Ny Lehilahy Mitsiriritra

TSY manana afa-tsy fototeny iray ihany ho an’ny teny hoe “fialonana” sy “fahasarotam-piaro” ny fiteny hebreo. Rehefa manisy fitenenana ny amin’ny olombelona mpanota ilay teny hebreo dia azo adika hoe “fitsiriritana” na “fifandrafiana”. (Genesisy 26:14, NW; Mpitoriteny 4:4, NW ). Ny fiteny grika anefa dia manana teny mihoatra ny iray ho an’ny “fialonana” sy “fahasarotam-piaro”. Ilay teny hoe zeʹlos, toy ilay mifanitsy aminy amin’ny teny hebreo dia sady mety hanondro fahasarotam-piaro ara-drariny no mety hanondro fahasarotam-piaro ratsy. Ny teny grika hafa iray hoe phthoʹnos, dia manana heviny tsy manorina ranofotsiny. Ao amin’ny Fandikan-tenin’Izao Tontolo Izao Vaovao, izy io dia adika foana hoe “fitsiriritana”.

Ahoana no nampiasana ilay teny hoe phthoʹnos teo amin’ny fiteny grika fahiny? Milaza toy izao ny The Anchor Bible Dictionary: “Tsy sahala amin’ny lehilahy mpierina ny lehilahy tratran’ny phthonos, fa izy dia tsy voatery haniry ireo zava-tsoa izay mahasosotra azy ny fananan’ny hafa izany; tsy iriny fotsiny ny ananan’io olon-kafa io izany. Tsy mitovy amin’ny lehilahy tia fifaninanana izy amin’ny hoe ny zava-kendreny dia tsy ny handresy sahala amin’ny an’ilay lehilahy tia fifaninanana akory, fa mba hisakana ny hafa tsy handresy kosa.”

Ny lehilahy mitsiriritra matetika dia tsy mahatsapa fa ny fihetsiky ny tenany ihany no antony lehibe indrindra mahatonga ny zava-manahirana azy. “Ny iray amin’ireo fomba hafahafa ananan’ny phthonos,” hoy ny fanazavan’io rakibolana io ihany, “dia ny tsy fisian’ny fahatsapan-tena”. Raha angatahina mba hanamarina ny fitondran-tenany ny lehilahy phthoneros, dia hilaza amin’ny tenany sy amin’ny hafa foana izy fa ireo izay asiany dia mendrika izany, fa ny tsy maha-ara-drariny ny tarehin-javatra no manosika azy hanakiana. Raha anontaniana izy hoe ahoana no ahafahany miteny toy ny ataony momba ny namana iray, dia hilaza izy fa mikendry izay hahasoa indrindra an’ilay namany ny fanakianana ataony.”

I Matio sy i Marka mpanoratra Filazantsara dia nampiasa ilay teny grika hoe phthoʹnos mba hilazalazana ny antony manosika ireo izay tompon’andraikitra tamin’ny famonoana an’i Jesosy. (Matio 27:18, NW; Marka 15:10, NW ). Eny, natosiky ny fitsiriritana izy ireo. Io fihetseham-po manimba io ihany no nanjary nahatonga ireo mpivadi-pinoana ho mpankahala feno faharatsian-toetra an’ireo rahalahiny teo aloha. (1 Timoty 6:3-5). Tsy mahagaga raha sakanana tsy hiditra ao amin’ny Fanjakan’Andriamanitra ireo lehilahy mitsiriritra! Namoaka didy i Jehovah Andriamanitra fa “mendrika ho faty” izay rehetra mitoetra ho “feno fitsiriritana”. — Romana 1:29, 32, NW; Galatiana 5:21, NW.

[Sary, pejy 7]

Aza mamela ny fitsiriritana handrava ny fiainanao