Ilay Lalana Ety Mankany Amin’ny Fahafahana
VITSY ny olona manan-tsaina maneho fisalasalana ny amin’ny hoe fehezin’ireo lalàna voajanahary izao rehetra izao. Ireny lalàna ireny dia mifehy ny zavatra rehetra manomboka amin’ireo ataoma bitika indrindra ka hatramin’ireo vahindanitra goavana misy kintana an’arivo tapitrisany maro. Raha tsy izany no izy, dia tsy ho nisy planina azo natao, ary tsy ho nisy fahazoana hevi-javatra; ny fiainana mihitsy dia tsy ho nisy. Noho ny fahatakarany ireo lalàna voajanahary, sy noho ny fiarahany miasa amin’izy ireo, ny olombelona dia afaka nanatontosa zavatra mahatalanjona, toy ny fandehanana teny amin’ny volana, sy ny fampitana sary miloko avy any amin’ny faritra na aiza na aiza etỳ an-tany, na avy eny ivelan’ny habakabaky ny tany mihitsy aza, mankeo amin’ny efijerin’ny televiziona ao an-tokantranontsika ao.
Kanefa ahoana ny amin’ireo lalàna ara-pitondran-tena? Andraisan-tsoa sy mahavokatra toy izany koa ve ny fifikirana amin’izy ireny? Maro no toa mihevitra fa tsy misy ny lalàna ara-pitondran-tena, ary mifidy filozofia na fivavahana iray milefitra loatra izay mety amin’ny faniriany manokana, izy ireo.
Misy anefa olona sasany izay mifidy lalana hafa, ilay ‘lalana ety izay mankany amin’ny fiainana’ araka ny voasoritra ao amin’ny Baiboly. Tsy tokony ho gaga isika raha toa ka safidin’olom-bitsy ihany izy io, satria nilaza toy izao momba ny lalana ety i Jesosy: “Vitsy ny mahita azy”. (Matio 7:14). Nahoana no vitsy ihany?
Satria ny lalana ety dia voafepetran’ireo lalàna sy fotopoto-pitsipik’Andriamanitra. Izy io dia tsy hanintona afa-tsy ny olona iray maniry amim-pahatsorana hampifanaraka ny fiainany amin’ireo fari-pitsipik’Andriamanitra ihany. Mifanohitra tanteraka amin’ilay lalana malalaka izay manome sarintsarim-pahafahana, kanefa raha ny marina dia manandevo, ilay lalana ety izay toa feno fameperana kosa, dia manafaka ny olona iray amin’ny lafiny lehibe rehetra. Ny faritra tsy azony ihoarana dia feran’ny “lalàna tanteraka, dia ny lalàn’ny fahafahana”. — Jakoba 1:25.
Ny fomba anafahan’ny lalana ety
Marina fa tsy mora foana akory ny mijanona eo amin’ilay lalana ety. Tsy tanteraka ny olombelona rehetra, ary manana fironana nolovana ho amin’ny fanaovan-dratsy. Koa mety hirona hivily lalana kely, ny olona iray. Na dia izany aza, dia mendrika ny fifehezana ny tena, na ny fanitsiana ilaina rehetra, ny soa entin’ny fifikirana amin’‘ny lalana ety’, satria ‘mampianatra antsika hahita soa’ Andriamanitra. — Isaia 48:17; Romana 3:23.
Indro misy ohatra iray manazava izany: Ny ray aman-dreny hendry dia manoritra amin’ny tsipiriany ireo karazan-tsakafo ho an’ny zanany. Izany indraindray dia midika ho fisehoana ho hentitra mandritra ireo fotoam-pisakafoana. Kanefa rehefa mihalehibe ny ankizy, dia hankasitrahany ny fifehezana feno fitiavana nampiharin’ireo ray aman-dreniny. Rehefa ho tonga olon-dehibe izy, dia ho efa nahazo ny fitiavana ny sakafo mahasalama. Ary ny habetsahan’ny karazan-tsakafo mahavelona misy, dia hisoroka izay mety ho fahatsapany ho voafepetra.
Eo amin’ny lafiny ara-panahy, Andriamanitra dia manao sahala amin’izany amin’ireo olona eo amin’ny lalana ety mankany amin’ny fiainana. Amboleny ao anatin’ireo mpandefitra, ireo faniriana mahasoa izay mitarika ho amin’ny fahasambarana sy ny tena fahafahana marina. Izany dia ataony amin’ny fanomezana ny Teniny, ny Baiboly. Fanampin’izany, dia asainy isika hangataka amim-bavaka ny fanahiny mba hanampy antsika, ary didiany isika hiaraka amin’ireo Kristiana toa antsika, izay afaka mampahery antsika hijanona eo amin’ny lalana ety. (Hebreo 10:24, 25). Eny, Andriamanitra dia fitiavana, ary io toetrany lehibe indrindra io, dia manamafy ny zava-kendreny sy ny fomba rehetra fanaovany zavatra. — 1 Jaona 4:8.
Rehefa manjaka ny fitiavana, ny fiadanana, ny hatsaram-po, ny fifehezan-tena, sy ny vokatry ny fanahin’Andriamanitra hafa, dia toa tsy feno fameperana ilay lalana ety. Araka ny lazain’ny Soratra Masina dia hoe: “tsy misy lalàna manohitra izany”. (Galatiana 5:22, 23, NW ). “Izay itoeran’ny Fanahin’[i Jehovah, NW ] no itoeran’ny fahafahana.” (2 Korintiana 3:17). Na dia ankehitriny aza, ireo Kristiana marina dia mahazo santionany amin’io fahafahana io. Afaka izy ireo amin’ny tahotra maro mampahory ny olona amin’izao andro izao, toy ny tahotra ny hoavy sy ny tahotra feno finoanoam-poana momba ny fahafatesana. Mampientam-po toy inona moa ny misaintsaina ny hoavy rehefa ‘ho henika ny fahalalana an’i Jehovah ny tany, tahaka ny anaronan’ny rano ny fanambanin’ny ranomasina’! (Isaia 11:9). Amin’izay, na dia ny tahotra ny heloka bevava aza dia tsy hisy intsony. Hanjavona mandrakizay ireo hidin-trano sy fefy vy. Hahatsiaro tena ho afaka sy voaro amin’ny loza ny rehetra — na andro na alina, ao an-trano sy any ivelan’ny trano. Izany ka tena ho fahafahana tokoa!
Mahazo antoka ny fanampian’Andriamanitra isika
Marina fa mitaky ezaka ny miaina mifanaraka amin’ireo fari-pitsipik’Andriamanitra, kanefa “tsy mavesatra ny didiny”, na dia ho an’ny olombelona tsy tanteraka aza. (1 Jaona 5:3). Arakaraka ny anaovantsika fanitsiana mba hijanonana eo amin’ny lalana ety sy ahatsapantsika ny soa entin’ny fandehanana eo aminy, dia mamboly tsy fitiavana mitombo an’ireo asa sy fisainana izay mampiavaka ireo olona eo amin’ilay lalana malalaka, isika. (Salamo 97:10). Ny fankatoavana ny lalàn’Andriamanitra dia manintona ilay toetra maha-isika antsika tsara kokoa ao amintsika rehetra ao. Tsy “alahelom-po” sy “fahoriam-panahy” izay mampiavaka olona maro akory no ampanantenain’Andriamanitra fa izao kosa: “Indro, ny mpanompoko hihoby noho ny faharavoam-po”. Eny, ny fo nampiofanin’i Jehovah dia faly sy afaka. — Isaia 65:14.
Maty i Jesosy mba hahatonga ny tena fahafahana hety ho azo ho antsika. Izao no lazain’ny Baiboly: “Toy izao no nitiavan’Andriamanitra izao tontolo izao: nomeny ny Zanani-lahy Tokana, mba tsy ho very izay rehetra mino Azy, fa hanana fiainana mandrakizay.” (Jaona 3:16). Ankehitriny, amin’ny maha-Mpanjakan’ny Fanjakan’Andriamanitra any an-danitra azy, i Jesosy dia manome ireo soa entin’io sorona io. Rehefa afaka fotoana fohy, aorian’“ny fahoriana lehibe”, rehefa hahatratra ny fiafarany ilay lalana malalaka sy ireo olona eo aminy, dia hanomboka amim-paharetana hitarika ny olombelona mpankato hizotra amin’ny tapany sisa amin’ilay lalana ety izy, ary izany dia hatrany amin’ny faran’izy io mihitsy, dia ny fahatanterahan’olombelona. (Apokalypsy 7:14-17; Matio 24:21, 29-31). Ela ny ela ka ho hitantsika ny fanatanterahana ilay fampanantenana lehibe manao hoe: “Izao zavatra ary rehetra izao aza dia hovotsorana amin’ny fahandevozana, dia ny fahalòvana, ho amin’ny fahafahana izay momba ny voninahitr’ireo zanak’Andriamanitra.” Tsy misy toa azy io fahafahana homen’Andriamanitra io. Na dia ny fahafatesana aza dia hesorina. — Romana 8:21; Apokalypsy 21:3, 4.
Amin’ny fahitana sy ny fahatakarana mazava hoe mankaiza ilay lalana ety, ny olona iray dia afaka tsara kokoa mifidy io lalana io ary manohy mandeha eo aminy. Ireo tanora indrindra no ampiana mba hahatsinjo ny lavitra ka tsy ho sosotra amin’izay heveriny ho fameperana aneren’ny fari-pitsipik’Andriamanitra azy ireo. Ianaran’izy ireo ny mahita azy ireny ho toy ny porofon’ny fitiavan’Andriamanitra sy ho toy ny fiarovana amin’ireo zava-dratsy eo amin’ilay lalana malalaka. (Hebreo 12:5, 6). Mazava ho azy, fa mila maharitra ny olona iray, amin’ny fitadidiana fa mitaky fotoana ny fampitomboana ireo toetra sy faniriana araka an’Andriamanitra, dia tahaka ny itakian’ny hazo fihinam-boa fotoana mba hamokarany voa tsara. Kanefa hamokatra ilay hazo raha kolokoloina sy tondrahana.
Noho izany, dia mianara ny Tenin’Andriamanitra, miaraha amin’ireo Kristiana hafa, ary “mivavaha, ka aza mitsahatra” mba hahazoana ny fanahy masina. (1 Tesaloniana 5:17). Mitokia amin’Andriamanitra mba hanampy anao “handamina ny làlanao”. (Ohabolana 3:5, 6). Kanefa azo ampiharina ve izany rehetra izany? Tena mandaitra ve izany? Eny, nandaitra izany tamin’i Tom ary koa tamin’i Mary, izay voatonona tao amin’ilay lahatsoratra teo aloha.
Nitsahatra tsy nandeha teo amin’ilay lalana malalaka izy ireo
Toy izao no nosoratan’i Tom: “Tany antenatenan’ireo taona 1970, izahay dia nifandray tamin’ny Vavolombelon’i Jehovah, rehefa nitsidika anay tany an-trano ny iray taminy. Nitarika ho amin’ny fianarana ny Baiboly ny dinidinika. Tsikelikely aho dia nanomboka nanadio ny fiainako. Natao batisa aho tamin’ny 1982, ary manompo ao amin’ny kongregasiona eto an-toerana ankehitriny. Ny zanakay lahy koa izao dia vita batisa. Misaotra ny vadiko aho noho ny nandeferany tamiko nandritra ireo taona rehetra talohan’ny nianarako ny fahamarinana. Ary ambonin’ny zavatra rehetra, dia misaotra an’i Jehovah sy ny Zanany, Kristy Jesosy, aho noho izay rehetra nomeny anay, sy noho ny fanantenana anananay ankehitriny momba ny hoavy.”
Ary ahoana ny amin’i Mary? Nihevitra izy fa tsy hamela azy na oviana na oviana Andriamanitra, kanefa naniry ny hianatra momba azy izy noho ireo zanany. Rehefa reny fa nampianatra Baiboly an’ilay mpiara-monina taminy ny Vavolombelon’i Jehovah, dia mba nangataka fanampiana koa izy. Kanefa nahatonga ny fandrosoana ho sarotra ireo fahazaran-dratsiny efa lalim-paka. Nandroso nihemotra ilay fianarana. Nampahery azy hatrany anefa ilay zanany vavy kely fito taona. “Aza mijanona, ry Neny a. Vitanao io!”, hoy izy. Tamin’izay dia niezaka mafy kokoa i Mary.
Rehefa niverina tao an-trano ny vadiny izay tsy vita soratra taminy, ary mpidoroka zava-mahadomelina koa izy io, dia nianatra koa. Tamin’ny farany, dia samy nandresy ireo fahazaran-dratsiny izy roa. Avy eo, rehefa nosoratany ara-dalàna ny fanambadiany, ka nanaiky hatao batisa izy ireo, dia nahita fahasambarana lehibe ary sambany vao mba nahatsapa ho toy ny tena fianakaviana iray. Nampalahelo fa matin’ny SIDA i Mary tamin’ny farany, kanefa izy dia maty nanana fo nifikitra tamin’ny fampanantenan’ny Baiboly momba ny fitsanganana amin’ny maty sy ny fiainana ao amin’ny tany tonga paradisa, voadio ho afaka amin’ny soritra rehetran’ilay lalana malalaka mahafaty.
Eny, azo atao ny miala amin’ilay lalana malalaka sady migodàna izay mankany amin’ny fandringanana. Hoy i Kristy Jesosy: “Izao no fiainana mandrakizay, dia ny mahafantatra Anao, Izay Andriamanitra tokana sady marina, sy Jesosy Kristy, Izay efa nirahinao.” (Jaona 17:3). Koa nahoana àry ianao no tsy manapa-kevitra ny handeha eo amin’ny lalana ety izay mankany amin’ny fiainana? Amin’ny fandraisana am-po sy amin’ny fampiharana izay ianaranao avy ao amin’ny Tenin’Andriamanitra, dia mety ho tsapanao manokana ilay fampanantenana manafana ny fo omen’ny Baiboly manao hoe: “Ho fantatrareo ny marina, ary ny marina hahafaka anareo tsy ho andevo.” — Jaona 8:32.