moana ny fandaharana manontolo, koa olona maro marenina no nanatrika niaraka tamin’ny fianakavian’izy ireo. Ny fotoana tena nampihetsi-po dia nandritra ny lahateny famaranana, rehefa nilaza ny asa notontosaina teo amin’ireo marenina ilay mpandahateny ka nanambara fa teo amin’ny 70 teo ho eo izy ireo no nanatrika teo. Nisy tehaka nirefodrefotra, nefa, araka ny nomarihin’ilay mpandahateny, dia tsy afaka nandre izany ireo marenina. Koa nangatahin’ilay mpandahateny ireo marenina hijery ny mpanatrika, ary naveriny ilay fanontaniana hoe: ‘Faly ve ianareo mahita ireo rahalahinareo marenina eto, miaraka aminareo?’, ary nangataka ny mpanatrika izy mba hitehaka, amin’ny fanofahofana ny tanana roa. Nahatalanjona ny nahita ireo rahalahy sy anabavy 11 000 nitehaka tamin’ny fanofahofana ny tanany. Safononoky ny hafaliana no sady nahatsapa ireo rahalahy sy anabavintsika marenina fa anisan’ny fianakaviamben’ny mpirahalahy izy ireo. Maro no latsa-dranomasom-pifaliana”.
Eo am-pandraisan’ireo Vavolombelon’i Jehovah anjara amin’ny asa fijinjana any Porto Rico, dia tsy isalasalana fa mbola hitohy ho seranan-tsambo manankarena izy io. Ireo ‘ondrin’Andriamanitra’ izay antsoiny hoe “ny zavatra faniry eo amin’ny firenena rehetra” dia tsy hitsahatra ny hiditra mba hofenoina voninahitra ny tranon’i Jehovah. — Jaona 10:16; Hagay 2:7, NW.
[Efajoro, pejy 9]
ANTONTAN’ISAN’ILAY TANY
Taom-piasana 1994
TAMPON’ISAN’NY MPITORY: 25 428
AMIN’NY ARA-KEVINY: Vavolombelona 1 ho an’ny olona 139
MPANATRIKA NY FAHATSIAROVANA: 60 252
ANTSALAN’NY MPITORY MPISAVA LALANA: 2 329
ANTSALAN’NY FAMPIANARANA NY BAIBOLY: 19 012
ISAN’NY NATAO BATISA: 919
ISAN’NY KONGREGASIONA: 312
BIRAON’NY SAMPANA: GUAYNABO